ਫਿਕਰਮੰਦੀ
            ਜਿੱਤ 'ਨੰਨੀ', ਚਿੰਤਾ ਵੱਡੀ
                         ਚਰਨਜੀਤ ਭੁੱਲਰ
ਬਠਿੰਡਾ :  ਲੋਕ ਸਭਾ ਹਲਕਾ ਬਠਿੰਡਾ ਵਿੱਚ ਲੋਕ ਰੋਹ ਦੇ ਝੁੱਲੇ ਝੱਖੜ ਨੇ ਸ਼੍ਰੋਮਣੀ ਅਕਾਲੀ ਦਲ ਨੂੰ ਸੋਚਾਂ ਵਿੱਚ ਪਾ ਦਿੱਤਾ ਹੈ। ਭਾਵੇਂ ਅਕਾਲੀ ਉਮੀਦਵਾਰ ਹਰਸਿਮਰਤ ਕੌਰ ਬਾਦਲ ਇਸ ਹਲਕੇ ਤੋਂ ਜਿੱਤ ਗਈ ਹੈ ਪਰ ਬਾਦਲ ਪਰਿਵਾਰ ਜਿੱਤ ਅਤੇ ਹਾਰ ਵਿਚਲੇ ਥੋੜ੍ਹੇ ਫਰਕ ਤੋਂ ਫਿਕਰਮੰਦ ਹੈ। ਨਤੀਜੇ ਦੇ ਐਲਾਨ ਮਗਰੋਂ ਕੱਲ੍ਹ ਜਦੋਂ ਮੀਡੀਆ ਪਿੰਡ ਬਾਦਲ ਪੁੱਜਾ ਤਾਂ ਬਾਦਲ ਪਰਿਵਾਰ ਦਾ ਕੋਈ ਮੈਂਬਰ ਮੀਡੀਆ ਸਾਹਮਣੇ ਨਹੀਂ ਆਇਆ। ਜ਼ਿਕਰਯੋਗ ਹੈ ਕਿ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਜੱਸੀ ਜਸਰਾਜ ਨੂੰ 87,901 ਵੋਟਾਂ ਮਿਲੀਆਂ ਹਨ ਅਤੇ 14 ਆਜ਼ਾਦ ਉਮੀਦਵਾਰਾਂ ਨੂੰ 32892 ਵੋਟਾਂ ਮਿਲੀਆਂ ਹਨ। ਬਾਦਲ ਪਰਿਵਾਰ ਇਨ੍ਹਾਂ ਤੱਥਾਂ 'ਤੇ ਧਿਆਨ ਕੇਂਦਰਿਤ ਕਰ ਰਿਹਾ ਹੈ ਕਿ ਜੇਕਰ ਇਹ ਫੈਕਟਰ ਨਾ ਹੁੰਦੇ ਤਾਂ ਸਿਆਸੀ ਨਤੀਜੇ ਕੀ ਹੋਣੇ ਸਨ। ਬਠਿੰਡਾ ਹਲਕੇ ਵਿੱਚ ਚੋਣ ਪ੍ਰਚਾਰ ਦੌਰਾਨ ਫ਼ਰੀਦਕੋਟ ਦੇ ਕਈ ਚਿਹਰੇ ਬਠਿੰਡਾ ਵਿੱਚ ਲਿਆ ਕੇ ਬਿਠਾਏ ਸਨ, ਉਸ ਤੋਂ ਸਥਾਨਕ ਅਕਾਲੀ ਔਖੇ ਸਨ, ਜਿਸ ਦਾ ਨਤੀਜਾ ਸਾਹਮਣੇ ਹੈ।
                   ਸੂਤਰਾਂ ਮੁਤਾਬਕ ਬਾਦਲ ਪਰਿਵਾਰ ਉਨ੍ਹਾਂ ਅਫ਼ਸਰਾਂ ਨੂੰ ਘੂਰੀਆਂ ਵੱਟ ਰਿਹਾ ਹੈ ਜੋ ਰੋਜ਼ਾਨਾ ਬੀਬੀ ਬਾਦਲ ਦੀ ਲੱਖਾਂ ਵੋਟਾਂ ਦੀ ਲੀਡ ਦਿਖਾ ਦਿੰਦੇ ਸਨ। ਚੋਣ ਪ੍ਰਚਾਰ ਦੌਰਾਨ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਬਠਿੰਡਾ ਹਲਕੇ ਤੋਂ ਲੰਮੀ ਗ਼ੈਰਹਾਜ਼ਰੀ ਨੇ ਵੀ ਆਪਣਾ ਰੰਗ ਦਿਖਾਇਆ ਹੈ। ਬਠਿੰਡਾ ਵਿੱਚ ਨਰਿੰਦਰ ਮੋਦੀ ਦੀ ਰੈਲੀ ਵੀ ਜਲਵਾ ਨਹੀਂ ਦਿਖਾ ਸਕੀ ਹੈ। ਅਕਾਲੀ ਦਲ ਬਠਿੰਡਾ ਹਲਕੇ ਵਿੱਚ 29316 ਵੋਟਾਂ ਨਾਲ ਪੱਛੜ ਗਿਆ ਹੈ। ਮਾਨਸਾ ਸ਼ਹਿਰ 'ਚੋਂ 23,911 ਵੋਟਾਂ ਘੱਟ ਪਈਆਂ ਹਨ। ਗੋਨਿਆਣਾ ਮੰਡੀ 'ਚੋਂ ਕਾਂਗਰਸ ਨੇ 575 ਵੋਟਾਂ ਅਤੇ ਭੁੱਚੋ ਮੰਡੀ 'ਚੋਂ ਕਾਂਗਰਸ ਨੇ 960 ਵੋਟਾਂ ਦੀ ਲੀਡ ਲਈ ਹੈ। ਮੌੜ ਮੰਡੀ ਵਿੱਚ ਅਕਾਲੀ ਦਲ ਨੂੰ ਘੱਟ ਵੋਟਾਂ ਪਈਆਂ ਹਨ। ਅਕਾਲੀ ਦਲ ਨੂੰ ਸ਼ਹਿਰੀ ਵੋਟਰਾਂ ਦੀ ਨਾਰਾਜ਼ਗੀ ਝੱਲਣੀ ਪਈ ਹੈ। ਵੱਡੀ ਸੱਟ ਪ੍ਰਾਪਰਟੀ ਟੈਕਸ ਨੇ ਮਾਰੀ ਹੈ। ਰੇਤਾ ਬਜਰੀ ਨੇ ਰਹਿੰਦੀ ਕਸਰ ਪੂਰੀ ਕਰ ਦਿੱਤੀ ਹੈ। ਸੱਤਾਧਾਰੀ ਧਿਰ ਨੂੰ ਸਰਕਾਰੀ ਮੁਲਾਜ਼ਮਾਂ ਦੇ ਰੋਹ ਦਾ ਵੀ ਸਾਹਮਣਾ ਕਰਨਾ ਪਿਆ ਹੈ। ਟਰਾਂਸਪੋਰਟਰ ਵੀ ਔਖੇ ਸਨ। ਬਠਿੰਡਾ ਸ਼ਹਿਰ ਵਿੱਚ ਸਾਬਕਾ ਅਕਾਲੀ ਕੌਂਸਲਰਾਂ ਪ੍ਰਤੀ ਨਾਰਾਜ਼ਗੀ ਵੀ ਰਹੀ ਹੈ।
                ਕਾਂਗਰਸੀ ਉਮੀਦਵਾਰ ਦੀ ਵੱਡੀ ਵੋਟ ਹਲਕਾ ਲੰਬੀ ਅਤੇ ਸਰਦੂਲਗੜ੍ਹ 'ਚੋਂ ਘਟੀ ਹੈ। ਅਕਾਲੀ ਦਲ ਨੂੰ ਸਭ ਤੋਂ ਘੱਟ ਲੀਡ ਸਿੰਜਾਈ ਮੰਤਰੀ ਦੇ ਹਲਕਾ ਮੌੜ 'ਚੋਂ ਸਿਰਫ਼ 1776 ਵੋਟਾਂ ਦੀ ਮਿਲੀ ਹੈ। ਹਲਕਾ ਭੁੱਚੋ ਵਿੱਚ ਫਰਵਰੀ, 2012 ਵਿੱਚ ਕਾਂਗਰਸੀ ਉਮੀਦਵਾਰ ਅਜੈਬ ਸਿੰਘ ਭੱਟੀ 1288 ਵੋਟਾਂ ਦੇ ਫਰਕ ਨਾਲ ਜਿੱਤੇ ਸਨ ਜਦੋਂ ਕਿ ਹੁਣ ਬੀਬਾ ਬਾਦਲ ਨੇ ਇਸ ਹਲਕੇ ਤੋਂ ਤਕਰੀਬਨ 5001 ਵੋਟਾਂ ਦੀ ਲੀਡ ਲਈ ਹੈ। ਕਈ ਕਾਂਗਰਸੀ ਆਗੂਆਂ ਨੇ ਅੰਮ੍ਰਿ੍ਰਤਸਰ ਹਲਕੇ ਵਿੱਚ ਜ਼ਿਆਦਾ ਡਿਊਟੀ ਦਿੱਤੀ ਹੈ। ਬਠਿੰਡਾ ਤੇ ਮਾਨਸਾ 'ਚੋਂ ਅਕਾਲੀ ਦਲ ਨੂੰ ਵੱਡੀ ਸੱਟ ਵੱਜਣ ਦਾ ਖਮਿਆਜ਼ਾ ਮੁੱਖ ਸੰਸਦੀ ਸਕੱਤਰ ਸਰੂਪ ਚੰਦ ਸਿੰਗਲਾ ਅਤੇ ਵਿਧਾਇਕ ਪ੍ਰੇਮ ਮਿੱਤਲ ਨੂੰ ਭੁਗਤਣਾ ਪੈ ਸਕਦਾ ਹੈ। ਹਲਕਾ ਲੰਬੀ 'ਚੋਂ ਅਕਾਲੀ ਦਲ ਨੂੰ ਸਭ ਤੋਂ ਵੱਡੀ ਲੀਡ 34,219 ਵੋਟਾਂ ਦੀ ਰਹੀ ਹੈ। ਹਲਕਾ ਬਠਿੰਡਾ ਦਿਹਾਤੀ 'ਚੋਂ ਅਕਾਲੀ ਉਮੀਦਵਾਰ ਦੀ 3573 ਵੋਟ ਘੱਟ ਗਈ ਹੈ, ਜਿਸ ਕਰਕੇ ਅਕਾਲੀ ਵਿਧਾਇਕ ਦਰਸ਼ਨ ਸਿੰਘ ਕੋਟਫੱਤਾ ਨੂੰ ਵੀ ਨਮੋਸ਼ੀ ਦਾ ਸਾਹਮਣਾ ਕਰਨਾ ਪਿਆ ਹੈ।
                    ਚੋਣਾਂ ਤੋਂ ਐਨ ਪਹਿਲਾਂ ਅਕਾਲੀ ਦਲ ਵੱਲੋਂ ਕਿਸਾਨਾਂ ਨੂੰ ਵੰਡੇ ਟਿਊਬਵੈਲ ਕੁਨੈਕਸ਼ਨਾਂ ਨੇ ਵੀ ਆਪਣਾ ਰੰਗ ਦਿਖਾਇਆ ਹੈ। ਹਲਕਾ ਬੁਢਲਾਡਾ ਤੋਂ ਅਕਾਲੀ ਦਲ ਨੂੰ 3300 ਵੋਟਾਂ ਦੀ ਲੀਡ ਮਿਲੀ ਹੈ। ਐਨ ਮੌਕੇ 'ਤੇ ਹਲਕਾ ਤਲਵੰਡੀ ਸਾਬੋ ਤੋਂ ਕਾਂਗਰਸੀ ਵਿਧਾਇਕ ਜੀਤਮਹਿੰਦਰ ਸਿੰਘ ਸਿੱਧੂ ਦੇ ਅਕਾਲੀ ਦਲ ਵਿੱਚ ਸ਼ਾਮਲ ਹੋਣ ਦਾ ਲਾਹਾ ਵੀ ਅਕਾਲੀ ਉਮੀਦਵਾਰ ਨੂੰ ਮਿਲਿਆ ਹੈ। ਕਾਂਗਰਸ ਕੋਲ ਮੌਕੇ 'ਤੇ ਇਸ ਹਲਕੇ ਵਿੱਚ ਮੂਹਰਲੀ ਕਤਾਰ ਦਾ ਕੋਈ ਨੇਤਾ ਨਹੀਂ ਸੀ। ਹਲਕਾ ਤਲਵੰਡੀ ਸਾਬੋ ਤੋਂ ਫਰਵਰੀ, 2012 ਵਿੱਚ ਜੀਤਮਹਿੰਦਰ ਸਿੰਘ ਸਿੱਧੂ 8524 ਵੋਟਾਂ ਦੇ ਫਰਕ ਨਾਲ ਜੇਤੂ ਰਿਹਾ ਸੀ ਅਤੇ ਹੁਣ ਹਰਸਿਮਰਤ ਦੀ ਲੀਡ 11,435 ਵੋਟਾਂ ਦੀ ਰਹੀ ਹੈ। ਚੋਣਾਂ ਮੌਕੇ ਬਠਿੰਡਾ ਸ਼ਹਿਰ ਦੇ ਕਾਂਗਰਸੀ ਆਗੂਆਂ ਨੂੰ ਅਕਾਲੀ ਦਲ ਵਿੱਚ ਸ਼ਾਮਲ ਕਰਨ ਦਾ ਅਕਾਲੀ ਉਮੀਦਵਾਰ ਨੂੰ ਕੋਈ ਲਾਭ ਨਹੀਂ ਹੋਇਆ ਹੈ। ਅਕਾਲੀ ਦਲ ਆਖਰੀ ਦੋ ਦਿਨਾਂ ਵਿੱਚ ਬੁਢਲਾਡਾ ਹਲਕੇ ਦੇ ਵੋਟਰਾਂ ਦਾ ਰੁਖ਼ ਮੋੜਨ ਵਿੱਚ ਕਾਮਯਾਬ ਰਿਹਾ

                             ਅਕਾਲੀ ਵਿਹੜਾ
            ਕਾਸ਼ ! ਖੁਸ਼ੀ ਨੂੰ ਖੰਭ ਲੱਗ ਜਾਂਦੇ
                             ਚਰਨਜੀਤ ਭੁੱਲਰ
ਬਠਿੰਡਾ :  ਬਠਿੰਡਾ ਹਲਕੇ ਦੇ ਅਕਾਲੀ ਵਿਹੜੇ ਵਿੱਚ ਅੱਜ ਖਾਮੋਸ਼ੀ ਛਾਈ ਰਹੀ। ਸਿਆਸੀ ਵਿਹੜਾ ਵਾਲ ਵਾਲ ਬਚ ਜਾਣ ਤੋਂ ਤਾਂ ਤਸੱਲੀ ਵਿਚ ਹੈ।  ਜਿੱਤ ਦਾ ਸਕੂਨ ਤਾਂ ਹੈ ਪਰ ਖੁਸ਼ੀ ਨੂੰ ਖੰਭ ਨਹੀਂ ਲੱਗ ਸਕੇ। ਕਿਸੇ ਚਿਹਰੇ 'ਤੇ ਪਹਿਲਾਂ ਵਾਲਾ ਜਲੌਅ ਨਹੀਂ ਸੀ। ਖ਼ਾਸ ਕਰਕੇ ਬਠਿੰਡਾ ਤੇ ਮਾਨਸਾ ਸ਼ਹਿਰ ਵਿੱਚ।  ਬੀਬਾ ਹਰਸਿਮਰਤ ਕੌਰ ਬਾਦਲ ਨੂੰ ਸਭ ਦੱਬੀ ਆਵਾਜ਼ ਮੁਬਾਰਕਾਂ ਦੇ ਰਹੇ ਸਨ। ਪਿੰਡ ਬਾਦਲ ਵਿੱਚ ਬੀਬਾ ਬਾਦਲ ਦੀ ਜਿੱਤ ਦੀ ਖੁਸ਼ੀ ਦੇ ਜਸ਼ਨ ਤਾਂ ਮਨਾਏ ਗਏ ਪਰ ਸਾਲ 2009 ਲੋਕ ਸਭਾ ਚੋਣਾਂ ਦੀ ਜਿੱਤ ਵਾਲੇ ਜਸ਼ਨ ਵਾਲੀ ਐਤਕੀਂ ਪੈਲ ਨਹੀਂ ਪੈ ਸਕੀ। ਜਦੋਂ ਚੋਣ ਨਤੀਜੇ ਆਏ ਤਾਂ ਪਹਿਲਾਂ ਗਿਣਤੀ ਕੇਂਦਰ ਦੇ ਬਾਹਰ ਖੜ੍ਹੇ ਢੋਲੀ ਇਕੱਲੇ ਹੀ ਨੱਚੇ। ਢੋਲੀ ਨਹੀਂ ਜਾਣਦੇ ਸਨ ਕਿ ਐਤਕੀਂ ਅਕਾਲੀ ਉਮੀਦਵਾਰ ਦੀ ਲੀਡ 19,874 ਵੋਟਾਂ ਦੀ ਹੈ ਜੋ  ਸਾਲ 2009 ਵਿੱਚ 1,20,960 ਵੋਟਾਂ ਦੀ ਸੀ। ਬਠਿੰਡਾ-ਮਾਨਸਾ ਦੇ ਵਿਕਾਸ 'ਤੇ ਪੂਰੇ 3500 ਕਰੋੜ ਵੀ ਖਰਚੇ, ਫਿਰ ਵੀ ਲੀਡ ਵਿੱਚ ਕਮੀ ਇੱਕ ਲੱਖ ਵੋਟਾਂ ਦੀ ਆ ਗਈ। ਚੋਣ ਨਤੀਜੇ ਤੋਂ ਪਹਿਲਾਂ ਹੀ ਅਕਾਲੀ ਦਲ ਦੇ ਕਾਫ਼ੀ ਸ਼ਹਿਰੀ ਆਗੂ ਗਿਣਤੀ ਕੇਂਦਰਾਂ ਵਿੱਚੋਂ ਚਲੇ ਗਏ ਸਨ। ਜਦੋਂ ਸ਼ਹਿਰੀ ਨਾ ਦਿੱਖੇ ਤਾਂ ਜਿੱਤ ਦੀ ਖੁਸ਼ੀ ਵਿੱਚ ਪਿੰਡਾਂ ਤੋਂ ਆਏ ਵਰਕਰਾਂ ਨੇ ਭੰਗੜਾ ਪਾਇਆ। ਬਾਦਲ ਪਰਿਵਾਰ ਦਾ ਦਾਅਵਾ ਸੀ ਕਿ ਐਤਕੀਂ ਦੋ ਲੱਖ ਵੋਟਾਂ ਦੇ ਫਰਕ ਨਾਲ ਚੋਣ ਜਿੱਤਣਗੇ।
                     ਪੰਜਾਬ ਦੇ ਜੇਤੂ ਅਕਾਲੀ ਉਮੀਦਵਾਰਾਂ ਵਿੱਚੋਂ ਸਭ ਤੋਂ ਘੱਟ ਲੀਡ ਬੀਬਾ ਬਾਦਲ ਦੀ ਹੈ। ਚੋਣ ਜਿੱਤਣ ਮਗਰੋਂ ਅਕਾਲੀ ਵਰਕਰਾਂ ਨੇ ਇੱਕ ਦੂਜੇ 'ਤੇ ਗੁਲਾਲ ਵੀ ਪਾਇਆ ਅਤੇ ਜਿੱਤ ਦੀ ਖੁਸ਼ੀ ਵਿੱਚ ਨਾਅਰੇ ਵੀ ਲਗਾਏ। ਬਾਦਲ ਪਰਿਵਾਰ ਨੂੰ ਐਤਕੀਂ ਜਿੱਤ ਦਾ ਧਰਵਾਸ ਤਾਂ ਹੈ  ਪਰ ਲੀਡ ਵਿੱਚ ਇੱਕ ਲੱਖ ਵੋਟਾਂ ਦੀ ਕਮੀ ਹੋਣ ਦਾ ਗਮ ਵੀ ਹੈ। ਮਨ ਬੁਝੇ ਹੋਣ ਕਰਕੇ ਭੰਗੜਾ ਪਾਉਣ ਵਾਲਿਆਂ ਦਾ ਐਤਕੀਂ ਢੋਲੀ ਨਾਲ ਤਾਲ ਨਹੀਂ ਮਿਲ ਰਿਹਾ ਸੀ। ਮਾਨਸਾ ਸ਼ਹਿਰ ਵਿੱਚ ਅਕਾਲੀ ਆਗੂਆਂ ਨੇ ਖੁਸ਼ੀ ਦਾ ਪ੍ਰਗਟਾਵਾ ਤਾਂ ਕੀਤਾ ਪਰ ਉਨ੍ਹਾਂ ਦੇ ਚਿਹਰੇ ਤੋਂ ਵੋਟ ਘਟਣ ਦਾ ਪਛਤਾਵਾਂ ਵੀ ਝਲਕ ਰਿਹਾ ਸੀ।ਪਿੰਡ ਬਾਦਲ ਵਿੱਚ ਮੁਬਾਰਕਾਂ ਦੇਣ ਵਾਲੇ ਸੈਂਕੜੇ ਆਗੂ ਤੇ ਵਰਕਰ ਤਾਂ ਬਾਦਲ ਪਰਿਵਾਰ ਦੇ ਅੰਗ ਸੰਗ ਜੁੜੇ ਪਰ ਪਿਛਲੀਆਂ ਜਿੱਤਾਂ ਵਾਲਾ ਨਜ਼ਾਰਾ ਬੱਝ ਨਹੀਂ ਰਿਹਾ ਸੀ। ਹਲਕਾ ਲੰਬੀ ਦੇ ਅਕਾਲੀ ਗਿਣਤੀ ਕੇਂਦਰਾਂ ਵਿੱਚੋਂ ਚਿਹਰੇ 'ਤੇ ਜਲੌਅ ਲੈ ਕੇ ਮੁੜੇ। ਲੰਬੀ ਤੇ ਸਰਦੂਲਗੜ੍ਹ ਵਿਚ ਵੱਜਦੇ ਢੋਲ ਬਠਿੰਡਾ ਤੇ ਮਾਨਸਾ ਦੇ ਅਕਾਲੀ ਆਗੂਆਂ ਦਾ ਮੂੰਹ ਚਿੜਾ ਰਹੇ ਸਨ। ਇਨ੍ਹਾਂ ਸ਼ਹਿਰਾਂ ਦੇ ਅਕਾਲੀ ਵਿਹੜਿਆਂ ਵਿੱਚ ਖ਼ਾਮੋਸ਼ੀ ਛਾਈ ਹੋਈ ਹੈ।
                       ਮਨਪ੍ਰੀਤ ਬਾਦਲ ਵੀ ਅੱਜ ਪਛਤਾਵੇ ਦੀ ਪੰਡ ਲੈ ਕੇ ਪਿੰਡ ਬਾਦਲ ਵਿੱਚ ਵੜੇ। ਐਨ ਜਿੱਤ ਦੇ ਨੇੜੇ ਪੁੱਜ ਕੇ ਵੀ ਉਹ ਹਾਰ ਗਏ। ਮਨਪ੍ਰੀਤ ਬਾਦਲ ਦਾ ਪ੍ਰਤੀਕਰਮ ਸੀ ਕਿ ਉਸ ਦੀ ਨੈਤਿਕ ਜਿੱਤ ਹੋਈ ਹੈ। ਉਹ ਇਹ ਨਹੀਂ ਜਾਣਦੇ ਕਿ ਨੈਤਿਕ ਜਿੱਤ ਸੰਸਦ ਦੀ ਪੌੜੀ ਨਹੀਂ ਚੜਾਉਂਦੀ। ਹੁਣ ਕਾਂਗਰਸੀ ਆਖਦੇ ਹਨ ਕਿ ਮਨਪ੍ਰੀਤ ਨੇ ਪੈਸੇ ਖ਼ਰਚਣ ਵਿਚ ਕੰਜੂਸੀ ਵਰਤੀ। ਦੋ ਦਿਨਾਂ ਤੋਂ ਪਾਠ ਤਾਂ ਦੋਹਾਂ ਬਾਦਲਾਂ ਦੇ ਘਰਾਂ ਵਿਚ ਚੱਲ ਰਹੇ ਸਨ ਪੰ੍ਰਤੂ ਬੀਬਾ ਬਾਦਲ ਤੇ ਮਿਹਰ ਹੋਈ।  ਬਠਿੰਡਾ ਤੇ ਮਾਨਸਾ ਦੇ ਕਾਂਗਰਸੀ ਆਗੂਆਂ ਨੂੰ ਮਨਪ੍ਰੀਤ ਬਾਦਲ ਦੇ ਹਾਰਨ ਦਾ ਓਨਾ ਦੁੱਖ ਨਹੀਂ ਹੈ ਜਿੰਨਾ ਚਾਅ ਉਨ੍ਹਾਂ ਨੂੰ ਇਨ੍ਹਾਂ ਦੋਹਾਂ ਸ਼ਹਿਰਾਂ ਵਿੱਚੋਂ ਕਾਂਗਰਸ ਦੀ ਵਧੀ ਵੋਟ ਦਾ ਹੈ। ਬਠਿੰਡਾ ਸ਼ਹਿਰ ਦੇ ਅਕਾਲੀ ਨੇਤਾ ਤਾਂ ਅੱਜ ਗਿਣਤੀ ਕੇਂਦਰਾਂ ਵਿੱਚ ਆਉਣ ਮਗਰੋਂ ਹੀ ਘਟੀ ਵੋਟ ਦਾ ਚਿੰਤਨ ਕਰਨ ਵਿੱਚ ਜੁਟ ਗਏ ਸਨ।
                                         ਬਾਦਲਾਂ ਨੇ ਬਚਾਈ ਲੋਕ ਰੋਹ ਦੇ ਝੱਖੜ 'ਚੋਂ ਬਠਿੰਡਾ ਸੀਟ
ਸ਼੍ਰੋਮਣੀ ਅਕਾਲੀ ਦਲ ਬਠਿੰਡਾ ਸੰਸਦੀ ਹਲਕੇ ਦੀ ਵੱਕਾਰੀ ਸੀਟ ਨੂੰ ਸਥਾਪਤੀ ਵਿਰੋਧੀ ਲਹਿਰ ਦੇ ਝੱਖੜ 'ਚੋਂ ਮਸਾਂ ਹੀ ਬਚਾ ਸਕਿਆ ਹੈ। ਅਕਾਲੀ ਉਮਦੀਵਾਰ ਹਰਸਿਮਰਤ ਕੌਰ ਬਾਦਲ ਨੇ ਆਪਣੇ ਵਿਰੋਧੀ ਕਾਂਗਰਸ ਦੇ ਉਮੀਦਵਾਰ ਮਨਪ੍ਰੀਤ ਸਿੰਘ ਬਾਦਲ ਨੂੰ 19,395 ਵੋਟਾਂ ਦੇ ਫਰਕ ਨਾਲ ਹਰਾ ਦਿੱਤਾ ਹੈ। ਸੰਸਦੀ ਹਲਕਾ ਬਠਿੰਡਾ ਵਿੱਚ 11,74,615 ਵੋਟਾਂ ਪਈਆਂ ਸਨ। ਇਨ੍ਹਾਂ ਵਿੱਚੋਂ ਸ਼੍ਰੋਮਣੀ ਅਕਾਲੀ ਦਲ ਦੀ ਉਮੀਦਵਾਰ ਹਰਸਿਮਰਤ ਕੌਰ ਬਾਦਲ ਨੂੰ 5,14,727 ਵੋਟਾਂ ਜਦੋਂਕਿ ਕਾਂਗਰਸੀ ਉਮੀਦਵਾਰ ਮਨਪ੍ਰੀਤ ਸਿੰਘ ਬਾਦਲ ਨੂੰ 4,95,332 ਵੋਟਾਂ ਮਿਲੀਆਂ ਹਨ।ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਜਸਰਾਜ ਸਿੰਘ ਲੌਂਗੀਆਂ ਨੂੰ 87,901 ਵੋਟਾਂ ਮਿਲੀਆਂ ਹਨ।
                   ਬਸਪਾ ਉਮੀਦਵਾਰ ਕੁਲਦੀਪ ਸਿੰਘ ਨੂੰ 13,732 ਅਤੇ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਉਮੀਦਵਾਰ ਰਜਿੰਦਰ ਸਿੰਘ ਨੂੰ ਸਿਰਫ਼ 1960 ਵੋਟਾਂ ਮਿਲੀਆਂ ਹਨ। ਪਿੰਡ ਬਾਦਲ ਦੇ ਆਜ਼ਾਦ ਉਮੀਦਵਾਰ ਮਨਪ੍ਰੀਤ ਸਿੰਘ ਬਾਦਲ (ਚੋਣ ਨਿਸ਼ਾਨ ਪਤੰਗ) ਨੂੰ 4618 ਵੋਟਾਂ ਮਿਲੀਆਂ ਹਨ। ਕੋਈ ਪਸੰਦ ਨਹੀਂ (ਨੋਟਾ) ਦਾ ਬਟਨ 4699 ਵੋਟਰਾਂ ਨੇ ਦਬਾਇਆ। ਬਠਿੰਡਾ ਹਲਕੇ ਦੇ ਪੇਂਡੂ ਵੋਟਰਾਂ ਨੇ ਅਕਾਲੀ ਉਮੀਦਵਾਰ ਹਰਸਿਮਰਤ ਕੌਰ ਬਾਦਲ ਦਾ ਸਾਥ ਦਿੱਤਾ ਜਦੋਂਕਿ ਸ਼ਹਿਰੀ ਵੋਟਰਾਂ ਨੇ ਕਾਂਗਰਸੀ ਉਮੀਦਵਾਰ ਮਨਪ੍ਰੀਤ ਸਿੰਘ ਬਾਦਲ ਦੀ ਬਾਂਹ ਫੜੀ।

                              ਨਵਾਂ ਰਾਹ
          ਰੌਕ ਸਟਾਰ ਬਣਿਆ ਡੇਰਾ ਮੁਖੀ
                            ਚਰਨਜੀਤ ਭੁੱਲਰ
ਬਠਿੰਡਾ :  ਡੇਰਾ ਸਿਰਸਾ ਦਾ ਮੁਖੀ ਹੁਣ ਕਿਸੇ ਪੌਪ ਸਟਾਰ ਤੋਂ ਘੱਟ ਨਹੀਂ ਹੈ। ਡੇਰਾ ਮੁਖੀ ਦੀ ਨਵੀਂ ਐਲਬਮ 'ਹਾਈਵੇ ਲਵ ਚਾਰਜਰ' ਹੁਣ ਰਿਲੀਜ਼ ਹੋਈ ਹੈ ਜਿਸ ਵਿਚ ਅੰਦਾਜ਼ ਵੀ ਪੱਛਮੀ ਹੈ ਅਤੇ ਧੁਨਾਂ ਵੀ। ਸਤਿਸੰਗ,  ਪ੍ਰਵਚਨਾਂ ਤੇ ਭਜਨਾਂ ਤੋਂ ਮਗਰੋਂ ਰੂਹਾਨੀ ਮੁਖੀ ਦਾ ਇਹ ਨਵਾਂ ਰੂਪ ਹੈ। ਇਸ ਨੂੰ 'ਧਾਰਮਿਕ ਰੌਕ' ਦਾ ਨਾਂ ਦਿੱਤਾ ਗਿਆ ਹੈ। ਡੇਰਾ ਮੁਖੀ ਨੇ ਇਸ ਰਾਹੀਂ ਆਧੁਨਿਕ ਸੰਗੀਤ ਵਿਚ ਨਵੇਂ ਜੌਹਰ ਦਿਖਾਏ ਹਨ। ਯੂਨੀਵਰਸਲ ਮਿਊਜ਼ਿਕ ਗਰੁੱਪ ਨੇ ਡੇਰਾ ਮੁਖੀ ਦੀ ਐਲਬਮ 'ਹਾਈਵੇ ਲਵ ਚਾਰਜਰ' ਨੂੰ ਰਿਲੀਜ਼ ਕੀਤਾ ਹੈ। ਇਸ ਕੰਪਨੀ ਨੇ ਡੇਰਾ ਮੁਖੀ ਨੂੰ ਗਲੋਬਲ ਪਲਾਕ ਐਵਾਰਡ ਵੀ ਦਿੱਤਾ ਹੈ। ਇਹ ਮਿਊਜ਼ਿਕ ਕੰਪਨੀ ਦੋ ਵਰ੍ਹਿਆਂ ਦੌਰਾਨ ਡੇਰਾ ਮੁਖੀ ਦੀਆਂ 6 ਐਲਬਮ ਰਿਲੀਜ਼ ਕਰ ਚੁੱਕੀ ਹੈ। ਕੰਪਨੀ ਦਾ ਦਾਅਵਾ ਹੈ ਕਿ ਨਵੀਂ ਐਲਬਮ ਇੱਕ ਕਰੋੜ ਵਿਕ ਚੁੱਕੀ ਹੈ। ਨਵੀਂ ਐਲਬਮ ਅੰਗਰੇਜ਼ੀ ਭਾਸ਼ਾ ਵਿਚ ਹੈ ਜਿਸ ਵਿਚ ਡੇਰਾ ਮੁਖੀ ਦਾ ਲਿਬਾਸ ਵੀ ਪੱਛਮੀ ਲਹਿਜੇ ਵਾਲਾ ਹੈ ਅਤੇ ਗਾਣੇ ਵੀ ਪੱਛਮੀ ਤਰਜ਼ਾਂ ਵਾਲੇ ਹਨ। ਡੇਰਾ ਸਿਰਸਾ ਦਾ ਦਾਅਵਾ ਹੈ ਕਿ ਨਵੀਂ ਐਲਬਮ ਤਿੰਨ ਦਿਨਾਂ ਵਿਚ 30 ਲੱਖ ਵਿਕੀ। ਯੂਨੀਵਰਸਲ ਮਿਊਜ਼ਿਕ ਕੰਪਨੀ ਦੇ ਮੈਨੇਜਿੰਗ ਡਾਇਰੈਕਟਰ ਦੇਵ ਰਾਜ ਦਾ ਕਹਿਣਾ ਸੀ ਕਿ ਨਵੀਂ ਐਲਬਮ ਦੀ ਰਿਕਾਰਡ ਵਿਕਰੀ ਨੇ ਡੇਰਾ ਮੁਖੀ ਨੂੰ ਰਿਕਾਰਡ ਵਿਕਰੀ ਵਾਲੇ ਕੌਮਾਂਤਰੀ ਗਾਇਕਾਂ ਵਿਚ ਸ਼ੁਮਾਰ ਕਰ ਦਿੱਤਾ ਹੈ। ਉਨ੍ਹਾਂ ਦੱਸਿਆ ਕਿ ਦੋ ਵਰ੍ਹਿਆਂ ਵਿਚ ਉਨ੍ਹਾਂ ਦੀ ਕੰਪਨੀ ਨੇ ਡੇਰਾ ਗੁਰੂ ਦੀਆਂ 6 ਐਲਬਮਾਂ ਰਿਲੀਜ਼ ਕੀਤੀਆਂ ਜਿਨ੍ਹਾਂ ਦੀ ਦੁਨੀਆ ਭਰ ਵਿਚ ਕਰੀਬ 1.20 ਕਰੋੜ ਵਿਕਰੀ ਹੋਈ ਹੈ। 'ਲਵ ਰਬ ਸੇ' ਦੀ ਵਿਕਰੀ ਵੀ ਕਾਫੀ ਉਚੀ ਰਹੀ ਹੈ।
                   ਡੇਰਾ ਸੂਤਰਾਂ ਦਾ ਦਾਅਵਾ ਹੈ ਕਿ ਯੂ ਟਿਊਬ 'ਤੇ ਡੇਰਾ ਮੁਖੀ ਦੀ ਨਵੀਂ ਐਲਬਮ ਨੂੰ 28 ਅਪਰੈਲ ਤੋਂ ਹੁਣ ਤੱਕ 4.50 ਲੱਖ ਲੋਕ ਵੇਖ ਚੁੱਕੇ ਹਨ।ਦੱਸਣਯੋਗ ਹੈ ਕਿ ਡੇਰਾ ਮੁਖੀ ਨੂੰ ਇਸ ਵੇਲੇ ਸੀ.ਬੀ.ਆਈ ਅਦਾਲਤ ਵਿਚ ਤਿੰਨ ਕੇਸਾਂ ਅਤੇ ਦੋ ਹੋਰ ਕਤਲ ਕੇਸਾਂ ਦੇ ਮਾਮਲਿਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪੰਜਾਬ ਵਿਚ ਉਨ੍ਹਾਂ ਦੀ ਫੇਰੀ ਸਾਲ 2007 ਤੋਂ ਬੰਦ ਹੈ ਅਤੇ ਉਨ੍ਹਾਂ ਖ਼ਿਲਾਫ਼ ਬਠਿੰਡਾ ਅਦਾਲਤ ਵਿਚ ਵੀ ਕੇਸ ਵੀ ਸੁਣਵਾਈ ਅਧੀਨ ਹੈ। ਅਕਾਲ ਤਖਤ ਤੋਂ ਡੇਰਾ ਮੁਖੀ ਖ਼ਿਲਾਫ਼ ਹੁਕਮਨਾਮਾ ਜਾਰੀ ਹੋ ਚੁੱਕਾ ਹੈ। ਇਨ੍ਹਾਂ ਗੱਲਾਂ ਨੂੰ ਪਾਸੇ ਰੱਖੀਏ ਤਾਂ ਆਮ ਲੋਕ ਉਨ੍ਹਾਂ ਦੀ ਰੌਕ ਸਟਾਰ ਵਾਲੇ ਨਵੇਂ ਅਕਸ ਤੋਂ ਅਣਜਾਣ ਸਨ। ਹੁਣ, ਨਵੀਂ ਐਲਬਮ ਕਾਰਨ ਉਹ ਮੁੜ ਚਰਚਾ ਵਿਚ ਹਨ। ਉਨ੍ਹਾਂ ਦੀ ਇਸ ਐਲਬਮ ਦਾ ਵਿਸ਼ਾ ਵਸਤੂ ਤਾਂ ਧਾਰਮਿਕ ਹੈ ਪ੍ਰੰਤੂ ਸੰਗੀਤ ਪੱਛਮੀ ਹੈ। ਡੇਰਾ ਸਿਰਸਾ ਦੇ ਸਿਆਸੀ ਵਿੰਗ ਦੇ ਸੀਨੀਅਰ ਮੈਂਬਰ ਗੁਰਬਾਜ਼ ਸਿੰਘ ਦਾ ਕਹਿਣਾ ਹੈ ਕਿ ਨਵੀਂ ਐਲਬਮ 'ਰੂਹਾਨੀ ਰੰਗਾਂ ਦਾ ਝਰਨਾ ਹੈ ਅਤੇ ਨਵੇਂ ਪੋਚ ਨੂੰ ਅਧਿਆਤਮਵਾਦ ਨਾਲ ਜੋੜਨ ਲਈ ਆਧੁਨਿਕ ਸੰਗੀਤ ਦਾ ਰਾਹ ਅਖਤਿਆਰ ਕੀਤਾ ਗਿਆ ਹੈ?'
                     ਵੇਰਵਿਆਂ ਅਨੁਸਾਰ ਡੇਰਾ ਮੁਖੀ ਵਲੋਂ ਪਹਿਲੀ ਵਾਰ ਸਾਲ 2005 ਵਿਚ ਗਾਇਨ ਕੀਤਾ ਗਿਆ ਸੀ ਜੋ ਭਰੂਣ ਹੱਤਿਆ ਖ਼ਿਲਾਫ਼ ਸੁਨੇਹਾ ਸੀ। ਡੇਰਾ ਸਿਰਸਾ ਵਲੋਂ ਸਤੰਬਰ 2011 ਤੋਂ ਰੂਬਰੂ ਨਾਈਟ ਸ਼ੁਰੂ ਕੀਤੀ ਗਈ ਸੀ ਜਿਸ 'ਚੋਂ ਡੇਰਾ ਮੁਖੀ ਦਾ ਪੌਪ ਸਟਾਰ ਵਾਲਾ ਨਵਾਂ ਅਵਤਾਰ ਪੈਦਾ ਹੋਇਆ। ਡੇਰਾ ਮੁਖੀ ਹੁਣ ਤੱਕ ਪੰਜਾਬੀ, ਹਰਿਆਣਵੀ, ਮਰਾਠੀ, ਬਾਗੜੀ, ਹਿੰਦੀ ਅਤੇ ਅੰਗਰੇਜ਼ੀ ਭਾਸ਼ਾ ਵਿਚ 19 ਐਲਬਮਾਂ ਰਿਕਾਰਡ ਤੇ ਰਿਲੀਜ਼ ਕਰ ਚੁੱਕੇ ਹਨ।ਡੇਰਾ ਮੁਖੀ ਹੁਣ ਤੱਕ 103 ਰੁਬਰੂ ਨਾਈਟਸ ਕਰ ਚੁੱਕੇ ਹਨ ਜਿਨ•ਾਂ ਚੋਂ ਆਖਰੀ ਹਾਲ ਹੀ ਵਿਚ ਦਿੱਲੀ ਵਿਖੇ ਹੋਈ ਹੈ। ਸੂਤਰ ਦੱਸਦੇ ਹਨ ਕਿ ਰੁਬਰੂ ਨਾਈਟ ਦੀ ਟਿਕਟ ਇੱਕ ਹਜ਼ਾਰ ਤੋਂ ਸ਼ੁਰੂ ਹੁੰਦੀ ਹੈ ਜੋ ਕਿ ਇੱਕ ਲੱਖ ਰੁਪਏ ਤੱਕ ਹੁੰਦੀ ਹੈ। ਜਿਨ•ਾਂ ਪੰਜ ਤੋਂ ਸੱਤ ਬਲਾਕਾਂ ਵਲੋਂ ਡੇਰੇ ਵਿਚ ਰੁਬਰੂ ਨਾਈਟ ਬੁੱਕ ਕੀਤੀ ਜਾਂਦੀ ਹੈ, ਉਨ•ਾਂ ਬਲਾਕਾਂ ਵਿਚ ਹੀ ਟਿਕਟਾਂ ਦੀ ਵਿਕਰੀ ਹੁੰਦੀ ਹੈ।
                     ਗੁਰਬਾਜ ਸਿੰਘ ਦਾ ਕਹਿਣਾ ਹੈ ਕਿ ਡੇਰਾ ਮੁਖੀ ਦੀਆਂ ਰੂਬਰੂ ਨਾਈਟਸ ਲਈ ਟਿਕਟਾਂ ਦੀ ਵਿਕਰੀ ਦਾ ਆਧਾਰ ਸ਼ਰਧਾ ਹੈ ਅਤੇ ਕੋਈ ਕੀਮਤ ਤੈਅ ਨਹੀਂ ਕੀਤੀ ਗਈ ਹੈ। ਉਨ੍ਹਾਂ ਆਖਿਆ ਕਿ ਰੁਬਰੂ ਨਾਈਟ ਸਮਾਜਿਕ ਕਾਰਜਾਂ ਲਈ ਕੀਤੀ ਜਾਂਦੀ ਹੈ। ਜੋ ਪੈਸਾ ਹਰ ਨਾਈਟ ਤੋਂ ਇਕੱਠਾ ਹੁੰਦਾ ਹੈ, ਉਹ ਲੋੜਵੰਦ ਲੋਕਾਂ ਦੀ ਮਦਦ ਅਤੇ ਡੇਰੇ ਵਲੋਂ ਚਲਾਏ ਜਾ ਰਹੇ ਸਿਹਤ ਕੇਂਦਰਾਂ 'ਤੇ ਲਗਾ ਦਿੱਤਾ ਜਾਂਦਾ ਹੈ।ਜਾਣਕਾਰੀ ਅਨੁਸਾਰ ਮਹੀਨੇ ਵਿਚ ਇੱਕ ਜਾਂ ਦੋ ਰੁਬਰੂ ਨਾਈਟਸ ਹੁੰਦੀਆਂ ਹਨ ਜਿਨ•ਾਂ ਵਿਚ ਪੈਰੋਕਾਰਾਂ ਦੀ ਗਿਣਤੀ ਇੱਕ ਤੋਂ ਦੋ ਲੱਖ ਹੁੰਦੀ ਹੈ। ਰੁਬਰੂ ਨਾਈਟ ਵਿਚ ਡੇਰਾ ਮੁਖੀ ਵਲੋਂ ਗਾਇਣ ਕੀਤਾ ਜਾਂਦਾ ਹੈ ਅਤੇ ਪੈਰੋਕਾਰਾਂ ਦੇ ਸਿੱਧੇ ਸੁਆਲ ਜੁਆਬ ਹੁੰੁਦੇ ਹਨ। ਡੇਰਾ ਮੁਖੀ ਵਲੋਂ ਨਾਈਟ ਦੌਰਾਨ ਤਿੰਨ ਦਫ਼ਾ ਪੁਸ਼ਾਕਾਂ ਬਦਲੀਆਂ ਜਾਂਦੀਆਂ ਹਨ ਜਿਨ•ਾਂ ਨੂੰ ਬਾਅਦ ਵਿਚ ਨਾਈਟ ਦੀ ਬੁਕਿੰਗ ਕਰਾਉਣ ਵਾਲੇ ਬਲਾਕ ਲੈ ਲੈਂਦੇ ਹਨ।

                             ਸਲਾਮ ਜ਼ਿੰਦਗੀ
                     ਬੱਸ ਮੇਰੇ ਕੋਲ ਮਾਂ ਹੈ...
                             ਚਰਨਜੀਤ ਭੁੱਲਰ
ਬਠਿੰਡਾ : ਜਿਨ੍ਹਾਂ ਕੋਲ ਮਾਂ ਹੈ, ਉਨ੍ਹਾਂ ਕੋਲ ਜ਼ਿੰਦਗੀ ਹੈ। ਇਹ ਸੋਚ ਨੌਜਵਾਨ ਰਾਹੁਲ ਦੀ ਹੈ, ਜਿਸ ਨੂੰ ਨਵਾਂ ਜਨਮ ਮਿਲਿਆ ਹੈ। ਨਵਾਂ ਜਨਮ ਦੇਣ ਵਾਲੀ ਵੀ ਉਸ ਦੀ ਮਾਂ ਉਰਮਿਲਾ ਹੀ ਹੈ। ਅੱਠ ਸਾਲ ਦੀ ਉਮਰ ਵਿੱਚ ਹੀ ਰਾਹੁਲ ਲਈ ਜ਼ਿੰਦਗੀ ਪਹਾੜ ਬਣ ਗਈ ਸੀ। ਉਰਮਿਲਾ ਨੇ ਜਦੋਂ ਪੁੱਤ ਦੀ ਉਂਗਲ ਫੜੀ ਤਾਂ ਸਭ ਪਹਾੜ ਝੁਕ ਗਏ। ਤਕਰੀਬਨ ਛੇ ਮਹੀਨੇ ਪਹਿਲਾਂ ਜਦੋਂ ਜ਼ਿੰਦਗੀ ਨੇ ਪਰਖ ਲਈ ਤਾਂ ਮਾਂ ਉਰਮਿਲਾ ਨੇ ਆਪਣੇ ਪੁੱਤ ਲਈ ਆਪਣਾ ਗੁਰਦਾ ਦੇ ਦਿੱਤਾ। ਰਾਹੁਲ ਆਖਦਾ ਹੈ, ਮਾਂ ਨੇ ਗੁਰਦਾ ਨਹੀਂ,ਜ਼ਿੰਦਗੀ ਦਿੱਤੀ ਹੈ। ਭਲਕੇ ਮਾਂ ਦਿਵਸ ਹੈ। ਰਾਹੁਲ ਆਖਦਾ ਹੈ ਕਿ ਮਾਂ ਨੇ ਜੋ ਜ਼ਿੰਦਗੀ ਦਾ ਤੋਹਫ਼ਾ ਦਿੱਤਾ ਹੈ, ਉਸ ਤੋਹਫ਼ੇ ਅੱਗੇ ਸਭ ਕੁਝ ਬੌਣਾ ਹੈ। ਰਾਹੁਲ ਦੇ ਪਿਤਾ 18 ਸਾਲ ਪਹਿਲਾਂ ਇਸ ਦੁਨੀਆ ਤੋਂ ਚਲੇ ਗਏ ਸਨ। ਜਦੋਂ ਪੁੱਤ ਦੀ ਜ਼ਿੰਦਗੀ 'ਤੇ ਭੀੜ ਪਈ ਤਾਂ ਮਾਂ ਨੇ ਆਪਣਾ ਇੱਕ ਗੁਰਦਾ ਦੇ ਦਿੱਤਾ। ਰਾਹੁਲ ਦੱਸਦਾ ਹੈ ਕਿ ਉਸ ਨੇ ਮਾਂ ਦੀਆਂ ਅੱਖਾਂ ਵਿੱਚ ਹਮੇਸ਼ਾ ਖੁਸ਼ੀ ਦੇਖੀ ਹੈ। ਇਵੇਂ ਹੀ ਬਠਿੰਡਾ ਦੇ ਸ਼ਾਂਤ ਨਗਰ ਦੀ ਇੱਕ ਮਾਂ ਨੇ ਆਪਣੇ ਪੁੱਤ ਲਈ ਆਪਣੀ ਜ਼ਿੰਦਗੀ ਦੀ ਪ੍ਰਵਾਹ ਨਹੀਂ ਕੀਤੀ। ਉਸ ਨੂੰ ਪੁੱਤ ਨਾਲੋਂ ਆਪਣੀ ਜ਼ਿੰਦਗੀ ਛੋਟੀ ਲੱਗੀ। ਜਦੋਂ ਪੁੱਤ ਦੀ ਜਾਨ 'ਤੇ ਬਣੀ ਤਾਂ ਬਲਤੇਜ ਕੌਰ ਨੇ ਆਪਣਾ ਗੁਰਦਾ ਪੁੱਤ ਨੂੰ ਦੇ ਦਿੱਤਾ। ਨੌਜਵਾਨ ਪੁੱਤ ਸੁਖਵਿੰਦਰ ਸਿੰਘ ਨੂੰ ਹੁਣ ਹਰ ਦਿਨ ਹੀ ਮਾਂ ਦਿਵਸ ਲੱਗਦਾ ਹੈ।
                ਬਠਿੰਡਾ ਦੇ ਭਾਗੂ ਰੋਡ ਦੀ 62 ਸਾਲ ਦੀ ਮਾਂ ਸੁਰਜੀਤ ਕੌਰ ਨੇ ਆਪਣਾ ਗੁਰਦਾ ਦੇ ਕੇ ਆਪਣੇ ਨੌਜਵਾਨ ਲੜਕੇ ਕੰਵਲਜੀਤ ਸਿੰਘ ਨੂੰ ਜ਼ਿੰਦਗੀ ਦੇ ਹਾਣ ਦਾ ਤਾਂ ਬਣਾ ਦਿੱਤਾ ਸੀ ਪਰ ਸੜਕ ਹਾਦਸੇ ਮਗਰੋਂ ਵਕਤ ਨੇ ਮਾਂ ਨੂੰ ਝੰਜੋੜ ਦਿੱਤਾ। ਭਲਕੇ ਮਾਂ ਦਿਵਸ ਮੌਕੇ ਇਹ ਮਾਂ ਆਪਣੇ ਨੌਜਵਾਨ ਪੁੱਤ ਦਾ ਰਾਹ ਤੱਕੇਗੀ ਪਰ ਮਾਂ ਨੂੰ ਚੇਤਾ ਨਹੀਂ ਰਹੇਗਾ ਕਿ ਉਨ੍ਹਾਂ ਰਾਹਾਂ ਤੋਂ ਕਦੇ ਕੋਈ ਨਹੀਂ ਪਰਤਿਆ। ਜੈਤੋ ਨੇੜਲੇ ਪਿੰਡ ਬਿਸ਼ਨੰਦੀ ਦੀ ਬਜ਼ੁਰਗ ਮਾਂ ਗੁਰਦੀਪ ਕੌਰ ਨੂੰ ਹੁਣ ਕੋਈ ਵੀ ਦਿਨ ਆਪਣਾ ਨਹੀਂ ਲੱਗਦਾ ਹੈ। ਜ਼ਿੰਦਗੀ ਦੇ ਆਖਰੀ ਮੋੜ 'ਤੇ ਖੜ੍ਹੀ ਇਸ ਮਾਂ ਕੋਲ ਨਾ ਹੁਣ ਪੁੱਤ ਹੈ ਅਤੇ ਨਾ ਪਤੀ। ਮਾਂ ਗੁਰਦੀਪ ਕੌਰ ਨੇ ਆਪਣੇ ਪੁੱਤ ਨੂੰ ਗੁਰਦਾ ਦੇ ਕੇ ਇੱਕ ਵਾਰ ਤਾਂ ਬਚਾ ਲਿਆ ਸੀ ਪਰ ਜ਼ਿੰਦਗੀ ਨੂੰ ਇਹ ਮਨਜ਼ੂਰ ਨਹੀਂ ਸੀ। ਪਹਿਲਾਂ ਉਸ ਦਾ ਪੁੱਤ ਚਲਾ ਗਿਆ ਅਤੇ ਬਾਅਦ 'ਚ ਉਸ ਰਾਹ 'ਤੇ ਉਸ ਦਾ ਪਤੀ ਗੁਰਬਖਸ਼ ਸਿੰਘ ਵੀ ਚਲਾ ਗਿਆ। ਮਾਂ ਦਿਵਸ ਮੌਕੇ ਇਨ੍ਹਾਂ ਮਾਵਾਂ ਨੂੰ ਜ਼ਿੰਦਗੀ ਵੀ ਸਲਾਮ ਕਰੇਗੀ
ਲੁਧਿਆਣਾ ਦੇ ਡੀ.ਐਮ.ਸੀ. ਹਸਪਤਾਲ ਵਿੱਚ ਲੰਘੇ ਛੇ ਵਰ੍ਹਿਆਂ ਵਿੱਚ 80 ਮਾਵਾਂ ਨੇ ਆਪਣੇ ਪੁੱਤਾਂ ਦੀ ਜ਼ਿੰਦਗੀ ਖਾਤਰ ਆਪਣੇ ਗੁਰਦੇ ਦਾਨ ਕੀਤੇ ਹਨ। ਅੰਮ੍ਰਿਤਸਰ ਦੇ ਸ੍ਰੀ ਗੁਰੂ ਤੇਗ ਬਹਾਦਰ ਹਸਪਤਾਲ ਵਿੱਚ ਹਰ ਸਾਲ ਔਸਤਨ 10 ਮਾਵਾਂ ਵੱਲੋਂ ਆਪਣੇ ਪੁੱਤਾਂ ਖਾਤਰ ਗੁਰਦੇ ਦਾਨ ਕੀਤੇ ਜਾ ਰਹੇ ਹਨ।
                ਜਲੰਧਰ ਦੇ ਇੱਕ ਪ੍ਰਾਈਵੇਟ ਕਿਡਨੀ ਹਸਪਤਾਲ ਵਿੱਚ ਲੰਘੇ ਛੇ ਵਰ੍ਹਿਆਂ ਵਿੱਚ 240 ਮਰੀਜ਼ਾਂ ਦੇ ਗੁਰਦੇ ਬਦਲੇ ਗਏ ਹਨ, ਜਿਨ੍ਹਾਂ ਵਿੱਚ ਤਕਰੀਬਨ 15 ਫੀਸਦੀ ਗੁਰਦੇ ਮਾਵਾਂ ਨੇ ਆਪਣੇ ਪੁੱਤਾਂ ਲਈ ਦਾਨ ਕੀਤੇ ਹਨ। ਕਈ ਕੇਸਾਂ ਵਿੱਚ ਮਾਵਾਂ ਆਪਣੀ ਜ਼ਿੰਦਗੀ ਖ਼ਤਰੇ ਵਿੱਚ ਪਾ ਕੇ ਵੀ ਆਪਣੇ ਲਾਲਾਂ ਨੂੰ ਬਚਾ ਨਹੀਂ ਸਕੀਆਂ ਹਨ। ਮੁਕਤਸਰ ਦੇ ਪਿੰਡ ਭਲਾਈਆਣਾ ਦੀ ਬਿਰਧ ਬਲਵੰਤ ਕੌਰ ਆਪਣੇ ਪੁੱਤ ਲਾਭ ਸਿੰਘ ਨੂੰ ਗੁਰਦਾ ਦੇ ਕੇ ਵੀ ਨਹੀਂ ਬਚਾ ਸਕੀ ਹੈ। ਇਵੇਂ ਹੀ ਪਿੰਡ ਗਿਆਨਾ ਦੀ ਬਿਰਧ ਮਾਂ ਮੁਖਤਿਆਰ ਕੌਰ ਨੇ ਆਪਣਾ ਗੁਰਦਾ ਦੇ ਕੇ ਆਪਣੇ ਪੁੱਤ ਗੁਰਸੇਵਕ ਦੀ ਜ਼ਿੰਦਗੀ ਲਈ ਹੰਭਲਾ ਮਾਰਿਆ ਸੀ ਜੋ ਰਾਸ ਨਹੀਂ ਆਇਆ। ਮਹਿਰਾਜ ਦੀ ਬਿਰਧ ਮਾਂ ਹਰਬੰਸ ਕੌਰ ਆਪਣਾ ਗੁਰਦਾ ਦੇ ਕੇ ਵੀ ਆਪਣਾ ਪੁੱਤ ਨਹੀਂ ਬਚਾ ਸਕੀ। ਵੱਡਾ ਜਿਗਰਾ ਰੱਖਣ ਵਾਲੀਆਂ ਇਨ੍ਹਾਂ ਮਾਵਾਂ ਨੂੰ ਮਾਂ ਦਿਵਸ ਮੌਕੇ ਸਲਾਮ।

                                              ਨਾਚੀ  ਸ਼ੌਕ 

                         ਮੁੱਖ ਮੰਤਰੀ ਦਾ ਗਲੋਬਲ ਵਾੜਾ
                                          ਚਰਨਜੀਤ ਭੁੱਲਰ
ਬਠਿੰਡਾ : ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਵਿੱਚ 'ਗਲੋਬਲ ਵਾੜਾ ਬਣਨ ਲੱਗਾ ਹੈ, ਜਿਸ ਨੂੰ ਹੁਣ ਨਵੇਂ ਮਹਿਮਾਨਾਂ ਦੀ ਉਡੀਕ ਹੈ। ਮੁੱਖ ਮੰਤਰੀ ਦਾ ਜਾਨਵਰਾਂ ਪ੍ਰਤੀ ਮੋਹ ਇਸ ਗਲੋਬਲ ਵਾੜੇ ਨੂੰ ਖੜ੍ਹਾ ਕਰ ਰਿਹਾ ਹੈ। ਪੂਰੇ 45 ਦਿਨਾਂ ਮਗਰੋਂ ਇਸ ਗਲੋਬਲ ਵਾੜੇ ਵਿੱਚ ਪੰਜ ਨਵੇਂ ਮਹਿਮਾਨ ਸ਼ਾਮਲ ਹੋਣਗੇ। ਇਹ ਮਹਿਮਾਨ ਪੰਜ ਨਾਚੀ ਬੱਕਰੀਆਂ ਹਨ ਜੋ ਪਾਕਿਸਤਾਨ 'ਚੋਂ ਬਾਦਲ ਪਰਿਵਾਰ ਨੇ ਖਰੀਦੀਆਂ ਹਨ। ਪਾਕਿਸਤਾਨ ਦੇ ਮੁਜ਼ੱਫਰਨਗਰ ਤੇ ਰਾਜਨਪੁਰ ਇਲਾਕਿਆਂ ਦੀ ਇਹ ਨਾਚੀ ਨਸਲ ਮੁੱਖ ਮੰਤਰੀ ਨੂੰ ਪਸੰਦ ਆਈ ਸੀ। ਨੱਚਣ ਦੀ ਕਲਾ ਇਨ੍ਹਾਂ ਬੱਕਰੀਆਂ ਦੀ ਖੂਬੀ ਹੈ। ਪਾਕਿਸਤਾਨ ਤੋਂ ਭਾਰਤ ਪੁੱਜੀ 'ਖੇਪ' ਵਿੱਚ ਚਾਰ ਬੱਕਰੀਆਂ ਅਤੇ ਇੱਕ ਬੱਕਰਾ ਹੈ, ਜਿਨ੍ਹਾਂ ਨੂੰ ਹੁਣ ਨਵੀਂ ਦਿੱਲੀ ਦੇ ਪੱਤਣ ਰੋਕ ਕੇਂਦਰ ਵਿੱਚ ਰੱਖਿਆ ਜਾਵੇਗਾ। ਉੱਥੇ ਇਨ੍ਹਾਂ ਬੱਕਰੀਆਂ ਦੀ ਪੂਰੀ ਸਰੀਰਕ ਜਾਂਚ ਹੋਵੇਗੀ। ਕਰੀਬ ਡੇਢ ਮਹੀਨੇ ਮਗਰੋਂ ਇਨ੍ਹਾਂ ਬੱਕਰੀਆਂ ਦੇ ਪਿੰਡ ਬਾਦਲ ਦੇ ਗਲੋਬਲ ਵਾੜੇ ਵਿੱਚ ਪੁੱਜਣ ਦੀ ਸੰਭਾਵਨਾ ਹੈ। ਮੁੱਖ ਮੰਤਰੀ ਬਾਦਲ ਦਾ ਜਾਨਵਰਾਂ ਅਤੇ ਪੰਛੀਆਂ ਨਾਲ ਕਾਫ਼ੀ ਲਗਾਓ ਹੈ ਅਤੇ ਉਹ ਸਟੇਜਾਂ ਤੋਂ ਆਪਣੇ ਇਸ ਸ਼ੌਕ ਦਾ ਕਈ ਵਾਰ ਪ੍ਰਗਟਾਵਾ ਵੀ ਕਰ ਚੁੱਕੇ ਹਨ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦਾ ਜ਼ਿਆਦਾ ਘੋੜਿਆਂ ਪ੍ਰਤੀ ਝੁਕਾਅ ਹੈ, ਜਦੋਂਕਿ ਮੁੱਖ ਮੰਤਰੀ ਦੇਸੀ ਵਿਦੇਸ਼ੀ ਨਸਲਾਂ ਦੇ ਜਾਨਵਰਾਂ ਪ੍ਰਤੀ ਮੋਹ ਰੱਖਦੇ ਹਨ।
                ਬਾਦਲ ਪਰਿਵਾਰ ਦਾ ਪਿੰਡ ਬਾਦਲ ਵਿੱਚ ਵੀਆਈਪੀ ਵਾੜਾ ਹੈ, ਜਿਸ 'ਤੇ ਹੁਣ ਗਲੋਬਲ ਵਾੜੇ ਦਾ ਰੰਗ ਚੜ੍ਹਨ ਲੱਗਾ ਹੈ। ਕਰੀਬ ਇੱਕ ਦਰਜਨ ਪਸ਼ੂ ਇਸ ਵਾੜੇ ਵਿੱਚ ਹਨ। ਗਲੋਬਲ ਵਾੜੇ ਵਿੱਚ ਨੀਲੀ ਰਾਵੀ ਨਸਲ ਦੀਆਂ ਤਿੰਨ ਮੱਝਾਂ ਹਨ, ਜੋ ਪਾਕਿਸਤਾਨ ਤੋਂ ਲਿਆਂਦੀਆਂ ਗਈਆਂ। ਪਾਕਿਸਤਾਨ ਦੇ ਲਾਹੌਰ, ਸ਼ੇਖੂਪੁਰਾ, ਫੈਸਲਾਬਾਦ ਤੇ ਮੁਲਤਾਨ ਦੇ ਇਲਾਕੇ ਵਿੱਚ ਇਹ ਨਸਲ ਪਾਈ ਜਾਂਦੀ ਹੈ। ਇਸੇ ਵਾੜੇ ਵਿੱਚ ਸਾਹੀਵਾਲ ਨਸਲ ਦੀਆਂ ਤਿੰਨ ਗਊਆਂ ਹਨ, ਇਹ ਵੀ ਪਾਕਿਸਤਾਨ ਤੋਂ ਆਈਆਂ ਹਨ। ਬਾਦਲ ਪਰਿਵਾਰ ਨੇ 3 ਮਈ 2013 ਨੂੰ 16.71 ਲੱਖ ਰੁਪਏ ਦੀ ਲਾਗਤ ਨਾਲ ਪਾਕਿਸਤਾਨ 'ਚੋਂ ਇੱਕ ਦਰਜਨ ਜਾਨਵਰ ਲਿਆਂਦੇ ਸਨ, ਜਿਨ੍ਹਾਂ ਇੱਕ ਸਾਨ੍ਹ ਅਤੇ ਚਾਰ ਭੇਡਾਂ ਵੀ ਸ਼ਾਮਲ ਹਨ। ਗਲੋਬਲ ਵਾੜੇ ਵਿੱਚ ਤਿੰਨ ਜਾਫਰਾਬਾਦੀ ਮੱਝਾਂ ਹਨ, ਜੋ ਕਿ ਗੁਜਰਾਤ 'ਚੋਂ ਲਿਆਂਦੀਆਂ ਗਈਆਂ ਹਨ। ਜਾਫਰਾਬਾਦੀ ਨਸਲ ਗੁਜਰਾਤ ਦੇ ਕੱਛ, ਜੂਨਾਗੜ ਤੇ ਜਾਮਨਗਰ ਦੇ ਖ਼ਿੱਤੇ ਵਿੱਚ ਪਾਈ ਜਾਂਦੀ ਹੈ। ਮੁਰਹਾ ਨਸਲ ਦੀਆਂ ਤਿੰਨ ਚਾਰ ਮੱਝਾਂ ਵੀ ਹਨ। ਇਹ ਨਸਲ ਹਿਸਾਰ ਇਲਾਕੇ ਦੀ ਹੈ ਅਤੇ ਹਰਿਆਣੇ ਦੀ ਸ਼ਾਨ ਸਮਝੀ ਜਾਂਦੀ ਹੈ। ਕੁਝ ਅਰਸਾ ਪਹਿਲਾਂ ਬਾਦਲ ਪਰਿਵਾਰ ਨੂੰ ਪਾਕਿਸਤਾਨ 'ਚੋਂ ਤੋਹਫ਼ੇ ਵਿੱਚ ਚਾਰ ਭੇਡੂ ਮਿਲੇ ਸਨ, ਜੋ ਕਿ ਅਫ਼ਗਾਨਿਸਤਾਨ ਦੀ ਚੁਨਿੰਦਾ ਨਸਲ ਦੇ ਸਨ। ਇਹ ਭੇਡੂ ਹੁਣ ਮਰ ਚੁੱਕੇ ਹਨ। ਪਿੰਡ ਬਾਦਲ ਵਿੱਚ ਹੀ ਬਾਦਲ ਪਰਿਵਾਰ ਦਾ ਸਟੱਡ ਫਾਰਮ ਹੈ, ਜਿਸ ਵਿੱਚ   ਕਰੀਬ 30 ਘੋੜੇ ਹਨ। 

                ਦੱਸਦੇ ਹਨ ਕਿ ਇਸ ਸਟੱਡ ਫਾਰਮ ਵਿਚ ਅੱਧੀ ਦਰਜਨ ਟੱਟੂ (ਛੋਟੇ ਕੱਦ ਵਾਲੇ ਘੋੜੇ) ਵੀ ਹਨ, ਜਿਨ੍ਹਾਂ ਦੀ ਮੂਲ ਉਤਪਤੀ ਆਸਟਰੇਲੀਆਂ ਦੀ ਹੈ। ਦੋ ਵੱਡੇ ਘੋੜੇ ਹਨ, ਜਿਨ੍ਹਾਂ ਦਾ ਮੂਲ ਯੂਰਪ ਦਾ ਹੈ। ਬਾਕੀ ਘੋੜੇ ਮਾਰਵਾੜੀ ਨਸਲ ਦੇ ਹਨ। ਪਿੰਡ ਬਾਦਲ ਵਿੱਚ ਬਣੇ ਸਰਕਾਰੀ ਵੈਟਰਨਰੀ ਹਸਪਤਾਲ ਦੇ ਇੰਚਾਰਜ ਡਾ. ਦਵਿੰਦਰ ਸਿੰਘ ਸਿੱਧੂ ਦਾ ਕਹਿਣਾ ਸੀ ਕਿ ਜਾਫਰਾਬਾਦੀ ਨਸਲ ਦੀਆਂ ਮੱਝਾਂ ਦੀ ਦੁੱਧ ਦੇਣ ਦੀ ਚੰਗੀ ਸਮਰੱਥਾ ਹੁੰਦੀ ਹੈ। ਉਨ੍ਹਾਂ ਆਖਿਆ ਕਿ ਜਦੋਂ ਮੁੱਖ ਮੰਤਰੀ ਦੇ ਸਟੱਡ ਫਾਰਮ ਦਾ ਕੋਈ ਪਸ਼ੂ ਬਿਮਾਰ ਹੁੰਦਾ ਹੈ ਤਾਂ ਇੱਥੇ ਸਰਕਾਰੀ ਪੋਲੀਕਲੀਨਿਕ ਵਿੱਚ ਇਲਾਜ ਲਈ ਲਿਆਂਦਾ ਜਾਂਦਾ ਹੈ। ਸਰਕਾਰੀ ਸੂਚਨਾ ਅਨੁਸਾਰ ਪੰਜਾਬ ਸਰਕਾਰ ਵੱਲੋਂ ਪਿੰਡ ਬਾਦਲ ਵਿੱਚ ਘੋੜਿਆਂ ਦਾ ਇਲਾਜ ਕੇਂਦਰ ਬਣਾ ਦਿੱਤਾ ਗਿਆ ਹੈ। ਇਸ ਤੋਂ ਪਹਿਲਾਂ ਜ਼ਿਲ੍ਹਾ ਪੱਧਰ ਦਾ ਸਰਕਾਰੀ ਹਸਪਤਾਲ ਵੀ ਪਿੰਡ ਬਾਦਲ ਵਿੱਚ ਹੀ ਬਣਿਆ ਹੋਇਆ ਹੈ। ਮੁੱਖ ਮੰਤਰੀ ਨੇ ਪਸ਼ੂ ਮੇਲਾ ਫੰਡਾਂ 'ਚੋਂ 16 ਜਨਵਰੀ 2009 ਨੂੰ ਘੋੜਿਆਂ ਦੇ ਇਲਾਜ ਕੇਂਦਰ ਵਾਸਤੇ 1.25 ਕਰੋੜ ਰੁਪਏ ਦਿੱਤੇ ਸਨ ਅਤੇ 25 ਜੂਨ 2009 ਨੂੰ ਇਲਾਜ ਕੇਂਦਰ ਵਿੱਚ ਸਾਜ਼ੋ-ਸਾਮਾਨ ਵਾਸਤੇ 50.19 ਲੱਖ ਰੁਪਏ ਦੀ ਗਰਾਂਟ ਦਿੱਤੀ ਗਈ ਸੀ। ਪਿੰਡ ਬਾਦਲ ਦੇ ਸਰਕਾਰੀ ਪਸ਼ੂ ਹਸਪਤਾਲ ਵਿੱਚ ਤਿੰਨ ਮਾਹਿਰ ਡਾਕਟਰ, ਦੋ ਵੈਟਰਨਰੀ ਇੰਸਪੈਕਟਰ,ਇੱਕ ਲੈਬਾਰਟਰੀ ਸਹਾਇਕ ਅਤੇ ਚਾਰ ਦਰਜਾ ਚਾਰ ਮੁਲਾਜ਼ਮ ਤਾਇਨਾਤ ਹਨ।
                 ਅਪਰੈਲ 2011 ਵਿੱਚ ਘੋੜਿਆਂ ਦਾ ਇਲਾਜ ਕੇਂਦਰ ਚੱਲ ਪਿਆ ਸੀ। ਪਹਿਲੇ ਦੋ ਵਰ੍ਹਿਆਂ ਵਿੱਚ ਇਸ ਇਲਾਜ ਕੇਂਦਰ ਵਿੱਚ 1008 ਘੋੜੇ ਇਲਾਜ ਵਾਸਤੇ ਆਏ ਸਨ। ਬਾਦਲ ਪਰਿਵਾਰ ਦੇ ਘੋੜੇ ਵੀ ਅਕਸਰ ਇਸ ਇਲਾਜ ਕੇਂਦਰ ਵਿੱਚ ਆਉਂਦੇ ਹਨ। 30 ਮਈ 2013 ਨੂੰ ਬਾਦਲ ਪਰਿਵਾਰ ਦੇ ਇੱਕ ਘੋੜੇ ਨੂੰ ਪੇਚਸ਼ ਹੋਣ ਕਰਕੇ ਲੁਧਿਆਣਾ ਯੂਨੀਵਰਸਿਟੀ ਵਿੱਚ ਇਲਾਜ ਲਈ ਲਿਜਾਇਆ ਗਿਆ ਸੀ।
                                              ਪੰਜਾਬ 'ਚੋਂ ਬੱਕਰੀਆਂ ਗ਼ਾਇਬ ਹੋਣ ਲੱਗੀਆਂ
ਪੰਜਾਬ ਵਿੱਚੋਂ ਹੁਣ ਬੱਕਰੀਆਂ ਗਾਇਬ ਹੋ ਰਹੀਆਂ ਹਨ ਅਤੇ ਬੱਕਰੀਆਂ ਪ੍ਰਤੀ ਸਰਕਾਰੀ ਨੀਤੀ ਵੀ ਬਹੁਤੀ ਉਤਸ਼ਾਹ ਵਾਲੀ ਨਹੀਂ ਹੈ। ਸਰਕਾਰੀ ਵੈਟਰਨਰੀ ਪੋਲੀਕਲੀਨਿਕ, ਬਠਿੰਡਾ ਡਾ. ਗੁਰਦਾਸ ਸਿੰਘ ਦਾ ਕਹਿਣਾ ਸੀ ਕਿ ਪੰਜਾਬ 'ਚੋਂ ਹੁਣ ਬੱਕਰੀਆਂ ਹੁਣ ਹੌਲੀ-ਹੌਲੀ ਲੋਪ ਹੋ ਰਹੀਆਂ ਹਨ। ਉਨ੍ਹਾਂ ਆਖਿਆ ਕਿ ਰਾਜ ਵਿੱਚ ਹੁਣ ਚਰਾਂਦਾਂ ਨਹੀਂ ਰਹੀਆਂ ਹਨ, ਜੋ ਕਿ ਇਸ ਦਾ ਮੁੱਖ ਕਾਰਨ ਹੈ। ਪੰਜਾਬ ਵਿੱਚ ਬੱਕਰੀਆਂ ਦੀ ਬੀਟਲ ਨਸਲ ਹੀ ਹੈ।