Thursday, March 29, 2018

                     ਜਾਣਾ ਸਹਿਜ ਨਹੀਂ
    ਆਖਰ ਹਾਰ ਗਈ ਜ਼ਿੰਦਗੀ ਦੀ ਜੰਗ 
                      ਚਰਨਜੀਤ ਭੁੱਲਰ
ਬਠਿੰਡਾ : ਆਖ਼ਰ ਜ਼ਿੰਦਗੀ ਦੇ ਰੰਗਮੰਚ ਤੋੋਂ ਸੁਹਜਦੀਪ ਅੌੌਲਖ ਵਿਦਾ ਹੋੋ ਗਈ। ਵਿਸ਼ਵ ਰੰਗਮੰਚ ਦਿਵਸ ਮੌੌਕੇ ਸੁਹਜਦੀਪ ਦਾ ਚਲੇ ਜਾਣਾ ਸਹਿਜ ਨਹੀਂ। ਸਭ ਬੰਨੇ ਚੰਗੇ ਰੰਗ ਭਾਗ ਸਨ, ਉਸ ਦੀ ਏਦਾਂ ਦੀ ਰੁਖ਼ਸਤ ਪਿੱਛੇ ਅਣਬੁੱਝ ਰਹੱਸ ਛੱਡ ਗਈ ਹੈ। ਪ੍ਰੋੋ. ਅਜਮੇਰ ਅੌੌਲਖ ਦੇ ਵਿਛੋੜੇ ਦਾ ਵੱਡਾ ਫੱਟ ਭਰਿਆ ਨਹੀਂ ਸੀ ਕਿ ਉਨ੍ਹਾਂ ਦੀ ਲਾਡਲੀ ਧੀ ਸੁਹਜਦੀਪ ਸੱਜਰਾ ਜ਼ਖ਼ਮ ਦੇ ਗਈ। ਜਦੋੋਂ ਉਸ ਦੀ ਸੁਰਤ ਸੰਭਲੀ ਸੀ ਤਾਂ ਉਦੋਂ ਹੀ ਥੀਏਟਰ ਨੇ ਉਸ ਨੂੰ ਗੋਦ ਲੈ ਲਿਆ ਸੀ। ਲੰਘੇ ਵਰ੍ਹੇ ਜਦੋਂ ਪ੍ਰੋ. ਅੌੌਲਖ ਦੀ ਅਰਥੀ ਉਠੀ ਤਾਂ ਮੋਢਾ ਸੁਹਜਦੀਪ ਨੇ ਦਿੱਤਾ ਸੀ। ਏਨਾ ਹੌੌਸਲਾ ਕਿ ਬਾਪ ਦੇ ਭੋੋਗ ’ਤੇ ਹਲੂਣਾ ਦੇਣ ਵਾਲੀ ਕੋਰੀਓਗਰਾਫੀ ਦੀ ਸੂਰਤਧਾਰ ਬਣੀ।ਜ਼ਿਕਰਯੋਗ ਹੈ ਕਿ ਲੋਕ-ਗਾਇਕ ਗੁਰਬਿੰਦਰ ਬਰਾੜ ਦੀ ਪਤਨੀ ਸੁਹਜਦੀਪ ਨੇ ਬੀਤੇ ਕੱਲ੍ਹ ਖ਼ੁਦ ਆਪਣੀ ਜ਼ਿੰਦਗੀ ਦੀ ਲੀਲਾ ਖ਼ਤਮ ਕਰ ਲਈ ਸੀ। ਵੱਡਾ ਰਹੱਸ ਇਹੋੋ ਹੈ ਕਿ ਹਨੇ੍ਹਰੇ ’ਚ ਗੁਆਚੇ ਲੋਕਾਂ ਨੂੰ ਰੌਸ਼ਨੀ ਵੰਡਣ ਵਾਲੇ ਅੌਲਖ ਪਰਿਵਾਰ ਦੀ ਧੀ ਨੇ ਏਡਾ ਕਦਮ ਕਿਉਂ ਚੁੱਕ ਲਿਆ। ਨਾ ਕੋਈ ਮਾਨਸਿਕ ਸਮੱਸਿਆ ਸੀ ਤੇ ਨਾ ਹੀ ਕੋਈ ਪਰਿਵਾਰਕ।
                  ‘‘ਅਵੇਸਲੇ ਯੁੱਧਾਂ ਦੀ ਨਾਇਕਾ’’ ਆਖ਼ਰ ਜੰਗ ਹਾਰ ਗਈ, ਜਿਸ ਨੇ ਪੂਰੀ ਜ਼ਿੰਦਗੀ ਰੰਗਮੰਚ ਦੀ ਝੋੋਲੀ ਪਾਈ, ਅੱਜ ਉਹ ਅਣਦੱਸੇ ਸੁਆਲ ਖੜ੍ਹੇ ਕਰ ਕੇ ਤੁਰ ਗਈ। ਉਹ ਆਪਣੇ ਪਿੱਛੇ ਇੱਕ ਪੁੱਤਰ ਨਜ਼ਰਨਿਵਾਜ਼,ਬੇਟੀ ਰੂਹਜ਼ੀਨਤ ਕੌੌਰ ਤੇ ਪਤੀ ਗੁਰਬਿੰਦਰ ਬਰਾੜ ਨੂੰ ਛੱਡ ਗਈ ਹੈ। ਜ਼ਿੰਦਗੀ ਨੂੰ ਟੀਸੀ ’ਤੇ ਖਲੋੋਅ ਕੇ ਦੇਖਣ ਵਾਲੀ ਆਖ਼ਰ ਅਲਵਿਦਾ ਆਖ ਗਈ। ਥੋੋੜ੍ਹਾ ਸਮਾਂ ਪਹਿਲਾਂ ਹੀ ਉਹ ਸ਼ਾਹਰੁਖ ਖ਼ਾਨ ਦੀ ਫਿਲਮ ਦੀ ਸ਼ੂਟਿੰਗ ਤੋੋਂ ਵਾਪਸ ਆਈ ਸੀ। ਸੋੋਸ਼ਲ ਮੀਡੀਆ ’ਤੇ ਆਪਣੇ ਪਤੀ ਗੁਰਬਿੰਦਰ ਬਰਾੜ ਦੇ ਹਰ ਨਵੇਂ ਗਾਣੇ ਦੀ ਵਕੀਲ ਬਣਦੀ ਰਹੀ ਹੈ। ਹਾਲੇ ਚਾਰ ਮਾਰਚ ਨੂੰ ਹੀ ਉਸ ਨੇ ਫੇਸਬੁੱਕ ’ਤੇ ਢਹਿਦੀ ਕਲਾਂ ਵਾਲਿਆਂ ਨੂੰ ਜ਼ਿੰਦਗੀ ਦੇ ਰੰਗ ਦੇਖਣ ਦੀ ਨਸੀਹਤ ਦਿੱਤੀ ਸੀ। ਆਰਟਿਸਟ ਗੁਰਪ੍ਰੀਤ ਦੱਸਦਾ ਹੈ ਕਿ ਜ਼ਿੰਦਗੀ ਦੀ ਆਖ਼ਰੀ ਸ਼ਾਮ ਤੋਂ ਪਹਿਲਾਂ ਹੀ ਉਸ ਨੇ ਮਰਹੂਮ ਨਾਟਕਕਾਰ ਟੋੋਨੀ ਬਾਤਿਸ਼ ਦੇ ਸਮਾਗਮਾਂ ਵਿੱਚ ਸਭਨਾਂ ਨੂੰ ਪੁੱਜਣ ਦੀ ਅਪੀਲ ਕੀਤੀ ਸੀ। ਥੋੋੜੇ੍ਹ ਦਿਨਾਂ ਮਗਰੋੋਂ ਉਸ ਦੀ ਇੱਕ ਪੰਜਾਬੀ ਫਿਲਮ ਵੀ ਰਿਲੀਜ਼ ਹੋੋਣ ਵਾਲੀ ਹੈ।
                    ਮਾਂ ਮਨਜੀਤ ਅੌੌਲਖ ਦੀ ਅੱਖ ਵਿੱਚੋਂ ਅੱਜ ਦਿਲ ਦੇ ਹੰਝੂ ਟਪਕ ਰਹੇ ਹਨ ਅਤੇ ਮਾਂ ਨੇ ਸਿਰਫ਼ ਇਹੋੋ ਆਖਿਆ ਕਿ ਪਹਿਲੋੋਂ ਰੰਗਮੰਚ ਦਾ ਬਾਪ ਚਲਾ ਗਿਆ ਤੇ ਹੁਣ ਧੀ। ਵੱਡੀ ਭੈਣ ਸੁਪਨਦੀਪ ਨੇ ਏਨਾ ਕੁ ਦੱਸਿਆ ਕਿ ਸੁਹਜਦੀਪ ਮੌੌਜੂਦਾ ਦੌੌਰ ਦੇ ਸਿਨੇਮੇ ਵਿੱਚ ਕੰਮ ਦੀ ਕਦਰ ਨਾ ਪੈਣ ਦੀ ਗੱਲ ਕਦੇ-ਕਦਾਈਂ ਕਰਦੀ ਹੁੰਦੀ ਸੀ। ਇੱਕ ਪੱਖ ਇਹ ਉਭਰ ਰਿਹਾ ਹੈ ਕਿ ਬਾਪ ਅੌੌਲਖ ਦਾ ਗ਼ਮ ਉਹ ਦਿਲ ਦੇ ਕੋੋਨੇ ਵਿਚ ਸਮੋੋਈ ਬੈਠੀ ਸੀ। ‘ਪਲਸ ਮੰਚ’ ਦੇ ਅਮੋੋਲਕ ਸਿੰਘ ਨੇ ਦੱਸਿਆ ਕਿ ਜਦੋਂ ਵੀ ਉਹ ਆਪਣੇ ਬਾਪ ਦੇ ਘਰ ਮਾਨਸਾ ਜਾਂਦੀ ਸੀ ਤਾਂ ਕਿੰਨਾ ਕਿੰਨਾ ਸਮਾਂ ਬਾਪ ਦੀ ਤਸਵੀਰ ਸਾਹਮਣੇ ਬੈਠੀ ਰਹਿੰਦੀ ਸੀ। ਅਜਮੇਰ ਅੌੌਲਖ ਦੀ ਪਹਿਲੀ ਬਰਸੀ 15 ਜੂਨ ਨੂੰ ਮਨਾਈ ਜਾ ਰਹੀ ਹੈ। ਪਹਿਲੀ ਬਰਸੀ ਤੋਂ ਪਹਿਲਾ ਹੀ ਧੀ ਦਾ ਭੋੋਗ ਸਮਾਗਮ ਆ ਜਾਏਗਾ, ਕਿਸੇ ਨੂੰ ਚਿੱਤ ਚੇਤੇ ਨਹੀਂ ਸੀ! ਜੋੋ ਪਤਾ ਲੱਗਾ ਹੈ, ਉਸ ਅਨੁਸਾਰ ਦਿਨ ਵਕਤ ਸੁਹਜਦੀਪ ਨੇ ਦੁਪਹਿਰ ਵਕਤ ਗਲੀ ਵਿੱਚੋਂ ਸਬਜ਼ੀ ਖ਼ਰੀਦ ਕੀਤੀ ਅਤੇ ਉਸ ਮਗਰੋੋਂ ਘਰੋਂ ਬੈਂਕ ਦੇ ਕੰਮ ਚਲੀ ਗਈ। ਘਰ ਵਾਪਸ ਤਿੰਨ ਵਜੇ ਪਰਤੀ ਤੇ ਆਪਣੇ ਕਮਰੇ ਵਿਚ ਚਲੀ ਗਈ।
                    ਹਾਲੇ 25 ਮਾਰਚ ਨੂੰ ਹੀ ਉਹ ਆਪਣੀ ਧੀ ਨੂੰ ਪੇਪਰਾਂ ਦੀ ਤਿਆਰੀ ਲਈ ਮਾਨਸਾ ਛੱਡ ਕੇ ਆਈ ਸੀ। ਬੀਤੇ ਕੱਲ੍ਹ ਜਦੋੋਂ ਬੇਟਾ ਘਰ ਪਰਤਿਆ ਤਾਂ ਉਦੋੋਂ ਘਟਨਾ ਦਾ ਪਤਾ ਲੱਗਿਆ। ਅੱਜ ਪਹਿਲਾਂ ਸਿਵਲ ਹਸਪਤਾਲ ਵਿੱਚ ਪੋੋਸਟਮਾਰਟਮ ਹੋੋਇਆ। ਦੁਪਹਿਰ ਮਗਰੋੋਂ ਹਜ਼ਾਰਾਂ ਲੋੋਕਾਂ ਦੀ ਹਾਜ਼ਰੀ ਵਿਚ ਅੰਤਿਮ ਵਿਦਾਇਗੀ ਹੋੋਈ। ਲੋੋਕ ਗਾਇਕ ਗੁਰਬਿੰਦਰ ਬਰਾੜ ਦੇ ਨੇੜਲੇ ਦੋੋਸਤ ਅਤੇ ਅੌੌਲਖ ਪਰਿਵਾਰ ਨਾਲ ਜੁੜੇ ਵੱਡੀ ਗਿਣਤੀ ਰੰਗਕਰਮੀ ਤੇ ਜਨਤਕ ਧਿਰਾਂ ਦੇ ਆਗੂ ਤੇ ਵਰਕਰ ਸਸਕਾਰ ਮੌੌਕੇ ਹਾਜ਼ਰ ਸਨ ਜਿਨ੍ਹਾਂ ਵਿੱਚ ਬਾਬਾ ਫਰੀਦ ਗਰੁੱਪ ਦੇ ਐਮ.ਡੀ. ਗੁਰਮੀਤ ਸਿੰਘ ਧਾਲੀਵਾਲ, ਡਿਪਟੀ ਡਾਇਰੈਕਟਰ ਜਗਜੀਤ ਚਹਿਲ, ਮਨਜੀਤ ਚਹਿਲ, ਫਿਲਮੀ ਅਦਾਕਾਰ ਦਰਸ਼ਨ ਅੌੌਲਖ, ਪ੍ਰੋ. ਲੱਖਾ ਲਹਿਰੀ, ਅਮਰਦੀਪ ਗਿੱਲ, ‘ਪਲਸ ਮੰਚ’ ਦੇ ਅਮੋੋਲਕ ਸਿੰਘ ਤੇ ਕਹਾਣੀਕਾਰ ਅਤਰਜੀਤ, ਪ੍ਰੋ. ਜਗਤਾਰ ਜੋੋਗਾ, ਗੀਤਕਾਰ ਮਨਪ੍ਰੀਤ ਟਿਵਾਣਾ, ਜਮਹੂਰੀ ਅਧਿਕਾਰ ਸਭਾ ਦੇ ਪ੍ਰਧਾਨ ਬੱਗਾ ਸਿੰਘ ਤੇ ਡਾ. ਅਜੀਤਪਾਲ ਸਿੰਘ,ਪ੍ਰਿੰਸੀਪਲ ਡਾ.ਰਵਿੰਦਰ ਮਾਨ, ਖੇਤ ਮਜ਼ਦੂਰ ਯੂਨੀਅਨ ਦੇ ਪ੍ਰਧਾਨ  ਜੋੋਰਾ ਨਸਰਾਲੀ, ਹਰਿੰਦਰ ਬਿੰਦੂ, ਖ਼ਜ਼ਾਨਾ ਮੰਤਰੀ ਦੇ ਮੀਡੀਆ ਇੰਚਾਰਜ ਹਰਜੋੋਤ ਸਿੰਘ,ਲੋੋਕ-ਗਾਇਕ ਗੋੋਰਾ ਚੱਕ ਵਾਲਾ,ਗਾਇਕ ਸੁਖਪਾਲ ਪਾਲੀ,ਭਿੰਦਰ ਡਬਵਾਲੀ,ਸਾਹਿਤ ਸਭਾ ਆਗੂ ਸੁਰਿੰਦਰਪ੍ਰੀਤ ਘਣੀਆ ਤੇ ਜਸਪਾਲ ਮਾਣਖੇੜਾ ਆਦਿ ਹਾਜ਼ਰ ਸਨ।         

Wednesday, March 28, 2018

                     ਸਿਆਸੀ ਨਿਸ਼ਾਨਾ
 ਮੋਦੀ ਦੀ ‘ਛੁੱਕ ਛੁੱਕ’ ਦਾ ਕੈਪਟਨ ਤੇ ਛਿੱਕਾ
                       ਚਰਨਜੀਤ ਭੁੱਲਰ
ਬਠਿੰਡਾ : ਬਠਿੰਡਾ ਰਿਫ਼ਾਈਨਰੀ ’ਚ ਅਖੀਰ ਅੱਜ ਬਜਰੀ ਨਾਲ ਲੱਦੀ ਮਾਲ ਗੱਡੀ ਪੁੱਜ ਗਈ ਹੈ ਜਿਸ ਦੀ ਛੁੱਕ ਛੁੱਕ ਨੇ ਇੱਕ ਸਿਆਸੀ ਸੁਨੇਹਾ ਕੈਪਟਨ ਹਕੂਮਤ ਨੂੰ ਦਿੱਤਾ ਹੈ। ਪੰਜਾਬ ’ਚ ਇਹ ਪਹਿਲਾ ਮੌਕਾ ਹੈ ਕਿ ਰੇਤਾ ਬਜਰੀ ਲਈ ‘ਰੇਲ ਰੂਟ’ ਦੀ ਵਰਤੋਂ ਹੋਈ ਹੈ। ਦਮ ਘੁੱਟਣ ਵਾਲਾ ਮਾਹੌਲ ਉਦੋਂ ਬਣਿਆ ਸੀ ਜਦੋਂ ‘ਗੁੰਡਾ ਟੈਕਸ’ ਦੀ ਚੜ੍ਹ ਮੱਚੀ ਸੀ। ਕੇਂਦਰ ਦੀ ਐਨਡੀਏ ਸਰਕਾਰ ਨੂੰ ਕੈਪਟਨ ਰਾਜ ਦੀ ਬਦਨਾਮੀ ਦਾ ਇੱਕ ਚੰਗਾ ਮੌਕਾ ਹੱਥ ਲੱਗਿਆ। ਵਿਰੋਧੀ ਧਿਰਾਂ ਨੇ ‘ਗੁੰਡਾ ਟੈਕਸ’ ਨੂੰ ਹੱਥੋਂ ਹੱਥ ਮੁੱਦਾ ਬਣਾ ਲਿਆ। ਇੱਧਰ ਰਿਫ਼ਾਈਨਰੀ ਪ੍ਰਬੰਧਕਾਂ ਨੇ ਕੇਂਦਰੀ ਰਮਜ਼ ਸਮਝਦੇ ਹੋਏ ਰੇਤਾ ਬਜਰੀ ਰੇਲ ਰਸਤੇ ਮੰਗਵਾਉਣ ਦਾ ਫ਼ੈਸਲਾ ਕਰ ਲਿਆ। ਗੇਂਦ ਹੱਥੋਂ ਨਿਕਲਣ ਤੋਂ ਪਹਿਲਾਂ ਹੀ ਕੈਪਟਨ ਸਰਕਾਰ ਨੇ ਮੌਕਾ ਸੰਭਾਲ ਲਿਆ। ਉਦੋਂ ਹੀ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਬਠਿੰਡਾ ਦੇ ਪੁਲੀਸ ਤੇ ਸਿਵਲ ਅਫ਼ਸਰਾਂ ਨੂੰ ਤਾੜ ਦਿੱਤਾ।  ਪੰਜਾਬੀ ਟ੍ਰਿਬਿਊਨ ਤਰਫ਼ੋਂ ਫਰਵਰੀ ਦੇ ਸ਼ੁਰੂ ’ਚ ‘ਗੁੰਡਾ ਟੈਕਸ’ ਨੂੰ ਪ੍ਰਮੱੁਖਤਾ ਨਾਲ ਉਭਾਰਨਾ ਸ਼ੁਰੂ ਕੀਤਾ ਅਤੇ ਸਭ ਤੋਂ ਪਹਿਲਾਂ ਰਿਫ਼ਾਈਨਰੀ ਵੱਲੋਂ ਰੇਲ ਰਸਤੇ ਰੇਤਾ ਬਜਰੀ ਮੰਗਵਾਏ ਜਾਣ ਦੀ ਖ਼ਬਰ ਨੂੰ 21 ਫਰਵਰੀ ਨੂੰ ਪ੍ਰਕਾਸ਼ਿਤ ਕੀਤਾ।
                    ਪੰਜਾਬੀ ਟ੍ਰਿਬਿਊਨ ਦੀ ਖ਼ਬਰ ਆਖ਼ਰ ਅੱਜ ਸੱਚ ਹੋ ਗਈ ਜਦੋਂ ਕਿ ਕਰੀਬ 10 ਵਜੇ ਮਾਲ ਗੱਡੀ ਰਿਫ਼ਾਈਨਰੀ ਦੇ ਅੰਦਰ ਪੁੱਜ ਗਈ। ਸੂਤਰ ਦੱਸਦੇ ਹਨ ਕਿ ਬਜਰੀ ਦਾ ਪੂਰਾ ਰੈਕ (ਕਰੀਬ 50 ਡੱਬੇ) ਰਿਫ਼ਾਈਨਰੀ ’ਚ ਆਇਆ ਹੈ ਜਿਸ ਨੂੰ ਅਣਲੋਡ ਕਰਨ ਦਾ ਕੰਮ ਦੇਰ ਸ਼ਾਮ ਤੱਕ ਚੱਲਿਆ। ਰਿਫ਼ਾਈਨਰੀ ਪ੍ਰਬੰਧਕਾਂ ਨੇ 7 ਮਾਰਚ ਤੱਕ ਅਣਲੋਡ ਕਰਨ ਦੀਆਂ ਕੁਟੇਸ਼ਨਾਂ ਲਈਆਂ ਸਨ। ਰਿਫ਼ਾਈਨਰੀ ’ਚ ਪੈਟਰੋ ਕੈਮੀਕਲ ਪ੍ਰੋਜੈਕਟ ਦੀ ਉਸਾਰੀ ਦਾ ਕੰਮ ਚੱਲ ਰਿਹਾ ਹੈ। ਪੈਟਰੋ ਕੈਮੀਕਲ ਪ੍ਰੋਜੈਕਟ ਦੀ ਧਰਾਤਲ ਲਈ ਬਜਰੀ ਦੀ ਵਰਤੋਂ ਹੋਣੀ ਹੈ। ਸੂਤਰ ਦੱਸਦੇ ਹਨ ਕਿ ਪੰਜਾਬ-ਹਿਮਾਚਲ ਪ੍ਰਦੇਸ਼ ਦੀ ਹੱਦ ਤੋਂ ਅਨੰਦਪੁਰ ਸਾਹਿਬ ਦੇ ‘ਕਰੈਸ਼ਰ ਜ਼ੋਨ’ ਤੋਂ ਰੇਲ ਰਸਤੇ ਬਜਰੀ ਮੰਗਵਾਈ ਗਈ ਹੈ। ਪਹਿਲਾਂ ਰਾਜਸਥਾਨ ਚੋਂ ਰੇਤਾ ਬਜਰੀ ਮੰਗਵਾਏ ਜਾਣ ਦੀ ਗੱਲ ਚੱਲੀ ਸੀ। ਸੂਤਰ ਦੱਸਦੇ ਹਨ ਕਿ ਕੱੁਝ ਤਕਨੀਕੀ ਦਿੱਕਤਾਂ ਰਾਹ ਵਿਚ ਰੋੜਾ ਬਣ ਗਈਆਂ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਉਦੋਂ ‘ਗੁੰਡਾ ਟੈਕਸ’ ਨੂੰ ਤਕੜੇ ਹੱਥੀਂ ਲਿਆ ਜਦੋਂ ਸਿਆਸੀ ਤੌਰ ਤੇ ਜ਼ਮੀਨ ਖਿਸਕਦੀ ਨਜ਼ਰ ਆਈ। ਜ਼ਿਲ੍ਹਾ ਪੁਲੀਸ ਨੇ ਵੀ ਆਪਣਾ ਰੰਗ ਬਦਲ ਲਿਆ ਸੀ।
                   ਉਸ ਮਗਰੋਂ ਹੀ ਰਿਫ਼ਾਈਨਰੀ ਲਾਗਿਓਂ ‘ਗੁੰਡਾ ਟੈਕਸ’ ਗ਼ਾਇਬ ਹੋ ਗਿਆ ਅਤੇ ਹੁਣ ਕਿਧਰੇ ਵੀ ਅਜਿਹੀ ਕੋਈ ਗੱਲ ਨਜ਼ਰ ਨਹੀਂ ਆਈ ਹੈ ਜਿਸ ਨਾਲ ਉਸਾਰੀ ਠੇਕੇਦਾਰਾਂ ਨੇ ਵੀ ਸੁੱਖ ਦਾ ਸਾਹ ਲਿਆ ਹੈ। ਵੱਡਾ ਸੁਆਲ ਹੁਣ ਇਹ ਚਰਚਾ ਵਿਚ ਹੈ ਕਿ ਜਦੋਂ ‘ਗੁੰਡਾ ਟੈਕਸ’ ਖ਼ਤਮ ਹੋ ਗਿਆ ਤਾਂ ਰਿਫ਼ਾਈਨਰੀ ਨੂੰ ਰੇਲ ਰਸਤੇ ਬਜਰੀ ਮੰਗਵਾਏ ਜਾਣ ਦੀ ਲੋੜ ਕਿਉਂ ਪੈ ਗਈ। ਸਿਆਸੀ ਹਲਕੇ ਦੱਸਦੇ ਹਨ ਕਿ ਬਠਿੰਡਾ ਰਿਫ਼ਾਈਨਰੀ ਕੇਂਦਰ ਸਰਕਾਰ ਦਾ ਮਿੱਤਲ ਐਨਰਜੀ ਲਿਮਟਿਡ ਨਾਲ ਸਾਂਝਾ ਪ੍ਰੋਜੈਕਟ ਹੈ ਜਿਸ ਕਰਕੇ ਰਿਫ਼ਾਈਨਰੀ ਪ੍ਰਬੰਧਕ ਰਾਜ ਨਾਲੋਂ ਕੇਂਦਰ ਨੂੰ ਪ੍ਰਮੱੁਖਤਾ ਦਿੰਦੇ ਹਨ। ਭਾਵੇਂ ‘ਗੁੰਡਾ ਟੈਕਸ’ ਦਾ ਰਾਜ ਫ਼ਿਲਹਾਲ ਚਲਾ ਗਿਆ ਹੈ ਪੰ੍ਰਤੂ ਕੇਂਦਰ ‘ਰੇਤ ਬਜਰੀ’ ਰੇਲ ਰਸਤੇ ਮੰਗਵਾ ਕੇ ਕੈਪਟਨ ਹਕੂਮਤ ਤੇ ਇੱਕ ਹੋਰ ਨਿਸ਼ਾਨਾ ਲਾਉਣ ਤੋਂ ਖੁੰਝਣਾ ਨਹੀਂ ਚਾਹੁੰਦੀ ਸੀ। ਰੇਲ ਰਸਤੇ ਬਜਰੀ ਮੰਗਵਾ ਕੇ ਇਹ ਪ੍ਰਭਾਵ ਦਿੱਤਾ ਗਿਆ ਹੈ ਕਿ ਪੰਜਾਬ ’ਚ  ‘ਸਭ ਅੱਛਾ’ ਨਹੀਂ ਹੈ। ਹਾਲਾਂਕਿ ਨੇੜਿਓ ਕੱਚਾ ਮਾਲ ਰੇਲ ਰਸਤੇ ਮੰਗਵਾਉਣਾ ਮਹਿੰਗਾ ਸੌਦਾ ਹੈ। ਦੂਰ ਦੁਰਾਡੇ ਤੋਂ ਰੇਲ ਦੀ ਵਰਤੋਂ ਸਸਤੀ ਪੈਂਦੀ ਹੈ। ਰਿਫ਼ਾਈਨਰੀ ਪ੍ਰਬੰਧਕਾਂ ਨੇ ਸਭ ਘਾਟੇ ਝੱਲ ਕੇ ਇਹ ਨਵਾਂ ਸਿਆਸੀ ਸੁਨੇਹਾ ਦਿੱਤਾ ਹੈ ਜੋ ਰਿਫ਼ਾਈਨਰੀ ਲਈ ਲੰਮੇ ਸਮੇਂ ਵਾਸਤੇ ਫ਼ਾਇਦੇ ਵਾਲਾ ਹੋਵੇਗਾ।

 
   










Tuesday, March 27, 2018

                          ਡਾਕਟਰਾਂ ਦੀ ਲੁੱਟ
    ‘ਕਮਿਸ਼ਨ’ ਦੇ ਟੀਕੇ ਨੇ ਮਰੀਜ਼ ਤੜਫਾਏ
                          ਚਰਨਜੀਤ ਭੁੱਲਰ
ਬਠਿੰਡਾ : ਸਰਕਾਰੀ ਹਸਪਤਾਲਾਂ ਦੇ ਡਾਕਟਰਾਂ ਵੱਲੋਂ ਆਪਣੇ ਘਰ ਭਰਨ ਲਈ ਮਰੀਜ਼ਾਂ ਦੀ ਕੀਤੀ ਜਾ ਰਹੀ ਅੰਨ੍ਹੀ ਲੁੱਟ ਬੇਨਕਾਬ ਹੋਈ ਹੈ। ਖ਼ੁਦ ਪੰਜਾਬ ਸਰਕਾਰ ਦੇ ਖ਼ੁਫ਼ੀਆ ਵਿੰਗ ਨੇ ਇਹ ਨਕਾਬ ਉਤਾਰਿਆ ਹੈ ਜਿਸ ਤੋਂ ਮਰੀਜ਼ਾਂ ਨੂੰ ਲੁੱਟਣ ਲਈ ਡਾਕਟਰਾਂ ਤੇ ਡਰੱਗਜ਼ ਕੰਪਨੀਆਂ ਦਾ ਗੱਠਜੋੜ ਸਾਹਮਣੇ ਆਇਆ ਹੈ। ਭੋਲੇ ਭਾਲੇ ਮਰੀਜ਼ ਆਪਣੀ ਮਜਬੂਰੀ ’ਚ ਲੁਟਾ ਹੋ ਰਹੇ ਹਨ। ਸਿਹਤ ਵਿਭਾਗ ਤਰਫ਼ੋਂ ਨਾ ਕਦੇ ਕੋਈ ਐਕਸ਼ਨ ਲਿਆ ਗਿਆ ਹੈ ਅਤੇ ਨਾ ਹੀ ਇਸ ਪ੍ਰੈਕਟਿਸ ਨੂੰ ਰੋਕਿਆ ਗਿਆ ਹੈ। ਦਰਜਨਾਂ ਸਰਕਾਰੀ ਡਾਕਟਰਾਂ ਅਤੇ ਮੈਡੀਕਲ ਸਟੋਰਾਂ ਦੇ ਇਸ ਧੰਦੇ ਦਾ ਪਰਦਾਫਾਸ਼ ਹੋਇਆ ਹੈ। ਖ਼ੁਫ਼ੀਆ ਵਿਭਾਗ ਪੰਜਾਬ ਦੇ ਡਾਇਰੈਕਟਰ ਜਨਰਲ ਪੁਲੀਸ ਵੱਲੋਂ ਸਿਹਤ ਵਿਭਾਗ ਦੇ ਪ੍ਰਮੁੱਖ ਸਕੱਤਰ ਨੂੰ ਇੱਕ ਖ਼ੁਫ਼ੀਆ ਪੱਤਰ ਲਿਖ ਕੇ ਦਰਜਨਾਂ ਸਰਕਾਰੀ ਡਾਕਟਰਾਂ ਅਤੇ ਮੈਡੀਕਲ ਸਟੋਰਾਂ ’ਤੇ ਉਂਗਲ ਉਠਾਈ ਹੈ। ਖ਼ੁਫ਼ੀਆ ਪੱਤਰ ਮਗਰੋਂ ਸਿਹਤ ਮਹਿਕਮੇ ’ਚ ਹਲਚਲ ਮੱਚੀ ਹੈ। ਸਿਹਤ ਵਿਭਾਗ ਪੰਜਾਬ ਨੇ ਸਮੂਹ ਸਿਵਲ ਸਰਜਨਾਂ ਨੂੰ ਫ਼ੌਰੀ ਪੱਤਰ ਲਿਖ ਕੇ ਮਰੀਜ਼ਾਂ ਦੀ ਲੁੱਟ ਲਈ ਬਣੇ ਗੱਠਜੋੜ ਤੇ 15 ਦਿਨਾਂ ਦੇ ਅੰਦਰ ਅੰਦਰ ਰਿਪੋਰਟ ਮੰਗੀ ਹੈ। ਸਾਰੀ ਗੱਲ ਹੁਣ ਸਿਵਲ ਸਰਜਨਾਂ ਤੇ ਸੁੱਟੀ ਗਈ ਹੈ।
            ਖ਼ੁਫ਼ੀਆ ਪੱਤਰ ਅਨੁਸਾਰ ਸਰਕਾਰੀ ਡਾਕਟਰ 30 ਤੋਂ 40 ਫ਼ੀਸਦੀ ਕਮਿਸ਼ਨ ਦੇਣ ਵਾਲੀਆਂ ਡਰੱਗਜ਼ ਕੰਪਨੀਆਂ ਦੀਆਂ ਮਹਿੰਗੀਆਂ ਦਵਾਈਆਂ ਮਰੀਜ਼ਾਂ ਨੂੰ ਲਿਖ ਕੇ ਲੁੱਟ ਕਰ ਰਹੇ ਹਨ ਜਦੋਂ ਕਿ ਇਹ ਦਵਾਈਆਂ ਕਾਰਗਰ ਵੀ ਨਹੀਂ ਹੁੰਦੀਆਂ ਹਨ। ਹਾਲਾਂਕਿ ਇਸੇ ਸਾਲਟ ਦੀਆਂ ਦਵਾਈਆਂ ਹਸਪਤਾਲਾਂ ਵਿਚਲੇ ਸਟੋਰਾਂ ਤੋਂ ਸਸਤੀਆਂ ਵੀ ਮਿਲਦੀਆਂ ਹਨ। ਡਾਕਟਰ ਮਰੀਜ਼ਾਂ ਨੂੰ ਬਾਹਰਲੇ ਮੈਡੀਕਲ ਸਟੋਰਾਂ ਤੋਂ ਦਵਾਈ ਲੈਣ ਲਈ ਮਜਬੂਰ ਕਰਦੇ ਹਨ। ਰਿਪੋਰਟ ਅਨੁਸਾਰ ਜ਼ਿਲ੍ਹਾ ਬਰਨਾਲਾ, ਸੰਗਰੂਰ, ਪਟਿਆਲਾ ਅਤੇ ਫ਼ਤਿਹਗੜ੍ਹ ਸਾਹਿਬ ਇਸ ਮਾਮਲੇ ’ਚ ਝੰਡੀ ਲਈ ਹੈ ਜਿਨ੍ਹਾਂ ਦੇ ਸਰਕਾਰੀ ਹਸਪਤਾਲਾਂ ਵਿਚ ਤਾਇਨਾਤ ਡਾਕਟਰ ਕਮਿਸ਼ਨ ਲੈਣ ਲਈ 60 ਫ਼ੀਸਦੀ ਦਵਾਈਆਂ ਖ਼ਾਸ ਕੰਪਨੀਆਂ ਦੀਆਂ ਲਿਖਦੇ ਹਨ। ਇਨ੍ਹਾਂ ਕੰਪਨੀਆਂ ਦੇ ਨੁਮਾਇੰਦੇ ਡਾਕਟਰਾਂ ਨੂੰ ਓ.ਪੀ.ਡੀ ’ਚ ਮਿਲਦੇ ਹਨ। ਫਿਰ ਮਰੀਜ਼ ਕਿਸੇ ਸਟੋਰ ਤੋਂ ਵੀ ਦਵਾਈ ਲੈਣ, ਡਾਕਟਰਾਂ ਨੂੰ ਗੁਪਤ ਤੌਰ ਤੇ ਕਮਿਸ਼ਨ ਪੁੱਜ ਜਾਂਦਾ ਹੈ।
           ਬਰਨਾਲਾ ਹਸਪਤਾਲ ਦੇ ਇੱਕ ਸੀਨੀਅਰ ਡਾਕਟਰ ਤੇ ਇੱਕ ਖ਼ਾਸ ਮੈਡੀਕਲ ਸਟੋਰ ਦੇ ਆਪਸੀ ਗੱਠਜੋੜ ਦੇ ਵੀ ਚਰਚੇ ਉੱਭਰੇ ਹਨ। ਲੁਧਿਆਣਾ ਦੇ ਸਰਕਾਰੀ  ਹਸਪਤਾਲ ਦੇ ਤਿੰਨ ਡਾਕਟਰਾਂ ਵੱਲੋਂ ਮੋਟੇ ਕਮਿਸ਼ਨਾਂ ਨਾਲ ਕਮਾਈ ਕੀਤੇ ਜਾਣ ਦੀ ਰਿਪੋਰਟ ਹੈ। ਖੰਨਾ,ਪਾਇਲ ਅਤੇ ਸਮਰਾਲਾ ਦੇ ਡਾਕਟਰਾਂ ਵੱਲੋਂ ਕਮਿਸ਼ਨ ਖਾਣ ਦੀ ਗੱਲ ਵਿਸ਼ੇਸ਼ ਉੱਭਰੀ ਹੈ। ਰੋਪੜ ਅਤੇ ਨੰਗਲ ਦੇ ਪੰਜ ਡਾਕਟਰਾਂ ਦੇ ਨਾਮ ਲਿਖੇ ਗਏ ਹਨ ਜੋ ਮਰੀਜ਼ਾਂ ਨੂੰ ਬਾਹਰਲੇ ਸਟੋਰਾਂ ਵਾਲੀ ਦਵਾਈ ਲਿਖਦੇ ਹਨ। ਅੰਮ੍ਰਿਤਸਰ ਦੇ ਤਿੰਨ ਸਰਕਾਰੀ ਡਾਕਟਰਾਂ ਅਤੇ ਤਿੰਨ ਮੈਡੀਕਲ ਸਟੋਰਾਂ ਦਾ ਗੱਠਜੋੜ ਵੀ ਬੇਪਰਦ ਕੀਤਾ ਗਿਆ ਹੈ। ਰਿਪੋਰਟ ਅਨੁਸਾਰ ਤਰਨਤਾਰਨ, ਬਟਾਲਾ,ਗੁਰਦਾਸਪੁਰ ਤੇ ਪਠਾਨਕੋਟ ਦੇ ਡਾਕਟਰਾਂ ਵੱਲੋਂ ਮਰੀਜ਼ਾਂ ਨੂੰ ਮਹਿੰਗੀ ਦਿਵਾਈ ਲਿਖ ਕੇ ਲੁੱਟ ਕਰਨ ਦਾ ਸਪਸ਼ਟ ਖ਼ਾਕਾ ਵਾਹਿਆ ਗਿਆ ਹੈ। ਜਲੰਧਰ,ਹੁਸ਼ਿਆਰਪੁਰ,ਕਪੂਰਥਲਾ ਤੇ ਸ਼ਹੀਦ ਭਗਤ ਸਿੰਘ ਨਗਰ ਦੇ ਸਰਕਾਰੀ ਡਾਕਟਰਾਂ ਵੱਲੋਂ ਹਸਪਤਾਲ ਵਿਚ ਮੌਜੂਦ ਸਾਲਟ ਦੀ ਥਾਂ ਬਾਹਰਲੇ ਸਟੋਰਾਂ ਤੋਂ ਦਵਾਈਆਂ ਲੈਣ ਲਈ ਮਰੀਜ਼ਾਂ ਨੂੰ ਮਜਬੂਰ ਕੀਤਾ ਜਾਂਦਾ ਹੈ।
                   ਫਰੀਦਕੋਟ ਦੇ ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਕਾਲਜ/ਹਸਪਤਾਲ ਵਿਚ ਚੱਲਦੇ ਵੱਡੇ ਪੱਧਰ ਦੇ ਕਮਿਸ਼ਨ ਬਾਰੇ ਵੀ ਖ਼ੁਲਾਸਾ ਕੀਤਾ ਗਿਆ ਹੈ। ਡਾਕਟਰਾਂ ਵੱਲੋਂ ਜੈਨਰਿਕ ਦਵਾਈਆਂ ਲਿਖਣ ਦੀ ਥਾਂ ਬਾਹਰਲੇ ਮੈਡੀਕਲ ਸਟੋਰਾਂ ਦੀ ਦਵਾਈ ਲਿਖੀ ਜਾਂਦੀ ਹੈ। ਫਾਰਮਾਸਿਸਟ ਐਸੋਸੀਏਸ਼ਨ ਬਠਿੰਡਾ ਦੇ ਜਨਰਲ ਸਕੱਤਰ ਸੁਖਮਿੰਦਰ ਸਿੱਧੂ ਦਾ ਪ੍ਰਤੀਕਰਮ ਸੀ ਕਿ ਮਹਿਕਮੇ ਵੱਲੋਂ ਸਪਸ਼ਟ ਹਦਾਇਤਾਂ ਦੇ ਉਲਟ ਡਾਕਟਰ ਦਵਾਈ ਦੇ ਬਰਾਂਡ ਨੇਮ ਦੀ ਥਾਂ ਸਿਰਫ਼ ਸਾਲਟ ਨੇਮ ਹੀ ਪਰਚੀ ਤੇ ਲਿਖਦੇ ਹਨ। ਡਰੱਗਜ਼ ਕੰਪਨੀਆਂ ਵੱਲੋਂ ਡਾਕਟਰਾਂ ਨੂੰ ਇਕੱਲਾ ਕਮਿਸ਼ਨ ਨਹੀਂ, ਬਲਕਿ ਮਹਿੰਗੇ ਹੋਟਲਾਂ ਵਿਚ ਖਾਣੇ ਅਤੇ ਸੈਰ-ਸਪਾਟਾ ਵੀ ਕਰਾਇਆ ਜਾਂਦਾ ਹੈ। ਹਾਲਾਂਕਿ ਪ੍ਰਾਈਵੇਟ ਹਸਪਤਾਲਾਂ ’ਚ ਇਸ ਤੋਂ ਵੱਡੀ ਲੁੱਟ ਹੈ ਪ੍ਰੰਤੂ ਖ਼ੁਫ਼ੀਆ ਵਿਭਾਗ ਨੇ ਉੱਧਰ ਫੇਰਾ ਨਹੀਂ ਪਾਇਆ ਹੈ।
                  ਪ੍ਰਧਾਨ ਮੰਤਰੀ ਭਾਰਤੀਆ ਜਨਅੌਸਧੀ ਪ੍ਰਯੋਜਨਾਂ ਤਹਿਤ ਪੰਜਾਬ ਦੇ ਸਿਹਤ ਕੇਂਦਰਾਂ ਵਿਚ 76 ਸਟੋਰ ਖੋਲੇ ਗਏ ਹਨ ਜਿੱਥੇ 700 ਦਵਾਈਆਂ ਮਿਲਦੀਆਂ ਹਨ। ਇਨ੍ਹਾਂ ਕੇਂਦਰਾਂ ਤੋਂ ਦਵਾਈ ਸਸਤੀ ਅਤੇ ਗੁਣਵੱਤਾ ਵਾਲੀ ਮਿਲਦੀ ਹੈ ਪ੍ਰੰਤੂ ਡਾਕਟਰ ਇਨ੍ਹਾਂ ਦੀ ਪ੍ਰਵਾਹ ਨਹੀਂ ਕਰਦੇ। ਸਰਕਾਰੀ ਹਸਪਤਾਲਾਂ ਦਾ ਆਸਰਾ ਸਿਰਫ਼ ਗ਼ਰੀਬ ਹੀ ਤੱਕਦੇ ਹਨ  ਜਿਨ੍ਹਾਂ ਦੀ ਮਜਬੂਰੀ ਦਾ ਫ਼ਾਇਦਾ ਡਾਕਟਰ ਉਠਾਉਂਦੇ ਹਨ। ਕੇਂਦਰ ਸਰਕਾਰ ਨੇ 8 ਸਤੰਬਰ 2017 ਨੂੰ ਪੱਤਰ ਲਿਖ ਕੇ ਜੈਨਰਿਕ ਦਵਾਈਆਂ ਹੀ ਸਿਫ਼ਾਰਸ਼ ਕੀਤੇ ਜਾਣ ਦੀ ਹਦਾਇਤ ਕੀਤੀ ਹੈ।
                         ਸਮਾਜੀ ਨਿਘਾਰ ਨੇ ਡਾਕਟਰ ਵਿਗਾੜੇ : ਐਸੋਸੀਏਸ਼ਨ
ਪੰਜਾਬ ਸਿਵਲ ਮੈਡੀਕਲ ਸਰਵਿਸਿਜ਼ ਐਸੋਸੀਏਸ਼ਨ ਦੇ ਸੰਗਠਨ ਸਕੱਤਰ ਡਾ. ਇੰਦਰਬੀਰ ਸਿੰਘ ਦਾ ਪ੍ਰਤੀਕਰਮ ਸੀ ਕਿ ਸਮਾਜ ਦੀਆਂ ਕਦਰਾਂ ਕੀਮਤਾਂ ਦੇ ਨਿਘਾਰ ਨੇ ਡਾਕਟਰਾਂ ’ਚ ਵਿਗਾੜ ਪੈਦਾ ਕੀਤੇ ਹਨ ਅਤੇ ਉਨ੍ਹਾਂ ਦੀ ਐਸੋਸੀਏਸ਼ਨ ਗ਼ਲਤ ਡਾਕਟਰਾਂ ਦਾ ਸਾਥ ਬਿਲਕੁਲ ਨਹੀਂ ਦਿੰਦੀ ਹੈ। ਸਰਕਾਰ ਜ਼ਿਆਦਾ ਮੈਡੀਸਨ ਮੁਹੱਈਆ ਕਰਾ ਕੇ ਇਸ ਪ੍ਰੈਕਟਿਸ ਨੂੰ ਕੰਟਰੋਲ ਕਰ ਸਕਦੀ ਹੈ ਪ੍ਰੰਤੂ ਡੰਡਾ ਕਿਸੇ ਮਸਲੇ ਦਾ ਹੱਲ ਨਹੀਂ ਹੈ।
                                 ਦਵਾਈਆਂ ਅੰਦਰਲੇ ਸਟੋਰਾਂ ’ਤੇ ਉਪਲਬਧ : ਡਾਇਰੈਕਟਰ
ਸਿਹਤ ਵਿਭਾਗ ਦੀ ਡਾਇਰੈਕਟਰ ਡਾ.ਜਸਪਾਲ ਸਿੰਘ ਦਾ ਪ੍ਰਤੀਕਰਮ ਸੀ ਕਿ ਸਿਵਲ ਸਰਜਨਾਂ ਤੋਂ ਪ੍ਰਾਪਤ ਹੋਣ ਵਾਲੀ ਰਿਪੋਰਟ ਦੇ ਆਧਾਰ ਤੇ ਅਗਲੀ ਕਾਰਵਾਈ ਕੀਤੀ ਜਾਵੇਗੀ। ਸਰਕਾਰ ਤਰਫ਼ੋਂ ਆਮ ਵਰਤੋਂ ਵਾਲੀਆਂ 266 ਦਵਾਈਆਂ ਹਸਪਤਾਲਾਂ ਨੂੰ ਉਪਲਬਧ ਕਰਾਈਆਂ ਗਈਆਂ ਹਨ ਤਾਂ ਜੋ ਮਰੀਜ਼ਾਂ ਨੂੰ ਬਾਹਰੀ ਸਟੋਰਾਂ ਤੇ ਜਾਣਾ ਹੀ ਨਾ ਪਵੇ। ਉਨ੍ਹਾਂ ਦੱਸਿਆ ਕਿ ਡਾਕਟਰਾਂ ਨੂੰ ਪਰਚੀ ਤੇ ਸਿਰਫ਼ ਸਾਲਟ ਨੇਮ ਲਿਖਣਾ ਚਾਹੀਦਾ ਹੈ, ਨਾ ਕਿ ਬਰਾਂਡ ਨੇਮ।


Monday, March 26, 2018

                       ਵੱਡਿਆਂ ਘਰਾਂ ਦੀਆਂ ਨੂੰਹਾਂ
     ਅੌਰਤਾਂ ਨੂੰ ਚੜ੍ਹਿਆ ‘ਲਾਲ ਪਰੀ’ ਦਾ ਸਰੂਰ
                             ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਵਿਚ ਐਤਕੀਂ ਸ਼ਰਾਬ ਦੇ ਠੇਕੇ ਲੈਣ ਲਈ ਵੱਡੇ ਘਰਾਂ ਦੀਆਂ ਨੂੰਹਾਂ ਤੇ ਧੀਆਂ ਨੇ ਮੈਦਾਨ ਵਿਚ ਹਨ। ਸ਼ਰਾਬ ਦੇ ਕਰੀਬ 4200 ਠੇਕੇ ਲੈਣ ਲਈ ਅੌਰਤਾਂ ਨੇ ਇੱਛਾ ਪ੍ਰਗਟ ਕੀਤੀ ਹੈ। ਕੋਈ ਜ਼ਿਲ੍ਹਾ ਨਹੀਂ ਬਚਿਆ ਜਿੱਥੇ ਅੌਰਤਾਂ ਠੇਕੇ ਲੈਣ ਦੇ ਮੁਕਾਬਲੇ ’ਚ ਨਾ ਹੋਣ। ਆਬਕਾਰੀ ਮਹਿਕਮੇ ਨੇ ਪੰਜਾਬ ਭਰ ਚੋਂ ਸਾਲ 2018-19 ਦੇ ਸ਼ਰਾਬ ਦੇ ਠੇਕੇ ਲੈਣ ਦੇ ਚਾਹਵਾਨਾਂ ਤੋਂ 20 ਤੋਂ 23 ਮਾਰਚ ਤੱਕ ਦਰਖਾਸਤਾਂ ਮੰਗੀਆਂ ਸਨ। ਕਰੀਬ 38 ਹਜ਼ਾਰ ਲੋਕਾਂ ਨੇ ਸ਼ਰਾਬ ਦੇ ਠੇਕੇ ਲੈਣ ਵਿਚ ਦਿਲਚਸਪੀ ਦਿਖਾਈ ਹੈ। ਵੱਡੀ ਗੱਲ ਇਹ ਹੈ ਕਿ ਵੱਡੇ ਘਰਾਂ ਦੀਆਂ ਅੌਰਤਾਂ ਸ਼ਰਾਬ ਦੇ ਠੇਕੇ ਲੈਣ ਲਈ ਮੁਕਾਬਲੇ ਵਿਚ ਬਹੁਤੇ ਥਾਵਾਂ ਤੇ ਉੱਤਰੀਆਂ ਹਨ। ਵੇਰਵਿਆਂ ਅਨੁਸਾਰ ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਸਾਬਕਾ ਪ੍ਰਧਾਨ ਅਤੇ ਸ਼੍ਰੋਮਣੀ ਅਕਾਲੀ ਦਲ (ਦਿੱਲੀ) ਦੇ ਆਗੂ ਹਰਵਿੰਦਰ ਸਿੰਘ ਸਰਨਾ ਦੀ ਲੜਕੀ ਜਸਦੀਪ ਕੌਰ ਚੱਡਾ ਇਨ੍ਹਾਂ ਅੌਰਤਾਂ ਵਿਚ ਸ਼ਾਮਲ ਹੈ ਜਿਸ ਨੇ ਸ਼ਰਾਬ ਦੇ ਠੇਕੇ ਲੈਣ ਲਈ ਕਈ ਜ਼ਿਲ੍ਹਿਆਂ ਵਿਚ ਦਰਖਾਸਤਾਂ ਪਾਈਆਂ ਹਨ।
                   ਭਾਵੇਂ ਚੱਡਾ ਪ੍ਰਵਾਰ ਦੇ ਸ਼ਰਾਬ ਕਾਰੋਬਾਰ ਤੋਂ ਕੋਈ ਅਣਜਾਣ ਨਹੀਂ ਹੈ ਪ੍ਰੰਤੂ ਐਤਕੀਂ ਜਸਦੀਪ ਕੌਰ ਚੱਡਾ ਨੇ ਖ਼ੁਦ ਸ਼ਰਾਬ ਦੇ ਠੇਕੇ ਲੈਣ ਲਈ ਪਹਿਲਕਦਮੀ ਕੀਤੀ ਹੈ। ਤੱਥਾਂ ਅਨੁਸਾਰ ਜਸਦੀਪ ਕੌਰ ਚੱਡਾ ਨੇ ਪੰਜਾਬ ਭਰ ਵਿਚ ਕਰੀਬ 636 ਐਪਲੀਕੇਸ਼ਨਾਂ ਠੇਕੇ ਲੈਣ ਲਈ ਪਾਈਆਂ ਹਨ ਤਾਂ ਜੋ ਕਈ ਜ਼ਿਲ੍ਹਿਆਂ ਦਾ ਸ਼ਰਾਬ ਕਾਰੋਬਾਰ ਲਿਆ ਜਾ ਸਕੇ। ਮੈਡਮ ਚੱਡਾ ਨੇ ਦੋ ਪ੍ਰਾਈਵੇਟ ਬੈਂਕਾਂ ਰਾਹੀਂ ਠੇਕਿਆਂ ਲਈ ਅਪਲਾਈ ਕੀਤਾ ਹੈ। ਇੱਕ ਸ਼ਰਾਬ ਕਾਰੋਬਾਰੀ ਨੇ ਆਪਣੇ ਪ੍ਰਵਾਰ ਦੀਆਂ ਦੋ ਅੌਰਤਾਂ ਨੂੰ ਫਿਰ ਮੈਦਾਨ ਵਿਚ ਉਤਾਰਿਆ ਹੈ। ਪੰਜਾਬ ਭਰ ਚੋਂ ਮਹਿਲਾ ਊਸ਼ਾ ਸਿੰਗਲਾ ਐਤਕੀਂ ਝੰਡੀ ਲੈ ਗਏ ਹਨ ਜਿਨ੍ਹਾਂ ਨੇ ਠੇਕੇ ਲੈਣ ਲਈ ਸਭ ਤੋਂ ਵੱਧ 1054 ਐਪਲੀਕੇਸ਼ਨਾਂ ਪਾਈਆਂ ਹਨ ਜਦੋਂ ਦੂਜੇ ਨੰਬਰ ਤੇ ਜਸਦੀਪ ਕੌਰ ਚੱਡਾ ਦਾ ਨਾਮ ਆਉਂਦਾ ਹੈ ਜਿਨ੍ਹਾਂ ਨੇ 636 ਦਰਖਾਸਤਾਂ ਪਾਈਆਂ ਹਨ। ਤੀਸਰਾ ਨੰਬਰ ਹਲਕਾ ਫ਼ਰੀਦਕੋਟ ਤੋਂ ਸਾਬਕਾ ਅਕਾਲੀ ਵਿਧਾਇਕ ਦੀਪ ਮਲਹੋਤਰਾ ਦੀ ਪਤਨੀ ਡਿੰਪੀ ਮਲਹੋਤਰਾ ਦਾ ਹੈ।
                  ਵੇਰਵਿਆਂ ਅਨੁਸਾਰ ਡਿੰਪੀ ਮਲਹੋਤਰਾ ਨੇ ਕਈ ਜ਼ਿਲ੍ਹਿਆਂ ਵਿਚ 632 ਐਪਲੀਕੇਸ਼ਨਾਂ ਠੇਕੇ ਲੈਣ ਲਈ ਪਾਈਆਂ ਹਨ। ਚੌਥਾ ਨੰਬਰ ਮਹਿਲਾ ਦਿਵਿਆ ਸਿੰਗਲਾ ਹੈ ਜਿਸ ਨੇ 611 ਦਰਖਾਸਤਾਂ ਪਾਈਆਂ ਹਨ। ਇਨ੍ਹਾਂ ਚਾਰ ਅੌਰਤਾਂ ਨੇ ਸਭ ਤੋਂ ਵੱਧ ਐਪਲੀਕੇਸ਼ਨਾਂ ਪਾਈਆਂ ਹਨ। ਆਬਕਾਰੀ ਵਿਭਾਗ ਤਰਫ਼ੋਂ 26 ਮਾਰਚ ਨੂੰ ਦੁਪਹਿਰ ਇੱਕ ਵਜੇ ਸਭ ਜ਼ਿਲ੍ਹਿਆਂ ਵਿਚ ਲਾਟਰੀ ਸਿਸਟਮ ਰਾਹੀਂ ਠੇਕਿਆਂ ਦੀ ਅਲਾਟਮੈਂਟ ਕੀਤੀ ਜਾਣੀ ਹੈ। ਦੋ ਪ੍ਰਾਈਵੇਟ ਬੈਂਕਾਂ ਰਾਹੀਂ 26,279 ਦਰਖਾਸਤਾਂ ਮਹਿਕਮੇ ਨੂੰ ਪ੍ਰਾਪਤ ਹੋਈਆਂ ਹਨ ਜਦੋਂ ਕਿ ਬਾਕੀ ਦਰਖਾਸਤਾਂ ਦਸਤੀ ਪ੍ਰਾਪਤ ਹੋਈਆਂ ਹਨ। ਇਸੇ ਤਰ੍ਹਾਂ ਜਲੰਧਰ ਵਿਚ ਅਰਪਨਾ ਗੁਪਤਾ ਨੇ 97 ਦਰਖਾਸਤਾਂ ਪਾਈਆਂ ਹਨ ਜਦੋਂ ਕਿ ਹਰਜਿੰਦਰ ਕੌਰ ਨੇ ਅੰਮ੍ਰਿਤਸਰ ਵਿਚ ਠੇਕੇ ਲੈਣ ਲਈ 31 ਦਰਖਾਸਤਾਂ ਪਾਈਆਂ ਹਨ।
                 ਬਠਿੰਡਾ ਵਿਚ ਮਹਿਲਾ ਅਨੀਤਾ ਨੇ 20 ਦਰਖਾਸਤਾਂ ਪਾਈਆਂ ਹਨ ਜਦੋਂ ਕਿ ਰਿਆ ਗਰਗ ਨੇ ਵੀ 20 ਐਪਲੀਕੇਸ਼ਨਾਂ ਪਾਈਆਂ ਹਨ। ਇਵੇਂ ਹੀ ਕਾਂਤਾ ਦੇਵੀ, ਰਵਨੀਤ ਕੌਰ,ਬਲਵਿੰਦਰ ਕੌਰ,ਜੋਤੀ, ਕੁਸ਼ਮ, ਪਰਮਿੰਦਰਜੀਤ ਕੌਰ ਗਿੱਲ, ਜਸ਼ਨਦੀਪ ਕੌਰ ,ਅਮਨਦੀਪ ਕੌਰ ਗਿੱਲ,ਮਨਪ੍ਰੀਤ ਕੌਰ, ਪ੍ਰਤਿਭਾ ਗੁਪਤਾ,ਪ੍ਰੇਰਨਾ ਸਿੰਗਲਾ,ਕਮਲਾ ਦੇਵੀ ਆਦਿ ਵੀ ਠੇਕੇ ਲੈਣ ਦੀਆਂ ਚਾਹਵਾਨ ਅੌਰਤਾਂ ਦੀ ਕਤਾਰ ਵਿਚ ਹਨ। ਇਨ੍ਹਾਂ ਅੌਰਤਾਂ ਵੱਲੋਂ ਜ਼ਿਆਦਾ ਸ਼ਹਿਰੀ ਠੇਕੇ ਲੈਣ ਲਈ ਰੁਚੀ ਦਿਖਾਈ ਗਈ ਹੈ। ਸੂਤਰ ਆਖਦੇ ਹਨ ਕਿ ਅਸਲ ਵਿਚ ਵੱਧ ਤੋਂ ਵੱਧ ਸ਼ਰਾਬ ਕਾਰੋਬਾਰ ਆਪਣੇ ਹੱਥ ਵਿਚ ਲੈਣ ਦੇ ਚੱਕਰ ਵਿਚ ਵੱਡੇ ਘਰ ਆਪਣੀਆਂ ਨੂੰਹਾਂ ਧੀਆਂ ਦੇ ਨਾਮ ਤੇ ਵੀ ਅਪਲਾਈ ਕਰ ਦਿੰਦੇ ਹਨ।
                    ਪੰਜਾਬ ਉਦੋਂ ਸ਼ਰਮਸਾਰ ਹੋਵੇਗਾ ਜਦੋਂ ਕਿ ਇਨ੍ਹਾਂ ਨੂੰਹਾਂ ਧੀਆਂ ਦੇ ਨਾਮ ਵੱਡੇ ਅੱਖਰਾਂ ਵਿਚ ਠੇਕਿਆਂ ਤੇ ਲਿਖੇ ਜਾਣਗੇ। ਐਤਕੀਂ ਬਠਿੰਡਾ ਜ਼ਿਲ੍ਹੇ ਵਿਚ 3474 ਦਰਖਾਸਤਾਂ ਪ੍ਰਾਪਤ ਹੋਈਆਂ ਹਨ ਜਦੋਂ ਕਿ ਮੁਕਤਸਰ ਵਿਚ 1900 ਅਰਜ਼ੀਆਂ ਆਈਆਂ ਹਨ। ਲੁਧਿਆਣਾ ਤੇ ਜਲੰਧਰ ਵਿਚ ਸਭ ਤੋਂ ਵੱਧ ਦੌੜ ਲੱਗੀ ਹੈ।
                       ਵੱਡਾ ਹੁੰਗਾਰਾ ਮਿਲਿਆ : ਵਧੀਕ ਕਮਿਸ਼ਨਰ
ਵਧੀਕ ਕਰ ਅਤੇ ਆਬਕਾਰੀ ਕਮਿਸ਼ਨਰ ਗੁਰਤੇਜ ਸਿੰਘ ਦਾ ਕਹਿਣਾ ਸੀ ਕਿ ਐਤਕੀਂ ਚੰਗਾ ਹੁੰਗਾਰਾ ਮਿਲਣ ਵਜੋਂ ਕਰੀਬ 40 ਹਜ਼ਾਰ ਦਰਖਾਸਤਾਂ ਠੇਕੇ ਲੈਣ ਲਈ ਪੁੱਜੀਆਂ ਹਨ ਅਤੇ ਇਨ੍ਹਾਂ ਤੋਂ ਐਪਲੀਕੇਸ਼ਨ ਫ਼ੀਸ ਦੇ ਰੂਪ ਵਿਚ ਕਰੀਬ 80 ਕਰੋੜ ਦੀ ਕਮਾਈ ਹੋਈ ਹੈ ਜੋ ਪਿਛਲੇ ਵਰੇ੍ਹ ਨਾਲੋਂ ਦੁੱਗਣੀ ਹੈ। ਉਨ੍ਹਾਂ ਦੱਸਿਆ ਕਿ ਵੱਡੀਆਂ ਫ਼ਰਮਾਂ ਵੱਲੋਂ ਆਪਣੇ ਘਰਾਂ ਦੀਆਂ ਅੌਰਤਾਂ ਤੇ ਅਰਜ਼ੀਆਂ ਪਾਏ ਜਾਣ ਦਾ ਰੁਝਾਨ ਵੀ ਵਧਿਆ ਹੈ।



         


Tuesday, March 20, 2018

                                                             ਮਾਲੀ ਸੰਕਟ 
                             ਕੈਪਟਨ ਸਰਕਾਰ ਦੀ ਅੱਖ ਹੁਣ ‘ਅਰਾਮ ਘਰਾਂ’ ਤੇ
                                                           ਚਰਨਜੀਤ ਭੁੱਲਰ
ਬਠਿੰਡਾ : ਕੈਪਟਨ ਸਰਕਾਰ ਦੀ ਅੱਖ ਹੁਣ ‘ਅਰਾਮ ਘਰਾਂ’ਤੇ ਹੈ। ਤਾਹੀਓ ਸਰਕਾਰ ਹੁਣ ਪੰਜਾਬ ਭਰ ਚੋਂ ਗੈਸਟ/ਰੈਸਟ ਹਾਊਸਜ਼ ਦਾ ਜਾਇਜਾ ਲੈ ਰਹੀ ਹੈ। ਡਿਪਟੀ ਕਮਿਸ਼ਨਰਾਂ ਤੋਂ ਹਫਤੇ ’ਚ ਹਰ ਵਿਭਾਗ/ਬੋਰਡ ਦੇ ਅਰਾਮ ਘਰਾਂ ਦੇ ਵੇਰਵੇ ਮੰਗੇ ਹਨ। ਆਮ ਰਾਜ ਪ੍ਰਬੰਧ ਤੇ ਤਾਲਮੇਲ ਵਿਭਾਗ ਨੇ ਉੱਚ ਪੱਧਰੀ ਮੀਟਿੰਗ ’ਚ ਫੈਸਲਾ ਹੋਇਆ ਹੈ ਜਿਸ ਦੇ ਕਈ ਮਾਅਣੇ ਕੱਢੇ ਜਾ ਰਹੇ ਹਨ। ਕਾਂਗਰਸ ਸਰਕਾਰ ਮਾਲੀ ਤੰਗੀ ਕੱਟਣ ਲਈ ਚਾਲੂ ਹਾਲਤ ਵਾਲੇ ਅਰਾਮ ਘਰਾਂ ਨੂੰ ਪ੍ਰਾਈਵੇਟ ਠੇਕੇਦਾਰਾਂ (ਪੀਪੀਪੀ ਮੋਡ) ਨੂੰ ਦੇਣ ਦੀ ਇੱਛੁਕ ਹੈ ਜਦੋਂ ਕਿ ਖੰਡਰ ਅਰਾਮ ਘਰਾਂ ਨੂੰ ਸਰਕਾਰ ਵੇਚਣ ਦੇ ਰਾਹ ਵੀ ਪੈ ਸਕਦੀ ਹੈ। ਅਰਾਮ ਘਰਾਂ ਦੇ ਖਰਚੇ ਘਟਾਉਣ ਦਾ ਮੰਤਵ ਵੀ ਹੋ ਸਕਦਾ ਹੈ। ਪੰਜਾਬ ਬੁਨਿਆਦੀ ਢਾਂਚਾ ਵਿਕਾਸ ਬੋਰਡ ਨੇ ਡਿਪਟੀ ਕਮਿਸ਼ਨਰਾਂ ਨੂੰ ਪੱਤਰ ਜਾਰੀ ਕੀਤਾ ਹੈ ਕਿ ਸਰਕਾਰ ਸਰਕਿਟ ਹਾਊਸ/ਗੈਸਟ/ਰੈਸਟ ਹਾਊਸਜ਼ ਨੂੰ ਪਬਲਿਕ ਪ੍ਰਾਈਵੇਟ ਹਿੱਸੇਦਾਰੀ ਤਹਿਤ ਚਲਾਉਣ ਦਾ ਖਾਕਾ ਤਿਆਰ ਕਰ ਰਹੀ ਹੈ ਜਿਸ ਕਰਕੇ ਹਰ ਵਿਭਾਗ/ਬੋਰਡ ਦੇ ਅਰਾਮ ਘਰ ਦੀ ਵਿਰਾਸਤੀ ਮਹੱਤਤਾ, ਮਾਲਕੀ, ਰਕਬਾ, ਜ਼ਮੀਨ ਦੀ ਮਾਲਕੀ, ਜ਼ਮੀਨ ਦੀ ਮੌਜੂਦਾ ਕੀਮਤ ਦੇ ਵੇਰਵੇ ਮੰਗੇ ਹਨ। 
                   ਸੁਝਾਓ ਵੀ ਮੰਗੇ ਹਨ ਕਿ ਇਸ ਰਕਬੇ ਤੇ ਰਿਹਾਇਸ਼ੀ/ਵਪਾਰਿਕ ਗਤੀਵਿਧੀ ਹੋ ਸਕਦੀ ਹੈ ਜਾਂ ਨਹੀਂ। ਸਾਰੇ ਵਿਭਾਗ ਤੇ ਬੋਰਡ ਇਨ੍ਹਾਂ ਵੇਰਵਿਆਂ ’ਚ ਜੁਟੇ ਹੋਏ ਹਨ। ਸੂਤਰ ਆਖਦੇ ਹਨ ਕਿ ਸਰਕਾਰ ਚਾਲੂ ਅਰਾਮ ਘਰਾਂ ਦੇ ਖਰਚੇ ਮਾਲੀ ਸੰਕਟ ਵਜੋਂ ਘਟਾਉਣਾ ਚਾਹੁੰਦੀ ਹੈ। ਲੋਕ ਨਿਰਮਾਣ ਵਿਭਾਗ ਦੇ ਪੰਜਾਬ ਭਰ ਵਿਚ ਕਰੀਬ 46 ਗੈਸਟ ਹਾਊਸ ਹਨ ਜਿਨ੍ਹਾਂ ਚੋਂ 30 ਇਕੱਲੇ ਮਾਲਵਾ ਖ਼ਿੱਤੇ ਵਿਚ ਹਨ। ਅੱਧੀ ਦਰਜਨ ਗੈਸਟ  ਹਾਊਸ ਪੁਲੀਸ ਅਫਸਰਾਂ ਨੇ ਨੱਪੇ ਹੋਏ ਹਨ। ਨਹਿਰ ਮਹਿਕਮੇ ਦੇ ਇਕੱਲੇ ਮਾਲਵੇ ਵਿਚ 31 ਅਰਾਮ ਹਨ ਜਿਨ੍ਹਾਂ ਚੋਂ 22 ਅਰਾਮ ਘਰ ਤਾਂ ਪਹਿਲਾਂ ਹੀ ‘ਡੈੱਡ’ ਐਲਾਨੇ ਹੋਏ ਹਨ। ਰਾਮਪੁਰਾ ਤੇ ਨੰਦਗੜ੍ਹ ਦੇ ਰੈਸਟ ਹਾਊਸ ਚਾਲੂ ਹਾਲਤ ਵਿਚ ਹਨ। ਅਕਾਲੀ ਸਰਕਾਰ ਸਮੇਂ ਜੂਨ 1998 ਵਿਚ ਅਰਾਮ ਘਰਾਂ ਸਮੇਤ 28 ਸੰਪਤੀਆਂ ਦੀ ਸਨਾਖਤ ਕੀਤੀ ਗਈ ਸੀ ਜਿਨ੍ਹਾਂ ਚੋਂ 22 ਸੰਪਤੀਆਂ ਦੀ ਨਿਲਾਮੀ ਕੀਤੀ ਗਈ ਸੀ। ਕਰੋੜਾਂ ਰੁਪਏ ਦੀਆਂ ਕਿਸ਼ਤਾਂ ਹਾਲੇ ਵੀ ਬਕਾਇਆ ਖੜ੍ਹੀਆਂ ਹਨ।
         ਨਹਿਰ ਮਹਿਕਮੇ ਦੇ ਰਾਮਨਗਰ,ਹੁਸਨਰ, ਕੋਟਸ਼ਮੀਰ,ਚੱਕ ਰਾਮ ਸਿੰਘ ਵਾਲਾ, ਪੂਹਲਾ, ਵਿਰਕ ਕਲਾਂ, ਕਾਲਝਰਾਨੀ, ਕਲਿਆਣ,  ਨਿਉਰ, ਜਲਾਲ,ਮੌੜ ਦਰਾਕਾ,ਬੀਬੀ ਵਾਲਾ ਦੇ ਅਰਾਮ ਘਰਾਂ ਦੀ ਪੁਜ਼ੀਸਨ ਕਾਫੀ ਮਾੜੀ ਹੈ। ਕਦੇ ਇਨ੍ਹਾਂ ਅਰਾਮ ਘਰਾਂ ਵਿਚ ਅੰਗਰੇਜ਼ ਠਹਿਰਦੇ ਹੁੰਦੇ ਸਨ, ਹੁਣ ਉਲੂ ਬੋਲਦੇ ਹਨ।ਸੂਤਰ ਆਖਦੇ ਹਨ ਕਿ ਕਿਸੇ ਪੜਾਅ ’ਤੇ ਸਰਕਾਰ ਖੰਡਰ ਨਹਿਰੀ ਅਰਾਮ ਘਰਾਂ ਨੂੰ ਵੇਚ ਵੀ ਸਕਦੀ ਹੈ ਕਿਉਂਕਿ ਇਸ ਸੰਪਤੀ ਤੋਂ ਸਰਕਾਰ ਨੂੰ ਚੰਗੀ ਕਮਾਈ ਹੋਣ ਦੀ ਉਮੀਦ ਹੈ। ਪੰਜਾਬ ਮੰਡੀ ਬੋਰਡ ਦੇ ਕਿਸਾਨ ਅਰਾਮ ਘਰਾਂ/ਕਿਸਾਨ ਸਰਾਏ/ਵਿਕਾਸ ਭਵਨਾਂ ਦੀ ਗਿਣਤੀ ਕਈ ਦਰਜਨਾਂ ਵਿਚ ਹੈ ਪ੍ਰੰਤੂ ਇਨ੍ਹਾਂ ਚੋਂ ਦੋ ਦਰਜਨ ਅਰਾਮ ਘਰਾਂ ਤੇ ਅਫਸਰਾਂ ਦਾ ਕਬਜ਼ਾ ਹੈ। ਮੰਡੀ ਬੋਰਡ ਦੇ ਕਰੀਬ ਸੱਤ ਅਰਾਮ ਘਰਾਂ ਵੱਲ ਸਵਾ ਕਰੋੜ ਤੋਂ ਜਿਆਦਾ ਦਾ ਕਿਰਾਇਆ ਖੜ੍ਹਾ ਹੈ। ਸਰਦੂਲਗੜ੍ਹ,ਮਲੋਟ, ਧਰਮਕੋਟ, ਅਮਲੋਹ,ਰਾਏਕੋਟ ਆਦਿ ਦੇ ਕਿਸਾਨ ਅਰਾਮ ਘਰ/ਕਿਸਾਨ ਸਰਾਏ ਡੀ.ਐਸ.ਪੀਜ਼ ਦੇ ਕਬਜ਼ੇ ਹੇਠ ਹਨ। ਇਨ੍ਹਾਂ ਬੋਰਡਾਂ ਤਰਫੋਂ ਵੇਰਵੇ ਇਕੱਠੇ ਕੀਤੇ ਜਾ ਰਹੇ ਹਨ।
                ਪਾਵਰਕੌਮ ਦੇ ਬਹੁਤੇ ਗੈਸਟ ਹਾਊਸਜ਼ ’ਚ ਮਹਿਮਾਨਾਂ ਦੀ ਗਿਣਤੀ ਨਾਮਾਤਰ ਹੈ। ਥਰਮਲ ਕਲੋਨੀ ਵਿਚ ਮੁਲਾਜ਼ਮਾਂ ਦਾ ਗੈਸਟ ਹਾਊਸ ਬੰਦ ਪਿਆ ਹੈ। ਪਿੰਡ ਬਾਦਲ ’ਚ ਆਲੀਸਾਨ ਗੈਸਟ ਹਾਊਸ ਹੈ ਜਿਥੇ ਮਹਿਮਾਨਾਂ ਦੀ ਗਿਣਤੀ ਨਾਮਾਤਰ ਹੈ ਪ੍ਰੰਤੂ ਖਰਚਾ ਬਹੁਤ ਜਿਆਦਾ ਹੈ। ਭਗਤਾ ਭਾਈਕਾ ਵਿਖੇ ਗੈਸਟ ਹਾਊਸ ਵਿਚ ਕੋਈ ਮਹਿਮਾਨ ਠਹਿਰਿਆ ਹੀ ਨਹੀਂ ਹੈ। ਮਲੋਟ ਦੇ ਗੈਸਟ ਹਾਊਸ ਵਿਚ ਚਾਰ ਪੰਜ ਵਰ੍ਹਿਆਂ ਵਿਚ ਸਿਰਫ 31 ਮਹਿਮਾਨ ਠਹਿਰੇ ਹਨ। ਪੰਚਾਇਤ ਵਿਭਾਗ ਦੇ ਜੋ ਵੱਡੇ ਸ਼ਹਿਰਾਂ ਵਿਚ ਪੰਚਾਇਤ ਭਵਨ ਹਨ, ਉਨ੍ਹਾਂ ਦੇ ਵੇਰਵੇ ਵੀ ਇਕੱਠੇ ਹੋ ਰਹੇ ਹਨ। ਬਠਿੰਡਾ ਦੇ ਪੰਚਾਇਤ ਭਵਨ ਵਿਚ ਖਜ਼ਾਨਾ ਮੰਤਰੀ ਦਾ ਦਫਤਰ ਅਤੇ ਕਈ ਹੋਰ ਵਪਾਰਿਕ ਅਦਾਰੇ ਇਸ ਅੰਦਰ ਚੱਲ ਰਹੇ ਹਨ। ਪੰਜਾਬ ਬੁਨਿਆਦੀ ਢਾਂਚਾ ਵਿਕਾਸ ਬੋਰਡ ਦੇ ਮੈਨੇਜਿੰਗ ਡਾਇਰੈਕਟਰ ਸ੍ਰੀ ਡੀ.ਕੇ.ਤਿਵਾੜੀ ਦਾ ਕਹਿਣਾ ਸੀ ਕਿ ਉਨ੍ਹਾਂ ਵਲੋਂ ਤਾਂ ਹਫਤੇ ਵਿਚ ਗੈਸਟ ਹਾਊਸਜ਼ ਦੇ ਅੰਕੜੇ ਇਕੱਠੇ ਕੀਤੇ ਜਾਣੇ ਹਨ ਜਿਨ੍ਹਾਂ ਬਾਰੇ ਅਗਲਾ ਫੈਸਲਾ ਸਰਕਾਰ ਨੇ ਲੈਣਾ ਹੈ।
                    ਨਿਲਾਮੀ ਦਾ ਕੋਈ ਮੰਤਵ ਨਹੀਂ : ਪ੍ਰਮੁੱਖ ਸਕੱਤਰ
ਆਮ ਰਾਜ ਪ੍ਰਬੰਧ ਵਿਭਾਗ ਦੇ ਪ੍ਰਮੁੱਖ ਸਕੱਤਰ ਕਿਰਪਾ ਸ਼ੰਕਰ ਸਿਰੋਜ ਦਾ ਕਹਿਣਾ ਸੀ ਕਿ ਉਹ ਪੰਜਾਬ ਚੋਂ ਵਿਰਾਸਤੀ ਮਹੱਤਤਾ ਵਾਲੇ ਅਰਾਮ ਘਰ ਲੱਭ ਰਹੇ ਹਨ ਤਾਂ ਜੋ ਉਨ੍ਹਾਂ ਨੂੰ ਪੀਪੀਪੀ ਮੋਡ ਰਾਹੀਂ ਚਲਾ ਕੇ ਕਮਾਈ ਦਾ ਵਸੀਲਾ ਪੈਦਾ ਕੀਤਾ ਜਾ ਸਕੇ ਅਤੇ ਵਿਰਾਸਤ ਸੰਭਾਲੀ ਜਾ ਸਕੇ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਕਿਸੇ ਅਰਾਮ ਘਰ ਨੂੰ ਵੇਚਣ ਦਾ ਕੋਈ ਮਕਸਦ ਨਹੀਂ ਹੈ ਅਤੇ ਸਿਰਫ ਚਲਾਉਣਾ ਮੰਤਵ ਹੈ।


Monday, March 19, 2018

                         ਕੈਪਟਨ ਦਾ ਖੂੰਡਾ 
            ਅਕਾਲੀ ਬਚੇ , ਮੁਲਾਜ਼ਮ ਫਸੇ 
                          ਚਰਨਜੀਤ ਭੁੱਲਰ
ਬਠਿੰਡਾ : ਐਤਕੀਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦਾ ‘ਸਿਆਸੀ ਖੂੰਡਾ’ ਵੱਡੇ ਲੀਡਰਾਂ ’ਤੇ ਨਹੀਂ ਚੱਲਿਆ ਜਦੋਂ ਕਿ ਛੋਟੇ ਮੁਲਾਜ਼ਮ ਵਾਹਣੀਂ ਪਾਏ ਹੋਏ ਹਨ। ਜ਼ਮੀਨ ਅਸਮਾਨ ਦਾ ਫ਼ਰਕ ਹੈ ਕਿ ਕੈਪਟਨ ਅਮਰਿੰਦਰ ਦੀ ਪਹਿਲੀ ਪਾਰੀ ਅਤੇ ਦੂਸਰੇ ਪਾਰੀ ਦੇ ਪਹਿਲੇ ਵਰੇ੍ਹ ਦੀ ‘ਕਰੁਪਸ਼ਨ ਖ਼ਿਲਾਫ਼ ਜੰਗ’ ਦਾ। ਚੋਣਾਂ ਤੋਂ ਪਹਿਲਾਂ ਕੈਪਟਨ ਨੇ ਗੱਠਜੋੜ ਦੇ ਵੱਡੇ ਲੀਡਰਾਂ ਖ਼ਿਲਾਫ਼ ਪੰਜਾਬ ਨੂੰ ਲੁੱਟਣ ਦੇ ਇਲਜ਼ਾਮ ਲਾਏ। ਚਾਰ ਮਹੀਨੇ ’ਚ ਸਭਨਾਂ ਨੂੰ ਅੰਦਰ ਕਰਨ ਦੇ ਵਾਅਦੇ ਕੀਤੇ ਗਏ। ਜਦੋਂ ਹੁਣ ਕੈਪਟਨ ਹਕੂਮਤ ਦੇ ਪਹਿਲੇ ਵਰੇ੍ਹ ਦੇ ਵਿਜੀਲੈਂਸ ਕੇਸਾਂ ਦੇ ਵਰਕੇ ਫਰੋਲੇ ਤਾਂ ਉਨ੍ਹਾਂ ’ਚ ਵੱਡੀ ਗਿਣਤੀ ਛੋਟੇ ਮੁਲਾਜ਼ਮ ਦੀ ਦਿੱਖੀ, ‘ਮਗਰਮੱਛ’ ਕਿਧਰੇ ਨਜ਼ਰੀਂ ਨਹੀਂ ਪਏ। ਤਾਹੀਓ ਅਕਾਲੀ ਖ਼ੁਸ਼ ਤੇ ਕਾਂਗਰਸੀ ਦੁਖੀ ਜਾਪਦੇ ਹਨ। ਵਿਜੀਲੈਂਸ ਦੇ ਸਰਕਾਰੀ ਤੱਥਾਂ ਅਨੁਸਾਰ ਪੰਜਾਬ ਵਿਚ ਗੱਠਜੋੜ ਸਰਕਾਰ ਦੇ ਆਖ਼ਰੀ ਵਰੇ੍ਹ ਸਾਲ 2016 ਦੌਰਾਨ 314 ਅਫ਼ਸਰਾਂ/ ਮੁਲਾਜ਼ਮਾਂ/ ਪ੍ਰਾਈਵੇਟ ਵਿਅਕਤੀਆਂ ਖ਼ਿਲਾਫ਼ 167 ਕੇਸ ਦਰਜ ਹੋਏ ਜਦੋਂ ਕਿ ਕੈਪਟਨ ਰਾਜ ਦੇ ਸਾਲ 2017 ਦੌਰਾਨ 291 ਵਿਅਕਤੀਆਂ ਖ਼ਿਲਾਫ਼ 159 ਕੇਸ ਦਰਜ ਹੋਏ।
                   ਪੜਤਾਲਾਂ ਦੇ ਆਧਾਰ ਤੇ ਦਰਜ ਹੋਣ ਵਾਲੇ ਕੇਸ ਜਿਨ੍ਹਾਂ ’ਚ ਪ੍ਰਾਈਵੇਟ ਵਿਅਕਤੀ/ਸਿਆਸੀ ਵਿਅਕਤੀ ਵੀ ਸ਼ਾਮਲ ਹੁੰਦੇ ਹਨ, ਤੇ ਨਜ਼ਰ ਮਾਰੀਏ ਤਾਂ ਸਾਲ 2016 ਦੇ ਵਰੇ੍ਹ ਵਿਚ 54 ਵਿਜੀਲੈਂਸ ਕੇਸ ਦਰਜ ਹੋਏ ਜਦੋਂ ਕਿ ਕੈਪਟਨ ਦੇ ਸਾਲ 2017 ਦੇ ਵਰੇ੍ਹ ਦੌਰਾਨ ਇਹ ਗਿਣਤੀ ਘੱਟ ਕੇ 36 ਰਹਿ ਗਈ। ਇਸੇ ਵਰੇ੍ਹ ’ਚ ਵਸੀਲਿਆਂ ਤੋਂ ਵੱਧ ਜਾਇਦਾਦ ਬਣਾਏ ਜਾਣ ਦੇ ਸਿਰਫ਼ ਪੰਜ ਕੇਸ ਦਰਜ ਹੋਏ ਹਨ। ਵਰ੍ਹਾ 2017 ਦੌਰਾਨ ਟਰੈਪ ਕੇਸ ਜ਼ਰੂਰ ਵਧੇ ਹਨ ਜਿਨ੍ਹਾਂ ਵਿਚ ਜ਼ਿਆਦਾ ਛੋਟੇ ਮੁਲਾਜ਼ਮ ਸ਼ਾਮਿਲ ਹਨ। ਸਾਲ 2016 ਵਿਚ 109  ਟਰੈਪ ਕੇਸਾਂ ਵਿਚ 130 ਮੁਲਾਜ਼ਮ/ ਅਧਿਕਾਰੀ ਫੜੇ ਗਏ ਜਦੋਂ ਕੈਪਟਨ ਹਕੂਮਤ ਨੇ ਪਹਿਲੇ ਵਰ੍ਹੇ ਵਿਚ 118 ਕੇਸ ਦਰਜ ਕਰਕੇ 149 ਮੁਲਾਜ਼ਮ/ਅਧਿਕਾਰੀ ਫੜੇ ਹਨ। ਮਤਲਬ ਕਿ ਕੈਪਟਨ ਸਰਕਾਰ ਨੇ ਛੋਟੀਆਂ ਮੱਛੀਆਂ ਫੜਨ ਵਿਚ ਬਾਜ਼ੀ ਮਾਰੀ ਹੈ। ਵਿਜੀਲੈਂਸ ਨੇ ਜਨਵਰੀ ਤੇ ਫਰਵਰੀ 2018 ਦੌਰਾਨ 28 ਕੇਸ ਦਰਜ ਕੀਤੇ ਹਨ।
                    ਕੈਪਟਨ ਰਾਜ ਦੇ ਪਹਿਲੇ ਵਰੇ੍ਹ 2017 ਦੌਰਾਨ ਵਿਜੀਲੈਂਸ ਨੇ 128 ਵਿਅਕਤੀਆਂ ਖ਼ਿਲਾਫ਼ ਵਿਜੀਲੈਂਸ ਪੜਤਾਲਾਂ ਦਰਜ ਕੀਤੀਆਂ ਹਨ ਜਦੋਂ ਕਿ ਇਸ ਤੋਂ ਜ਼ਿਆਦਾ ਤਾਂ ਅਕਾਲੀ ਰਾਜ ਦੇ ਸਾਲ 2016 ਦੌਰਾਨ 201 ਪੜਤਾਲਾਂ ਦਰਜ ਹੋਈਆਂ ਸਨ। ਅਕਾਲੀ ਰਾਜ ਦੇ 2016 ਦੌਰਾਨ 61 ਪ੍ਰਾਈਵੇਟ ਵਿਅਕਤੀਆਂ (ਸਮੇਤ ਸਿਆਸੀ ਵਿਅਕਤੀ) ਪੜਤਾਲਾਂ ਦਰਜ ਹੋਈਆਂ ਜਦੋਂ ਕਿ ਹੁਣ 2017 ਵਿਚ ਸਿਰਫ਼ 30 ਵਿਅਕਤੀਆਂ ਖ਼ਿਲਾਫ਼ ਪੜਤਾਲਾਂ ਦਰਜ ਹੋਈਆਂ ਹਨ। ਜਦੋਂ ਕੈਪਟਨ ਦੀ ਪਹਿਲੀ ਪਾਰੀ (2002-2007) ਸੀ ਤਾਂ ਉਦੋਂ ਪਹਿਲੇ ਵਰੇ੍ਹ ਦੌਰਾਨ ਹੀ ਸਿਆਸੀ ਖੂੰਡਾ ਚਲਾ ਕੇ ਦਰਜਨਾਂ  ਲੀਡਰਾਂ ਨੂੰ ਜੇਲ੍ਹ ਦੀ ਹਵਾ ਖੁਆ ਦਿੱਤੀ ਸੀ।  ਵਰ੍ਹਾ 2002-2003 ਦੌਰਾਨ ਰਿਕਾਰਡ ਕੇਸ ਦਰਜ ਹੋਏ ਸਨ। ਹੁਣ ਦੂਸਰੀ ਪਾਰੀ ਦੇ ਪਹਿਲੇ ਵਰੇ੍ਹ ਦੌਰਾਨ ਕਿਸੇ ਸਿਆਸੀ ਲੀਡਰ ਨੂੰ ਤੱਤੀ ਵਾਅ ਨਹੀਂ ਲੱਗੀ ਹੈ।
                    ਹੁਣ ਪਹਿਲੇ ਵਰੇ੍ਹ ਦੌਰਾਨ ਵਿਜੀਲੈਂਸ ਨੇ ਸਿੰਚਾਈ ਘੁਟਾਲਾ, ਮੰਡੀ ਬੋਰਡ ਦੇ ਐਕਸੀਅਨ ਦਾ ਕੇਸ,ਪੀ.ਟੀ.ਯੂ ਕੇਸ ਅਤੇ ਝਿਉਰਹੇੜੀ ਕੇਸ ਦੇ ਮਾਮਲੇ ਦਰਜ ਕੀਤੇ ਹਨ ਜਿਨ੍ਹਾਂ ਚੋਂ ਨੇਤਾ ਲੋਕ ਬਚ ਗਏ ਹਨ। ਸਿਆਸੀ ਭੇਤੀ ਆਖਦੇ ਹਨ ਕਿ ਇਹ ‘ਦੋਸਤਾਨਾ ਖੇਡ’ ਦਾ ਨਤੀਜਾ ਹੈ ਜਦੋਂ ਕਿ ਵਿਰੋਧੀ ਧਿਰਾਂ ਦੇ ਲੀਡਰ ਆਖਦੇ ਹਨ ਕਿ ਵਿਜੀਲੈਂਸ ਹੁਣ ਬਦਲਾਖੋਰੀ ਤੋਂ ਗੁਰੇਜ਼ ਕਰ ਰਹੀ ਹੈ। ਹਾਕਮ ਧਿਰ ਆਖ ਰਹੀ ਹੈ ਕਿ ਮੈਰਿਟ ਤੇ ਸਭ ਕੱੁਝ ਹੋ ਰਿਹਾ ਹੈ। ਇੱਕ ਵਿਜੀਲੈਂਸ ਅਧਿਕਾਰੀ ਨੇ ਦੱਸਿਆ ਕਿ ਉੱਪਰੋਂ ਹਰੀ ਝੰਡੀ ਨਹੀਂ ਮਿਲੀ ਜਿਸ ਕਰਕੇ ਉਹ ਬੇਵੱਸ ਹਨ। ਤਾਹੀਓਂ ਵਿਜੀਲੈਂਸ ਕੋਲ ਸ਼ਿਕਾਇਤਾਂ ਦੀ ਗਿਣਤੀ ਵੀ ਘਟਣ ਲੱਗੀ ਹੈ। ਨਤੀਜੇ ਵਜੋਂ ਲੀਡਰਾਂ ਖ਼ਿਲਾਫ਼ ਕਾਰਵਾਈ ਦਾ ਖਾਤਾ ਵੀ ਨਹੀਂ ਖੁੱਲ੍ਹਿਆ ਹੈ।
                   ਵਿਜੀਲੈਂਸ ਪੰਜਾਬ ਨੇ ਲੰਘੇ ਪੰਜ ਵਰ੍ਹਿਆਂ (2013-2017) ਦੌਰਾਨ 1279 ਵਿਅਕਤੀਆਂ (ਸਰਕਾਰੀ/ਗ਼ੈਰਸਰਕਾਰੀ) ਤੇ ਕੁੱਲ 722 ਕੇਸ ਦਰਜ ਕੀਤੇ ਹਨ ਜਿਨ੍ਹਾਂ ਚੋਂ 500 ਕੇਸ ਰੰਗੇ ਹੱਥੀ ਵੱਢੀ ਲੈਣ ਵਾਲਿਆਂ ਦੇ ਹਨ ਜਦੋਂ ਕਿ 186 ਕੇਸ ਪੜਤਾਲਾਂ ਕਰਨ ਮਗਰੋਂ ਦਰਜ ਕੀਤੇ ਗਏ ਹਨ। ਸਿਰਫ਼ ਤਿੰਨ ਦਰਜਨ ਕੇਸ ਵਸੀਲਿਆਂ ਤੋਂ ਵੱਧ ਆਮਦਨ ਵਾਲੇ ਦਰਜ ਹੋਏ ਹਨ। ਇਨ੍ਹਾਂ ਪੰਜ ਵਰ੍ਹਿਆਂ ਦੌਰਾਨ 54 ਅਫ਼ਸਰਾਂ, 263 ਮੁਲਾਜ਼ਮਾਂ ਅਤੇ 136 ਪ੍ਰਾਈਵੇਟ ਵਿਅਕਤੀਆਂ ਨੂੰ ਅਦਾਲਤਾਂ ਵਿਚ ਸਜ਼ਾ ਹੋਈ ਹੈ। ਜਨਵਰੀ ਤੇ ਫਰਵਰੀ 2018 ਵਿਚ ਦਰਜਨ ਨੂੰ ਸਜ਼ਾ ਹੋਈ ਹੈ।
                 ਸਿੰਚਾਈ ਘੁਟਾਲੇ ’ਚ ਵਕਤ ਲੱਗਿਆ : ਡਾਇਰੈਕਟਰ
ਵਿਜੀਲੈਂਸ ਦੇ ਡਾਇਰੈਕਟਰ ਜੀ.ਨਗੇਸਵਰਾ ਰਾਓ ਦਾ ਕਹਿਣਾ ਸੀ ਕਿ ਵਿਜੀਲੈਂਸ ਦੀ ਸਾਲ ਦੌਰਾਨ ਬਿਹਤਰ ਕਾਰਗੁਜ਼ਾਰੀ ਰਹੀ ਹੈ ਤੇ ਟਰੈਪ ਕੇਸ ਪਿਛਲੇ ਵਰੇ੍ਹ ਨਾਲੋਂ ਵਧੇ ਹਨ। ਪੁਰਾਣੇ ‘ਨੌਕਰੀ ਘੁਟਾਲੇ’ ਦੇ ਵੱਡੇ ਦੋਸ਼ੀ ਫੜੇ ਹਨ ਅਤੇ ਐਕਸੀਅਨ ਸੁਰਿੰਦਰਪਾਲ ਭਲਵਾਨ ਤੇ ਤਿੰਨ ਕੇਸ ਦਰਜ ਕੀਤੇ ਹਨ। ਸਿੰਚਾਈ ਘੁਟਾਲਾ ਹੀ ਬਹੁਤ ਸਮਾਂ ਖਾ ਗਿਆ ਹੈ ਜਿਸ ਕਰਕੇ ਪੜਤਾਲਾਂ ਦੀ ਗਿਣਤੀ ਘਟੀ ਹੈ। ਜਦੋਂ ਲੀਡਰਾਂ ਬਾਰੇ ਪੁੱਛਿਆ ਤਾਂ ਉਨ੍ਹਾਂ ਇਸ ’ਤੇ ਕੋਈ ਟਿੱਪਣੀ ਕਰਨ ਤੋਂ ਨਾਂਹ ਕਰ ਦਿੱਤੀ।




Monday, March 12, 2018

                                                   ਦੇਖਣਗੇ ਹਵਾਈ ਚੱਪਲ ਵਾਲੇ 
                                 ਹਵਾਈ ਜਹਾਜ਼ ’ਚ ਉੱਡੇਗਾ ਸਰਕਾਰੀ ਖ਼ਜ਼ਾਨਾ 
                                                         ਚਰਨਜੀਤ ਭੁੱਲਰ
ਬਠਿੰਡਾ :  ਹਵਾਈ ਜਹਾਜ਼ ’ਚ ‘ਆਮ ਆਦਮੀ’ ਨਹੀਂ, ਹੁਣ ਸਰਕਾਰੀ ਖ਼ਜ਼ਾਨਾ ਉੱਡੇਗਾ। ਕਿਸੇ ਵੀ ਹਵਾਈ ਕੰਪਨੀ  ਨੂੰ ਤੰਗੀ ਨਾ ਝੱਲਣੀ ਪਵੇ , ਤਾਹੀਓਂ ਕੇਂਦਰ ਤੇ ਪੰਜਾਬ ਸਰਕਾਰ ਵੱਲੋਂ ਸਾਂਝੇ ਤੌਰ ਤੇ ਇਨ੍ਹਾਂ ਦਾ ਬੋਝ ਚੁੱਕਿਆ ਜਾਣਾ ਹੈ। ਹਾਲਾਂਕਿ ਪੰਜਾਬ ਦਾ ਵਿੱਤੀ ਸੰਕਟ ਕਿਸੇ ਤੋਂ ਲੁਕਿਆ ਨਹੀਂ ਪ੍ਰੰਤੂ ਫਿਰ ਵੀ ਹਵਾਈ ਕੰਪਨੀਆਂ ਦਾ ਹਰ ਘਾਟਾ ਸਰਕਾਰ ਪੂਰਾ ਕਰੇਗੀ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤਰਫ਼ੋਂ 1 ਅਪਰੈਲ 2017 ਤੋਂ ਖੇਤਰੀ ਸੰਪਰਕ ਸਕੀਮ-ਉਡਾਣ ਸ਼ੁਰੂ ਕੀਤੀ ਗਈ ਹੈ। ਮੋਦੀ ਦਾ ਨਾਅਰਾ ਹੈ ਕਿ ‘ਉੱਡੇ ਦੇਸ਼ ਕਾ ਆਮ ਨਾਗਰਿਕ’। ਪ੍ਰਧਾਨ ਮੰਤਰੀ ਨੇ ਜਨਤਿਕ ਐਲਾਨ ਕੀਤਾ ਸੀ ਕਿ ਹੁਣ ਹਵਾਈ ਚੱਪਲ ਪਹਿਨਣ ਵਾਲਾ ਵੀ ਹਵਾਈ ਜਹਾਜ਼ ’ਚ ਉੱਡੇਗਾ। ਬਠਿੰਡਾ ਤੇ ਲੁਧਿਆਣਾ ਹਵਾਈ ਅੱਡੇ ਤੋਂ ਉਡਾਣਾਂ ਚਾਲੂ ਹਨ ਜਦੋਂ ਕਿ ਪਠਾਨਕੋਟ ਤੇ ਆਦਮਪੁਰ ਹਵਾਈ ਅੱਡੇ ਤੋਂ ਇਸੇ ਮਹੀਨੇ ਉਡਾਣ ਸ਼ੁਰੂ ਹੋਵੇਗੀ। ਕੇਂਦਰੀ ਹਵਾਬਾਜ਼ੀ ਮੰਤਰਾਲੇ ਦੇ ਵੇਰਵਿਆਂ ਅਨੁਸਾਰ ਪੰਜਾਬ ਦੇ ਇਨ੍ਹਾਂ ਹਵਾਈ ਅੱਡਿਆਂ ਤੋਂ ਉਡਾਣਾਂ ਲਈ ਹਵਾਈ ਕੰਪਨੀਆਂ ਨੂੰ ਮੋਟਾ ਗੱਫਾ ਮਿਲੇਗਾ। ਕਿਸੇ ਵੀ ਹਵਾਈ ਉਡਾਣ ਵਿਚ ਪੰਜਾਹ ਫ਼ੀਸਦੀ ਸੀਟਾਂ ਖ਼ਾਲੀ ਰਹਿਣ ਦੀ ਸੂਰਤ ਵਿਚ ਇਨ੍ਹਾਂ ਸੀਟਾਂ ਦੇ ਖਰਚਾ ਸਰਕਾਰੀ ਖ਼ਜ਼ਾਨੇ ਚੁੱਕੇਗਾ। ਮਤਲਬ ਕਿ ਸਰਕਾਰ ਇਨ੍ਹਾਂ ਕੰਪਨੀਆਂ ਨੂੰ ਸਬਸਿਡੀ ਦੇ ਰੂਪ ਵਿਚ ਪੈਸਾ ਦੇਵੇਗੀ।
                      ਮੰਤਰਾਲੇ ਅਨੁਸਾਰ ਪੰਜਾਬ ਚੋਂ ਇਨ੍ਹਾਂ ਉਡਾਣਾਂ ਦੀ ਅਨੁਮਾਨਿਤ ਸਲਾਨਾ ਸਬਸਿਡੀ (ਵੀਜੀਐਫ) 21.95 ਕਰੋੜ ਬਣੇਗੀ। ਖੇਤਰੀ ਸੰਪਰਕ ਸਕੀਮ ਤਹਿਤ ਇਸ ਸਬਸਿਡੀ ਦੀ 80 ਫ਼ੀਸਦੀ ਰਾਸ਼ੀ ਕੇਂਦਰ ਅਤੇ 20 ਫ਼ੀਸਦੀ ਰਾਸ਼ੀ ਪੰਜਾਬ ਸਰਕਾਰ ਦੇਵੇਗੀ। ਮੰਤਰਾਲੇ ਦੇ ਅਨੁਮਾਨ ਅਨੁਸਾਰ ਬਠਿੰਡਾ-ਦਿੱਲੀ ਹਵਾਈ ਉਡਾਣ ਦੀ ਅਨੁਮਾਨਿਤ ਸਬਸਿਡੀ 8.46 ਕਰੋੜ ਬਣੇਗੀ ਜਦੋਂ ਕਿ ਲੁਧਿਆਣਾ ਦਿੱਲੀ ਉਡਾਣ ਦੀ 5.15 ਕਰੋੜ ਬਣੇਗੀ। ਲੁਧਿਆਣਾ ਤੋਂ ਇੱਕ ਹੋਰ ਉਡਾਣ ਮਾਰਚ ਮਹੀਨੇ ’ਚ ਹੀ ਸ਼ੁਰੂ ਹੋਣੀ ਹੈ ਜਿਸ ਦੀ ਅਨੁਮਾਨਿਤ ਰਾਸ਼ੀ 2.31 ਕਰੋੜ ਬਣਾਈ ਗਈ ਹੈ। ਪਠਾਨਕੋਟ ਦਿੱਲੀ ਉਡਾਣ ਦੀ ਅਨੁਮਾਨਿਤ ਸਬਸਿਡੀ 6.03 ਕਰੋੜ ਰੱਖੀ ਗਈ ਹੈ ਅਤੇ ਇਹ ਉਡਾਣ ਇਸੇ ਮਹੀਨੇ ਚਾਲੂ ਹੋਣੀ ਹੈ। ਬਠਿੰਡਾ ਜੰਮੂ ਉਡਾਣ ਲਈ ਹਾਲੇ ਸਬਸਿਡੀ ਰੱਖੀ ਜਾਣੀ ਹੈ। ਆਦਮਪੁਰ ਦਿੱਲੀ ਲਈ ਸਪਾਈਸ ਜੈੱਟ ਵੱਲੋਂ ਮਾਰਚ ਮਹੀਨੇ ’ਚ ਉਡਾਣ ਭਰਨੀ ਹੈ ਜਿਸ ਨੂੰ 20 ਸੀਟਾਂ ਦੀ ਸਬਸਿਡੀ ਮਿਲੇਗੀ। ਬਠਿੰਡਾ ਦਿੱਲੀ ਉਡਾਣ ਹਫ਼ਤੇ ਚੋਂ ਤਿੰਨ ਦਿਨ ਚੱਲ ਰਹੀ ਹੈ। ਦਿਨ ਵਧਦੇ ਹਨ ਤਾਂ ਸਬਸਿਡੀ ਦੀ ਰਾਸ਼ੀ ਵੀ ਵਧੇਗੀ।
            ਜਦੋਂ ਵੀ ਇਨ੍ਹਾਂ ਉਡਾਣਾਂ ’ਚ ਸੀਟਾਂ ਖ਼ਾਲੀ ਰਹਿਣਗੀਆਂ ਤਾਂ ਉਸ ਦਾ ਖਰਚਾ ਸਰਕਾਰੀ ਖ਼ਜ਼ਾਨੇ ਨੂੰ ਪੈ ਜਾਣਾ ਹੈ। ਕੇਂਦਰ ਸਰਕਾਰ ਵੱਲੋਂ ਖੇਤਰੀ ਸੰਪਰਕ ਸਕੀਮ ਤਹਿਤ 10 ਵਰ੍ਹਿਆਂ ਲਈ ਖ਼ਾਲੀ ਰਹੀਆਂ ਸੀਟਾਂ ਤੇ 80 ਫ਼ੀਸਦੀ ਸਬਸਿਡੀ ਅਤੇ ਸਰਵਿਸ ਟੈਕਸ ਛੋਟ ਤੋਂ ਇਲਾਵਾ ਦੋ ਫ਼ੀਸਦੀ ਕੇਂਦਰੀ ਟੈਕਸ ਵਿਚ ਰਿਆਇਤ ਦਿੱਤੀ ਜਾਵੇਗੀ। ਕੇਂਦਰ ਸਰਕਾਰ ਤਰਫ਼ੋਂ ਇਹ ਸਬਸਿਡੀ ਦੇਣ ਲਈ ‘ਖੇਤਰੀ ਸੰਪਰਕ ਫ਼ੰਡ’ ਕਾਇਮ ਕੀਤਾ ਗਿਆ ਹੈ। ਪੰਜਾਬ ਸਰਕਾਰ ਵੱਲੋਂ ਹਵਾਈ ਕੰਪਨੀ ਨੂੰ ਵੈਟ ਜਾਂ ਜੀਐਸਟੀ ਵਿਚ ਇੱਕ ਫ਼ੀਸਦੀ ਛੋਟ ਦਿੱਤੀ ਜਾਵੇਗੀ। ਰਾਜ ਸਰਕਾਰ ਵੱਲੋਂ ਹਵਾਈ ਅੱਡਿਆਂ ਤੇ ਲੈਂਡਿੰਗ ਅਤੇ ਪਾਰਕਿੰਗ ਮੁਫ਼ਤ ਵਿਚ ਦਿੱਤੀ ਜਾਣੀ ਹੈ। ਬਿਜਲੀ,ਪਾਣੀ ਤੇ ਹੋਰ ਸਹੂਲਤਾਂ ਰਿਆਇਤੀ ਦਰਾਂ ਤੇ ਦਿੱਤੀਆਂ ਜਾਣਗੀਆਂ।
                    ਹਵਾਈ ਅੱਡਿਆਂ ਦੀ ਸੁਰੱਖਿਆ ਦੇ ਬਦਲੇ ਵੀ ਪੰਜਾਬ ਸਰਕਾਰ ਨੂੰ ਕੋਈ ਪੈਸਾ ਨਹੀਂ ਮਿਲੇਗਾ ਕਿਉਂਕਿ ਸੁਰੱਖਿਆ ਰਾਜ ਸਰਕਾਰ ਨੇ ਮੁਫ਼ਤ ਵਿਚ ਦੇਣੀ ਹੈ। ਬਠਿੰਡਾ ਦੇ ਹਵਾਈ ਅੱਡੇ ਤੇ ਕਰੀਬ 34 ਮੁਲਾਜ਼ਮ ਤੇ ਅਧਿਕਾਰੀ ਤਾਇਨਾਤ ਕੀਤੇ ਗਏ ਹਨ। ਇਸ ਤੋਂ ਇਲਾਵਾ ਅੱਧੀ ਦਰਜਨ ਹੋਮ ਗਾਰਡ ਦੇ ਜਵਾਨ ਵੀ ਤਾਇਨਾਤ ਹਨ। ਇਨ੍ਹਾਂ ਦਾ ਖਰਚਾ ਸਮੇਤ ਤਨਖ਼ਾਹ ਕਰੀਬ ਦੋ ਕਰੋੜ ਸਲਾਨਾ ਬਣਦਾ ਹੈ। ਕੇਂਦਰ ਅਤੇ ਰਾਜ ਸਰਕਾਰ ਨੇ ਇਸ ਤੋਂ ਪਹਿਲਾਂ 40 ਕਰੋੜ ਰੁਪਏ ਹਵਾਈ ਅੱਡੇ ਦੀ ਉਸਾਰੀ ਅਤੇ ਸੜਕਾਂ ਆਦਿ ਤੇ ਖ਼ਰਚ ਕੀਤੇ ਹਨ। ਗੱਠਜੋੜ ਸਰਕਾਰ ਸਮੇਂ ਇਨ੍ਹਾਂ ਉਡਾਣਾਂ ਦੇ ਕੇਂਦਰ ਨਾਲ ਇਕਰਾਰ ਹੋਏ ਹਨ ਜੋ ‘ਆਮ ਆਦਮੀ’ ਲਈ ਕਿਸੇ ਪੱਖੋਂ ਲਾਹੇ ਵਾਲੇ ਨਹੀਂ। ਉਂਜ, ਹਵਾਈ ਸਹੂਲਤ ਨਾਲ ਕਾਰੋਬਾਰੀ ਲੋਕਾਂ ਨੂੰ ਜ਼ਰੂਰ ਫ਼ਾਇਦਾ ਮਿਲ ਰਿਹਾ ਹੈ।
            ਜਨਤਿਕ ਆਗੂ ਐਡਵੋਕੇਟ ਐਨ.ਕੇ.ਜੀਤ ਅਤੇ ਸਿਦਕ ਫੋਰਮ ਦੇ ਸਾਧੂ ਰਾਮ ਕੁਸ਼ਲਾ ਦਾ ਪ੍ਰਤੀਕਰਮ ਸੀ ਕਿ ਅਸਲ ਵਿਚ ਸਰਕਾਰਾਂ ਦੀ ‘ਆਮ ਆਦਮੀ’ ਦੇ ਬਹਾਨੇ ‘ਖ਼ਾਸ ਲੋਕਾਂ’ ਨੂੰ ਹਵਾਈ ਸਹੂਲਤ ਦੇਣ ਲਈ ਖ਼ਜ਼ਾਨੇ ਚੋਂ ਗੱਫੇ ਦਿੱਤੇ ਗਏ ਹਨ ਜਦੋਂ ਕਿ ‘ਆਮ ਆਦਮੀ’ ਨੂੰ ਦੋ ਡੰਗ ਦੀ ਰੋਟੀ ਦਾ ਫ਼ਿਕਰ ਹੈ, ਹਵਾਈ ਜਹਾਜ਼ਾਂ ਦੇ ਸੁਪਨੇ ਵੀ ਉਨ੍ਹਾਂ ਦੀ ਪਹੁੰਚ ਚੋਂ ਬਾਹਰ ਹਨ। ਪੰਜਾਬ ਸਰਕਾਰ ਸ਼ਹਿਰਾਂ ਦੇ ਬੱਸ ਅੱਡਿਆਂ ਦੀ ਹਾਲਤ ਹੀ ਸੁਧਾਰ ਦੇਵੇ, ਇਹੋ ਕਾਫ਼ੀ ਹੈ। ਉਨ੍ਹਾਂ ਦੱਸਿਆ ਕਿ ਬਠਿੰਡਾ ਦੇ ਬੱਸ ਅੱਡਾ ਟੁੱਟਿਆ ਪਿਆ ਹੈ ਜਿਸ ਵਾਸਤੇ ਖ਼ਜ਼ਾਨੇ ਦਾ ਮੂੰਹ ਨਹੀਂ ਖੁੱਲ੍ਹਿਆ ਹੈ।
                   ਖ਼ਜ਼ਾਨੇ ਬੋਝ ਤੋਂ ਬਚ ਜਾਵੇਗਾ : ਡਾਇਰੈਕਟਰ
ਸ਼ਹਿਰੀ ਹਵਾਬਾਜ਼ੀ ਵਿਭਾਗ ਪੰਜਾਬ ਦੇ ਡਾਇਰੈਕਟਰ ਕੈਪਟਨ ਅਭੈ ਚੰਦਰਾ ਦਾ ਕਹਿਣਾ ਸੀ ਕਿ 50 ਫ਼ੀਸਦੀ ਸੀਟਾਂ ਖ਼ਾਲੀ ਰਹਿਣ ਵਜੋਂ ਹੀ ਖਰਚਾ ਸਰਕਾਰ ਨੇ ਝੱਲਣਾ ਹੈ ਪ੍ਰੰਤੂ ਬਠਿੰਡਾ ਦਿੱਲੀ ਅਤੇ ਬਠਿੰਡਾ ਜੰਮੂ ਉਡਾਣ ਲਈ ਕਾਫ਼ੀ ਚੰਗਾ ਹੁੰਗਾਰਾ ਮਿਲਿਆ ਹੈ ਜਿਸ ਕਰਕੇ ਸਰਕਾਰ ਨੂੰ ਖਰਚਾ ਚੁੱਕਣ ਦੀ ਲੋੜ ਹੀ ਨਹੀਂ ਰਹਿਣੀ ਹੈ। ਉਨ੍ਹਾਂ ਦੱਸਿਆ ਕਿ ਪਠਾਨਕੋਟ ਦਿੱਲੀ ਉਡਾਣ ਇਸੇ ਮਹੀਨੇ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ।



Sunday, March 11, 2018

                   ਕਰਜ਼ਾ ਮੁਆਫ਼ੀ ਸਮਾਰੋਹ 
ਪੰਦਰਾਂ ਲੱਖ ’ਚ ਪਿਆ ‘ਇਸ਼ਕ ਦਾ ਗਿੱਧਾ’ 
                       ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਮੰਡੀ ਬੋਰਡ ਨੂੰ ‘ਇਸ਼ਕ ਦਾ ਗਿੱਧਾ’ ਪੂਰੇ 15 ਲੱਖ ਰੁਪਏ ਵਿਚ ਪਿਆ ਜੋ ਗੁਰਦਾਸ ਮਾਨ ਨੇ ਮਾਨਸਾ ਵਿਖੇ ‘ਕਰਜ਼ਾ ਮੁਆਫ਼ੀ ਸਮਾਰੋਹ’ ’ਚ ਪਾਇਆ। ਮਾਨਸਾ ਪ੍ਰਸ਼ਾਸਨ ਨੇ ਜੋ ਪਹਿਲੇ ਕਰਜ਼ਾ ਮੁਆਫ਼ੀ ਸਮਾਰੋਹ ਦੇ ਪ੍ਰਬੰਧ ਕੀਤੇ, ਉਨ੍ਹਾਂ ’ਤੇ 20 ਲੱਖ ਦਾ ਖਰਚਾ ਆਇਆ ਜਦੋਂ ਕਿ ਇਕੱਲੇ ਗੁਰਦਾਸ ਮਾਨ ਨੂੰ 15 ਲੱਖ ਦੇਣੇ ਪਏ ਹਨ। ਪੰਜਾਬ ਸਰਕਾਰ ਨੇ ਮਾਨਸਾ ਸਮਾਰੋਹ ਦੇ ਇੰਤਜ਼ਾਮ ਤੇ ਆਏ ਖ਼ਰਚੇ ਦੇ ਬਿੱਲ ਹਾਲੇ ਤੱਕ ਕਲੀਅਰ ਨਹੀਂ ਕੀਤੇ ਹਨ ਜਦੋਂ ਕਿ ਮੰਡੀ ਬੋਰਡ ਨੇ ਗੁਰਦਾਸ ਮਾਨ ਨੂੰ ਸਾਰੀ ਅਦਾਇਗੀ ਹੱਥੋਂ ਹੱਥ ਕਰ ਦਿੱਤੀ ਹੈ। ਕੈਪਟਨ ਹਕੂਮਤ ਨੇ 7 ਜਨਵਰੀ ਨੂੰ ਮਾਨਸਾ ਵਿਖੇ ‘ਕਰਜ਼ਾ ਮੁਆਫ਼ੀ ਸਮਾਰੋਹ’ ਕੀਤਾ ਸੀ ਜਿਸ ’ਚ ਗੁਰਦਾਸ ਮਾਨ ਨੂੰ ਉਚੇਚੇ ਤੌਰ ’ਤੇ ਮਨੋਰੰਜਨ ਲਈ ਸੱਦਿਆ ਗਿਆ। ਕਾਂਗਰਸ ਸਰਕਾਰ ਨੇ ਮਾਨਸਾ ਸਮਾਰੋਹ ਸਿਆਸੀ ਭੱਲ ਖੱਟਣ ਲਈ ਕੀਤੇ ਪ੍ਰੰਤੂ ਇਨ੍ਹਾਂ ਸਮਾਰੋਹਾਂ ਦਾ ਵੱਡਾ ਬੋਝ ਪੰਜਾਬ ਮੰਡੀ ਬੋਰਡ ਤੇ ਪਾ ਦਿੱਤਾ ਗਿਆ ਹੈ ਜਦੋਂ ਕਿ ਮੰਡੀ ਬੋਰਡ ਦੇ ਇਨ੍ਹਾਂ ਸਮਾਰੋਹਾਂ ਨਾਲ ਕੋਈ ਤੁਅੱਲਕ ਨਹੀਂ ਸੀ।
                    ਸੂਤਰ ਦੱਸਦੇ ਹਨ ਕਿ ਮੰਡੀ ਬੋਰਡ ਨੂੰ ਇਨ੍ਹਾਂ ਸਮਾਰੋਹਾਂ ਦੇ ਕਰੀਬ 35 ਲੱਖ ਦੇ ਬਿੱਲਾਂ ਦਾ ਖਰਚਾ ਚੁੱਕਣਾ ਪਿਆ ਹੈ ਜਿਨ੍ਹਾਂ ਵਿਚ 15 ਲੱਖ ਦਾ ਗੁਰਦਾਸ ਮਾਨ ਦਾ ਬਿੱਲ ਵੀ ਹੈ। ਹੁਣ ਸਰਕਾਰ ਤਰਫ਼ੋਂ 14 ਮਾਰਚ ਨੂੰ ਨਕੋਦਰ ਵਿਖੇ ‘ਕਰਜ਼ਾ ਮੁਆਫ਼ੀ ਸਮਾਰੋਹ’ ਕੀਤੇ ਜਾ ਰਹੇ ਹਨ ਜਿਸ ਵਿਚ ਗਾਇਕ ਮਾਸਟਰ ਸਲੀਮ ਨੂੰ ਬੁਲਾਇਆ ਜਾ ਰਿਹਾ ਹੈ। ਮਾਨਸਾ ਸਮਾਰੋਹ ਵਿਚ ਗੁਰਦਾਸ ਮਾਨ ਬੁਲਾਏ ਜਾਣ ਦੀ ਵਿਰੋਧੀ ਧਿਰਾਂ ਨੇ ਅਲੋਚਨਾ ਵੀ ਕੀਤੀ ਸੀ। ਕਿਸਾਨ ਧਿਰਾਂ ਨੇ ਆਖਿਆ ਕਿ ਸਰਕਾਰ ਨੇ ਮਨੋਰੰਜਨ ਸਟੇਜ ਲਗਾ ਕੇ ਕਿਸਾਨਾਂ ਦੇ ਜ਼ਖ਼ਮਾਂ ਤੇ ਲੂਣ ਛਿੜਕਿਆ। ਪਹਿਲੇ ਸਮਾਰੋਹਾਂ ਵਿਚ ਪੰਜ ਜ਼ਿਲ੍ਹਿਆਂ ਦੇ 47 ਹਜ਼ਾਰ ਕਿਸਾਨਾਂ ਦਾ ਕਰਜ਼ ਮੁਆਫ਼ ਕੀਤਾ ਗਿਆ ਜੋ ਕਿ ਕਰੀਬ 167 ਕਰੋੜ ਰੁਪਏ ਬਣਦਾ ਹੈ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਮਾਨਸਾ ਸਮਾਰੋਹਾਂ ਵਿਚ ਕਰਜ਼ਾ ਮੁਆਫ਼ੀ ਸਰਟੀਫਿਕੇਟਾਂ ਦੀ ਵੰਡ ਕੀਤੀ ਗਈ ਸੀ। ਜਿਨ੍ਹਾਂ ਕਿਸਾਨਾਂ ਨੂੰ ਸਰਟੀਫਿਕੇਟ ਸਟੇਜ ਤੋਂ ਵੰਡੇ ਗਏ ਸਨ, ਉਨ੍ਹਾਂ ਨੂੰ ਸਮਾਰੋਹਾਂ ਤੋਂ ਇੱਕ ਦਿਨ ਪਹਿਲਾਂ ਹੀ ਮਾਨਸਾ ਦੇ ਹੋਟਲਾਂ ਵਿਚ ਠਹਿਰਾਇਆ ਗਿਆ।
                  ਠਹਿਰ ਦੌਰਾਨ ਕਿਸਾਨਾਂ ਦੀ ਖ਼ੂਬ ਖ਼ਾਤਰਦਾਰੀ ਕੀਤੀ ਗਈ ਅਤੇ ਦੂਸਰੇ ਦਿਨ ਸਮਾਰੋਹਾਂ ਵਿਚ ਉਨ੍ਹਾਂ ਨੂੰ ਸਰਟੀਫਿਕੇਟ ਤਕਸੀਮ ਕੀਤੇ ਗਏ। ਸਮਾਰੋਹਾਂ ਵਿਚ ਗੁਰਦਾਸ ਮਾਨ ਨੇ ਕਈ ਘੰਟੇ ਸਟੇਜ ਤੋਂ ਰੰਗ ਬੰਨ੍ਹਿਆ ਜਿਸ ਦੇ ਬਦਲੇ ਵਿਚ ਮੰਡੀ ਬੋਰਡ ਨੇ 15 ਲੱਖ ਦੀ ਅਦਾਇਗੀ ਕੀਤੀ। ਲੋਕ ਸੰਪਰਕ ਵਿਭਾਗ ਨੇ ਆਰਟੀਆਈ ਸੂਚਨਾ ’ਚ ਦੱਸਿਆ ਕਿ ਵਿਭਾਗ ਨੇ ਮਾਨਸਾ ਸਮਾਰੋਹਾਂ ਤੇ ਕੋਈ ਖਰਚਾ ਨਹੀਂ ਕੀਤਾ ਹੈ ਅਤੇ ਗੁਰਦਾਸ ਮਾਨ ਦੀ ਅਦਾਇਗੀ ਵੀ ਪੰਜਾਬ ਮੰਡੀ ਬੋਰਡ ਵੱਲੋਂ ਕੀਤੀ ਗਈ ਹੈ। ਸਰਕਾਰੀ ਸੂਤਰਾਂ ਨੇ ਏਨਾ ਦੱਸਿਆ ਕਿ ਮੰਡੀ ਬੋਰਡ ਨੂੰ ਮਾਨਸਾ ਸਮਾਰੋਹਾਂ ਦੇ 35 ਲੱਖ ਦੇ ਬਿੱਲਾਂ ਦੀ ਅਦਾਇਗੀ ਕਰਨੀ ਪਈ ਹੈ। ਮਾਨਸਾ ਸਮਾਰੋਹਾਂ ਵਿਚ ਜੋ ਟੈਂਟ ਲਾਇਆ ਗਿਆ, ਉਹ ਫ਼ਰਮ ਪਟਿਆਲਾ ਤੋਂ ਸੀ ਅਤੇ ਉਸ ਦਾ ਬਿੱਲ ਕਰੀਬ 11 ਲੱਖ ਰੁਪਏ ਦਾ ਬਣਿਆ ਹੈ। ਤਿੰਨ ਲੱਖ ਦਾ ਖਰਚਾ ਲੰਗਰ ਦਾ ਰਿਹਾ ਹੈ। ਮਾਨਸਾ ਪ੍ਰਸ਼ਾਸਨ ਕੋਲ ਟੈਂਟ,ਸਾਊਂਡ,ਲੰਗਰ,ਫੁੱਲਾਂ,ਬੈਨਰਾਂ ਆਦਿ ਤੇ ਕਰੀਬ 20 ਲੱਖ ਰੁਪਏ ਦੇ ਬਿੱਲ ਪੁੱਜੇ ਹਨ। ਮੰਡੀ ਬੋਰਡ ਦੇ ਸਕੱਤਰ ਅਮਿਤ ਢਾਕਾ ਦਾ ਕਹਿਣਾ ਸੀ ਕਿ ਸਮਾਰੋਹਾਂ ਦੇ ਬਿੱਲ ਪ੍ਰਾਪਤ ਹੋ ਰਹੇ ਹਨ ਅਤੇ ਅਦਾਇਗੀ ਵੀ ਕੀਤੀ ਜਾ ਰਹੀ ਹੈ।
                               ਫ਼ੰਡ ਪ੍ਰਾਪਤ ਨਹੀਂ ਹੋਏ : ਡਿਪਟੀ ਕਮਿਸ਼ਨਰ
ਡਿਪਟੀ ਕਮਿਸ਼ਨਰ ਮਾਨਸਾ ਸ੍ਰੀ ਧਰਮਪਾਲ ਗੁਪਤਾ ਨੇ ਦੱਸਿਆ ਕਿ ਉਨ੍ਹਾਂ ਨੇ ਇੱਕ ਕਮੇਟੀ ਬਣਾ ਕੇ ਸਮਾਰੋਹਾਂ ਤੇ ਬਹੁਤ ਸੰਜਮ ਨਾਲ ਖਰਚਾ ਕੀਤਾ ਹੈ ਅਤੇ ਇਹ ਖਰਚਾ ਕਰੀਬ 20 ਲੱਖ ਰੁਪਏ ਬਣਦਾ ਹੈ ਜਿਸ ਦੇ ਬਿੱਲ ਸਰਕਾਰ ਨੂੰ ਭੇਜ ਦਿੱਤੇ ਗਏ ਹਨ। ਉਨ੍ਹਾਂ ਦੱਸਿਆ ਕਿ ਸਰਕਾਰ ਤੋਂ ਅਦਾਇਗੀ ਲਈ ਫ਼ੰਡ ਮੰਗੇ ਹਨ ਪ੍ਰੰਤੂ ਹਾਲੇ ਤੱਕ ਕੋਈ ਪੈਸਾ ਪ੍ਰਾਪਤ ਨਹੀਂ ਹੋਇਆ ਹੈ। ਗੁਰਦਾਸ ਮਾਨ ਦੀ ਅਦਾਇਗੀ ਉਨ੍ਹਾਂ ਨੇ ਨਹੀਂ ਕੀਤੀ ਹੈ।


Thursday, March 8, 2018

                       ਬਠਿੰਡਾ ਰਿਫ਼ਾਈਨਰੀ 
 ਐਤਵਾਰ ਨੂੰ ਰੇਲ ਰਸਤੇ ਪੁੱਜੇਗਾ ਰੇਤਾ ਬਜਰੀ
                         ਚਰਨਜੀਤ ਭੁੱਲਰ
ਬਠਿੰਡਾ :  ਬਠਿੰਡਾ ਰਿਫ਼ਾਈਨਰੀ ਵਿਚ ਪਹਿਲੀ ਦਫ਼ਾ ਰੇਤਾ ਬਜਰੀ ਰੇਲ ਰਸਤੇ ਪੁੱਜੇਗਾ ਅਤੇ ਰਿਫ਼ਾਈਨਰੀ ਪ੍ਰਬੰਧਕਾਂ ਨੇ ਇਸ ਰੇਲ ਰੈਕ ਨੂੰ ਅਣਲੋਡ ਕਰਨ ਲਈ ਤਿਆਰੀ ਵਿੱਢ ਦਿੱਤੀ ਹੈ। ਹਾਲਾਂਕਿ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ‘ਗੁੰਡਾ ਟੈਕਸ’ ਨੂੰ ਨਕੇਲ ਪਾਉਣ ਲਈ ਪੁਲੀਸ ਅਫ਼ਸਰਾਂ ਨੂੰ ਖੁੱਲ੍ਹੇ ਹੁਕਮ ਕੀਤੇ ਹਨ ਪ੍ਰੰਤੂ ਇਸ ਦੇ ਬਾਵਜੂਦ ਰਿਫ਼ਾਈਨਰੀ ਪ੍ਰਬੰਧਕਾਂ ਨੇ ਰੇਲ ਰਸਤੇ ਰੇਤਾ ਬਜਰੀ ਮੰਗਵਾਉਣ ਦਾ ਫ਼ੈਸਲਾ ਕਰ ਲਿਆ ਹੈ। ਅਹਿਮ ਸੂਤਰਾਂ ਅਨੁਸਾਰ ਰਿਫ਼ਾਈਨਰੀ ਅੰਦਰ ਐਤਵਾਰ ਵਾਲੇ ਦਿਨ ਰੇਤਾ ਬਜਰੀ ਪੁੱਜਣ ਦੀ ਸੰਭਾਵਨਾ ਹੈ। ਇੰਜ ਜਾਪਦਾ ਹੈ ਕਿ ਕੇਂਦਰ ਸਰਕਾਰ ਨੇ ਅਸਿੱਧੇ ਢੰਗ ਨਾਲ ਕੈਪਟਨ ਹਕੂਮਤ ਨੂੰ ਇੱਕ ਸਿਆਸੀ ਝਟਕਾ ਦੇਣ ਦੀ ਕੋਸ਼ਿਸ਼ ਕੀਤੀ ਹੋਵੇ। ਪੰਜਾਬੀ ਟ੍ਰਿਬਿਊਨ ਵੱਲੋਂ 21 ਫਰਵਰੀ ਨੂੰ ਰੇਤ ਬਜਰੀ ਰੇਲ ਰਸਤੇ ਮੰਗਵਾਏ ਜਾਣ ਦੀ ਪ੍ਰਮੁੱਖਤਾ ਨਾਲ ਖ਼ਬਰ ਪ੍ਰਕਾਸ਼ਿਤ ਕੀਤੀ ਸੀ। ਹੁਣ ਰਿਫ਼ਾਈਨਰੀ ਪ੍ਰਬੰਧਕਾਂ ਨੇ ਰੇਤਾ ਬਜਰੀ ਦੇ ਰੇਲ ਰੈਕ ਨੂੰ ਅਣਲੋਡ ਅਤੇ ਸ਼ਿਫ਼ਟ ਕਰਾਉਣ ਲਈ ਪ੍ਰਾਈਵੇਟ ਕੰਪਨੀਆਂ ਤੋਂ ਕੁਟੇਸ਼ਨਾਂ ਮੰਗ ਲਈਆਂ ਹਨ ਜਿਨ੍ਹਾਂ ਦੀ ਆਖ਼ਰੀ ਤਰੀਕ 7 ਮਾਰਚ ਸੀ।
                    ਪ੍ਰਬੰਧਕਾਂ ਨੇ ਪੱਤਰ ਵਿਚ ਰੇਲ ਰੈਕ ਰਿਫ਼ਾਈਨਰੀ ਦੇ ਅੰਦਰ ਅਤੇ ਬਾਹਰ ਅਣਲੋਡ ਕਰਨ ਦੀ ਗੱਲ ਆਖੀ ਹੈ। ਅਹਿਮ ਸੂਤਰ ਦੱਸਦੇ ਹਨ ਕਿ ਐਤਵਾਰ ਵਾਲੇ ਦਿਨ ਰੇਤਾ ਬਜਰੀ ਦਾ ਪਹਿਲਾ ਰੈਕ ਪੁੱਜਣ ਦੀ ਸੰਭਾਵਨਾ ਹੈ। ਇੱਕੋ ਰੇਲ ਰੈਕ ਵਿਚ ਕਰੀਬ 100 ਟਰੱਕਾਂ ਦਾ ਮਾਲ ਆ ਜਾਵੇਗਾ। ਰੇਲ ਰਸਤੇ ਰੇਤਾ ਬਜਰੀ ਮਹਿੰਗਾ ਪਵੇਗਾ ਜਾਂ ਸਸਤਾ, ਇਹ ਵੱਖਰਾ ਮਾਮਲਾ ਹੈ ਪ੍ਰੰਤੂ ਇਹ ਮੌਜੂਦਾ ਕੈਪਟਨ ਹਕੂਮਤ ਨੂੰ ਸਿਆਸੀ ਤੌਰ ਤੇ ਜਰੂਰ ਢਾਹ ਲਾਏਗਾ। ਵੇਰਵਿਆਂ ਅਨੁਸਾਰ ਪਿਛਲੇ ਇੱਕ ਹਫ਼ਤੇ ਤੋਂ ਰਿਫ਼ਾਈਨਰੀ ਕੋਲ ਕਿਸੇ ਵੀ ਤਰ੍ਹਾਂ ਦਾ ਗੁੰਡਾ ਟੈਕਸ ਨਹੀਂ ਹੈ ਅਤੇ ਪੁਲੀਸ ਅਧਿਕਾਰੀ ਇਸ ਮਾਮਲੇ ਤੇ ਕਾਫ਼ੀ ਸਖ਼ਤ ਹੋਏ ਹਨ। ਜਦੋਂ ਹੁਣ ਸਭ ਕੱੁਝ ਸ਼ਾਂਤ ਹੋ ਗਿਆ ਹੈ ਤਾਂ ਰਿਫ਼ਾਈਨਰੀ ਪ੍ਰਬੰਧਕਾਂ ਨੇ ਰੇਲ ਰਸਤੇ ਰੇਤਾ ਬਜਰੀ ਮੰਗਵਾਉਣ ਲਈ ਕਿਸ ਨਜ਼ਰੀਏ ਤੋਂ ਫ਼ੈਸਲਾ ਕੀਤਾ ਹੈ।
               ਸੂਤਰ ਦੱਸਦੇ ਹਨ ਕਿ ਕੇਂਦਰ ਸਰਕਾਰ ਚਾਹੁੰਦੀ ਹੈ ਕਿ ਰੇਤਾ ਬਜਰੀ ਦੇ ਮਾਮਲੇ ਵਿਚ ਮੌਜੂਦਾ ਕਾਂਗਰਸ ਸਰਕਾਰ ਨੂੰ ਸਿਆਸੀ ਸੇਕ ਲਾਇਆ ਜਾਵੇ। ਰਿਫ਼ਾਈਨਰੀ ਪ੍ਰਬੰਧਕਾਂ ਦੀ ਤਰਜੀਹ ਮੌਜੂਦਾ ਰਾਜ ਸਰਕਾਰ ਨਾਲੋਂ ਕੇਂਦਰ ਸਰਕਾਰ ਹੈ। ਹੋ ਸਕਦਾ ਹੈ ਕਿ ਕੇਂਦਰੀ ਦਬਾਓ ਮਗਰੋਂ ਹੀ ਰੇਲ ਰੈਕ ਮੰਗਵਾਏ ਜਾਣ ਦਾ ਫ਼ੈਸਲਾ ਕੀਤਾ ਗਿਆ ਹੋਵੇ।  ਦੱਸਣਯੋਗ ਹੈ ਕਿ ਅਕਾਲੀ ਹਕੂਮਤ ਵੇਲੇ ਵੀ ਰੇਤਾ ਬਜਰੀ ਰੇਲ ਰਸਤੇ ਮੰਗਵਾਏ ਜਾਣ ਦੀ ਨੌਬਤ ਨਹੀਂ ਆਈ ਸੀ। ਕੈਪਟਨ ਸਰਕਾਰ ਦੇ ਕੱੁਝ ਚੌਧਰੀਆਂ ਨੇ ਆਪਣੇ ਘਰ ਭਰਨ ਲਈ ਸਰਕਾਰ ਦੇ ਅਕਸ ਨੂੰ ਦਾਅ ਤੇ ਲਾਈ ਰੱਖਿਆ ਜੋ ਬਦਨਾਮੀ ਦਾ ਕਾਰਨ ਬਣਿਆ। ਰਿਫ਼ਾਈਨਰੀ ਅੰਦਰ ਪੈਟਰੋ ਕੈਮੀਕਲ ਪ੍ਰੋਜੈਕਟ ਦੀ ਉਸਾਰੀ ਦਾ ਕੰਮ ਸ਼ੁਰੂ ਹੋ ਚੁੱਕਾ ਹੈ।
                ਰੇਲ ਰਸਤੇ ਰੇਤਾ ਬਜਰੀ ਕਿਥੋਂ ਮੰਗਵਾਇਆ ਜਾ ਰਿਹਾ ਹੈ, ਇਸ ਦੀ ਭਿਣਕ ਨਹੀਂ ਲੱਗ ਸਕੀ ਹੈ। ਪੰਜਾਬ ਦੇ ਟਰਾਂਸਪੋਰਟਰਾਂ ਨੂੰ ਰੇਲ ਰਸਤੇ ਕੱਚਾ ਮਾਲ ਮੰਗਵਾਉਣ ਦਾ ਫੈਸਲਾ ਕਾਫ਼ੀ ਢਾਹ ਲਾਉਣ ਵਾਲਾ ਹੈ। ਸੈਂਕੜੇ ਟਰੱਕ ਮਾਲਕਾਂ ਤੋਂ ਕੰਮ ਖੱੁਸ ਜਾਵੇਗਾ। ਦੱਸਣਯੋਗ ਹੈ ਕਿ ਮੁੱਖ ਮੰਤਰੀ ਨੇ ਬੀਤੇ ਕੱਲ੍ਹ ਹਵਾਈ ਸਰਵੇਖਣ ਕਰਕੇ ਗ਼ੈਰਕਾਨੂੰਨੀ ਮਾਈਨਿੰਗ ਨੂੰ ਰੋਕਣ ਦਾ ਸਖ਼ਤ ਸੁਨੇਹਾ ਦਿੱਤਾ ਹੈ। ਪੈਟਰੋ ਕੈਮੀਕਲ ਪ੍ਰੋਜੈਕਟ ਦੇ ਉਸਾਰੀ ਅਧਿਕਾਰੀ ਸੁੱਚਾ ਸਿੰਘ ਨਾਲ ਜਦੋਂ ਗੱਲ ਕਰਨੀ ਚਾਹੀ ਤਾਂ ਉਨ੍ਹਾਂ ਮੀਟਿੰਗ ਵਿਚ ਹੋਣ ਦੀ ਗੱਲ ਆਖੀ।


Wednesday, March 7, 2018

                    ਵਿਕਾਸ ਦਾ ਪੁਆੜਾ
  ਰੁੱਖਾਂ ਦੀ ਸੁੱਖ ਨਹੀਂ ਮੰਗਦੇ ਹੁਣ ਪੰਜਾਬੀ
                       ਚਰਨਜੀਤ ਭੁੱਲਰ
ਬਠਿੰਡਾ  : ਉਹ ਦਿਨ ਚਲੇ ਗਏ ਜਦੋਂ ਪੰਜਾਬੀ ਰੁੱਖਾਂ ਦੀਆਂ ਛਾਵਾਂ ਦੀ ਸੁੱਖ ਮੰਗਦੇ ਸਨ। ਨਵੇਂ ਜ਼ਮਾਨੇ ਦੇ ‘ਵਿਕਾਸ’ ਦਾ ਸੁਨੇਹਾ ਪੰਜਾਬ ਲਈ ਫ਼ਿਕਰਮੰਦੀ ਵਾਲਾ ਹੈ। ਪੰਜਾਬ ਹੁਣ ਦਰਖਤਾਂ ’ਤੇ ਕੁਹਾੜਾ ਚਲਾਉਣ ਦੇ ਮਾਮਲੇ ’ਚ ਮੁਲਕ ਦੀ ਟੀਸੀ ਕੋਲ ਪੁੱਜ ਗਿਆ ਹੈ। ਨਵੇਂ ਤੱਥ ਹਨ ਕਿ ਪੰਜਾਬ ਦੇਸ਼ ਭਰ ਚੋਂ ਅਜਿਹਾ ਤੀਸਰਾ ਸੂਬਾ ਬਣ ਗਿਆ ਹੈ ਜਿਸ ’ਚ ਸਭ ਤੋਂ ਵੱਧ ਦਰਖਤਾਂ ਤੇ ਕੁਹਾੜਾ ਚੱਲਿਆ ਹੈ। ਵਿਕਾਸ ਪ੍ਰੋਜੈਕਟਾਂ ਦੇ ਹਿਸਾਬ ਨਾਲ ਦੇਖੀਏ ਤਾਂ ਪੰਜਾਬ ਦਾ ਦੇਸ਼ ਚੋਂ ਨੰਬਰ ਦੂਸਰਾ ਹੈ ਜਿਨ੍ਹਾਂ ਵਾਸਤੇ ਇਨ੍ਹਾਂ ਦਰਖਤਾਂ ਦੀ ਕਟਾਈ ਹੋਈ ਹੈ। ਦਰਖਤਾਂ ਦੀ ਕਟਾਈ ਵਿਚ ਪਹਿਲੇ ਨੰਬਰ ਤੇ ਮੱਧ ਪ੍ਰਦੇਸ਼ ਹੈ ਅਤੇ ਦੂਸਰੇ ਨੰਬਰ ’ਤੇ ਛੱਤੀਸਗੜ੍ਹ ਹੈ। ਪੰਜਾਬ ਦਾ ਨੰਬਰ ਤੀਜਾ ਹੈ। ਕੇਂਦਰੀ ਵਾਤਾਵਰਨ ਤੇ ਜੰਗਲਾਤ ਮੰਤਰਾਲੇ ਦੇ ਵੇਰਵਿਆਂ ਅਨੁਸਾਰ ਪੰਜਾਬ ਵਿਚ ਅਕਤੂਬਰ 1980 ਤੋਂ ਲੈ ਕੇ ਫਰਵਰੀ 2018 ਤੱਕ ‘ਵਿਕਾਸ ਪ੍ਰੋਜੈਕਟਾਂ’ ਕਰਕੇ 1.72 ਲੱਖ ਏਕੜ ਰਕਬੇ ਚੋਂ ਜੰਗਲਾਤ ਦਾ ਸਫ਼ਾਇਆ ਹੋਇਆ ਹੈ। ਮੋਟੇ ਅੰਦਾਜ਼ੇ ਅਨੁਸਾਰ 4170 ਸਰਕਾਰੀ ਤੇ ਪ੍ਰਾਈਵੇਟ ਵਿਕਾਸ ਪ੍ਰੋਜੈਕਟਾਂ ਨੇ ਪੰਜਾਬ ’ਚ ਲੰਘੇ 37 ਵਰ੍ਹਿਆਂ ਦੌਰਾਨ 5.12 ਕਰੋੜ ਦਰਖਤਾਂ ਦੀ ਬਲੀ ਲਈ ਹੈ।
                   ਇਕੱਲੇ 2017 ਦੇ ਵਰੇ੍ਹ ਦੌਰਾਨ 1415 ਏਕੜ ਰਕਬਾ ਗੈਰ ਜੰਗਲਾਤ ਵਿਚ ਤਬਦੀਲ ਹੋਇਆ ਹੈ ਜਿਸ ਦਾ ਮਤਲਬ ਹੈ ਕਿ ਕਰੀਬ ਸਵਾ ਚਾਰ ਲੱਖ ਦਰਖਤਾਂ ਦੀ ਕਟਾਈ ਹੋਈ ਹੈ। ਵੇਰਵਿਆਂ ਅਨੁਸਾਰ ਜਨਵਰੀ 2015 ਤੋਂ ਹੁਣ ਤੱਕ ਕਰੀਬ ਪੰਜਾਹ ਲੱਖ ਦਰਖਤਾਂ ਦੀ ਕਟਾਈ ਹੋਈ ਹੈ। ਲੰਘੇ ਚਾਰ ਵਰ੍ਹਿਆਂ ਦੌਰਾਨ 2280 ਏਕੜ ਰਕਬੇ ਚੋਂ ਜੰਗਲਾਤ ਘਟਿਆ ਹੈ। ਕੇਂਦਰੀ ਵਾਤਾਵਰਨ ਮੰਤਰਾਲੇ ਨੇ ਚਿੰਤਾ ਜ਼ਾਹਿਰ ਕੀਤੀ ਹੈ ਕਿ ਇਸ ਨਾਲ ਵਾਤਾਵਰਨ ਸੰਤੁਲਨ ਵਿਚ ਵਿਗਾੜ ਪੈਦਾ ਹੋਣ ਲੱਗਾ ਹੈ। ਪੰਜਾਬ ਵਿਚ ਲੰਘੇ ਵਰ੍ਹਿਆਂ ਦੌਰਾਨ ਪ੍ਰਾਈਵੇਟ ਕਾਲੋਨੀਆਂ, ਸ਼ਾਪਿੰਗ ਮਾਲਜ਼, ਸੜਕਾਂ,ਫਲਾਈ ਓਵਰਾਂ ਆਦਿ ਦਾ ਵੱਡਾ ਜਾਲ ਵਿਛਿਆ ਹੈ ਜਿਸ ਨੇ ਹਰੇ ਭਰੇ ਪੰਜਾਬ ਨੂੰ ਨਚੋੜ ਕੇ ਰੱਖ ਦਿੱਤਾ ਹੈ। ਬਦਲੇ ਵਿਚ ਨਵੇਂ ਪੌਦਿਆਂ ਲਈ ਪੈਸਾ ਵੀ ਜਮਾ ਕਰਾਇਆ ਗਿਆ ਹੈ। ਵਰ੍ਹਾ 2006 ਤੋਂ ਸਾਲ 2017 ਤੱਕ ਵਿਕਾਸ ਪ੍ਰੋਜੈਕਟਾਂ ਲਈ ਦਰਖ਼ਤ ਕੱਟਣ ਦੇ ਬਦਲੇ ਵਿਚ ਕੇਂਦਰ ਸਰਕਾਰ ਨੂੰ 768 ਕਰੋੜ ਦੇ ਫ਼ੰਡ ਪੰਜਾਬ ਚੋਂ ਜਮਾਂ ਹੋਏ ਹਨ।
        ਕੇਂਦਰੀ ਜੰਗਲਾਤ ਮੰਤਰਾਲੇ ਨੇ ਇਨ੍ਹਾਂ ਫ਼ੰਡਾਂ ਚੋਂ ਸਾਲ 2009 ਤੋਂ 2017 ਦੌਰਾਨ ਸਿਰਫ਼ 283 ਕਰੋੜ ਰੁਪਏ ਹੀ ਜਾਰੀ ਕੀਤੇ ਹਨ। ਗਰੀਨ ਭਾਰਤ ਮਿਸ਼ਨ ਤਹਿਤ ਪੰਜਾਬ ਨੂੰ ਸਿਰਫ਼ 6.11 ਕਰੋੜ ਦੇ ਫ਼ੰਡ ਮਿਲੇ ਹਨ ਜਦੋਂ ਕਿ ਕੇਂਦਰੀ ਪਲਾਂਟੇਸ਼ਨ ਪ੍ਰੋਗਰਾਮ ਤਹਿਤ ਪੰਜਾਬ ਨੂੰ ਲੰਘੇ ਤਿੰਨ ਵਰ੍ਹਿਆਂ ਤੋਂ ਧੇਲਾ ਨਹੀਂ ਮਿਲਿਆ ਹੈ। ਇੱਧਰ ਪੰਜਾਬ ਸਰਕਾਰ ਦਾ ਖ਼ਜ਼ਾਨਾ ਖ਼ਾਲੀ ਹੈ। ਕਦੇ ਸ਼ਿਵ ਕੁਮਾਰ ਬਟਾਲਵੀ ਨੇ ਰੁੱਖਾਂ ਚੋਂ ਸਨੇਹ ਦੇਖਿਆ ਸੀ। ਦਿੱਲੀ ਯੂਨੀਵਰਸਿਟੀ ਦੇ ਪੰਜਾਬੀ ਵਿਭਾਗ ਦੇ ਡਾ. ਰਵੀ ਰਵਿੰਦਰ ਦਾ ਪ੍ਰਤੀਕਰਮ ਸੀ ਕਿ ਅੱਜ ਦੇ ਰੁੱਖਾਂ ਬਿਨਾਂ ਘੋਨੇ ਹੋਏ ਪੰਜਾਬ ਨੇ ਸ਼ਿਵ ਕੁਮਾਰ ਦੀ ਰੂਹ ਨੂੰ ਜ਼ਰੂਰ ਝੰਜੋੜਾ ਦਿੱਤਾ ਹੋਵੇਗਾ। ਉਨ੍ਹਾਂ ਆਖਿਆ ਕਿ ਹਰ ਪੰਜਾਬੀ ਸੁੱਖਾਂ ਨੂੰ ਰੁੱਖਾਂ ਚੋਂ ਤਲਾਸ਼ਣਾ ਸ਼ੁਰੂ ਕਰੇ।
          ਕੰਕਰੀਟ ਦੇ ਵਿਕਾਸ ਨੇ ਪੰਜਾਬ ਦੀ ਆਬੋ ਹਵਾ ਚੋਂ ਨੀਰ ਕੱਢ ਦਿੱਤਾ ਹੈ ਅਤੇ ਸੰਘਣੀਆਂ ਛਾਵਾਂ ਖੋਹ ਲਈਆਂ ਹਨ। ਬਠਿੰਡਾ ਤੋਂ ਅੰਮ੍ਰਿਤਸਰ ਚਹੁੰ ਮਾਰਗੀ ਸੜਕ ਨੇ ਕਰੀਬ 30 ਹਜ਼ਾਰ ਦਰਖਤਾਂ ਅਤੇ ਪਾਣੀਪਤ ਜਲੰਧਰ ਸੜਕ ਨੇ 1.10 ਲੱਖ ਦਰਖਤਾਂ ਨੂੰ ਬੇਜਾਨ ਕੀਤਾ ਹੈ। ਲੁਧਿਆਣਾ ਫ਼ਿਰੋਜ਼ਪੁਰ ਸੜਕ ਕਰਕੇ 500 ਏਕੜ ਰਕਬੇ ’ਚ ਅਤੇ ਬਠਿੰਡਾ ਜ਼ੀਰਕਪੁਰ ਸੜਕ ਮਾਰਗ ਕਰਕੇ 281 ਹੈਕਟੇਅਰ ਰਕਬੇ ਚੋਂ ਜੰਗਲਾਤ ਦਾ ਸਫ਼ਾਇਆ ਹੋਇਆ ਹੈ। ਪੰਜਾਬ ਸਰਕਾਰ ਦਾ ‘ਮਾਲਵਾ ਪ੍ਰੋਜੈਕਟ’ ਮਾਰਚ 2016 ਤੋਂ ਬੰਦ ਪਿਆ ਹੈ। ਪੰਜਾਬ ਵਿਚ ਹੁਣ ‘ਨੰਨ੍ਹੀ ਛਾਂ’ ਦਾ ਹੋਕਾ ਵੀ ਕਿਧਰੇ ਨਹੀਂ ਸੁਣ ਰਿਹਾ ਹੈ। ਪੰਜਾਬ ਵਿਚ ਕਰੀਬ 20 ਹਜ਼ਾਰ ਏਕੜ ਜੰਗਲਾਤ ਦੇ ਰਕਬੇ ਵਿਚ ਨਜਾਇਜ਼ ਕਬਜ਼ੇ ਹਨ। ਕਾਫ਼ੀ ਅਰਸਾ ਪਹਿਲਾਂ ਪੰਜਾਬ ਵਿਚ ‘ਜਪਾਨ ਪ੍ਰੋਜੈਕਟ’ ਤਹਿਤ 20 ਹਜ਼ਾਰ ਵਰਗ ਹੈਕਟੇਅਰ ਰਕਬੇ ਵਿਚ ਜੰਗਲਾਤ ਲਾਇਆ ਗਿਆ ਸੀ।
                  ਮਜਬੂਰੀ ’ਚ ਕੱਟਣੇ ਪੈਂਦੇ ਹਨ : ਜੰਗਲਾਤ ਮੰਤਰੀ
ਜੰਗਲਾਤ ਮੰਤਰੀ ਸਾਧੂ ਸਿੰਘ ਧਰਮਸੋਤ ਦਾ ਕਹਿਣਾ ਸੀ ਕਿ ਪੰਜਾਬ ਵਿਚ ਵਿਕਾਸ ਲਈ ਦਰਖ਼ਤ ਕੱਟਣੇ ਮਜਬੂਰੀ ਬਣ ਗਿਆ ਹੈ ਕਿਉਂਕਿ ਲੋਕਾਂ ਨੂੰ ਸਹੂਲਤਾਂ ਦੇਣ ਦੇ ਮੱਦੇਨਜ਼ਰ ਕਰਨਾ ਪੈ ਰਿਹਾ ਹੈ। ਉਨ੍ਹਾਂ ਆਖਿਆ ਕਿ ਚਾਲੂ ਮਾਲੀ ਵਰੇ੍ਹ ਦੌਰਾਨ 2 ਕਰੋੜ ਪੌਦੇ ਲਗਾਏ ਗਏ ਹਨ ਅਤੇ ਕਰੀਬ ਇੱਕ ਹਜ਼ਾਰ ਏਕੜ ਰਕਬਾ ਨਜਾਇਜ਼ ਕਬਜ਼ਿਆਂ ਤੋਂ ਮੁਕਤ ਕਰਾਇਆ ਗਿਆ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਪੌਦੇ ਲਾਉਣ ਵਿਚ ਵੀ ਪੰਜਾਬ ਮੋਹਰੀ ਹੈ ਅਤੇ ਕੇਂਦਰ ਤੋਂ ਫ਼ੰਡ ਵੀ ਪ੍ਰਾਪਤ ਹੋ ਰਹੇ ਹਨ।

         




Monday, March 5, 2018

                       ਰਾਹ ਬਣਦੇ ਗਏ..
       ਮਹਿਲਾ ਸੰਘਰਸ਼ ਦਾ ਕੇਂਦਰ ‘ਬਿੰਦੂ’
                         ਚਰਨਜੀਤ ਭੁੱਲਰ
ਬਠਿੰਡਾ  : ‘ਧੀਏ, ਮਸ਼ਾਲ ਬਾਲ ਕੇ ਰੱਖੀ, ਰਾਤ ਨੂੰ ਮਾਰਚ ਕਰਨੈ’। ਇਹ ਆਖ਼ਰੀ ਸ਼ਬਦ ਸਨ ਬਾਪ ਮੇਘ ਰਾਜ ਦੇ, ਜੋ ਉਸ ਨੇ ਆਪਣੀ ਅੱਠਵੀਂ ਕਲਾਸ ’ਚ ਪੜ੍ਹਦੀ ਬੱਚੀ ਬਿੰਦੂ ਨੂੰ ਆਖੇ। ਪਲਾਂ ਮਗਰੋਂ ਭਾਣਾ ਵਾਪਰ ਗਿਆ ਜੋ ਲੋਕ ਚੇਤਿਆਂ ’ਚ ‘ਸੇਵੇਵਾਲਾ ਕਾਂਡ’ ਵਜੋਂ ਅੱਜ ਵੀ ਯਾਦ ਹੈ। ਕਾਲੇ ਦੌਰ ਦੇ ਸਾਲ 1991 ਦੀ ਉਹ 9 ਅਪਰੈਲ ਨੂੰ ਮਾਰੇ 18 ਜਣਿਆਂ ’ਚ ਇੱਕ ਮੇਘ ਰਾਜ ਸੀ ਜਿਸ ਨੇ ਛਾਤੀ ’ਚ ਗੋਲੀ ਖਾਧੀ। ਤਪੇ ਹੋਏ ਮਾਹੌਲ ’ਚ ਫ਼ਰੀਦਕੋਟ ਦੇ ਪਿੰਡ ਸੇਵੇਵਾਲਾ ਦੀ 13 ਵਰ੍ਹਿਆਂ ਦੀ ਬੱਚੀ ਬਿੰਦੂ ਨੇ ਬਾਪ ਦੇ ਆਖ਼ਰੀ ਬੋਲ ਪੁਗਾਉਣ ਦੀ ਜ਼ਿੱਦ ਫੜ ਲਈ। ਮਾਪੇ ਤੇ ਰਿਸ਼ਤੇਦਾਰਾਂ ਨੇ ਬੱਚੀ ਨੂੰ ਤਾੜਿਆ, ‘ਹੁਣ ਤੂੰ ਹੋਰ ਛਿੰਗੜੀ ਨਾ ਛੇੜ ਦੇਵੀਂ’। ਉਸਨੂੰ ਖ਼ੌਫ਼ ਕਦੇ ਬਿਗਾਨਾ ਨਾ ਲੱਗਿਆ ਤੇ ਉਸ ਦੇ ਰੋਹ ਦਾ ਲਾਵਾ ਖੌਲਣ ਲੱਗਾ। ਅੱਜ ਉਹੋ ਬੱਚੀ ਕਰੀਬ 30 ਵਰ੍ਹਿਆਂ ਦੀ ਹਰਿੰਦਰ ਬਿੰਦੂ ਵਜੋਂ ਜਾਣੀ ਜਾਂਦੀ ਹੈ ਜੋ ਬਾਪ ਦੇ ਆਖ਼ਰੀ ਬੋਲ ਪੁਗਾਉਣ ਲਈ ‘ਮਸ਼ਾਲ’ ਲੈ ਕੇ ਪਿੰਡ ਪਿੰਡ ਘੁੰਮ ਰਹੀ ਹੈ। ਕਿਸਾਨ ਤੇ ਮਜ਼ਦੂਰ ਅੌਰਤਾਂ ਦੀ ਚੀਸ ਉਸ ਨੂੰ ਆਪਣੀ ਲੱਗਦੀ ਹੈ।
                    ਜਦੋਂ ਇਹੋ ਅਣਹੋਣੀ ਚੀਸ ਬਾਪ ਦੇ ਛਲਨੀ ਹੋਏ ਚਿਹਰੇ ਨੂੰ ਦੇਖ ਕੇ ਪਈ ਸੀ ਤਾਂ ਉਦੋਂ ਬਾਪ ਵੱਲੋਂ ਕਹੇ ਲਫ਼ਜ਼ ‘ਮੇਰੀ ਮੌਤ ਤੇ ਨਾ ਰੋਇਓ’ ਬਿੰਦੂ ਦੇ ਜ਼ਿਹਨ ’ਚ ਆਏ। ਬਿੰਦੂ ਨੇ 1996 ਤੋਂ ਲੈ ਕੇ ਹੁਣ ਤੱਕ ਪੇਂਡੂ ਅੌਰਤਾਂ ਨੂੰ ਚੇਤਨਤਾ ਦਾ ਜਾਗ ਲਾਉਣ ਦਾ ਬੀੜਾ ਚੁੱਕਿਆ ਹੋਇਆ ਹੈ। ਦਿਨ ਤੇ ਰਾਤ ਉਸ ਲਈ ਇੱਕੋ ਹੈ। ਇੱਕੋ ਮਿਸ਼ਨ ਹੈ, ਤਬਦੀਲੀ ਦਾ ਪੁੜ ਘੁਮਾਉਣਾ। ਦੱਸਦੀ ਹੈ ਕਿ ਜਦੋਂ ਪੁੜ ਘੁੰਮੇਗਾ ਤਾਂ ਅੌਰਤ ਜਾਗੇਗੀ, ਅਰਜ਼ਾਂ ਕਰਨ ਵਾਲੇ ਹੱਥ ਫਿਰ ਮੁੱਕੇ ਬਣ ਜਾਣਗੇ। ਮੁਕਤੀ ਦਾ ਅਹਿਸਾਸ ਪੀੜਤ ਅੌਰਤਾਂ ਨੂੰ ਸੰਘਰਸ਼ੀ ਪਹੇ ਤੇ ਲੈ ਕੇ ਜਾਵੇਗਾ। ਖੋਟੇ ਭਾਗਾਂ ਦੀ ਥਾਂ ਉਹ ਹਕੂਮਤ ਨੂੰ ਕਟਹਿਰੇ ’ਚ ਖੜ੍ਹਾ ਕਰਨਗੀਆਂ। ਭਾਰਤੀ ਕਿਸਾਨ ਯੂਨੀਅਨ (ਉਗਰਾਹਾਂ) ਦੇ ਮਹਿਲਾ ਵਿੰਗ ਦੀ ਹਰਿੰਦਰ ਬਿੰਦੂ ਜ਼ਿਲ੍ਹਾ ਬਠਿੰਡਾ ਦੀ ਪ੍ਰਧਾਨ ਹੈ। ਜਦੋਂ ਸੰਘਰਸ਼ੀ ਇਕੱਠਾ ’ਚ ਉਹ ਬੋਲਦੀ ਹੈ ਤਾਂ ਸੁਣਨ ਵਾਲੀਆਂ ਅੌਰਤਾਂ ਦੇ ਅੰਦਰ ਲਾਵਾ ਫੁੱਟਣ ਲੱਗਦਾ ਹੈ। ਖ਼ੁਦਕੁਸ਼ੀ ਕਰਨ ਵਾਲੇ ਕਿਸਾਨਾਂ ਮਜ਼ਦੂਰਾਂ ਦੀਆਂ ਵਿਧਵਾਵਾਂ ਨੂੰ ਪਿੰਡ ਪਿੰਡ ਇਕੱਠਾ ਕਰਕੇ ਉਨ੍ਹਾਂ ਨੂੰ ਇੱਕ ਲੜੀ ’ਚ ਪਰੋਣ ਦਾ ਯਤਨ ਕਰਦੀ ਹੈ।
                  ਉਹ ਹੰਝੂਆਂ ਨੂੰ ਛੱਡ ਕੇ ਹਕੂਮਤਾਂ ਤੋਂ ਹੱਕ ਮੰਗਣ ਦੇ ਗੁਰ ਵੀ ਸਿਖਾਉਂਦੀ ਹੈ।  ਪੰਜਾਬ ਦੇ ਬਹੁਤੇ ਪਿੰਡਾਂ ਦੀ ਜੂਹ ਬਿੰਦੂ ਲਈ ਹੁਣ ਓਪਰੀ ਨਹੀਂ ਹੈ। ਫ਼ਰੀਦਕੋਟ ਦੇ ‘ਸਰੂਤੀ ਕਾਂਡ’ ’ਚ ਬਿੰਦੂ ਨੇ ਅੌਰਤਾਂ ਦੀ ਲਾਮਬੰਦੀ ਕੀਤੀ ਸੀ। ਕੋਈ ਥਾਣਾ ਤੇ ਕੋਈ ਜੇਲ੍ਹ ਉਸ ਲਈ ਡਰ ਨਹੀਂ ਬਣਦੀ। ਕਿਸਾਨ ਧਿਰ ਵੱਲੋਂ ਬਿੰਦੂ ਨੂੰ ਇੱਕ ਮਾਰੂਤੀ ਕਾਰ ਦਿੱਤੀ ਹੋਈ ਹੈ ਜਿਸ ਤੇ ਇੱਕ ਸਪੀਕਰ ਲੱਗਾ ਹੋਇਆ ਹੈ। ਵਰ੍ਹਿਆਂ ਤੋਂ ਉਹ ਖ਼ੁਦ ਕਾਰ ਚਲਾ ਕੇ ਪੇਂਡੂ ਪੰਜਾਬ ਦੇ ਹਰ ਗਲੀ ਮਹੱਲੇ ਘੁੰਮ ਰਹੀ ਹੈ। ਬਿੰਦੂ ਦੱਸਦੀ ਹੈ ਕਿ ਉਸ ਨੇ ਕਾਫ਼ੀ ਇਨਕਲਾਬੀ ਸਹਿਤ ਪੜ੍ਹਿਆ ਹੈ ਜਿਸ ਨੇ ਉਸ ਦੇ ਰਾਹ ਮੋਕਲੇ ਕੀਤੇ ਹਨ। ਪੁਲੀਸ ਦੇ ਲਾਠੀਚਾਰਜ ਵੀ ਬਿੰਦੂ ਨੇ ਝੱਲੇ ਹਨ। ਜਦੋਂ ਅੰਮ੍ਰਿਤਸਰ ਇੰਗਲੈਂਡ ਦੀ ਮਹਾਰਾਣੀ ਆਈ ਸੀ ਤਾਂ ਉਦੋਂ ਬਿੰਦੂ ਦਾ ਸਿੱਧਾ ਪੇਚਾ ਪੁਲੀਸ ਨਾਲ ਪਿਆ। ਪੁਲੀਸ ਵੱਲੋਂ ਵਿਰੋਧ ’ਚ ਵਰ੍ਹਾਈ ਡਾਂਗ ਬਿੰਦੂ ਨੇ ਆਪਣੇ ਹੱਥ ਵਿਚ ਫੜ ਲਈ। ਉਸ ਨੇ ਪੁਲੀਸ ਨੂੰ ਲਲਕਾਰ ਮਾਰੀ ‘ ਮਹਾਰਾਣੀ ਲਈ ਰੈੱਡ ਕਾਰਪੈਟ ਤੇ ਪੰਜਾਬ ਦੀਆਂ ਧੀਆਂ ਲਈ ਡਾਂਗਾਂ।’ ਮਾਹੌਲ ਬਿੰਦੂ ਦੇ ਪੱਖ ’ਚ ਹੋ ਗਿਆ।
                   ਚਾਰ ਭੈਣਾਂ ਤੇ ਇੱਕ ਭਰਾ ਦੀ ਭੈਣ ਬਿੰਦੂ ਕੋਲ ਜਜ਼ਬਾ ਹੈ ਜੋ ਜਬਰ ਅੱਗੇ ਲਿਫਣ ਨਹੀਂ ਦਿੰਦਾ। ਉਸ ਨੇ ਕਰੀਬ ਦੋ ਦਰਜਨ ਪੇਂਡੂ ਅੌਰਤਾਂ ਨੂੰ ਚੰਗੇ ਬੁਲਾਰੇ ਬਣਾ ਦਿੱਤਾ ਹੈ। ਇਸ ਤੋਂ ਬਿਨ੍ਹਾਂ ਅੌਰਤਾਂ ਦੇ ਘਰੇਲੂ ਮਸਲੇ ਜਦੋਂ ਪੰਚਾਇਤਾਂ ਤੋਂ ਅੜ ਜਾਂਦੇ ਹਨ ਤਾਂ ਬਿੰਦੂ ਉਨ੍ਹਾਂ ਦੀ ਤੰਦ ਵੀ ਸੁਲਝਾ ਦਿੰਦੀ ਹੈ। ਬਿੰਦੂ ਨੇ ਆਪਣਾ ਦਿਨ ਤੇ ਰਾਤ ਵੀ, ਲੋਕ ਲਹਿਰ ਦੇ ਲੇਖੇ ਲਾਈ ਹੈ। ਉਸ ਦਾ ਬੇਟਾ ਅਜੀਬ ਪੰਜਵੀਂ ਕਲਾਸ ’ਚ ਪੜ੍ਹ ਰਿਹਾ ਹੈ। ਕਿਸਾਨ ਤੇ ਮਜ਼ਦੂਰ ਧਿਰਾਂ ਨੇ ਜਦੋਂ ਪੁਲੀਸ ਨੂੰ ਪੋਲਾ ਪਾਉਣਾ ਹੁੰਦਾ ਹੈ ਤਾਂ ਅੌਰਤਾਂ ਬਿੰਦੂ ਦੀ ਅਗਵਾਈ ’ਚ ਢਾਲ ਬਣਦੀਆਂ ਹਨ।  ‘ਉਹ ਮਾਈ ਭਾਗੋ ਦੀਆਂ ਵਾਰਸ ਹਨ ਤੇ ਰਾਣੀ ਝਾਂਸੀ ਵੀ ਬਣਨਾ ਜਾਣਦੀਆਂ ਹਨ।’ ਭਾਸ਼ਣਾਂ ’ਚ ਜਦੋਂ ਬਿੰਦੂ ਇਹ ਹਵਾਲੇ ਦਿੰਦੀ ਹੈ ਤਾਂ ਜ਼ਿੰਦਾਬਾਦ ਦੇ ਨਾਅਰੇ ਗੂੰਜਦੇ ਹਨ। ਨਰਮਾ ਪੱਟੀ ਵਿਚ ਖ਼ੁਦਕੁਸ਼ੀ ਪੀੜਤ ਪ੍ਰਵਾਰਾਂ ਦੀਆਂ ਅੌਰਤਾਂ ਦੀ ਲਾਮਬੰਦੀ ’ਚ ਇਸ ਮਹਿਲਾ ਵਿੰਗ ਦਾ ਵੱਡਾ ਯੋਗਦਾਨ ਹੈ। ਉਹ ਆਖਦੀ ਹੈ ਕਿ ਅੌਰਤਾਂ ਨੂੰ ਘਰਾਂ ਦੀ ਚਾਰਦੀਵਾਰੀ ਚੋਂ ਕੱਢ ਕੇ ਸੰਘਰਸ਼ੀ ਗੁਰ ਸਿਖਾ ਕੇ ਉਨ੍ਹਾਂ ਨੂੰ ਆਪਣੀ ਮੁਕਤੀ ਦੀ ਜ਼ਿੰਦਗੀ ਜੀਣ ਸਿਖਾਉਣਾ, ਇੱਕੋ ਮਿਸ਼ਨ ਹੈ। ਪੇਂਡੂ ਅੌਰਤਾਂ ਦਾ ਬਿੰਦੂ ’ਤੇ ਵੱਡਾ ਭਰੋਸਾ, ਇਸ ਮਿਸ਼ਨ ਦੀ ਇੱਕ ਵੱਡੀ ਪ੍ਰਾਪਤੀ ਵੀ ਹੈ।



Friday, March 2, 2018

                          ਬਠਿੰਡਾ ਥਰਮਲ 
      ਵੱਜ ਗਏ ਨੇ ਤਾਲੇ, ਡੁੱਬ ਗਈਆਂ ਝੀਲਾਂ
                         ਚਰਨਜੀਤ ਭੁੱਲਰ
ਬਠਿੰਡਾ : ‘ਵੇਖਿਆ ਤੇਰਾ ਬਠਿੰਡਾ, ਨਾ ਤੋਰੀ ਨਾ ਟਿੰਢਾ’ , ਇਸ ਮਿਹਣੇ ਦੀ ਮੜਕ ਸਭ ਤੋਂ ਪਹਿਲਾਂ ਬਠਿੰਡਾ ਥਰਮਲ ਨੇ ਭੰਨੀ ਸੀ। ਜਦੋਂ ਚਿਮਨੀਆਂ ਚੋਂ ਧੂੰਆਂ ਨਿਕਲਿਆ ਤਾਂ ਚਾਰ ਚੁਫੇਰੇ ਜਗਮਗ ਹੋ ਗਈ। ਲਾਲਟੈਨਾਂ ਨੂੰ ਬੂਹੇ ਭੇੜ ਦਿੱਤੇ ਤੇ ਥਰਮਲ ਮਾਣ ਬਣਿਆ ਬਠਿੰਡਾ ਦਾ। ਸਿਆਸੀ ਧਿਰਾਂ ਨੇ ‘ਵਾਇਆ ਥਰਮਲ’ ਗੱਦੀਆਂ ਵੀ ਲਈਆਂ। ਜਦੋਂ ਸਤੰਬਰ 1974 ’ਚ ਥਰਮਲ ਦਾ ਪਹਿਲਾਂ ਯੂਨਿਟ ਚੱਲਿਆਂ ਤਾਂ ਉਦੋਂ ਇਹ ਯੂਨਿਟ ਚਲਾਉਣ ਵਾਲੇ ਬੁਆਇਲਰ ਕੰਟਰੋਲਰ ਸੁਖਰਾਮ ਸਿੰਘ ਪਰਮਾਰ ਦੱਸਦੇ ਹਨ ਕਿ ਕਿਵੇਂ ਯੂਨਿਟ ਚੱਲਣ ਮਗਰੋਂ ਖ਼ਿੱਤੇ ’ਚ ਵਿਕਾਸ ਦੀ ਪੈੜ ਚਾਲ ਸ਼ੁਰੂ ਹੋਈ। ਪਰਮਾਰ ਨੇ 16 ਜਨਵਰੀ 1975 ਨੂੰ ਥਰਮਲ ’ਚ ਜੁਆਇੰਨ ਕੀਤਾ ਸੀ। ਦੱਸਦੇ ਹਨ ਕਿ ਪੂਰੇ ਇਲਾਕੇ ਚੋਂ ਲੋਕ ਥਰਮਲ ਨੂੰ ਅਚੰਭੇ ਨਾਲ ਵੇਖਣ ਆਉਂਦੇ ਸਨ।  ਹੁਣ ਥਰਮਲ ਇਕੱਲਾ ਸਨਅਤੀ ਪ੍ਰੋਜੈਕਟ ਨਹੀਂ ਰਿਹਾ, ਬਲਕਿ ਬਠਿੰਡਾ ਦੀ ਵਿਰਾਸਤ ਬਣ ਗਿਆ ਹੈ। ਥਰਮਲ ਦੀਆਂ ਝੀਲਾਂ ਵਜੋਂ ਬਠਿੰਡਾ ਨੂ ੰ‘ਝੀਲਾਂ ਦਾ ਸ਼ਹਿਰ’ ਵੀ ਆਖਿਆ ਜਾਂਦਾ ਹੈ। ਜਦੋਂ ਪਹਿਲੀ ਦਫ਼ਾ ਥਰਮਲ ਦੀ ਚਿਮਨੀ ਚੋਂ ਧੂੰਆਂ ਨਿਕਲਿਆ ਸੀ ਉਦੋਂ ਤਤਕਾਲੀ ਮੁੱਖ ਮੰਤਰੀ ਗਿਆਨੀ ਜ਼ੈਲ ਸਿੰਘ ਆਏ ਸਨ।
                    ਜਦੋਂ ਏਸ਼ੀਅਨ ਖੇਡਾਂ ਸਨ ਤਾਂ ਉਦੋਂ ਬਿਜਲੀ ਪੈਦਾਵਾਰ ਦੇ ਇਸ ਥਰਮਲ ਨੇ ਸਾਰੇ ਰਿਕਾਰਡ ਤੋੜੇ ਅਤੇ ਕੇਂਦਰ ਸਰਕਾਰ ਨੇ ਇਸ ਥਰਮਲ ਨੂੰ 3.16 ਕਰੋੜ ਦਾ ਇਨਾਮ ਦਿੱਤਾ। ਉਸ ਮਗਰੋਂ ਬਹੁਤੇ ਸਾਰੇ ਵੱਡੇ ਛੋਟੇ ਇਨਾਮ ਇਸ ਦੀ ਝੋਲੀ ਪਏ। ਜੇਤੂ ਥਰਮਲ ਅਖੀਰ ਹਕੂਮਤ ਹੱਥੋਂ ਹਾਰ ਗਿਆ। ਬਠਿੰਡਾ ਥਰਮਲ ਉਦੋਂ ਵੀ ਚਰਚਾ ਵਿਚ ਆਇਆ ਜਦੋਂ ਇਸ ਦੇ ਪ੍ਰਦੂਸ਼ਣ ਵਜੋਂ ਸ਼ਹਿਰ ਤੇ ਰਾਖ ਦੀ ਵਰਖਾ ਹੋਣ ਲੱਗੀ ਸੀ। ਪਾਵਰਕੌਮ ਨੇ 715 ਕਰੋੜ ਦਾ ਕਰਜ਼ਾ ਚੁੱਕ ਕੇ ਬਠਿੰਡਾ ਥਰਮਲ ਦੇ ਦੋ ਯੂਨਿਟਾਂ ਦਾ ਸਾਲ 2004-07 ਵਿਚ ਅਤੇ ਤਿੰਨ ਅਤੇ ਚਾਰ ਯੂਨਿਟ ਦੀ ਸਾਲ 2010-14 ਵਿਚ ਰੈਨੋਵੇਸ਼ਨ ਕਰਾਈ ਜਿਸ ਨਾਲ ਬੁੱਢਾ ਥਰਮਲ ਮੁੜ ਜਵਾਨ ਹੋ ਗਿਆ। ਥਰਮਲ ਦੇ ਸਾਬਕਾ ਮੁੱਖ ਇੰਜੀਨੀਅਰ ਕਰਨੈਲ ਸਿੰਘ ਮਾਨ ਆਖਦੇ ਹਨ ਕਿ ਥਰਮਲ ਨੂੰ ਬੰਦ ਕਰਨ ਦਾ ਮਤਲਬ ਵਿਰਾਸਤ ਲੁੱਟਣ ਬਰਾਬਰ ਹੈ। ਬਿਨਾਂ ਕਿਸੇ ਕਾਰਨ ਬੰਦ ਕਰਨਾ ਸਮਝੋਂ ਬਾਹਰ ਹੈ। ਦੱਸਣਯੋਗ ਹੈ ਕਿ ਚੋਣਾਂ 2017 ਦੇ ਚੋਣ ਪ੍ਰਚਾਰ ਦੌਰਾਨ ਥਰਮਲ ਚੋਣ ਮੁੱਦਾ ਬਣਿਆ। ਮਨਪ੍ਰੀਤ ਬਾਦਲ ਚੋਣ ਪ੍ਰਚਾਰ ਦੌਰਾਨ ਥਰਮਲ ਦੀਆਂ ਚਿਮਨੀਆਂ ਦੇ ਬੰਦ ਹੋਏ ਧੰੂਏਂ ਦੀ ਗੱਲ ਕਰਕੇ ਗੱਚ ਭਰ ਲੈਂਦੇ ਸਨ।
                  ਚੋਣਾਂ ਸਮੇਂ ਮਨਪ੍ਰੀਤ ਬਾਦਲ ਥਰਮਲ ਦੇ ਗੇਟ ’ਤੇ ਪੁੱਜੇ। ਮੁਲਾਜ਼ਮਾਂ ਦੇ ਇਕੱਠ ਵਿਚ ਨੂੰ ਮਨਪ੍ਰੀਤ ਬਾਦਲ ਭਾਵੁਕ ਹੋ ਗਏ ‘ਇਹ ਲੋਕਾਂ ਦੇ ਹੱਡ ਮਾਸ ਨਾਲ ਬਣਿਆ ਐਂ, ਇਸ ਦੀਆਂ ਚਿਮਨੀਆਂ ਚੋਂ ਸਰਕਾਰ ਬਣਨ ’ਤੇ ਧੂੰਆਂ ਕੱਢਾਂਗੇ’। ਮੁਲਾਜ਼ਮ ਆਗੂ ਗੁਰਸੇਵਕ ਸੰਧੂ ਆਖਦੇ ਹਨ ਕਿ ਉਦੋਂ ਮੁਲਾਜ਼ਮ ਸਿਆਸੀ ਤਮਾਸ਼ੇ ਨੂੰ ਸਮਝ ਨਹੀਂ ਸਕੇ ਸਨ। ਖ਼ਜ਼ਾਨਾ ਮੰਤਰੀ ਨੇ ਹੀ ਸੱਚਮੁੱਚ ਥਰਮਲ ਬੰਦ ਕਰਕੇ ਪੂਰੇ ਪ੍ਰੋਜੈਕਟ ਦਾ  ਹੀ ਧੂੰਆਂ ਕੱਢ ਦਿੱਤਾ ਹੈ। ਮਨਪ੍ਰੀਤ ਬਾਦਲ ਹੁਣ ਤਰਕ ਦਿੰਦੇ ਹਨ ਕਿ ਥਰਮਲ ਨੂੰ ਚਲਾਉਣਾ ਘਾਟੇ ਦਾ ਸੌਦਾ ਹੈ ਤੇ ਵਾਅਦਾ ਕਰਦੇ ਹਨ ਕਿ ਕਿਸੇ ਮੁਲਾਜ਼ਮ ਨੂੰ ਬੇਰੁਜ਼ਗਾਰ ਨਹੀਂ ਕੀਤਾ ਜਾਵੇਗਾ। ਬਠਿੰਡਾ ਥਰਮਲ ਤੇ 21 ਸਤੰਬਰ 2017 ਨੂੰ ਆਖ਼ਰੀ ਸਾਹ ਲਿਆ। ਥਰਮਲ ਦੇ ਰੈਗੂਲਰ 108 ਮੁਲਾਜ਼ਮਾਂ ਦੇ ਪਹਿਲਾਂ ਤਬਾਦਲੇ ਕੀਤੇ ਅਤੇ 220 ਮੁਲਾਜ਼ਮਾਂ ਦੇ ਹੁਣ ਤਬਾਦਲੇ ਕੀਤੇ ਹਨ ਜਿਨ੍ਹਾਂ ਨੂੰ ਮੁਲਾਜ਼ਮ ਧਿਰਾਂ ਨੇ ਬਠਿੰਡਾ ਅਦਾਲਤ ਵਿਚ ਚੁਨੌਤੀ ਦਿੱਤੀ ਹੈ। ਕੱਚੇ ਪੱਕੇ ਮੁਲਾਜ਼ਮਾਂ ਤੋਂ ਬਿਨਾਂ ਲੋਕ ਪੱਖੀ ਧਿਰਾਂ ਸੜਕਾਂ ਤੇ ਚੀਕ ਰਹੀਆਂ ਹਨ ਕਿ ‘ਵਿਰਾਸਤ ਬਚਾ ਲਓ’।
                  ਸਰਕਾਰੀ ਦਰਬਾਰ ਚੋਂ ਕੋਈ ਹੱਥ ਨਹੀਂ ਉੱਠਿਆ। ਥਰਮਲ ਦੀ ਕਰੀਬ 462 ਕਰੋੜ ਦੀ ਸੰਪਤੀ ਹੈ ਅਤੇ ਕਰੀਬ 2200 ਏਕੜ ਰਕਬੇ ਵਿਚ ਲੱਗਾ ਹੋਇਆ ਹੈ। ਦਸੰਬਰ ਮਹੀਨੇ ਤੋਂ ਕੱਚੇ ਪੱਕੇ ਮੁਲਾਜ਼ਮ ਸੜਕਾਂ ਤੇ ਹਨ। ਨਾ ਕਿਸੇ ਅਫ਼ਸਰ ਨੂੰ ਰਹਿਮ ਆਇਆ ਤੇ ਨਾ ਕਿਸੇ ਨੇਤਾ ਦਾ ਮਨ ਡੋਲਿਆ ਹੈ। ਕੱਚੇ ਕਾਮੇ ਪਹਿਲੀ ਜਨਵਰੀ ਤੋਂ ਪੱਕੇ ਮੋਰਚੇ ਤੇ ਬੈਠੇ ਹਨ। ਪੱਕੇ ਮੁਲਾਜ਼ਮ ਸੜਕਾਂ ਤੇ ਕੂਕ ਰਹੇ ਹਨ।  ਖ਼ਜ਼ਾਨਾ ਮੰਤਰੀ ਨੇ 14 ਜਨਵਰੀ ਨੂੰ ਕੱਚੇ ਕਾਮਿਆਂ ਨਾਲ ਪਿੰਡ ਬਾਦਲ ਵਿਚ ਮੀਟਿੰਗ ਕੀਤੀ, ਕੋਈ ਨਤੀਜਾ ਨਾ ਨਿਕਲਿਆ। 26 ਜਨਵਰੀ ਨੂੰ ਸਿਹਤ ਮੰਤਰੀ ਬ੍ਰਹਮ ਮਹਿੰਦਰਾ ਨੂੰ ਮੁਲਾਜ਼ਮ ਮਿਲੇ ਜਿਨ੍ਹਾਂ ਨੇ ਮੈਨੇਜਮੈਂਟ ਦੇ ਵਫ਼ਦ ਨੂੰ ਬਠਿੰਡਾ ਭੇਜਿਆ। 27 ਜਨਵਰੀ ਨੂੰ ਮੈਨੇਜਮੈਂਟ ਨੇ ਇਨ੍ਹਾਂ ਕਾਮਿਆਂ ਨਾਲ ਗੱਲ। ਜ਼ਬਾਨੀ ਸਮਝੌਤਾ ਕੀਤਾ ਪ੍ਰੰਤੂ ਕੋਈ ਨੋਟੀਫ਼ਿਕੇਸ਼ਨ ਨਾ ਕੀਤਾ। ਠੇਕਾ ਮੁਲਾਜ਼ਮ ਆਗੂ ਵਿਜੇ ਕੁਮਾਰ ਦੱਸਦਾ ਹੈ ਕਿ 20 ਫਰਵਰੀ ਨੂੰ ਪਾਵਰਕੌਮ ਦੇ ਸੀਐਮਡੀ ਵੇਨੂੰ ਪ੍ਰਸ਼ਾਦ ਨੂੰ ਮਿਲੇ  ਜਿਨ੍ਹਾਂ ਨੇ ਜਲਦੀ ਮੀਟਿੰਗ ਦਾ ਭਰੋਸਾ ਦਿੱਤਾ।
                  22 ਫਰਵਰੀ ਨੂੰ ਕਾਂਗਰਸੀ ਨੇਤਾ ਹਰਵਿੰਦਰ ਲਾਡੀ ਨੇ ਮੀਟਿੰਗ ਕੀਤੀ, ਬੇਸਿੱਟਾ ਰਹੀ। ਵਿਜੇ ਕੁਮਾਰ ਨੇ ਦੱਸਿਆ ਕਿ 11 ਅਤੇ 12 ਫਰਵਰੀ ਨੂੰ ਮੁੜ ਵੀਨੂੰ ਬਾਦਲ ਨੂੰ ਮਿਲੇ ਜਿਨ੍ਹਾਂ ਨੇ ਮੁਰਦਾਬਾਦ ਬੰਦ ਕਰਨ ਦੀ ਨਸੀਹਤ ਦਿੱਤੀ। ਠੇਕਾ ਮੁਲਾਜ਼ਮ ਆਗੂ ਰਜਿੰਦਰ ਢਿਲੋਂ ਨੇ ਦੱਸਿਆ ਕਿ ਡਿਪਟੀ ਕਮਿਸ਼ਨਰ ਨੇ ਵੀ ਮੀਟਿੰਗ ਦਾ ਵਾਅਦਾ ਕੀਤਾ ਸੀ। ਦੋ ਮਹੀਨਿਆਂ ਦੌਰਾਨ ਉਨ੍ਹਾਂ ਨੂੰ ਲਾਰੇ ਤੇ ਵਾਅਦੇ ਹੀ ਮਿਲੇ ਹਨ, ਹਕੀਕਤ ਵਿਚ ਕੱੁਝ ਨਹੀਂ ਹੋਇਆ। ਉਨ੍ਹਾਂ ਨੂੰ ਰੁਜ਼ਗਾਰ ਦਾ ਭਰੋਸਾ ਮੰਗਿਆ ਪ੍ਰੰਤੂ ਪੁਲੀਸ ਨੇ ਕੇਸ ਦਰਜ ਕਰ ਦਿੱਤੇ।
                                                 ਹਾਲੇ ਲੰਮੀ ਉਮਰ ਭੋਗਣੀ ਸੀ
ਸ੍ਰੀ ਗੁਰੂ ਨਾਨਕ ਦੇਵ ਜੀ ਥਰਮਲ ਪਲਾਂਟ ਦੀ ਨੀਂਹ 1970 ਵਿਚ ਰੱਖ ਗਈ ਜਦੋਂ ਚਾਰੇ ਪਾਸੇ ਹਨੇਰਾ ਪਸਰਿਆ ਹੋਇਆ ਸੀ। 440 ਮੈਗਾਵਾਟ ਵਾਲੇ ਇਸ ਥਰਮਲ ਦਾ ਪਹਿਲਾ ਯੂਨਿਟ ਸਤੰਬਰ 1974, ਦੂਸਰਾ ਸਤੰਬਰ 1975 ਵਿਚ ਚੱਲਿਆ ਜਦੋਂ ਕਿ ਤੀਸਰਾ ਯੂਨਿਟ ਮਾਰਚ 1978 ਵਿਚ ਅਤੇ ਚੌਥਾ ਯੂਨਿਟ 1979 ਵਿਚ ਚੱਲਿਆ ਸੀ। ਥੋੜ੍ਹਾ ਅਰਸਾ ਪਹਿਲਾਂ ਕੇਂਦਰੀ ਪਾਵਰ ਰਿਸਰਚ ਇੰਸਟੀਚੂਟ ਬੰਗਲੌਰ ਨੇ ਇਸ ਦੀ ਸਟੱਡੀ ਕਰਕੇ ਇਸ ਦੇ ਨਵੀਨੀਕਰਨ ਦਾ ਸੁਝਾਓ ਦਿੱਤਾ। ਰੈਨੋਵੇਸ਼ਨ ਮਗਰੋਂ ਇਸ ਥਰਮਲ ਦੇ ਯੂਨਿਟ ਨੰਬਰ ਇੱਕ ਅਤੇ ਦੋ ਦੀ ਮਿਆਦ ਸਾਲ 2021-22 ਤੱਕ ਅਤੇ ਤਿੰਨ ਨੰਬਰ ਯੂਨਿਟ ਦੀ ਮਿਆਦ ’ਚ 2029 ਤੱਕ ਤੇ ਚਾਰ ਨੰਬਰ ਯੂਨਿਟ ਦੀ ਉਮਰ ਵਿਚ ਸਾਲ 2031 ਦਾ ਵਾਧਾ ਹੋ ਗਿਆ।    







Thursday, March 1, 2018

                                                        ਸਰਕਾਰੀ ਦਗਾ
                          ਬਾਬਿਆਂ ਜ਼ਮੀਨ ਗੁਆਈ, ਪੋਤਿਆਂ ਗੁਆਈ ਚਾਕਰੀ
                                                       ਚਰਨਜੀਤ ਭੁੱਲਰ
ਬਠਿੰਡਾ : ਏਸ ਨੂੰ ਚੰਗਾ ਹੀ ਸਮਝੋ ਕਿ ਬਾਬਾ ਅਜਮੇਰ ਸਿੰਘ ਜਹਾਨੋਂ ਚਲਾ ਗਿਆ। ਕਿਤੇ ਹੁਣ ਮੰਜੇ ਤੇ ਬੈਠਾ ਹੁੰਦਾ ਤਾਂ ਮੁੜ ਜ਼ਖ਼ਮ ਹਰੇ ਹੋ ਜਾਣੇ ਸਨ। ਸਮੇਂ ਦੀਆਂ ਸਰਕਾਰਾਂ ਨੇ ਬਾਬੇ ਨਾਲ ਜੱਗੋਂ ਤੇਰ੍ਹਵੀਂ ਕੀਤੀ। ਉਂਜ, ਬਾਬੇ ਦੇ ਪੋਤੇ ਨਾਲ ਵੀ ਘੱਟ ਨਹੀਂ ਗੁਜ਼ਾਰੀ। ਜਦੋਂ ਬਠਿੰਡਾ ਥਰਮਲ ਲਈ ਜ਼ਮੀਨ ਐਕਵਾਇਰ ਹੋਈ ਤਾਂ ਬਾਬੇ ਅਜਮੇਰ ਸਿੰਘ ਤੋਂ ਸਾਰੀ ਦੀ ਸਾਰੀ 13 ਏਕੜ ਜ਼ਮੀਨ ਖੋਹ ਲਈ। ਬਦਲੇ ਵਿਚ ਮਿਲੇ ਸਿਰਫ਼ 55 ਹਜ਼ਾਰ ਰੁਪਏ। ਪੈਲ਼ੀਆਂ ਵਾਲਾ ਕਿਸਾਨ ਪਲਾਂ ਵਿਚ ਖ਼ਾਲੀ ਹੱਥ ਕਰ ਦਿੱਤਾ। ਉਦੋਂ ਬਾਬੇ ਨੇ ਥਰਮਲ ਦੀਆਂ ਚਿਮਨੀਆਂ ਚੋਂ ਧੂੰਆਂ ਨਿਕਲਦਾ ਦੇਖ ਕੇ ਦਿਲ ਨੂੰ ਢਾਰਸ ਦਿੱਤੀ ਕਿ ਚਲੋ, ਮਲੇ ਝਾੜੀਆਂ ਤਾਂ ਲਾਟੂ ਜਗਣ ਲੱਗੇ । ‘ਜਨਤਿਕ ਹਿਤਾਂ’ ਲਈ ਦਿੱਤੀ ਪੈਲੀ ਮਗਰੋਂ ਵਲਵਲੇ ਨੇ ਬਾਬੇ ਨੂੰ ਡੋਲਣ ਨਾ ਦਿੱਤਾ। ਉਦੋਂ ਦੀ ਹਕੂਮਤ ਨੇ ਸਰਦੇ ਪੁੱਜਦੇ ਕਿਸਾਨ ਅਜਮੇਰ ਸਿੰਘ ਨੂੰ ਸਿਰਫ਼ ਦਿਲਾਸੇ ਦਿੱਤੇ। ਅੱਜ ਕੈਪਟਨ ਹਕੂਮਤ ਨੇ ਇਸ ਬਾਬੇ ਦੇ ਪੋਤੇ ਜਸਵਿੰਦਰ ਸਿੰਘ ਤੋਂ ‘ਕੱਚੀ’ ਨੌਕਰੀ ਵੀ ਖੋਹ ਲਈ ਹੈ। ਉਹ ਆਖਦਾ ਹਾਂ ਕਿ ਬਾਬੇ ਤੋਂ ਜ਼ਮੀਨ ਖੋਹ ਲਈ ਤੇ ਮੈਥੋਂ ਕੱਚੀ ਨੌਕਰੀ।
                   ਜਸਵਿੰਦਰ ਦੱਸਦਾ ਹੈ ਕਿ ਜਦੋਂ ਸੁਰਤ ਸੰਭਲੀ ਸੀ ਉਦੋਂ ਸਭਨਾਂ ਨੂੰ ਮਾਣ ਨਾਲ ਦੱਸਦਾ ਹੁੰਦਾ ਸੀ ਕਿ ਬਾਬੇ ਦੀ ਪੈਲੀ ਨੇ ਥਰਮਲ ਨੂੰ ਭਾਗ ਲਾਏ ਹਨ। ਹੁਣ ਇਨ੍ਹਾਂ ਚਿਮਨੀਆਂ ਨੂੰ ਬੁਝਾ ਕੇ ਸਰਕਾਰਾਂ ਨੇ ਉਮੀਦਾਂ ਦੇ ਆਲ੍ਹਣੇ ਤੀਲ੍ਹਾ ਤੀਲ੍ਹਾ ਕਰ ਦਿੱਤੇ ਹਨ। ਉਹ ਆਖਦਾ ਹੈ ਕਿ ‘ਕੱਚੀ ਨੌਕਰੀ’ ਵੀ ਨਹੀਂ ਦੇਣੀ ਤਾਂ ਸਰਕਾਰ ਜ਼ਮੀਨ ਵਾਪਸ ਕਰ ਦੇਵੇ। ਅੱਜ ਇਸ ਪ੍ਰਵਾਰ ਕੋਲ ਕੋਈ ਜ਼ਮੀਨ ਨਹੀਂ ਅਤੇ ਸਰਕਾਰੀ ਦਗ਼ੇ ਤੋਂ ਇਹ ਪ੍ਰਵਾਰ ਖ਼ਫ਼ਾ ਹੈ। ਐਡਵੋਕੇਟ ਅਨਿਲ ਜੈਨ ਦੱਸਦੇ ਹਨ ਕਿ ਏਦਾ ਦੇ ਦਰਜਨਾਂ ਪ੍ਰਵਾਰ ਹਨ ਜਿਨ੍ਹਾਂ ਦੇ ਦਾਦਿਆਂ ਦੀ ਜ਼ਮੀਨ ਥਰਮਲ ਲਈ ਐਕਵਾਇਰ ਹੋਈ ਸੀ ਤੇ ਹੁਣ ਪੋਤਿਆਂ ਨੂੰ ‘ਕੱਚੀ ਨੌਕਰੀ’ ਤੋਂ ਵੀ ਹੱਥ ਧੋਣੇ ਪਏ ਹਨ। ਅਮਰਪੁਰਾ ਕੋਠੇ ਦੇ ਕਈ ਨੌਜਵਾਨ ਥਰਮਲ ਬੰਦੀ ਮਗਰੋਂ ਨੌਕਰੀ ਚਲੇ ਜਾਣ ਤੇ ਦਿਲ ਛੱਡ ਬੈਠੇ ਹਨ। ਸਿਵੀਆਂ ਦੇ ਇੱਕ ਨੌਜਵਾਨ ਨੇ ਕੱੁਝ ਸਮਾਂ ਥਰਮਲ ਵਿਚ ਪਹਿਲਾਂ ਕੰਮ ਕੀਤਾ ਸੀ ਜਿਸ ਨੂੰ ਮਗਰੋਂ ਕੰਮ ਤੋਂ ਜੁਆਬ ਦੇ ਦਿੱਤਾ ਜਦੋਂ ਕਿ ਉਸ ਦੇ ਬਾਬੇ ਨੇ ਥਰਮਲ ਲਈ ਜ਼ਮੀਨ ਦਿੱਤੀ ਸੀ।
                   ਵੇਰਵਿਆਂ ਅਨੁਸਾਰ ਬਠਿੰਡਾ ਥਰਮਲ ਤੇ ਰਿਹਾਇਸ਼ੀ ਕਲੋਨੀ ਲਈ ਸਾਲ 1968-69 ਵਿਚ ਕਈ ਪੜਾਵਾਂ ’ਚ ਕਰੀਬ 2200 ਏਕੜ ਜ਼ਮੀਨ ਐਕੁਆਇਰ ਕੀਤੀ ਗਈ ਸੀ।  ਪਿੰਡ ਸਿਵੀਆਂ,ਜੋਗਾਨੰਦ ਤੋਂ ਇਲਾਵਾ ਬਠਿੰਡਾ ਦੇ ਕੋਠੇ ਅਮਰਪੁਰਾ,ਕੋਠੇ ਸੁੱਚਾ ਸਿੰਘ, ਕੋਠੇ ਕਾਮੇਕੇ ਦੇ ਸੈਂਕੜੇ ਕਿਸਾਨਾਂ ਦੀ ਜ਼ਮੀਨ ਐਕੁਆਇਰ ਹੋਈ ਸੀ। ਜ਼ਮੀਨਾਂ ਤਾਂ ਲੈ ਲਈਆਂ ਸਨ ਪ੍ਰੰਤੂ ਇਨ੍ਹਾਂ ਪ੍ਰਵਾਰਾਂ ਨੂੰ ਨੌਕਰੀਆਂ ਨਹੀਂ ਦਿੱਤੀਆਂ ਸਨ। ਏਦਾ ਦੇ ਦਰਜਨਾਂ ‘ਕੱਚੇ ਕਾਮੇ’ ਵੀ ਹਨ ਜਿਨ੍ਹਾਂ ਪੂਰੀ ਜ਼ਿੰਦਗੀ ਇਸ ਥਰਮਲ ਦੇ ਲੇਖੇ ਲਾ ਦਿੱਤੀ। ਮਹਿਮਾ ਭਗਵਾਨਾ ਦੇ ਹਰਮੇਲ ਸਿੰਘ ਦੀ ਜ਼ਿੰਦਗੀ ਦਾ ਝੋਲਾ ਅੱਜ ਖ਼ਾਲੀ ਹੈ। ਉਹ ਕਰੀਬ 20 ਵਰ੍ਹਿਆਂ ਤੋਂ ਥਰਮਲ ਵਿਚ ਤਾਇਨਾਤ ਸੀ। ਆਖਦਾ ਹੈ ਕਿ ਜ਼ਿੰਦਗੀ ਦੇ ਅਹਿਮ ਪਲ ਇਸ ਥਰਮਲ ਵਿਚ ਲਾ ਦਿੱਤੇ। ਹੁਣ ਜ਼ਿੰਦਗੀ ਦੀ ਆਖ਼ਰੀ ਮੋੜ ’ਤੇ ਥਰਮਲ ਨੇ ਪੱਲਾ ਝਾੜ ਲਿਆ ਹੈ। ਦਰ ਦਰ ਝੋਲੀ ਅੱਡਣ ਤੋਂ ਬਿਨਾਂ ਕੋਈ ਗੁਜ਼ਾਰਾ ਨਹੀਂ। ਰਾਮਚਰਨ ਸਵੀਪਰ ਆਪਣੇ ਸਿਰ ਦੇ ਚਿੱਟੇ ਵਾਲ ਦਿਖਾਉਂਦਾ ਹੈ।
                  ਆਖਦਾ ਹੈ ਕਿ 20 ਸਾਲ ਤੋਂ ਥਰਮਲ ਵਿਚ ਸਾਫ਼ ਸਫ਼ਾਈ ਕੀਤੀ। ਛੇ ਮਹੀਨੇ ਪਹਿਲਾਂ ਪਤਨੀ ਦੀ ਮੌਤ ਹੋ ਗਈ । ਉਹ ਆਖਦਾ ਹੈ ਕਿ ਹੁਣ ਸਰਕਾਰ ‘ਨਾਢੂ ਖਾਂ’ ਬਣ ਕੇ ਬੈਠ ਗਈ। ਤਾਹੀਓ ਸੜਕ ਤੇ ਬੈਠਣਾ ਪਿਆ ਹੈ। ਲਛਮਣ ਦਾਸ ਨੇ 30 ਰੁਪਏ ਤੋਂ ਥਰਮਲ ’ਚ ਨੌਕਰੀ ਸ਼ੁਰੂ ਕੀਤੀ। 22 ਵਰ੍ਹਿਆਂ ਮਗਰੋਂ ਉਸ ਨੂੰ ਹੁਣ ਛੇ ਹਜ਼ਾਰ ਮਿਲਣ ਲੱਗੇ ਸਨ। ਥਰਮਲ ’ਚ ਕੰਮ ਕਰਦੇ ਕਰਦੇ ਅੱਧੋਰਾਣੇ ਹੋ ਗਏ। ਜ਼ਿੰਦਗੀ ਦੇ ਆਖ਼ਰੀ ਪੜਾਅ ’ਤੇ ਹੁਣ ਸਰਕਾਰ ਨਾਲ ਮੜਿੱਕਣਾ ਪੈ ਗਿਆ ਹੈ। ਉਹ ਆਖਦਾ ਹੈ ਕਿ ਸੰਘਰਸ਼ੀ ਧੂੰਆਂ ਹੀ ਸਰਕਾਰਾਂ ਲਈ ਅੱਗ ਬਣੇਗਾ। ਮਹਿਮਾ ਸਰਜਾ ਦਾ ਦਰਸ਼ਨ ਸਿੰਘ ਦੱਸਦਾ ਹੈ ਕਿ ‘ਕੱਚੀ ਨੌਕਰੀ’ ਚਲੇ ਜਾਣ ਮਗਰੋਂ ਅੱਜ ਪਾਵਰਕੌਮ ਵਾਲਿਆਂ ਨੇ ਉਸ ਦਾ ਬਿਜਲੀ ਦਾ ਮੀਟਰ ਵੀ ਪੁੱਟ ਲਿਆ ਹੈ। ਬਿਜਲੀ ਬਿੱਲ ਭਰਨ ਜੋਗੇ ਪੈਸੇ ਨਹੀਂ ਹਨ। ਉਹ ਆਖਦਾ ਹੈ ਕਿ ਪੂਰੇ ਜ਼ਿੰਦਗੀ ਲੋਕਾਂ ਦੇ ਘਰਾਂ ਨੂੰ ਰੌਸ਼ਨ ਕਰਦੇ ਰਹੇ ਜਦੋਂ ਕਿ ਹੁਣ ਉਨ੍ਹਾਂ ਦੇ ਖ਼ੁਦ ਦੇ ਹਿੱਸੇ ਨ੍ਹੇਰਾ ਹੀ ਆਇਆ।
                 ਇਨ੍ਹਾਂ ਕੱਚੇ ਕਾਮਿਆਂ ਦੇ ਦੁੱਖਾਂ ਦੀ ਕੋਈ ਅਖੀਰ ਨਹੀਂ। ਕੈਪਟਨ ਸਰਕਾਰ ਨੇ ਥਰਮਲ ਬੰਦੀ ਦਾ ਫ਼ੈਸਲਾ ਕਰਕੇ ਮਾਹੌਲ ਨੂੰ ਤਪਾ ਦਿੱਤਾ ਹੈ। ਹਕੂਮਤ ਅੱਗੇ ਲਿਫਣ ਦੀ ਥਾਂ ਇਨ੍ਹਾਂ ਕਾਮਿਆਂ ਨੇ ਸੰਘਰਸ਼ੀ ਲਹਿਰ ਨਾਲ ਟੋਚਣ ਪਾ ਲਿਆ ਹੈ। ਤਾਹੀਓ ਹੁਣ ਇਹ ਕਾਮੇ ਪੂਰੇ ਦੋ ਮਹੀਨਿਆਂ ਤੋਂ ਇੱਥੋਂ ਦੇ ਸਕੱਤਰੇਤ ਅੱਗੇ ‘ਪੱਕਾ ਮੋਰਚਾ’ ਲਾਈ ਬੈਠੇ ਹਨ। ਸਰਕਾਰ ਕਾਮਿਆਂ ਦੇ ਮਨ ਬੁੱਝਣ ਦੀ ਥਾਂ ਇਨ੍ਹਾਂ ਦੀ ਅਣਦੇਖੀ ਦੇ ਰਾਹ ਪਈ ਹੈ। ਕੈਪਟਨ ਹਕੂਮਤ ਨੇ ਇਨ੍ਹਾਂ ਕਾਮਿਆਂ ਨੂੰ ਬਸੰਤ ਰੁੱਤੇ ਪਤਝੜ ਦਿਖਾ ਦਿੱਤੀ ਹੈ। ਪਹਿਲੀ ਜਨਵਰੀ ਤੋਂ ਇਹ ਮੁਲਾਜ਼ਮ ਸੰਘਰਸ਼ ਵਿਚ ਕੁੱਦੇ ਹੋਏ ਹਨ ਤੇ ਦਿਨ ਰਾਤ ਇਨ੍ਹਾਂ ਦਾ ਸੰਘਰਸ਼ ਚੱਲ ਰਿਹਾ ਹੈ। ਨਵੇਂ ਸਾਲ ਦੀ ਸ਼ੁਰੂਆਤ ਹੀ ਸੰਘਰਸ਼ੀ ਟੈਂਟ ਲਾਉਣ ਨਾਲ ਹੋਈ। ਲੋਹੜੀ ਵੀ ਸੰਘਰਸ਼ ਵਿਚ ਲੰਘੀ ਤੇ ਬਸੰਤ ਰੁੱਤ ਵੀ ਏਦਾ ਹੀ ਕੱਢ ਦਿੱਤੀ। ਹੁਣ ਹੋਲੀ ਦੇ ਰੰਗਾਂ ਤੋਂ ਵੀ ਇਨ੍ਹਾਂ ਨੂੰ ਉਮੀਦ ਨਹੀਂ। ਥਰਮਲਜ਼ ਕੰਟਰੈਕਟਰ ਵਰਕਰਜ਼ ਕੋਆਰਡੀਨੇਸ਼ਨ ਕਮੇਟੀ ਦੇ ਰਜਿੰਦਰ ਢਿਲੋਂ ਤੇ ਵਿਜੇ ਕੁਮਾਰ ਨੇ ਆਖਿਆ ਕਿ ਬਿਨਾਂ ਕੁੱਝ ਪ੍ਰਾਪਤੀ ਤੋਂ ਨਾ ਹਿੱਲਣ ਦਾ ਪ੍ਰਣ ਹੈ, ਚਾਹੇ ਕਿੰਨੇ ਹੀ ਤਿਉਹਾਰ ਸੜਕਾਂ ਤੇ ਕੱਢਣ ਪੈਣ।
                 ਜ਼ਿੰਦਗੀ ਸ਼ਰੀਕ ਬਣ ਗਈ
ਬਠਿੰਡਾ ਥਰਮਲ ਦੇ ‘ਕੱਚੇ ਕਾਮੇ’ ਹੁਣ ਦਿਨੇ ਸੰਘਰਸ਼ ਕਰਦੇ ਹਨ ਤੇ ਰਾਤਾਂ ਨੂੰ ਜ਼ਿੰਦਗੀ ਤੋਰਨ ਲਈ ਸੰਘਰਸ਼ ਕਰਦੇ ਹਨ। ਰਾਜ ਕੁਮਾਰ ਰਾਤ ਨੂੰ ਚੌਕੀਦਾਰੀ ਕਰਨ ਲੱਗਾ ਹੈ ਅਤੇ ਦਿਨੇ ਉਹ ਸੰਘਰਸ਼ ਵਿਚ ਕੁੱਦਦਾ ਹੈ। ਕਾਮਾ ਰਵੀ ਰਾਤ ਨੂੰ ਰੇਹੜੀ ਲਾਉਂਦਾ ਹੈ ਤੇ ਦਿਨੇ ਸੰਘਰਸ਼ ਤਪਾਉਂਦਾ ਹੈ। ਇਵੇਂ ਰਾਜੇਸ਼ ਕੁਮਾਰ ਇਕੱਲੀ ਨੌਕਰੀ ਨਹੀਂ, ਆਪਣੀ ਮਾਂ ਵੀ ਗੁਆ ਬੈਠਾ ਹੈ ਜੋ ਰਾਤ ਨੂੰ ਇੱਕ ਰੇਹੜੀ ਤੇ ਮਜ਼ਦੂਰੀ ਕਰਦਾ ਹੈ। ਨਿਰਮਲ ਸਿੰਘ ਰਾਤ ਵਕਤ ਕਿਰਾਏ ਤੇ ਲੈ ਕੇ ਆਟੋ ਰਿਕਸ਼ਾ ਚਲਾਉਣ ਲੱਗਾ ਹੈ ਤੇ ਦਿਨ ਵੇਲੇ ਉਹ ਰੋਸ ਮਾਰਚਾਂ ਵਿਚ ਸ਼ਾਮਿਲ ਹੁੰਦਾ ਹੈ। ਜ਼ਿੰਦਗੀ ਦਾ ਤੋਰਾ ਤੋਰਨ ਲਈ ਇਹ ਕਾਮੇ ਪਾਪੜ ਵੇਲ ਰਹੇ ਹਨ।