Thursday, December 27, 2012

                            ਕਾਹਦੀ ਯੂਨੀਵਰਸਿਟੀ
         ਗੁਰੂ ਤੇ ਸ਼ਿਸ਼ ਆਉਣ ਤੋਂ ਡਰਦੇ ਹਨ !
                                ਚਰਨਜੀਤ ਭੁੱਲਰ
ਬਠਿੰਡਾ  : ਕੇਂਦਰ ਸਰਕਾਰ ਵਲੋਂ ਬਠਿੰਡਾ ਵਿੱਚ ਸ਼ੁਰੂ ਕੀਤੀ ਸੈਂਟਰਲ ਯੂਨੀਵਰਸਿਟੀ ਆਫ਼ ਪੰਜਾਬ ਆਪਣਾ ਕ੍ਰਿਸ਼ਮਾ ਦਿਖਾਉਣ ਵਿੱਚ ਫੇਲ ਹੋ ਗਈ ਹੈ। ਚਾਰ ਵਰਿ•ਆਂ ਮਗਰੋਂ ਵੀ ਇਸ ਵਰਸਿਟੀ ਵਿੱਚ ਨਾ ਕੋਈ ਫੈਕਲਟੀ ਆਉਣ ਨੂੰ ਤਿਆਰ ਹੈ ਅਤੇ ਨਾ ਹੀ ਵਿਦਿਆਰਥੀ। ਕੇਂਦਰੀ ਯੂਨੀਵਰਸਿਟੀ ਦੇ ਪ੍ਰਬੰਧਕ ਏਨੀ ਉੱਚ ਪਾਏਦਾਰ ਵਿੱਦਿਅਕ ਸੰਸਥਾ ਵਿੱਚ ਵਿੱਦਿਅਕ ਢਾਂਚਾ ਹੀ ਨਹੀਂ ਉਸਾਰ ਸਕੇ ਹਨ। ਕੇਂਦਰੀ ਮਾਨਵ ਸਰੋਤ ਵਿਕਾਸ ਮੰਤਰਾਲੇ ਵਲੋਂ ਇਸ ਵਰਸਿਟੀ ਨੂੰ 168 ਅਧਿਆਪਨ ਫੈਕਲਟੀ ਅਤੇ 70 ਨਾਨ ਟੀਚਿੰਗ ਦੀਆਂ ਪ੍ਰਵਾਨਿਤ ਅਸਾਮੀਆਂ ਦਿੱਤੀਆਂ ਹਨ ਲੇਕਿਨ ਇਸ ਵਰਸਿਟੀ ਵਿੱਚ ਰੈਗੂਲਰ ਅਸਾਮੀਆਂ ਭਰਨ ਨੂੰ ਤਰਜੀਹ ਨਹੀਂ ਦਿੱਤੀ ਜਾ ਰਹੀ ਹੈ ਜਿਸ ਕਰਕੇ ਫੈਕਲਟੀ ਨੂੰ ਇਸ ਵਰਸਿਟੀ ਪ੍ਰਤੀ ਕੋਈ ਖਿੱਚ ਨਹੀਂ ਹੈ। ਨਤੀਜਾ ਇਹ ਹੈ ਕਿ ਫੈਕਲਟੀ ਬਿਨ•ਾਂ ਵਰਸਿਟੀ ਖ਼ਾਲੀ ਖੜਕ ਰਹੀ ਹੈ।
             ਕੇਂਦਰੀ ਵਰਸਿਟੀ ਵਲੋਂ ਸੂਚਨਾ ਦੇ ਅਧਿਕਾਰ ਤਹਿਤ ਜੋ ਵੇਰਵੇ ਦਿੱਤੇ ਗਏ ਹਨ, ਉਹ ਹੈਰਾਨ ਕਰਨ ਵਾਲੇ ਹਨ। ਸੂਚਨਾ ਅਨੁਸਾਰ ਇਸ ਵਰਸਿਟੀ ਵਲੋਂ ਅਧਿਆਪਕਾਂ ਦੀਆਂ ਪ੍ਰਵਾਨਿਤ 168 ਅਸਾਮੀਆਂ ਚੋਂ ਸਿਰਫ਼ 15 ਅਸਾਮੀਆਂ ਤੇ ਹੀ ਰੈਗੂਲਰ ਭਰਤੀ ਕੀਤੀ ਗਈ ਹੈ ਜਦੋਂ ਕਿ 25 ਅਸਾਮੀਆਂ ਕੰਟਰੈਕਟ ਤੇ ਭਰੀਆਂ ਹੋਈਆਂ ਹਨ। ਏਦਾ ਹੀ ਨਾਨ ਟੀਚਿੰਗ ਦੀਆਂ ਪ੍ਰਵਾਨਿਤ 70 ਅਸਾਮੀਆਂ ਚੋ ਸਿਰਫ਼ 6 ਅਸਾਮੀਆਂ ਹੀ ਰੈਗੂਲਰ ਭਰੀਆਂ ਹਨ ਜਦੋਂ ਕਿ 30 ਅਸਾਮੀਆਂ ਕੰਟਰੈਕਟ ਤੇ ਭਰੀਆਂ ਹਨ। ਟੀਚਿੰਗ ਅਤੇ ਨਾਨ ਟੀਚਿੰਗ ਦੀਆਂ ਪ੍ਰਵਾਨਿਤ 238 ਅਸਾਮੀਆਂ ਚੋ ਸਿਰਫ਼ 76 ਅਸਾਮੀਆਂ ਹੀ ਭਰੀਆਂ ਗਈਆਂ ਹਨ। ਕੇਂਦਰ ਸਰਕਾਰ ਵਲੋਂ ਇਹ ਵਰਸਿਟੀ 27 ਫਰਵਰੀ 2009 ਨੂੰ ਸਥਾਪਿਤ ਕੀਤੀ ਗਈ ਸੀ ਅਤੇ ਪਹਿਲਾ ਵਿੱਦਿਅਕ ਸੈਸ਼ਨ ਅਗਸਤ 2009 ਵਿੱਚ ਸ਼ੁਰੂ ਹੋ ਗਿਆ ਸੀ। ਹੁਣ ਚੌਥਾ ਵਿੱਦਿਅਕ ਸੈਸ਼ਨ ਚੱਲ ਰਿਹਾ ਹੈ।
              ਸੂਚਨਾ ਅਨੁਸਾਰ ਇਸ ਵਰਸਿਟੀ ਚੋ ਲੰਘੇ ਚਾਰ ਵਰਿ•ਆਂ ਦੌਰਾਨ 9 ਅਧਿਆਪਕ ਅਤੇ 17 ਨਾਨ ਟੀਚਿੰਗ ਦੇ ਮੁਲਾਜ਼ਮ ਆਪਣਾ ਅਸਤੀਫ਼ਾ ਦੇ ਚੁੱਕੇ ਹਨ। ਇੱਕ ਅਧਿਆਪਕ ਨੂੰ ਟਰਮੀਨੇਟ ਕੀਤਾ ਜਾ ਚੁੱਕਾ ਹੈ ਜਦੋਂ ਕਿ ਹੋਰ ਅੱਧੀ ਦਰਜਨ ਅਧਿਆਪਕਾਂ ਨੇ ਆਪਣੇ ਮਿਆਦ ਵਿੱਚ ਵਾਧਾ ਹੀ ਨਹੀਂ ਕਰਾਇਆ ਹੈ। ਇਸੇ ਤਰ•ਾਂ ਨਾਨ ਟੀਚਿੰਗ ਦੇ ਪੰਜ ਮੁਲਾਜ਼ਮ ਵੀ ਆਪਣੀ ਮਿਆਦ ਖਤਮ ਹੋਣ ਮਗਰੋਂ ਵਰਸਿਟੀ ਛੱਡ ਚੁੱਕੇ ਹਨ। ਵਿੱਦਿਅਕ ਹਲਕਿਆਂ ਵਿੱਚ ਇਹੋ ਚਰਚਾ ਹੈ ਕਿ ਇਸ ਵਰਸਿਟੀ ਦੇ ਪ੍ਰਬੰਧਕਾਂ ਵਲੋਂ ਰੈਗੂਲਰ ਭਰਤੀ ਨਾ ਕੀਤੇ ਜਾਣ ਕਰਕੇ ਦੂਸਰੇ ਵਿੱਦਿਅਕ ਅਦਾਰਿਆਂ ਦੇ ਤਜਰਬੇਕਾਰ ਰੈਗੂਲਰ ਅਧਿਆਪਕ ਕੰਟਰੈਕਟ ਤੇ ਇਸ ਵਰਸਿਟੀ ਵਿੱਚ ਆਉਣ ਨੂੰ ਤਿਆਰ ਨਹੀਂ ਹੁੰਦੇ ਹਨ। ਹਲਕੇ ਇਹ ਵੀ ਆਖਦੇ ਹਨ ਕਿ ਅਸਤੀਫ਼ਾ ਦੇਣ ਵਾਲੇ ਅਧਿਆਪਕਾਂ ਲਈ ਵਰਸਿਟੀ ਦਾ ਮਾਹੌਲ ਜਿੰਮੇਵਾਰ ਰਿਹਾ ਹੈ।
           ਵਰਸਿਟੀ ਨੇ ਅਸਤੀਫ਼ਾ ਦੇਣ ਵਾਲੇ ਅਧਿਆਪਕਾਂ ਦੇ ਅਸਤੀਫ਼ਿਆਂ ਦੀ ਫੋਟੋ ਕਾਪੀ ਦੇਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਕੇਂਦਰੀ ਵਰਸਿਟੀ ਦਾ ਇੱਕ ਅਧਿਆਪਕ ਭਰਤੀ ਦੇ ਮਾਮਲੇ ਤੇ ਹਾਈਕੋਰਟ ਵੀ ਚਲਾ ਗਿਆ ਸੀ। ਇਸੇ ਤਰ•ਾਂ ਦਾ ਹਾਲ ਵਿਦਿਆਰਥੀਆਂ ਦਾ ਹੈ। ਕੇਂਦਰੀ ਵਰਸਿਟੀ ਚੋ 18 ਵਿਦਿਆਰਥੀ ਆਪਣੇ ਪੜਾਈ ਛੱਡ ਕੇ ਜਾ ਚੁੱਕੇ ਹਨ। ਇਸ ਵਰਸਿਟੀ ਵਿੱਚ 7 ਸਕੂਲਜ਼ ਚੱਲ ਰਹੇ ਹਨ ਜਿਨ•ਾਂ ਦੇ ਅਧੀਨ ਵੱਖ ਵੱਖ ਵਿਭਾਗ ਚੱਲ ਹਨ ਜਿਨ•ਾਂ ਨੂੰ ਸੈਂਟਰ ਦਾ ਨਾਮ ਦਿੱਤਾ ਜਾਂਦਾ ਹੈ। ਇਨ•ਾਂ ਵਿਭਾਗਾਂ ਵਿੱਚ ਕੁੱਲ 457 ਸੀਟਾਂ ਹਨ ਜਿਨ•ਾਂ ਚੋ 224 ਸੀਟਾਂ ਖ਼ਾਲੀ ਪਈਆਂ ਹਨ ਜੋ ਕਿ 50 ਫੀਸਦੀ ਦੇ ਕਰੀਬ ਹਨ। ਵਰਸਿਟੀ ਵਿੱਚ 233 ਵਿਦਿਆਰਥੀ ਪੜ• ਰਹੇ ਹਨ। ਵਰਸਿਟੀ ਵਿੱਚ 10 ਕੋਰਸ ਅਜਿਹੇ ਹਨ ਜਿਨ•ਾਂ ਵਿੱਚ ਕੋਈ ਵੀ ਵਿਦਿਆਰਥੀ ਨਹੀਂ ਹੈ।  ਮਿਸਾਲ ਦੇ ਤੌਰ ਤੇ,ਐਲ.ਐਲ.ਐਮ (ਇਨਵਾਇਰਨਮੈਂਟਲ ਲਾਅ),ਐਮ.ਏ (ਡਿਵੈਲਪਮੈਂਟ ਇਕਨਾਮਿਕਸ), ਐਮ.ਏ (ਕੰਪੈਰੇਟਿਵ ਲਿਟਰੇਚਰ), ਐਮ.ਐਸ.ਸੀ,ਪੀ.ਐਚ.ਡੀ (ਬਾਇਓਸਾਇੰਸਜ਼) ਆਦਿ ਵਿੱਚ ਕੋਈ ਵੀ ਵਿਦਿਆਰਥੀ ਨਹੀਂ ਹੈ। ਸਕੂਲ ਆਫ਼ ਲੈਂਗੂਏਜਜ਼,ਲਿਟਰੇਚਰ ਐਂਡ ਕਲਚਰ ਵਿੱਚ 40 ਸੀਟਾਂ ਖ਼ਾਲੀ ਪਈਆਂ ਹਨ ਜਦੋਂ ਕਿ 33 ਭਰੀਆਂ ਹਨ। ਦੇਖਿਆ ਗਿਆ ਹੈ ਕਿ ਇਸ ਵਰਸਿਟੀ ਕੋਲ ਬੁਨਿਆਦੀ ਢਾਂਚੇ ਦੀ ਕੋਈ ਕਮੀ ਨਹੀਂ ਹੈ ਅਤੇ ਆਧੁਨਿਕ ਤਕਨੀਕ ਦੀ ਵਰਤੋਂ ਵਿੱਚ ਵੀ ਕੋਈ ਕਸਰ ਬਾਕੀ ਨਹੀਂ ਛੱਡੀ ਗਈ ਹੈ। ਫਿਰ ਵੀ ਵਰਸਿਟੀ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਨੂੰ ਤਰਸ ਰਹੀ ਹੈ।
                                          ਹਰ ਵਰਸਿਟੀ ਦਾ ਏਹੋ ਹਾਲ ਹੈ  : ਵਾਈਸ ਚਾਂਸਲਰ
ਕੇਂਦਰੀ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਡਾ.ਜੈ ਰੂਪ ਸਿੰਘ ਦਾ ਕਹਿਣਾ ਸੀ ਕਿ ਸੀਨੀਅਰ ਫੈਕਲਟੀ ਦਾ ਨਾ ਮਿਲਣਾ ਹਰ ਕੇਂਦਰੀ ਵਰਸਟੀ ਦੀ ਸਮੱਸਿਆ ਬਣੀ ਹੋਈ ਹੈ ਅਤੇ ਇਹ ਵਰਸਿਟੀ ਢੁਕਵੀਂ ਜਗ•ਾ ਤੇ ਨਾ ਹੋਣ ਕਰਕੇ ਵੀ ਇੱਥੇ ਕੋਈ ਸੀਨੀਅਰ ਫੈਕਲਟੀ ਆਉਣ ਨੂੰ ਤਿਆਰ ਨਹੀਂ ਹੁੰਦੀ। ਐਮਰਜੈਂਸੀ ਕਰਕੇ ਕੰਟਰੈਕਟ ਤੇ ਅਸਾਮੀਆਂ ਭਰੀਆਂ ਜਾਂਦੀਆਂ ਹਨ। ਰੈਗੂਲਰ ਅਸਾਮੀਆਂ ਇਸ ਕਰਕੇ ਨਹੀਂ ਭਰੀਆਂ ਜਾ ਸਕੀਆਂ ਹਨ ਕਿਉਂਕਿ ਇੰਟਰਵਿਊ ਸਮੇਂ ਲੋੜੀਂਦੀ ਗਿਣਤੀ ਅਨੁਸਾਰ ਉਮੀਦਵਾਰ ਨਹੀਂ ਪੁੱਜਦੇ ਹਨ। ਅਸਤੀਫ਼ਾ ਦੇਣ ਵਾਲੀ ਫੈਕਲਟੀ ਚੋ ਕਈ ਪੱਕੀ ਨੌਕਰੀ ਮਿਲਣ ਕਰਕੇ ਇੱਥੋਂ ਅਸਤੀਫ਼ਾ ਦੇ ਕੇ ਚਲੇ ਗਏ ਹਨ ਅਤੇ ਉਨ•ਾਂ ਦੇ ਅਸਤੀਫ਼ਿਆਂ ਦਾ ਆਪਣਾ ਕੋਈ ਕਾਰਨ ਹੋਵੇਗਾ।

Saturday, December 22, 2012

                             ਕਾਰਪੋਰੇਟੀ ਦਬਦਬਾ
      ਪੈਲ਼ੀਆਂ ਚੋ ਬਾਹਰ ਕੀਤੇ ਖੇਤਾਂ ਦੇ ਪੁੱਤ
                                ਚਰਨਜੀਤ ਭੁੱਲਰ
ਬਠਿੰਡਾ : ਪ੍ਰਾਈਵੇਟ ਕੰਪਨੀਆਂ ਵੱਲੋਂ ਤਾਪ ਬਿਜਲੀ ਘਰ ਲਾਉਣ ਲਈ ਪੰਜਾਬ ਦੀ ਕਰੀਬ ਪੰਜ ਹਜ਼ਾਰ ਏਕੜ ਜ਼ਮੀਨ 'ਚੋਂ ਕਿਸਾਨਾਂ ਨੂੰ ਬਾਹਰ ਕਰ ਦਿੱਤਾ ਗਿਆ ਹੈ। ਪੰਜਾਬ ਦੇ 5136 ਏਕੜ ਰਕਬੇ ਦੀ ਮਾਲਕੀ ਜੋ ਪਹਿਲਾਂ ਕਿਸਾਨਾਂ ਦੇ ਨਾਂ ਬੋਲਦੀ ਸੀ,ਉਨ੍ਹਾਂ ਜ਼ਮੀਨਾਂ ਦੀ ਮਾਲਕੀ ਹੁਣ ਪ੍ਰਾਈਵੇਟ ਕੰਪਨੀਆਂ ਕੋਲ ਆ ਗਈ ਹੈ। ਪੰਜਾਬ ਸਰਕਾਰ ਵੱਲੋਂ ਇਨ੍ਹਾਂ ਕੰਪਨੀਆਂ ਨੂੰ ਜ਼ਮੀਨ ਲੈ ਕੇ ਦੇਣ ਵਾਸਤੇ ਵਿਚੋਲਗੀ ਕੀਤੀ ਗਈ ਹੈ। ਰਾਜ ਸਰਕਾਰ ਨੇ ਇਨ੍ਹਾਂ ਜ਼ਮੀਨਾਂ ਨੂੰ ਐਕੁਆਇਰ ਕੀਤਾ ਹੈ ਤੇ ਕੰਪਨੀਆਂ ਹਵਾਲੇ ਕਰ ਦਿੱਤਾ ਗਿਆ ਹੈ। ਪ੍ਰਾਈਵੇਟ ਕੰਪਨੀਆਂ ਹੁਣ ਪਿੰਡਾਂ ਵਿੱਚ ਜ਼ਮੀਨਾਂ ਦੀਆਂ ਮਾਲਕ ਬਣ ਗਈਆਂ ਹਨ ਜਦੋਂ ਕਿ ਜ਼ਮੀਨਾਂ ਦੇ ਅਸਲੀ ਮਾਲਕ ਹੁਣ ਪਿੰਡ ਤੋਂ ਬਾਹਰ ਕਰ ਦਿੱਤੇ ਗਏ ਹਨ। ਕਿਸਾਨਾਂ ਨੂੰ ਜੋ ਮੁਆਵਜ਼ਾ ਦਿੱਤਾ ਗਿਆ ਹੈ,ਉਹ ਪ੍ਰਾਈਵੇਟ ਕੰਪਨੀਆਂ ਦੇ ਖ਼ਜ਼ਾਨੇ 'ਚੋਂ ਦਿੱਤਾ ਗਿਆ ਹੈ। ਪੰਜਾਬ ਸਰਕਾਰ ਨੇ ਇਨ੍ਹਾਂ ਤਾਪ ਬਿਜਲੀ ਘਰਾਂ ਵਾਸਤੇ ਕੋਈ ਵੀ ਧੇਲਾ ਖਰਚ ਨਹੀਂ ਕੀਤਾ।ਪੰਜਾਬ ਵਿੱਚ ਨਵੇਂ ਲੱਗ ਰਹੇ ਚਾਰ ਤਾਪ ਬਿਜਲੀ ਘਰਾਂ ਵਾਸਤੇ 5136 ਏਕੜ ਜ਼ਮੀਨ ਐਕੁਆਇਰ ਕੀਤੀ ਗਈ ਹੈ ਜਿਸ ਦਾ ਕਿਸਾਨਾਂ ਨੂੰ 1045.37 ਕਰੋੜ ਰੁਪਏ ਮੁਆਵਜ਼ਾ ਦਿੱਤਾ ਗਿਆ ਹੈ।
            ਪਾਵਰਕੌਮ ਵੱਲੋਂ ਸੂਚਨਾ ਦੇ ਅਧਿਕਾਰ ਤਹਿਤ ਜੋ ਵੇਰਵੇ ਦਿੱਤੇ ਗਏ ਹਨ,ਉਨ੍ਹਾਂ ਮੁਤਾਬਿਕ ਪੰਜਾਬ ਸਰਕਾਰ ਨੇ ਇਨ੍ਹਾਂ ਚਾਰ ਤਾਪ ਬਿਜਲੀ ਘਰਾਂ ਵਾਸਤੇ 2008 ਵਿੱਚ ਹੀ ਜ਼ਮੀਨਾਂ ਐਕੁਆਇਰ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਸੀ। ਅਣਗਿਣਤ ਕਿਸਾਨ ਇਨ੍ਹਾਂ ਪ੍ਰਾਈਵੇਟ ਕੰਪਨੀਆਂ ਦੀ ਮਾਰ ਹੇਠ ਆ ਗਏ ਹਨ। ਪੰਜਾਬ ਸਰਕਾਰ ਇਨ੍ਹਾਂ ਪ੍ਰਾਈਵੇਟ ਕੰਪਨੀਆਂ ਦੇ ਸਹਾਰੇ ਪੰਜਾਬ ਨੂੰ ਬਿਜਲੀ ਪੈਦਾਵਾਰ ਵਿੱਚ ਸਰਪਲੱਸ ਸੂਬਾ ਬਣਾਉਣਾ ਚਾਹੁੰਦੀ ਹੈ। ਪਾਵਰਕੌਮ ਵੱਲੋਂ ਕੋਈ ਵੀ ਨਵਾਂ ਤਾਪ ਬਿਜਲੀ ਘਰ ਨਹੀਂ ਲਾਇਆ ਜਾ ਰਿਹਾ ਹੈ। ਮਾਨਸਾ ਜ਼ਿਲ੍ਹੇ ਦੇ ਪਿੰਡ ਗੋਬਿੰਦਪੁਰਾ ਵਿੱਚ ਇੱਕ ਪ੍ਰਾਈਵੇਟ ਕੰਪਨੀ ਨੂੰ ਜ਼ਮੀਨ ਦੇਣ ਵਾਸਤੇ ਸਰਕਾਰ ਨੇ ਜਬਰ ਦਾ ਹਥਿਆਰ ਵੀ ਵਰਤਿਆ। ਮਾਲ ਵਿਭਾਗ ਦੇ ਕਾਗਜ਼ਾਂ ਵਿੱਚ ਹੁਣ ਕਿਸਾਨਾਂ ਦੀ ਥਾਂ ਪ੍ਰਾਈਵੇਟ ਕੰਪਨੀਆਂ ਦਾ ਨਾਂ ਬੋਲਣ ਲੱਗਾ ਹੈ। ਸੂਚਨਾ ਅਨੁਸਾਰ ਤਲਵੰਡੀ ਸਾਬੋ ਥਰਮਲ ਪ੍ਰਾਜੈਕਟ ਲਈ 2113 ਏਕੜ,5 ਕਨਾਲ ਤੇ 4 ਮਰਲੇ ਜ਼ਮੀਨ ਐਕੁਆਇਰ ਕੀਤੀ ਗਈ ਹੈ ਤੇ ਇੱਥੇ ਨਹਿਰੀ ਜ਼ਮੀਨ ਦਾ ਮੁਆਵਜ਼ਾ ਪ੍ਰਤੀ ਏਕੜ 10.40 ਲੱਖ ਰੁਪਏ ਦਿੱਤਾ ਗਿਆ ਹੈ। ਪਿੰਡ ਬਣਾਵਾਲੀ ਸਮੇਤ ਤਿੰਨ ਪਿੰਡਾਂ ਦੀ ਜ਼ਮੀਨ ਸਰਕਾਰ ਨੇ ਫਰਵਰੀ 2008 ਵਿੱਚ ਐਕੁਆਇਰ ਕੀਤੀ। ਪ੍ਰਾਈਵੇਟ ਕੰਪਨੀ ਨੇ ਇਨ੍ਹਾਂ ਕਿਸਾਨਾਂ ਨੂੰ 282.63 ਕਰੋੜ ਰੁਪਏ ਦਾ ਮੁਆਵਜ਼ਾ ਦਿੱਤਾ। ਇਨ੍ਹਾਂ ਪਿੰਡਾਂ ਦੇ ਮਾਲਕ ਕਈ ਕਿਸਾਨਾਂ ਨੂੰ ਤਾਂ ਪੰਜਾਬ ਵੀ ਛੱਡਣਾ ਪੈ ਗਿਆ ਹੈ। ਉਹ ਹੁਣ ਹਰਿਆਣਾ ਵਿੱਚ ਖੇਤੀ ਕਰਨ ਲੱਗੇ ਹਨ।
             ਇੰਡੀਆ ਬੁੱਲ ਲਿਮਟਿਡ ਨਵੀਂ ਦਿੱਲੀ ਕੰਪਨੀ ਵੱਲੋਂ ਪਿੰਡ ਗੋਬਿੰਦੁਪਰਾ ਵਿੱਚ 871 ਏਕੜ,9 ਕਨਾਲ,10 ਮਰਲੇ ਜ਼ਮੀਨ ਦੀ ਮਾਲਕ ਬਣ ਚੁੱਕੀ ਹੈ। ਇਸ ਕੰਪਨੀ ਵਲੋਂ 187 ਕਰੋੜ ਰੁਪਏ ਦੀ ਅਦਾਇਗੀ ਕਿਸਾਨਾਂ ਨੂੰ ਕਰ ਦਿੱਤੀ ਗਈ ਹੈ। ਕਾਫ਼ੀ ਕਿਸਾਨਾਂ ਨੇ ਇਹ ਅਦਾਇਗੀ ਲੈਣ ਤੋਂ ਇਨਕਾਰ ਵੀ ਕਰ ਦਿੱਤਾ ਹੈ। ਪੰਜਾਬ ਸਰਕਾਰ ਨੇ ਪ੍ਰਾਈਵੇਟ ਕੰਪਨੀ ਦੇ ਤਾਪ ਬਿਜਲੀ ਘਰ ਵਾਸਤੇ ਪਿੰਡ ਗੋਬਿੰਦਪੁਰਾ ਦੀਆਂ ਨੌਜਵਾਨ ਧੀਆਂ 'ਤੇ ਵੀ ਪੁਲੀਸ ਕੇਸ ਦਰਜ ਕਰਾ ਦਿੱਤੇ ਸਨ। ਇਸ ਪਿੰਡ ਦੀ ਨਹਿਰੀ ਜ਼ਮੀਨ ਦਾ ਮੁਆਵਜ਼ਾ ਪ੍ਰਤੀ ਏਕੜ 14 ਲੱਖ ਰੁਪਏ ਦਿੱਤਾ ਗਿਆ ਸੀ। ਮੁਆਵਜ਼ਾ ਰਾਸ਼ੀ ਦਾ ਸਾਰਾ ਪੈਸਾ ਪ੍ਰਾਈਵੇਟ ਕੰਪਨੀ ਵੱਲੋਂ ਦਿੱਤਾ ਗਿਆ ਹੈ।ਪੰਜਾਬ ਸਰਕਾਰ ਵੱਲੋਂ ਰਾਜਪੁਰਾ ਤਾਪ ਬਿਜਲੀ ਪ੍ਰਾਜੈਕਟ 1078 ਏਕੜ ਜ਼ਮੀਨ ਐਕੁਆਇਰ ਕੀਤੀ ਗਈ ਹੈ। ਇਨ੍ਹਾਂ ਜ਼ਮੀਨਾਂ ਦੇ ਮਾਲਕ ਕਿਸਾਨਾਂ ਨੂੰ ਪ੍ਰਾਈਵੇਟ ਕੰਪਨੀ ਤਰਫ਼ੋਂ ਹੀ 411.67 ਕਰੋੜ ਰੁਪਏ ਦਾ ਮੁਆਵਜ਼ਾ ਦਿੱਤਾ ਗਿਆ ਹੈ। ਇਸ ਜ਼ਮੀਨ ਦਾ ਭਾਅ 2008 'ਚ ਕਿਸਾਨਾਂ ਨੂੰ ਪ੍ਰਤੀ ਏਕੜ 24 ਲੱਖ ਰੁਪਏ ਦਿੱਤਾ ਗਿਆ ਹੈ। ਇਸੇ ਤਰ੍ਹਾਂ ਹੀ ਗੋਇੰਦਵਾਲ ਸਾਹਿਬ ਥਰਮਲ ਪਾਵਰ ਪ੍ਰਾਜੈਕਟ ਲਈ 1074 ਏਕੜ ਜ਼ਮੀਨ ਐਕੁਆਇਰ ਕੀਤੀ ਗਈ ਹੈ ਜਿਸ ਦਾ ਮੁਆਵਜ਼ਾ 164.07 ਕਰੋੜ ਰੁਪਏ ਕਿਸਾਨਾਂ ਨੂੰ ਪ੍ਰਾਈਵੇਟ ਕੰਪਨੀ ਵੱਲੋਂ ਦਿੱਤਾ ਗਿਆ ਹੈ।
                                                     ਕੰਪਨੀਆਂ ਵੱਲੋਂ ਬਿਜਲੀ ਦਾ ਰੇਟ ਤੈਅ
ਪ੍ਰਾਈਵੇਟ ਕੰਪਨੀਆਂ ਵੱਲੋਂ ਪੰਜਾਬ ਸਰਕਾਰ ਨੂੰ ਬਿਜਲੀ ਵੇਚੀ ਜਾਏਗੀ ਜਿਸ ਦਾ ਬਕਾਇਦਾ ਰੇਟ ਤੈਅ ਹੋ ਚੁੱਕਾ ਹੈ। ਰਾਜਪੁਰਾ ਤਾਪ ਬਿਜਲੀ ਘਰ ਦੀ ਬਿਜਲੀ ਦੀ ਖਰੀਦ ਦਾ ਲੈਵਲਾਈਜ਼ਡ ਰੇਟ 2.890 ਰੁਪਏ ਪ੍ਰਤੀ ਯੂਨਿਟ ਹੈ ਜਦੋਂਕਿ ਤਲਵੰਡੀ ਸਾਬੋ ਥਰਮਲ ਪ੍ਰਾਜੈਕਟ ਦੀ ਬਿਜਲੀ ਦੀ ਖਰੀਦ ਦਾ ਲੈਵਲਾਈਜ਼ਡ ਰੇਟ 2.864 ਰੁਪਏ ਪ੍ਰਤੀ ਯੂਨਿਟ ਹੈ। ਗੋਇੰਦਵਾਲ ਤਾਪ ਬਿਜਲੀ ਪ੍ਰਾਜੈਕਟ ਦੀ ਬਿਜਲੀ ਦੀ ਖਰੀਦ ਰੇਟ ਪੰਜਾਬ ਰਾਜ ਬਿਜਲੀ ਰੈਗੂਲੇਟਰੀ ਕਮਿਸ਼ਨ ਵੱਲੋਂ ਅਸਲ ਖਰਚੇ ਦੇ ਆਧਾਰ 'ਤੇ ਪ੍ਰਾਜੈਕਟ ਖਤਮ ਹੋਣ ਮਗਰੋਂ ਨਿਰਧਾਰਤ ਕੀਤਾ ਜਾਣਾ ਹੈ।

Sunday, December 16, 2012

                              ਖ਼ਜ਼ਾਨੇ ਦਾ 'ਇਲਾਜ'
  ਪ੍ਰਾਈਵੇਟ ਹਸਪਤਾਲ ਨੂੰ 70 ਲੱਖ ਦਾ ਤੋਹਫ਼ਾ
                                 ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਸਰਕਾਰ ਵੱਲੋਂ ਬਠਿੰਡਾ ਦੇ ਪ੍ਰਾਈਵੇਟ ਮੈਕਸ ਹਸਪਤਾਲ ਨੂੰ 70 ਲੱਖ ਰੁਪਏ ਦਾ ਤੋਹਫ਼ਾ ਦੇ ਦਿੱਤਾ ਗਿਆ ਹੈ। ਨਗਰ ਨਿਗਮ ਬਠਿੰਡਾ ਨੇ ਪੰਜਾਬ ਸਰਕਾਰ ਦੀ ਹਦਾਇਤ 'ਤੇ ਮੈਕਸ ਹਸਪਤਾਲ ਨੂੰ 70.15 ਲੱਖ ਰੁਪਏ ਦੇ ਵਿਕਾਸ ਖਰਚੇ ਮੁਆਫ਼ ਕਰ ਦਿੱਤੇ ਹਨ। ਸਰਕਾਰ ਨੇ ਇਸ ਤੋਂ ਪਹਿਲਾਂ ਇਸ ਹਸਪਤਾਲ ਨੂੰ ਮਾਮੂਲੀ ਲੀਜ਼ ਰਾਸ਼ੀ 'ਤੇ 4.81 ਏਕੜ ਜਗ੍ਹਾ ਦਿੱਤੀ ਸੀ। ਨਿਗਮ ਇਸ ਹਸਪਤਾਲ ਨੂੰ 27 ਅਗਸਤ 2010 ਤੋਂ ਵਿਕਾਸ ਖਰਚੇ ਜਮ੍ਹਾਂ ਕਰਾਉਣ ਬਾਰੇ ਪੱਤਰ ਲਿਖ ਰਿਹਾ ਸੀ ਪਰ ਕਰੀਬ ਦੋ ਸਾਲ ਇਸ ਹਸਪਤਾਲ ਦੇ ਪ੍ਰਬੰਧਕਾਂ ਨੇ ਨਿਗਮ ਨੂੰ ਬਾਂਹ ਨਹੀਂ ਫੜਾਈ। ਫੰਡਾਂ ਦੀ ਕਮੀ ਝੱਲ ਰਹੇ ਨਗਰ ਨਿਗਮ ਨੂੰ ਆਖਰ ਸਰਕਾਰੀ ਹਦਾਇਤ 'ਤੇ ਵਿਕਾਸ ਖਰਚੇ ਤੋਂ ਛੋਟ ਦੇਣੀ ਪਈ ਹੈ। ਸੂਚਨਾ ਦੇ ਅਧਿਕਾਰ ਕਾਨੂੰਨ ਤਹਿਤ 7 ਦਸੰਬਰ 2012 ਨੂੰ ਮਿਲੀ ਜਾਣਕਾਰੀ ਅਨੁਸਾਰ ਨਿਗਮ ਨੇ ਜਨਤਕ ਤੇ ਨਿੱਜੀ ਭਾਈਵਾਲੇ ਵਾਲੇ ਅਦਾਰੇ ਮੈਕਸ ਸੁਪਰਸਪੈਸ਼ਲਿਟੀ ਹਸਪਤਾਲ ਨੂੰ ਸਿਰਫ਼ ਵਿਕਾਸ ਖਰਚੇ 70,15,634 ਰੁਪਏ ਤੋਂ ਛੋਟ ਦਿੱਤੀ ਹੈ। ਨਗਰ ਨਿਗਮ ਨੇ ਸਥਾਨਕ ਸਵੈ ਸ਼ਾਸਨ ਵਿਭਾਗ ਦੇ ਪੱਤਰ ਮੀਮੋ ਨੰਬਰ 15/18/2012- 1 ਸਸ1/ 3314 ਦਾ ਹਵਾਲਾ ਦਿੱਤਾ ਹੈ, ਜਿਸ ਤਹਿਤ ਸਰਕਾਰ ਨੇ ਮੈਕਸ ਹਸਪਤਾਲ ਦੇ ਵਿਕਾਸ ਖਰਚੇ ਮੁਆਫ਼ ਕਰਨ ਦਾ ਫੈਸਲਾ ਕੀਤਾ ਹੈ।
              ਮੁੱਢਲੇ ਪੜਾਅ 'ਤੇ ਇਸ ਹਸਪਤਾਲ ਦੇ ਵਿਕਾਸ ਖਰਚੇ 65,47,425 ਰੁਪਏ ਬਣੇ ਸਨ ਅਤੇ ਉਸ ਮਗਰੋਂ ਰਿਵਾਈਜ਼ਡ ਸਾਈਟ ਪਲਾਨ ਦੇ ਆਧਾਰ 'ਤੇ ਵਿਕਾਸ ਖਰਚੇ 70,15,634 ਰੁਪਏ ਬਣਾਏ ਸਨ, ਜਿਨ੍ਹਾਂ ਨੂੰ ਭਰਨ ਵਾਸਤੇ ਨਿਗਮ ਨੇ 16 ਸਤੰਬਰ 2011 ਨੂੰ ਮੈਕਸ ਹਸਪਤਾਲ ਨੂੰ ਪੱਤਰ ਲਿਖਿਆ ਸੀ। ਨਿਗਮ ਨੇ 11 ਨਵੰਬਰ 2011 ਨੂੰ ਮੁੜ ਪੱਤਰ ਲਿਖ ਕੇ ਮੈਕਸ ਹਸਪਤਾਲ ਨੂੰ ਚੇਤਾਵਨੀ ਵੀ ਦਿੱਤੀ ਸੀ ਪਰ ਪ੍ਰਬੰਧਕਾਂ ਨੇ ਆਖ ਦਿੱਤਾ ਕਿ ਉਹ ਵਿਕਾਸ ਖਰਚੇ ਤੋਂ ਛੋਟ ਲੈ ਰਹੇ ਹਨ। ਪੰਜਾਬ ਸਰਕਾਰ ਨੇ ਫਤਹਿਗੜ੍ਹ ਸਾਹਿਬ ਅਤੇ ਨੰਗਲ ਦੇ ਏਦਾਂ ਦੇ ਹਸਪਤਾਲਾਂ ਨੂੰ ਵੀ ਲੱਖਾਂ ਰੁਪਏ ਦੇ ਵਿਕਾਸ ਖਰਚੇ ਤੋਂ ਛੋਟ ਦਿੱਤੀ ਹੈ। ਪੰਜਾਬ ਬੁਨਿਆਦੀ ਢਾਂਚਾ ਵਿਕਾਸ ਬੋਰਡ ਵੱਲੋਂ 29 ਫਰਵਰੀ 2011 ਨੂੰ ਸਥਾਨਕ ਸਵੈ ਸ਼ਾਸਨ ਵਿਭਾਗ ਨੂੰ ਪੱਤਰ ਲਿਖ ਕੇ ਛੋਟ ਦੇਣ ਲਈ ਆਖਿਆ ਸੀ। ਹੁਣ ਮੈਕਸ ਹਸਪਤਾਲ ਨੂੰ ਵੀ ਛੋਟ ਦੇ ਦਿੱਤੀ ਗਈ ਹੈ। ਹਸਪਤਾਲ ਦਾ ਉਦਘਾਟਨ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਕੀਤਾ ਸੀ ਅਤੇ ਉਸ ਮਗਰੋਂ ਸੰਸਦ ਮੈਂਬਰ ਬੀਬੀ ਹਰਸਿਮਰਤ ਕੌਰ ਬਾਦਲ ਵੀ ਇਸ ਹਸਪਤਾਲ ਦੇ ਸਮਾਗਮਾਂ ਵਿੱਚ ਆ ਚੁੱਕੇ ਹਨ।
             ਨਗਰ ਨਿਗਮ ਨੇ 14 ਜੂਨ 2012 ਨੂੰ ਦਿੱਤੀ ਸੂਚਨਾ ਵਿੱਚ ਦੱਸਿਆ ਸੀ ਕਿ ਮੈਕਸ ਹਸਪਤਾਲ ਨੇ ਹਾਲੇ ਤੱਕ ਨਕਸ਼ਾ ਵੀ ਪਾਸ ਨਹੀਂ ਕਰਾਇਆ। ਇਸ ਹਸਪਤਾਲ ਵੱਲੋਂ ਉਸ ਸਮੇਂ ਤੱਕ ਸਿਰਫ਼ 15,16,273 ਰੁਪਏ ਜਮ੍ਹਾਂ ਕਰਾਏ ਗਏ ਸਨ। ਨਗਰ ਨਿਗਮ ਵੱਲੋਂ ਇਸ ਹਸਪਤਾਲ ਨੂੰ ਸਾਲ 2012-13 ਤੋਂ ਹਾਊਸ ਟੈਕਸ ਲਾਇਆ ਗਿਆ ਹੈ। ਹਾਊਸ ਟੈਕਸ ਲਾਉਣ ਲਈ 1,16,36,035 ਰੁਪਏ ਨਿਰਧਾਰਨ ਤਜਵੀਜ਼ ਕੀਤੀ ਗਈ। ਇਸ ਨਿਰਧਾਰਨ ਅਨੁਸਾਰ ਪ੍ਰਤੀ ਸਾਲ 17,45,405 ਰੁਪਏ ਹਾਊਸ ਟੈਕਸ ਬਣਦਾ ਹੈ। ਮਗਰੋਂ ਨਗਰ ਨਿਗਮ ਨੇ 23 ਨਵੰਬਰ 2012 ਨੂੰ ਦਿੱਤੀ ਸੂਚਨਾ ਵਿੱਚ ਦੱਸਿਆ ਕਿ ਮੈਕਸ ਹਸਪਤਾਲ ਵੱਲੋਂ ਬਣਦਾ ਹਾਊਸ ਟੈਕਸ ਵੀ ਨਹੀਂ ਭਰਿਆ ਗਿਆ। ਨਿਗਮ ਨੇ ਦੱਸਿਆ ਕਿ ਸਲਾਨਾ ਹਾਊਸ ਟੈਕਸ 13,96,324 ਰੁਪਏ ਬਾਕੀ ਹੈ। ਨਗਰ ਨਿਗਮ ਨੇ ਮੈਕਸ ਹਸਪਤਾਲ ਤੋਂ ਹਾਊਸ ਟੈਕਸ ਲੈਣ ਲਈ ਨਿਗਮ ਐਕਟ ਦੀ ਧਾਰਾ 137 ਅਧੀਨ ਨੋਟਿਸ ਵੀ ਜਾਰੀ ਕੀਤਾ ਹੈ। ਮੁੱਢਲੇ ਪੜਾਅ 'ਤੇ ਨਿਗਮ ਨੇ ਇਸ ਹਸਪਤਾਲ ਦੇ 1,86,632 ਰੁਪਏ ਪਾਣੀ ਦੇ ਖਰਚੇ ਅਤੇ 3,11,053 ਰੁਪਏ ਸੈੱਸ ਚਾਰਜਜ ਬਣਾਏ ਸਨ। ਇਨ੍ਹਾਂ ਦਾ ਕੀ ਬਣਿਆ, ਇਸ ਬਾਰੇ ਕੋਈ ਸੂਚਨਾ ਨਹੀਂ ਮਿਲ ਸਕੀ।
           ਦੱਸਣਯੋਗ ਹੈ ਕਿ ਇਸ ਇਲਾਕੇ ਵਿੱਚ ਕੈਂਸਰ ਦੀ ਬਿਮਾਰੀ ਦੇ ਹੱਲੇ ਦੇ ਮੱਦੇਨਜ਼ਰ ਇਹ ਹਸਪਤਾਲ ਬਣਾਇਆ ਗਿਆ ਸੀ। ਮੈਕਸ ਕੰਪਨੀ ਵੱਲੋਂ ਸਾਲਾਨਾ ਕੁਝ ਰਾਸ਼ੀ ਸਰਕਾਰ ਕੋਲ ਜਮ੍ਹਾਂ ਕਰਾਈ ਜਾਣੀ ਸੀ, ਜਿਸ ਨਾਲ ਗਰੀਬ ਲੋਕਾਂ ਦਾ ਇਲਾਜ ਹੋਣਾ ਸੀ। ਇਸ ਰਾਸ਼ੀ ਦੀ ਵੀ ਕੋਈ ਸੂਚਨਾ ਨਹੀਂ ਮਿਲ ਸਕੀ ਹੈ। ਸੂਤਰ ਆਖਦੇ ਹਨ ਕਿ ਗਰੀਬ ਲੋਕ ਇਸ ਹਸਪਤਾਲ ਦੇ ਇਲਾਜ ਦੀ ਪਹੁੰਚ ਤੋਂ ਦੂਰ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਹਸਪਤਾਲ ਦੀ ਪਰਚੀ ਫੀਸ ਹੀ ਜ਼ਿਆਦਾ ਹੈ। ਪਿਛਲੇ ਸਮੇਂ ਤੋਂ ਦੇਖਿਆ ਗਿਆ ਹੈ ਕਿ ਇਸ ਹਸਪਤਾਲ ਵੱਲੋਂ ਆਪਣਾ ਪ੍ਰਚਾਰ ਵੀ ਯੋਜਨਾਬੱਧ ਤਰੀਕੇ ਨਾਲ ਕੀਤਾ ਜਾ ਰਿਹਾ ਹੈ। ਮੈਕਸ ਕੰਪਨੀ ਦਾ ਪੱਖ ਜਾਣਨ ਵਾਸਤੇ ਉਨ੍ਹਾਂ ਦੇ ਮੀਡੀਆ ਵਿੰਗ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਸਰਕਾਰ ਦੀ ਨੀਤੀ ਅਨੁਸਾਰ ਹਸਪਤਾਲ ਨੂੰ ਵਿਕਾਸ ਖਰਚਿਆਂ ਤੋਂ ਛੋਟ ਮਿਲੀ ਹੈ। ਹਾਊਸ ਟੈਕਸ ਦੇ ਮੁੱਦੇ 'ਤੇ ਉਨ੍ਹਾਂ ਕਿਹਾ ਕਿ ਇਸ ਬਾਰੇ ਸਰਕਾਰ ਦੇ ਫੈਸਲੇ ਦੀ ਉਡੀਕ ਕੀਤੀ ਜਾ ਰਹੀ ਹੈ।

Saturday, December 15, 2012

                                    ਸੰਘਰਸ਼ੀ ਮੈਦਾਨ
              ...ਧੀਆਂ ਕਿਉਂ ਜੰਮੀਆਂ ਨੀਂ ਮਾਏ !
                                    ਚਰਨਜੀਤ ਭੁੱਲਰ
ਬਠਿੰਡਾ :  ਮਾਂ ਨਰਿੰਦਰ ਕੌਰ ਨੇ ਇਹ ਨਹੀਂ ਸੋਚਿਆ ਸੀ ਕਿ ਉਸ ਦੀ ਧੀ ਨੂੰ ਰੁਜ਼ਗਾਰ ਖਾਤਰ ਮਰਨ ਵਰਤ ਰੱਖਣੇ ਪੈਣਗੇ। ਇਸ ਮਾਂ ਨੂੰ ਤਾਂ ਇਹ ਵੀ ਚਿੱਤ ਚੇਤਾ ਨਹੀਂ ਸੀ ਕਿ ਉਸ ਦੀ ਧੀ ਨੂੰ ਜੇਲ੍ਹਾਂ ਤੇ ਥਾਣੇ ਵੀ ਵੇਖਣੇ ਪੈਣਗੇ। ਇਸ ਮਾਂ ਕੋਲ ਹੁਣ ਆਪਣੀ ਧੀ ਨੂੰ ਹੱਲਾਸ਼ੇਰੀ ਦੇਣ ਤੋਂ ਬਿਨਾਂ ਕੋਈ ਚਾਰਾ ਨਹੀਂ ਬਚਿਆ।  ਤਾਹੀਓਂ ਜਸਬੀਰ ਕੌਰ ਬਠਿੰਡਾ ਵਿੱਚ ਪੂਰੇ 17 ਦਿਨਾਂ ਤੋਂ ਮਰਨ ਵਰਤ 'ਤੇ ਬੈਠੀ ਹੈ ਤੇ ਸ਼ਾਮੀਂ ਅੱਜ ਉਸ ਦੀ ਹਾਲਤ ਖਰਾਬ ਹੋਣ 'ਤੇ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ ਹੈ। ਜੂਨ 2012 ਵਿੱਚ ਸਰਕਾਰ ਨੇ ਉਸ ਨੂੰ ਸਪੈਸ਼ਲ ਟਰੇਨਰ ਅਧਿਆਪਕ ਵਜੋਂ ਰੱਖ ਲਿਆ ਸੀ। ਬਿਨਾਂ ਤਨਖਾਹ ਦਿੱਤੇ ਉਸ ਨੂੰ ਅਕਤੂਬਰ 2012 ਵਿੱਚ ਫਿਰ ਨੌਕਰੀ ਤੋਂ ਫ਼ਾਰਗ ਕਰ ਦਿੱਤਾ।
             ਜ਼ਿਲ੍ਹਾ ਗੁਰਦਾਸਪੁਰ ਦੇ ਪਿੰਡ ਪੰਨਵਾਂ ਦੀ ਜਸਬੀਰ ਕੌਰ ਨੂੰ ਤਾਂ ਰੁਜ਼ਗਾਰ ਲਈ ਸ਼ੁਰੂ ਕੀਤੀ ਸੰਘਰਸ਼ੀ ਲੜਾਈ ਵਿੱਚ ਆਪਣੀ ਅਗਲੀ ਪੜ੍ਹਾਈ ਵੀ ਅੱਧ ਵਿਚਾਲੇ ਛੱਡਣੀ ਪਈ ਹੈ। ਰਾਏਕੋਟ ਦੀ ਹਰਪਿੰਦਰ ਕੌਰ ਯੋਗਤਾ ਪੱਖੋਂ ਐਮ.ਏ, ਬੀ.ਐਡ ਹੈ। ਜਦੋਂ ਐਤਕੀਂ ਪੂਰਾ ਦੇਸ਼ ਦੀਵਾਲ਼ੀ ਦੇ ਜਸ਼ਨ ਮਨਾ ਰਿਹਾ ਸੀ ਤਾਂ ਉਹ ਮਰਨ ਵਰਤ 'ਤੇ ਬੈਠੀ ਹੋਈ ਸੀ। ਹੁਣ ਫਿਰ ਉਹ ਮਰਨ ਵਰਤ 'ਤੇ ਬੈਠਣ ਲਈ ਤਿਆਰ ਹੈ। ਉਸ ਦੀ ਬਜ਼ੁਰਗ ਮਾਂ ਪਰਮਜੀਤ ਕੌਰ ਨੂੰ ਇਹੋ ਝੋਰਾ ਹੈ ਕਿ ਉਸ ਨੇ ਧੀ ਮਰਨ ਵਰਤ 'ਤੇ ਬੈਠਣ ਲਈ ਨਹੀਂ ਪੜ੍ਹਾਈ ਸੀ। ਤਿੰਨ ਭਰਾਵਾਂ ਦੀ ਇਕਲੌਤੀ ਭੈਣ ਹਰਪਿੰਦਰ ਕੌਰ ਵਰ੍ਹਿਆਂ ਤੋਂ ਰੁਜ਼ਗਾਰ ਲਈ ਲੜ ਰਹੀ ਹੈ। ਇਨ੍ਹਾਂ ਲੜਕੀਆਂ ਦੇ ਨਾਲ ਉਨ੍ਹਾਂ ਦੀਆਂ ਮਾਵਾਂ ਵੀ ਸੰਘਰਸ਼ ਕਰ ਰਹੀਆਂ ਹਨ। ਗੁਰਦਾਸਪੁਰ ਦੇ ਪਿੰਡ ਹੰਝੂਪੁਰਾ ਤੋਂ ਬਿਰਧ ਮਾਂ ਸਕੁੰਤਲਾ ਦੇਵੀ ਤਾਂ ਆਪਣੀ ਧੀ ਮੋਨਿਕਾ ਕੁਮਾਰੀ ਨਾਲ ਬਠਿੰਡਾ ਵਿੱਚ ਖੁਦ ਸੜਕ 'ਤੇ ਬੈਠੀ ਹੈ।
            ਮਾਂ ਸਕੁੰਤਲਾ ਦੇਵੀ ਦਾ ਕਹਿਣਾ ਸੀ ਕਿ ਸਰਕਾਰ ਨੂੰ ਸਾਡੇ ਬੁਢਾਪੇ ਵੱਲ ਵੇਖਣਾ ਚਾਹੀਦਾ ਹੈ। ਉਹ ਆਖਦੀ ਹੈ ਕਿ ਜਦੋਂ ਧੀ ਸੜਕਾਂ 'ਤੇ ਹੈ,ਅਸੀਂ ਘਰ ਕਿਵੇਂ ਬੈਠ ਸਕਦੇ ਹਾਂ। ਦੋ ਹੋਰ ਮਾਵਾਂ ਵੀ ਏਦਾਂ ਹੀ ਸੰਘਰਸ਼ ਦੇ ਮੈਦਾਨ ਵਿੱਚ ਧੀਆਂ ਨਾਲ ਕੁੱਦੀਆਂ ਹੋਈਆਂ ਹਨ। ਜ਼ਿਲ੍ਹਾ ਫਰੀਦਕੋਟ ਦੇ ਪਿੰਡ ਮਾਨ ਮਰਾੜ ਦੀ ਰਮਨਦੀਪ ਕੌਰ ਨੇ ਤਾਂ ਪੜ੍ਹਨ ਵਿੱਚ ਵੀ ਕੋਈ ਕਸਰ ਨਹੀਂ ਛੱਡੀ ਹੈ। ਇਸ ਲੜਕੀ ਨੇ ਐਮ.ਫਿਲ ਕੀਤੀ ਹੈ ਤੇ ਹੁਣ ਪੀਐਚ.ਡੀ ਕਰ ਰਹੀ ਹੈ। ਇਸ ਲੜਕੀ ਦੀ ਮਾਂ ਕਰਮਜੀਤ ਕੌਰ ਆਖਦੀ ਹੈ ਕਿ ਉਹ ਤਾਂ ਆਪਣੀ ਧੀ ਨੂੰ ਪੜ੍ਹਾ ਹੀ ਸਕਦੇ ਸਨ। ਰੁਜ਼ਗਾਰ ਤਾਂ ਸਰਕਾਰਾਂ ਨੇ ਹੀ ਦੇਣਾ ਹੈ। ਮਾਂ ਆਖਦੀ ਹੈ ਕਿ ਉਸ ਦੇ ਪੰਜ ਧੀਆਂ ਹਨ ਤੇ ਉਸ ਧੀ ਰਮਨਦੀਪ ਕੌਰ ਦੋ ਵਰ੍ਹਿਆਂ ਤੋਂ ਰੁਜ਼ਗਾਰ ਖਾਤਰ ਧਰਨੇ ਮੁਜ਼ਾਹਰਿਆਂ ਵਿੱਚ ਜਾ ਰਹੀ ਹੈ। ਜੈਤੋ ਮੰਡੀ ਦੀ ਅਨੀਤਾ ਤਾਂ 9 ਵਰ੍ਹਿਆਂ ਤੋਂ ਸਰਕਾਰ ਖ਼ਿਲਾਫ਼ ਨਾਅਰੇ ਮਾਰ ਰਹੀ ਹੈ। ਅਨੀਤਾ ਨੇ ਤਿੰਨ ਵਿਸ਼ਿਆਂ ਵਿੱਚ ਐਮ.ਏ ਕੀਤੀ ਹੋਈ ਹੈ ਤੇ ਐਮ.ਐਡ ਵੀ ਕੀਤੀ ਹੋਈ ਹੈ। ਉਹ ਪਹਿਲਾਂ 1000 ਰੁਪਏ ਦੀ ਸਰਕਾਰੀ ਤਨਖਾਹ 'ਤੇ ਕੰਮ ਕਰਦੀ ਸੀ ਤੇ ਹੁਣ ਉਸ ਨੂੰ 3500 ਰੁਪਏ ਮਿਲਦੇ ਸਨ। ਸਰਕਾਰ ਹੁਣ ਉੱਚ ਯੋਗਤਾ ਵਾਲੀ ਲੜਕੀ ਨੂੰ 3500 ਰੁਪਏ ਤਨਖਾਹ ਦੇਣ ਤੋਂ ਵੀ ਭੱਜ ਗਈ ਹੈ। ਉਸ ਦੀ ਮਾਂ ਭੰਵਰੀ ਦੇਵੀ ਦਾ ਕਹਿਣਾ ਸੀ ਕਿ ਇਸ ਰੁਜ਼ਗਾਰ ਨੇ ਤਾਂ ਉਸ ਦੀ ਧੀ ਨੂੰ ਥਾਣਾ ਤੇ ਜੇਲ੍ਹ ਵਿਖਾ ਦਿੱਤੀ ਹੈ।
            ਇਨ੍ਹਾਂ ਮਾਵਾਂ ਨੇ ਮੈਂਬਰ ਪਾਰਲੀਮੈਂਟ ਬੀਬੀ ਹਰਸਿਮਰਤ ਕੌਰ ਬਾਦਲ ਨੂੰ ਆਖਿਆ ਹੈ ਕਿ ਉਹ ਵੀ ਕਿਸੇ ਦੀ ਧੀ ਹੈ। ਸਾਡੀਆਂ ਧੀਆਂ ਬਾਰੇ ਨਹੀਂ ਤਾਂ ਸਾਡੀ ਬਿਰਧ ਅਵਸਥਾ ਬਾਰੇ ਹੀ ਸੋਚ ਲਿਆ ਜਾਵੇ। ਮਾਨਸਾ ਜ਼ਿਲ੍ਹੇ ਦੀ ਅੰਗਹੀਣ  ਲੜਕੀ ਸਿਮਰਨਜੀਤ ਕੌਰ ਤਾਂ ਤਿੰਨ ਵਰ੍ਹਿਆਂ ਤੋਂ ਸੰਘਰਸ਼ ਵਿੱਚ ਕੁੱਦੀ ਹੋਈ ਹੈ। ਸਿਮਰਨਜੀਤ ਕੌਰ ਨੂੰ ਪਹਿਲਾਂ ਕੁਦਰਤ ਨੇ ਇਨਸਾਫ ਨਾ ਦਿੱਤਾ ਅੇ ਹੁਣ ਸਰਕਾਰਾਂ ਨੇ। ਉਸ ਦੀ ਮਾਂ ਜਰਨੈਲ ਕੌਰ ਨੇ ਧੀ ਨੂੰ ਇਸ ਕਰਕੇ ਪੜ੍ਹਾਇਆ ਸੀ ਕਿ ਵਿੱਦਿਆ ਹੀ ਉਸ ਦੀ ਧੀ ਨੂੰ ਤਕਦੀਰ ਬਦਲ ਦੇਵੇਗੀ ਪਰ ਸਰਕਾਰਾਂ ਨੇ ਜਰਨੈਲ ਕੌਰ ਦੇ ਸੁਪਨੇ ਤੋੜ ਦਿੱਤੇ ਹਨ। ਮੁਕਤਸਰ ਦੇ ਪਿੰਡ ਆਸਾ ਬੁੱਟਰ ਦੀ ਬੇਅੰਤ ਕੌਰ ਐਮ.ਏ,ਬੀ.ਐਡ ਹੈ ਜੋ 3500 ਰੁਪਏ ਦੀ ਨੌਕਰੀ ਲਈ ਸੜਕਾਂ 'ਤੇ ਬੈਠੀ ਹੈ। ਏਦਾਂ ਦਾ ਦੁੱਖ ਹਰ ਧੀ ਦਾ ਹੈ ਜੋ ਨੰਨ੍ਹੀ ਛਾਂ ਮਿਹੰਮ ਦੀ ਸੰਸਥਾਪਕ ਬੀਬੀ ਹਰਸਿਮਰਤ ਕੌਰ ਬਾਦਲ ਦੇ ਹਲਕੇ ਵਿੱਚ ਇਨਸਾਫ ਲੈਣ ਲਈ ਬੈਠੀਆਂ ਹਨ।
            ਪੰਜਾਬ ਸਰਕਾਰ ਨੇ ਇਨ੍ਹਾਂ ਲੜਕੀਆਂ ਸਮੇਤ 1800 ਦੇ ਕਰੀਬ ਲੜਕੇ ਲੜਕੀਆਂ ਨੂੰ ਸਪੈਸ਼ਲ ਟਰੇਨਰ ਅਧਿਆਪਕ ਵਜੋਂ ਨਿਯੁਕਤ ਕੀਤਾ ਸੀ। ਥੋੜ੍ਹਾ ਸਮਾਂ ਪਹਿਲਾਂ ਇਨ੍ਹਾਂ ਨੂੰ ਫ਼ਾਰਗ ਕਰ ਦਿੱਤਾ ਗਿਆ। ਮਗਰੋਂ ਸਰਕਾਰ ਨੇ 500 ਦੇ ਕਰੀਬ ਨੌਜਵਾਨਾਂ ਨੂੰ ਮੁੜ ਜੁਆਇਨ ਕਰ ਲਿਆ ਪਰ ਇਹ ਅਧਿਆਪਕ ਸਾਰਿਆਂ ਲਈ ਇਨਸਾਫ ਮੰਗ ਰਹੇ ਹਨ। ਹੁਣ ਠੰਢ ਦਾ ਮੌਸਮ ਸ਼ੁਰੂ ਹੋ ਗਿਆ ਹੈ ਤੇ ਫਿਰ ਵੀ ਇਹ ਅਧਿਆਪਕ ਸੜਕ ਕਿਨਾਰੇ ਬਠਿੰਡਾ ਵਿੱਚ 51 ਦਿਨਾਂ ਤੋਂ ਡਟੇ ਹੋਏ ਹਨ।

Friday, December 14, 2012

                               ਬੇਕਾਰੀ ਦੀ ਪੀੜ
           ਪਾਪਾ, ਤੁਸੀਂ ਜੇਲ ਕਿਉਂ ਜਾਂਦੇ ਹੋ !
                                ਚਰਨਜੀਤ ਭੁੱਲਰ
ਬਠਿੰਡਾ : ਨੌਂ ਵਰ੍ਹਿਆਂ ਦੀ ਬੱਚੀ ਕਿਰਨਪ੍ਰੀਤ ਦੀ ਸਮਝੋ ਬਾਹਰ ਹੈ ਕਿ ਉਸ ਦੇ ਬਾਪ ਨੂੰ ਜੇਲ੍ਹ ਕਿਉਂ ਜਾਣਾ ਪੈਂਦਾ ਹੈ। ਉਮਰ ਵਿੱਚ ਇਹ ਬੱਚੀ ਛੋਟੀ ਹੈ, ਜਦੋਂ ਕਿ ਰੁਜ਼ਗਾਰ ਦਾ ਮਸਲਾ ਵੱਡਾ ਹੈ। ਇਸ ਬੱਚੀ ਦਾ ਪਿਤਾ ਗੁਰਚਰਨ ਸਿੰਘ ਪੰਜਾਹ ਦਿਨਾਂ ਤੋਂ ਬਠਿੰਡਾ ਵਿੱਚ ਆਪਣੇ ਸਾਥੀਆਂ ਨਾਲ ਸੰਘਰਸ਼ 'ਤੇ ਬੈਠਾ ਹੈ। ਬੇਰੁਜ਼ਗਾਰ ਗੁਰਚਰਨ ਸਿੰਘ ਨੂੰ ਆਪਣੀ ਬੱਚੀ ਦੇ ਸੁਆਲ ਪ੍ਰੇਸ਼ਾਨ ਕਰਦੇ ਹਨ। ਏਦਾਂ ਦੇ ਸੁਆਲ ਹਰ ਉਸ ਬੱਚੇ ਦੇ ਹਨ, ਜਿਨ੍ਹਾਂ ਦੇ ਮਾਪੇ ਰੁਜ਼ਗਾਰ ਖਾਤਰ ਸੰਘਰਸ਼ ਕਰ ਰਹੇ ਹਨ।
            ਪਾਪਾ, ਤੁਸੀਂ ਜੇਲ੍ਹ ਕਿਉਂ ਜਾਂਦੇ ਹੋ? ਕਿਰਨਪ੍ਰੀਤ ਦੇ ਇਸ ਸੁਆਲ ਨੂੰ ਹਰ ਦਫ਼ਾ ਗੁਰਚਰਨ ਹੱਸ ਕੇ ਟਾਲ ਦਿੰਦਾ ਹੈ। ਤਰਨ ਤਾਰਨ ਦਾ ਗੁਰਚਰਨ ਸਿੰਘ ਰੁਜ਼ਗਾਰ ਲਈ ਲੜਦਾ ਹੋਇਆ ਪੰਜ ਦਫ਼ਾ ਜੇਲ੍ਹ ਜਾ ਚੁੱਕਾ ਹੈ। ਉਹ ਮਾਝੇ ਅਤੇ ਮਾਲਵੇ ਵਿੱਚ ਪੁਲੀਸ ਦੇ ਲਾਠੀਚਾਰਜ ਦਾ ਸ਼ਿਕਾਰ ਵੀ ਹੋ ਚੁੱਕਾ ਹੈ। ਉਹ ਆਖਦਾ ਹੈ ਕਿ ਜਦੋਂ ਬੇਕਾਰੀ ਦੀ ਚੀਸ ਤਿੱਖੀ ਹੋਵੇ ਤਾਂ ਫਿਰ ਜੇਲ੍ਹਾਂ ਤੇ ਲਾਠੀਆਂ ਤੋਂ ਡਰ ਨਹੀਂ ਲੱਗਦਾ। ਪੰਜਾਬ ਸਰਕਾਰ ਨੇ ਰਾਜ ਭਰ ਵਿੱਚ 1800 ਦੇ ਕਰੀਬ ਸਪੈਸ਼ਲ ਟਰੇਨਰ ਅਧਿਆਪਕ ਰੱਖੇ ਸਨ, ਜਿਨ੍ਹਾਂ ਨੂੰ ਪ੍ਰਤੀ ਮਹੀਨਾ 3500 ਰੁਪਏ ਤਨਖਾਹ ਦਿੱਤੀ ਜਾਂਦੀ ਸੀ। ਹੁਣ ਗੁਰਚਰਨ ਸਮੇਤ ਬਾਕੀ ਅਧਿਆਪਕਾਂ ਨੂੰ ਨੌਕਰੀ ਤੋਂ ਫ਼ਾਰਗ ਕਰ ਦਿੱਤਾ ਗਿਆ ਹੈ। ਹੁਣ ਉਹ ਸਾਥੀਆਂ ਨਾਲ ਬਠਿੰਡਾ ਦੇ ਮਿੰਨੀ ਸਕੱਤਰੇਤ ਦੇ ਬਾਹਰ ਸੜਕ ਕਿਨਾਰੇ ਟੈਂਟ ਲਾ ਕੇ ਸੰਘਰਸ਼ 'ਤੇ ਬੈਠਾ ਹੈ। ਪੰਜ ਭੈਣਾਂ ਦੇ ਇਕਲੌਤੇ ਭਰਾ ਗੁਰਚਰਨ ਸਿੰਘ ਦੇ 75 ਵਰ੍ਹਿਆਂ ਦੇ ਪਿਤਾ ਦਰਸ਼ਨ ਸਿੰਘ ਦੀ ਇੱਕੋ ਅੰਤਿਮ ਇੱਛਾ ਹੈ ਕਿ ਮਰਨ ਤੋਂ ਪਹਿਲਾਂ ਪੁੱਤ ਨੂੰ ਰੁਜ਼ਗਾਰ ਮਿਲ ਜਾਵੇ।
             ਬਟਾਲਾ ਦੀ ਸੰਘਰਸ਼ ਵਿੱਚ ਕੁੱਦੀ ਜਸਵੀਰ ਕੌਰ ਦਾ ਬੱਚਾ ਅੰਮ੍ਰਿਤਪਾਲ ਜਦੋਂ ਆਪਣੀ ਮਾਂ ਨਾਲ ਸੜਕਾਂ 'ਤੇ ਧਰਨੇ ਮੁਜ਼ਾਹਰੇ 'ਤੇ ਬੈਠਦਾ ਹੈ ਤਾਂ ਉਹ ਏਨੀ ਕੁ ਰਮਜ਼ ਤਾਂ ਸਮਝਦਾ ਹੈ ਕਿ ਪਾਣੀ ਸਿਰੋਂ ਲੰਘਿਆ ਹੋਇਆ ਹੈ। ਜਸਵੀਰ ਕੌਰ ਬਠਿੰਡਾ ਜੇਲ੍ਹ ਵੀ ਜਾ ਚੁੱਕੀ ਹੈ ਅਤੇ ਜੇਲ੍ਹ ਵਿੱਚ ਮਰਨ ਵਰਤ 'ਤੇ ਵੀ ਬੈਠ ਚੁੱਕੀ ਹੈ। ਉਹ ਦੱਸਦੀ ਹੈ ਕਿ ਜਦੋਂ ਉਹ ਬੱਚੇ ਨੂੰ ਘਰੇ ਛੱਡ ਕੇ ਧਰਨਿਆਂ ਵਿੱਚ ਆਉਂਦੀ ਹੈ ਤਾਂ ਵਾਪਸੀ 'ਤੇ ਬੱਚਾ ਅਣਜਾਣੇ ਵਿੱਚ ਬਹੁਤ ਸੁਆਲ ਕਰਦਾ ਹੈ। ਫਾਜ਼ਿਲਕਾ ਦੀ ਰੇਸ਼ਮਾ ਰਾਣੀ ਪੰਜ ਵਰ੍ਹਿਆਂ ਤੋਂ ਸੰਘਰਸ਼ੀ ਰਾਹ 'ਤੇ ਹੈ। ਉਹ ਬਠਿੰਡਾ ਜੇਲ੍ਹ ਵਿੱਚ ਵੀ ਜਾ ਚੁੱਕੀ ਹੈ। ਉਹ ਦੱਸਦੀ ਹੈ ਕਿ ਜਦੋਂ ਉਹ ਵਾਪਸ ਘਰ ਜਾਂਦੀ ਹੈ ਤਾਂ ਬੱਚੀ ਸੋਨਮ ਇਹੋ ਸੁਆਲ ਕਰਦੀ ਹੈ ਕਿ ਮੰਮਾ ਥੋਨੂੰ ਪੁਲੀਸ ਕਿਉਂ ਫੜਦੀ ਹੈ? ਉਹ ਸਮਝਾਉਂਦੀ ਹੈ ਕਿ ਜਦੋਂ ਹੱਕ ਮੰਗਣਾ ਗੁਨਾਹ ਬਣ ਜਾਏ ਤਾਂ ਏਦਾਂ ਹੀ ਹੁੰਦਾ ਹੈ। ਉਹ ਬੇਕਾਰੀ ਵਿੱਚ ਉਲਝੀ ਹੋਈ ਬੱਚਿਆਂ ਦੀ ਪਰਵਰਿਸ਼ ਵੀ ਚੰਗੀ ਤਰ੍ਹਾਂ ਨਹੀਂ ਕਰ ਸਕੀ ਹੈ। ਐਮ.ਏ, ਬੀ.ਐੱਡ ਹੋਣ ਦੇ ਬਾਵਜੂਦ ਉਸ ਨੂੰ 3500 ਰੁਪਏ ਦੀ ਸਪੈਸ਼ਲ ਟਰੇਨਰ ਦੀ ਨੌਕਰੀ ਖਾਤਰ ਗਰਮੀ ਸਰਦੀ ਸੜਕਾਂ 'ਤੇ ਰੁਲਣਾ ਪੈਂਦਾ ਹੈ। ਜ਼ਿਲ੍ਹਾ ਮੋਗਾ ਦੇ ਪਿੰਡ ਸਿੰਘਾ ਵਾਲਾ ਦੇ ਨਾਮਦੇਵ ਸਿੰਘ ਦੇ ਘਰ ਜਦੋਂ ਪੁੱਤ ਨੇ ਜਨਮ ਲਿਆ ਤਾਂ ਉਹ ਉਸ ਵਕਤ ਬਠਿੰਡਾ ਦੇ ਸਕੱਤਰੇਤ ਅੱਗੇ ਸੰਘਰਸ਼ ਵਿੱਚ ਬੈਠਾ ਸੀ। ਉਹ ਦੱਸਦਾ ਹੈ ਕਿ ਉਸ ਨੇ ਡੇਢ ਮਹੀਨੇ ਮਗਰੋਂ ਆਪਣੇ ਬੱਚੇ ਦਾ ਮੂੰਹ ਦੇਖਿਆ। ਉਹ ਤਿੰਨ ਦਫ਼ਾ ਜੇਲ੍ਹ ਜਾ ਚੁੱਕਾ ਹੈ ਅਤੇ ਪੰਜਾਬ ਵਿੱਚ ਪੰਜ ਥਾਈਂ ਪੁਲੀਸ ਦਾ ਲਾਠੀਚਾਰਜ ਵੀ ਝੱਲ ਚੁੱਕਾ ਹੈ।
             ਡਰੋਲੀ ਭਾਈ ਦਾ ਸਤਨਾਮ ਸਿੰਘ ਮਾਪਿਆਂ ਦਾ ਇਕਲੌਤਾ ਪੁੱਤ ਹੈ। ਮਾਂ ਪਰਮਜੀਤ ਕੌਰ ਹੱਲਾਸ਼ੇਰੀ ਦੇ ਕੇ ਪੁੱਤ ਨੂੰ ਸੰਘਰਸ਼ੀ ਕਾਫਲੇ ਵਿੱਚ ਤੋਰਦੀ ਹੈ। ਉਹ ਦੱਸਦਾ ਹੈ ਕਿ ਉਸ ਦੀ ਮਾਂ ਹੁਣ ਜਦੋਂ ਵੀ ਫੋਨ ਕਰਦੀ ਹੈ ਤਾਂ ਇਹੋ ਪੁੱਛਦੀ ਹੈ, ਪੁੱਤ, ਪਈ ਸਰਕਾਰ ਦੇ ਮਨ ਵਿੱਚ ਮਿਹਰ। ਉਹ ਨਿਰਉੱਤਰ ਹੋ ਜਾਂਦਾ ਹੈ। ਏਦਾਂ ਦੇ ਸੈਂਕੜੇ ਨੌਜਵਾਨ ਹਨ, ਜੋ ਵਰ੍ਹਿਆਂ ਤੋਂ ਨੌਕਰੀ ਖਾਤਰ ਲੜ ਰਹੇ ਹਨ। ਬਠਿੰਡਾ ਵਿੱਚ ਬੈਠੇ ਇਨ੍ਹਾਂ ਸਪੈਸ਼ਲ ਟਰੇਨਰ ਅਧਿਆਪਕਾਂ ਦੀ ਇਹੋ ਮੰਗ ਹੈ ਕਿ ਉਨ੍ਹਾਂ ਨੂੰ ਸਰਕਾਰ ਮੁੜ ਜੁਆਇਨ ਕਰਾਏ। ਪੰਜਾਬ ਸਰਕਾਰ ਨੇ ਥੋੜਾ ਸਮਾਂ ਪਹਿਲਾਂ 400 ਅਧਿਆਪਕਾਂ ਨੂੰ ਮੁੜ ਜੁਆਇਨ ਕਰਨ ਦੇ ਪੱਤਰ ਜਾਰੀ ਕਰ ਦਿੱਤੇ ਸਨ ਪਰ ਇਹੋ ਹੱਕ ਸਭ ਮੰਗਦੇ ਹਨ। ਜਦੋਂ ਪਹਿਲੇ ਪੜਾਅ ਦਾ ਸੰਘਰਸ਼ ਲੜਿਆ ਤਾਂ ਸਰਕਾਰ ਨੇ ਇਨ੍ਹਾਂ ਨੂੰ ਮਈ ਜੂਨ ਵਿੱਚ ਜੁਆਇਨ ਕਰਾ ਲਿਆ ਸੀ। ਉਸ ਮਗਰੋਂ ਅਕਤੂਬਰ ਵਿੱਚ ਫਿਰ ਫ਼ਾਰਗ ਕਰ ਦਿੱਤਾ। ਹੁਣ ਇਹ ਅਧਿਆਪਕ ਮੁੜ ਸੰਘਰਸ਼ ਦੇ ਰਾਹ 'ਤੇ ਹਨ। ਬਠਿੰਡਾ ਵਿੱਚ ਇਨ੍ਹਾਂ ਬੇਰੁਜ਼ਗਾਰਾਂ ਦੇ ਟੈਂਟ ਵਿੱਚ ਕਈ ਅਧਿਆਪਕ ਮਰਨ ਵਰਤ 'ਤੇ ਵੀ ਬੈਠੇ ਹਨ। ਥੋੜੇ ਦਿਨ ਪਹਿਲਾਂ ਮੁੱਖ ਮੰਤਰੀ ਨਾਲ ਇਨ੍ਹਾਂ ਅਧਿਆਪਕਾਂ ਦੇ ਵਫ਼ਦ ਦੀ ਮੀਟਿੰਗ ਹੋਈ ਹੈ, ਜਿਸ ਵਿੱਚ ਮੁੱਖ ਮੰਤਰੀ ਨੇ ਚਾਰ ਦਿਨਾਂ ਵਿੱਚ ਮਾਮਲਾ ਹੱਲ ਕਰਨ ਦੀ ਗੱਲ ਆਖੀ ਹੈ। ਇਨ੍ਹਾਂ ਬੇਰੁਜ਼ਗਾਰਾਂ ਦਾ ਕਹਿਣਾ ਹੈ ਕਿ ਉਹ ਹੁਣ ਖ਼ਾਲੀ ਹੱਥ ਬਠਿੰਡਾ ਤੋਂ ਨਹੀਂ ਜਾਣਗੇ।
                                                        ਸੰਘਰਸ਼ ਨੂੰ ਭਰਾਤਰੀ ਮੋਢਾ
ਬਠਿੰਡਾ ਇਲਾਕੇ ਦੇ ਦਾਨੀ ਸੱਜਣਾਂ ਦੀ ਇਨ੍ਹਾਂ ਅਧਿਆਪਕਾਂ ਦੇ ਸੰਘਰਸ਼ 'ਤੇ ਮਿਹਰ ਹੈ। ਪੀ.ਆਰ.ਟੀ.ਸੀ. ਦੀ ਇਕ ਬੱਸ ਦਾ ਕੰਡਕਟਰ ਦੋ ਦਫ਼ਾ ਇਨ੍ਹਾਂ ਦੇ ਟੈਂਟ ਵਿੱਚ ਆ ਕੇ ਪੰਜ-ਪੰਜ ਸੌ ਰੁਪਏ ਦੇ ਗਿਆ ਹੈ। ਉਸ ਨੇ ਇਹ ਗੁਪਤ ਦਾਨ ਦਿੱਤਾ। ਇਕ ਹੋਰ ਪ੍ਰਿੰਸੀਪਲ ਗੁਪਤ ਦਾਨ ਵਜੋਂ ਇਕ ਹਜ਼ਾਰ ਰੁਪਏ ਦੇ ਗਿਆ। ਏਦਾਂ ਦੇ ਗੁਪਤ ਦਾਨੀ ਬਹੁਤ ਹਨ। ਬਠਿੰਡਾ ਦੇ ਇਕ ਗੁਰਦੁਆਰੇ ਦੇ ਪ੍ਰਬੰਧਕ ਇਨ੍ਹਾਂ ਨੂੰ ਸ਼ਾਮ ਵਕਤ ਲੰਗਰ ਦੇ ਜਾਂਦੇ ਹਨ। ਸਰਕਾਰੀ ਅਧਿਆਪਕ ਬਲਜਿੰਦਰ ਸਿੰਘ ਲੰਗਰ ਦਾ ਰਾਸ਼ਨ ਦੇ ਰਿਹਾ ਹੈ, ਜਦੋਂ ਕਿ ਇਕ ਹੋਰ ਅਧਿਆਪਕ ਸੁਖਚਰਨ ਸਿੰਘ ਲੱਕੜਾਂ ਦੇ ਕੇ ਜਾਂਦਾ ਹੈ। ਭਰਾਤਰੀ ਧਿਰਾਂ ਵੱਲੋਂ ਦੁੱਧ ਭੇਜ ਦਿੱਤਾ ਜਾਂਦਾ ਹੈ। ਇਨ੍ਹਾਂ ਦਾਨੀ ਸੱਜਣਾਂ ਦੀ ਮਦਦ ਨਾਲ ਇਨ੍ਹਾਂ ਬੇਰੁਜ਼ਗਾਰਾਂ ਦਾ ਲੰਗਰ ਵੀ ਚੱਲ ਰਿਹਾ ਹੈ।

Thursday, December 13, 2012

                                    ਸਰਕਾਰੀ ਦਰਬਾਰ
                ਬਾਪੂ ਚੇਅਰਮੈਨ ,ਪੁੱਤ ਸੇਵਾਦਾਰ
                                      ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਵਿੱਚ ਕਈ ਅਜਿਹੀਆਂ ਮਾਰਕੀਟ ਕਮੇਟੀਆਂ ਹਨ ਜਿਨ੍ਹਾਂ ਵਿੱਚ ਪਿਤਾ ਚੇਅਰਮੈਨ ਹਨ ਜਦੋਂ ਕਿ ਉਨ੍ਹਾਂ ਦੇ ਪੁੱਤ ਸੇਵਾਦਾਰ ਹਨ। ਮਾਰਕੀਟ ਕਮੇਟੀਆਂ ਵਿੱਚ ਜੋ ਸੇਵਾਦਾਰਾਂ ਅਤੇ ਚੌਕੀਦਾਰਾਂ ਦੀ ਨਵੀਂ ਭਰਤੀ ਹੋਈ ਹੈ, ਉਸ ਵਿੱਚ ਚੇਅਰਮੈਨਾਂ ਦੇ ਪੁੱਤਾਂ ਤੇ ਰਿਸ਼ਤੇਦਾਰਾਂ ਨੂੰ ਨੌਕਰੀਆਂ ਜ਼ਰੂਰ ਮਿਲ ਗਈਆਂ ਹਨ। ਇੰਜ ਲੱਗਦਾ ਹੈ ਕਿ ਜਿਵੇਂ ਪੰਜਾਬ ਵਿੱਚ ਹੁਣ ਸੇਵਾਦਾਰ ਦੀ ਨੌਕਰੀ ਵੀ ਆਮ ਲੋਕਾਂ ਲਈ ਨਹੀਂ ਬਚੀ ਹੈ।  ਮਾਰਕੀਟ ਕਮੇਟੀਆਂ ਤੋਂ ਸੂਚਨਾ  ਅਧਿਕਾਰ ਕਾਨੂੰਨ ਤਹਿਤ ਜੋ ਸੂਚਨਾਵਾਂ ਮਿਲੀਆਂ ਹਨ, ਉਨ੍ਹਾਂ ਰਾਹੀਂ ਇਹ ਖੁਲਾਸਾ ਹੋਇਆ ਹੈ।ਰਾਮਾਂ ਵਿੱਚ ਨਵੇਂ ਤਿੰਨ ਸੇਵਾਦਾਰ ਭਰਤੀ ਕੀਤੇ ਗਏ ਹਨ। ਇਸ ਮਾਰਕੀਟ ਕਮੇਟੀ ਦੇ ਚੇਅਰਮੈਨ ਗੁਰਜੀਤ ਸਿੰਘ ਪਿੰਡ ਕੋਟਬਖਤੂ ਹਨ। ਉਨ੍ਹਾਂ ਦੇ ਲੜਕੇ ਭੁਪਿੰਦਰ ਸਿੰਘ ਨੂੰ ਸੇਵਾਦਾਰ ਦੀ ਨੌਕਰੀ ਦਿੱਤੀ ਗਈ ਹੈ। ਇਸ ਅਸਾਮੀ ਲਈ 416 ਉਮੀਦਵਾਰਾਂ ਨੇ ਅਪਲਾਈ ਕੀਤਾ ਸੀ ਇਨ੍ਹਾਂ ਵਿੱਚੋਂ ਸੇਵਾਦਾਰ ਦੀ ਨੌਕਰੀ ਲਈ ਭੁਪਿੰਦਰ ਸਿੰਘ 'ਯੋਗ' ਨਿਕਲਿਆ। ਇੰਜ ਹੀ ਇੱਕ ਹੋਰ ਸੇਵਾਦਾਰ ਮਨਪ੍ਰੀਤ ਸਿੰਘ ਵੀ ਚੇਅਰਮੈਨ ਦੇ ਪਿੰਡ ਕੋਟਬਖਤੂ ਦਾ ਹੀ ਹੈ। ਤਤਕਾਲੀ ਚੇਅਰਮੈਨ ਗੁਰਜੀਤ ਸਿੰਘ ਦਾ ਕਹਿਣਾ ਹੈ ਕਿ ਉਹ ਤਾਂ ਭਰਤੀ ਵੇਲੇ ਬਿਮਾਰ ਸਨ ਅਤੇ ਉਨ੍ਹਾਂ ਦੀ ਗੈਰਹਾਜ਼ਰੀ ਵਿੱਚ ਵਾਈਸ ਚੇਅਰਮੈਨ ਨੇ ਕਮੇਟੀ ਬਣਾ ਕੇ ਭਰਤੀ ਕੀਤੀ ਸੀ। ਉਸ ਦੇ ਲੜਕੇ ਦੀ ਸਭ ਤੋਂ ਜਿਆਦਾ ਯੋਗਤਾ ਬੀ.ਏ,ਐਲ.ਐਲ.ਬੀ.ਸੀ.  ਜਿਸ ਕਰਕੇ ਉਸ ਦੀ ਨਿਯੁਕਤੀ ਹੋਈ ਹੈ।
              ਮਾਰਕੀਟ ਕਮੇਟੀ, ਭੁੱਚੋ ਮੰਡੀ ਵਿੱਚ ਦੋ ਸੇਵਾਦਾਰ ਰੱਖੇ ਗਏ ਜਿਨ੍ਹਾਂ  ਲਈ 281 ਉਮੀਦਵਾਰਾਂ ਨੇ ਅਪਲਾਈ ਕੀਤਾ। ਨਿਯੁਕਤੀ ਮਾਰਕੀਟ ਕਮੇਟੀ ਦੇ ਚੇਅਰਮੈਨ ਹਰਗੋਬਿੰਦ ਸਿੰਘ ਦੇ ਲੜਕੇ ਕੁਲਵਿੰਦਰ ਸਿੰਘ ਦੀ ਹੋਈ ਹੈ। ਹਰਗੋਬਿੰਦ ਸਿੰਘ ਦਾ ਕਹਿਣਾ ਸੀ ਕਿ ਵਾਈਸ ਚੇਅਰਮੈਨ ਵਲੋਂ ਇਹ ਭਰਤੀ ਕੀਤੀ ਗਈ  ਅਤੇ ਉਸ ਦੀ ਕੋਈ ਦਾਖਲਅੰਦਾਜੀ ਨਹੀਂ। ਮਾਰਕੀਟ ਕਮੇਟੀ, ਸਰਦੂਲਗੜ੍ਹ ਦੀ  ਨਵੀਂ ਭਰਤੀ ਵਿੱਚ ਗੁਰਪ੍ਰੀਤ ਸਿੰਘ (ਪਿੰਡ ਚੈਨੇਵਾਲਾ) ਨੂੰ ਸੇਵਾਦਾਰ ਨਿਯੁਕਤ ਕੀਤਾ ਗਿਆ ਹੈ। ਇਸ ਸੇਵਾਦਾਰ ਦਾ ਪਿਤਾ ਸੁਖਦੇਵ ਸਿੰਘ ਵਾਸੀ ਚੈਨੇਵਾਲਾ ਮਾਰਕੀਟ ਕਮੇਟੀ ਦਾ ਚੇਅਰਮੈਨ ਹੈ। ਇਸ ਕਮੇਟੀ ਵਿੱਚ ਸੇਵਾਦਾਰ ਲੱਗਣ ਲਈ 583 ਉਮੀਦਵਾਰਾਂ ਨੇ ਅਪਲਾਈ ਕੀਤਾ ਸੀ। ਚੇਅਰਮੈਨ ਸੁਖਦੇਵ ਸਿੰਘ ਦਾ ਕਹਿਣਾ ਸੀ ਕਿ  16 ਮਹੀਨੇ ਤੋ ਕਮੇਟੀ ਵਿੱਚ ਠੇਕੇ 'ਤੇ ਸੇਵਾਦਾਰ ਲੱਗਿਆ ਹੋਇਆ ਸੀ। ਹੁਣ ਚੋਣ ਕਮੇਟੀ ਨੇ ਉਸ ਦੀ ਚੋਣ ਕੀਤੀ ਹੈ ਅਤੇ ਉਹ ਚੋਣ ਕਮੇਟੀ ਵਿੱਚ ਸ਼ਾਮਲ ਨਹੀਂ ਸੀ।   ਸੇਵਾਦਾਰ ਦੀ ਅਸਾਮੀ ਲਈ ਯੋਗਤਾ ਅੱਠਵੀਂ ਪਾਸ ਹੁੰਦੀ ਹੈ। ਸੇਵਾਦਾਰ ਨੂੰ  ਨਿਯੁਕਤੀ ਹੋਣ ਮਗਰੋਂ ਔਸਤਨ 12,500 ਰੁਪਏ ਪ੍ਰਤੀ ਮਹੀਨਾ ਤਨਖਾਹ ਮਿਲਣੀ ਸ਼ੁਰੂ ਹੋ ਜਾਂਦੀ ਹੈ।  ਕਲਰਕ ਵਜੋਂ ਤਰੱਕੀ ਲਈ ਸੇਵਾਦਾਰ ਵਾਸਤੇ15 ਫੀਸਦੀ ਕੋਟਾ ਵੀ ਹੁੰਦਾ ਹੈ ਜਿਸ ਕਰਕੇ ਚੇਅਰਮੈਨਾਂ ਲਈ ਆਪਣੇ ਪੁੱਤਾਂ ਨੂੰ ਸੇਵਾਦਾਰ ਬਣਾਉਣਾ  ਘਾਟੇ ਦਾ ਸੌਦਾ ਨਹੀਂ ਹੈ। ਮਾਰਕੀਟ ਕਮੇਟੀ ਮਾਨਸਾ ਦੇ ਚੇਅਰਮੈਨ ਸੁਰਜੀਤ ਸਿੰਘ ਪਿੰਡ ਬਾਜੇਵਾਲਾ ਦੇ ਭਰਾ ਤੋਗਾ ਸਿੰਘ ਦੇ ਪੋਤੇ ਯਾਦਵਿੰਦਰ ਸਿੰਘ ਦੀ ਸੇਵਾਦਾਰ ਵਜੋਂ ਨਵੀਂ ਨਿਯੁਕਤੀ ਹੋਈ ਹੈ। ਚੇਅਰਮੈਨ ਸੁਰਜੀਤ ਸਿੰਘ ਦਾ ਕਹਿਣਾ ਸੀ ਕਿ ਸੇਵਾਦਾਰ ਚੁਣਿਆ ਲੜਕਾ  ਉਨ੍ਹਾਂ ਦੇ ਪਿੰਡ 'ਚੋਂ ਹੈ ਹੋਰ ਕੋਈ ਗੱਲ ਨਹੀਂ। ਇਸ ਅਸਾਮੀ ਲਈ 236 ਉਮੀਦਵਾਰ ਮੈਦਾਨ ਵਿੱਚ ਸਨ। ਇਸ ਨਿਯੁਕਤੀ ਦੀ ਤਾਂ ਮੁੱਖ ਮੰਤਰੀ  ਦੇ ਦਰਬਾਰ ਵਿੱਚ ਵੀ ਚਰਚਾ ਹੋ ਚੁੱਕੀ ਹੈ।  
           ਦੱਸਣਯੋਗ ਹੈ ਕਿ ਮਾਰਕੀਟ ਕਮੇਟੀਆਂ ਨੇ  ਖਾਲੀ ਪਈਆਂ ਅਸਾਮੀਆਂ ਭਰਨ ਲਈ ਚੋਣ ਭਰਤੀ ਬੋਰਡ ਬਣਾ ਕੇ ਆਪਣੇ ਪੱਧਰ 'ਤੇ ਹੀ ਸੇਵਾਦਾਰਾਂ ਅਤੇ ਚੌਕੀਦਾਰਾਂ ਦੀ ਭਰਤੀ ਕੀਤੀ ਹੈ। ਮਾਰਕੀਟ ਕਮੇਟੀ, ਬਰੇਟਾ ਵਿੱਚ ਪੰਜਾਬ ਸਰਕਾਰ ਵਲੋਂ ਪੰਜਾਬ ਮੰਡੀ ਬੋਰਡ ਦੇ ਨਾਮਜ਼ਦ ਕੀਤੇ ਮੈਂਬਰ ਦਰਸ਼ਨ ਸਿੰਘ ਦੇ ਲੜਕੇ ਸੁਖਜਿੰਦਰ ਸਿੰਘ (ਪਿੰਡ ਗੋਰਖਨਾਥ) ਨੂੰ ਸੇਵਾਦਾਰ  ਨਿਯੁਕਤ ਕੀਤਾ ਗਿਆ ਹੈ। ਜ਼ਿਲ੍ਹਾ ਗੁਰਦਾਸਪੁਰ ਵਿੱਚ ਪੈਂਦੀ ਮਾਰਕੀਟ ਕਮੇਟੀ ਧਾਰੀਵਾਲ  ਵਿੱਚ ਅਮਰਜੀਤ ਸਿੰਘ ਨੂੰ ਸੇਵਾਦਾਰ ਰੱਖਿਆ ਗਿਆ ਹੈ ਜੋ ਕਿ ਕਮੇਟੀ ਦੇ ਚੇਅਰਮੈਨ ਦਾ ਲੜਕਾ ਹੈ।  ਪਠਾਨਕੋਟ ਜ਼ਿਲ੍ਹੇ ਦੀ ਮਾਰਕੀਟ ਕਮੇਟੀ ਨਰੋਟ ਜੈਮਲ ਸਿੰਘ ਦੇ ਚੇਅਰਮੈਨ ਬਹਾਦਰ ਸਿੰਘ ਦੇ ਭਤੀਜੇ ਭਾਨੂੰ ਰਾਣਾ ਨੂੰ ਸੇਵਾਦਾਰ ਦੀ ਨੌਕਰੀ ਮਿਲੀ ਹੈ ਜੋ ਕਿ ਪਿੰਡ ਮੁੱਠੀ ਦਾ ਰਹਿਣ ਵਾਲਾ ਹੈ। ਮਾਰਕੀਟ ਕਮੇਟੀ ਸਰਹਿੰਦ (ਜ਼ਿਲ੍ਹਾ ਫਤਹਿਗੜ੍ਹ ਸਾਹਿਬ)ਵਿੱਚ ਤਾਂ ਤਿੰਨ ਰਿਸ਼ਤੇਦਾਰਾਂ ਨੂੰ ਨੌਕਰੀਆਂ ਮਿਲੀਆਂ ਹਨ। ਇਸ ਕਮੇਟੀ ਦਾ ਚੇਅਰਮੈਨ ਜਤਿੰਦਰ ਸਿੰਘ ਹੈ ਜਿਸ ਦੇ ਰਿਸ਼ਤੇਦਾਰ ਕੁਲਦੀਪ ਸਿੰਘ ਵਾਸੀ ਰਜਿੰਦਰਗੜ੍ਹ ਨੂੰ ਸੇਵਾਦਾਰ ਰੱਖਿਆ ਗਿਆ ਹੈ। ਕਮੇਟੀ ਦੇ ਨਾਮਜ਼ਦ ਇੱਕ ਮੈਂਬਰ ਦਾ ਰਿਸ਼ਤੇਦਾਰ ਮਨਦੀਪ ਸਿੰਘ ਵੀ ਸੇਵਾਦਾਰ ਰੱਖਿਆ ਗਿਆ ਹੈ। ਇਸੇ ਤਰ੍ਹਾਂ ਮਾਰਕੀਟ ਕਮੇਟੀ ਦੇ ਸਕੱਤਰ ਦੇ ਰਿਸ਼ਤੇਦਾਰ ਗੁਰਬਿੰਦਰ ਸਿੰਘ ਨੂੰ ਵੀ ਨੌਕਰੀ ਦਿੱਤੀ ਗਈ ਹੈ।
           ਮਾਰਕੀਟ ਕਮੇਟੀ ਰਾਮਪੁਰਾ ਫੂਲ ਵਿੱਚ ਤਿੰਨ ਸੇਵਾਦਾਰ ਅਤੇ ਤਿੰਨ ਚੌਕੀਦਾਰ ਭਰਤੀ ਕੀਤੇ ਗਏ ਹਨ। ਇਸ ਕਮੇਟੀ ਵਿੱਚ ਚੌਕੀਦਾਰ ਦੀ ਅਸਾਮੀ 'ਤੇ ਸਾਬਕਾ ਮੁੱਖ ਸੰਸਦੀ ਸਕੱਤਰ ਜਗਦੀਪ ਸਿੰਘ ਨਕਈ ਦੇ ਪੀ ਏ ਰਹੇ ਜਗਦੀਪ ਸਿੰਘ  ਵਾਸੀ ਰਾਮਪੁਰਾ ਨੂੰ ਭਰਤੀ ਕੀਤਾ ਗਿਆ ਹੈ। ਮਾਰਕੀਟ ਕਮੇਟੀਆਂ ਦੇ ਚੇਅਰਮੈਨਾਂ ਦਾ ਤਰਕ ਹੈ ਕਿ  ਮੈਰਿਟ ਦੇ ਅਧਾਰ 'ਤੇ ਭਰਤੀ ਹੋਈ ਹੈ। ਜਦੋਂ ਕਿ ਸੂਤਰ ਆਖਦੇ ਹਨ ਕਿ ਜੇ ਮੈਰਿਟ ਹੀ ਆਧਾਰ ਹੁੰਦੀ ਤਾਂ ਮਾਰਕੀਟ ਕਮੇਟੀਆਂ ਵਿੱਚ ਦਸ ਦਸ ਸਾਲ ਤੋਂ ਕੰਮ ਕਰ ਰਹੇ ਕੱਚੇ ਅਤੇ ਠੇਕੇ 'ਤੇ ਕੰਮ ਕਰ ਰਹੇ ਸੇਵਾਦਾਰਾਂ ਨੇ ਪੱਕੇ ਹੋ ਜਾਣਾ ਸੀ। ਹੁਣ ਜੋ ਸੇਵਾਦਾਰ ਭਰਤੀ ਕੀਤੇ ਗਏ ਹਨ,ਉਨ੍ਹਾਂ ਦੀ ਪੱਕੀ ਨਿਯੁਕਤੀ ਕੀਤੀ ਗਈ ਹੈ।
                                                     ਚੇਅਰਮੈਨਾਂ ਦੇ ਗਰਾਈਂ ਸੇਵਾਦਾਰ ਬਣੇ 
 ਸੇਵਾਦਾਰ ਤੇ ਚੌਕੀਦਾਰ ਬਣਨ ਦਾ ਮਾਣ ਚੇਅਰਮੈਨਾਂ ਦੇ ਗਰਾਈਂ ਉਮੀਦਵਾਰਾਂ ਨੂੰ ਵੀ ਮਿਲਿਆ। ਮਾਰਕੀਟ ਕਮੇਟੀ, ਮੁੱਦਕੀ ਦੇ ਚੇਅਰਮੈਨ ਮੁਖਤਿਆਰ ਸਿੰਘ ਦੇ ਪਿੰਡ ਮੁੱਦਕੀ ਦਾ ਗੁਰਮੁੱਖ ਸਿੰਘ,ਮਾਰਕੀਟ ਕਮੇਟੀ, ਜ਼ੀਰਾ ਦੇ ਚੇਅਰਮੈਨ ਬਹਾਦਰ ਸਿੰਘ ਦੇ ਪਿੰਡ ਹਰਦਾਸਾ ਸਿੰਘ ਦਾ ਬਲਦੇਵ ਸਿੰਘ ਅਤੇ ਜਲਾਲਾਬਾਦ ਕਮੇਟੀ ਦੇ ਚੇਅਰਮੈਨ ਦਵਿੰਦਰ ਸਿੰਘ ਦੇ ਪਿੰਡ ਚੱਕ ਜਾਨੀਸਰ ਦੇ ਜੀਵਨਦੀਪ ਸਿੰਘ ਤੇ ਅਮਰਦੀਪ ਸਿੰਘ ਇਨ੍ਹਾਂ ਅਸਾਮੀਆਂ ਲਈ ਨਿਯੁਕਤ ਕੀਤੇ ਗਏ ਹਨ। ਬੱਸੀ ਪਠਾਣਾਂ ਕਮੇਟੀ ਦੇ ਚੇਅਰਮੈਨ ਲਖਵੀਰ ਸਿੰਘ ਦੇ ਪਿੰਡ ਬਾਬਲਾ ਦਾ ਗੁਰਿੰਦਰ ਸਿੰਘ,ਭੁਲੱਥ ਕਮੇਟੀ ਦੇ ਚੇਅਰਮੈਨ ਸਵਰਨ ਸਿੰਘ ਜੋਸ਼ ਦੇ ਪਿੰਡ ਨੌਰੰਗਪੁਰ ਦਾ ਸਤਪਾਲ ਰਾਮ,ਹਰੀਕੇ ਕਮੇਟੀ ਦੇ ਚੇਅਰਮੈਨ ਮੇਲਾ ਸਿੰਘ ਦੇ ਪਿੰਡ ਹਰੀਕੇ ਦਾ ਜਸਬੀਰ ਸਿੰਘ,ਮਲੌਦ ਕਮੇਟੀ ਦੇ ਚੇਅਰਮੈਨ ਅਮਰੀਕ ਸਿੰਘ ਦੇ ਪਿੰਡ ਰੋੜੀਆਂ ਦਾ ਪਰਵਿੰਦਰ ਸਿੰਘ,ਮੋਰਿੰਡਾ ਕਮੇਟੀ ਦੇ ਚੇਅਰਮੈਨ ਰਜਿੰਦਰ ਸਿੰਘ ਦੇ ਪਿੰਡ ਮੁੰਡੀਆਂ ਦਾ ਕਰਮਜੀਤ ਸਿੰਘ, ਸ੍ਰੀਹਰਗੋਬਿੰਦ ਮਾਰਕੀਟ ਕਮੇਟੀ ਦੇ ਚੇਅਰਮੈਨ ਪਰਮਿੰਦਰ ਸਿੰਘ ਦੇ ਪਿੰਡ ਬਾਘੇ ਦਾ ਗੁਰਪ੍ਰੀਤ ਸਿੰਘ ਅਤੇ ਪਠਾਨਕੋਟ ਕਮੇਟੀ ਦੇ ਚੇਅਰਮੈਨ ਗਵਨ ਘਈ ਦੇ ਸ਼ਾਹਪੁਰ ਕੰਡੀ ਦਾ ਨਿਕਸਨ ਤੇ ਗਗਨਦੀਪ ਵੀ ਇਨ੍ਹਾਂ ਅਸਾਮੀਆਂ 'ਤੇ ਨਿਯੁਕਤ ਹੋਣ ਵਿੱਚ ਬਾਜ਼ੀ ਮਾਰ ਗਏ ਹਨ।
                                                       ਭਰਤੀ ਪ੍ਰਕਿਰਿਆ ਵਿੱਚ ਮਨਮਰਜ਼ੀ 
 ਮਾਰਕੀਟ ਕਮੇਟੀਆਂ ਦੀ ਭਰਤੀ ਪ੍ਰਕਿਰਿਆ ਵਿੱਚ ਇਕਸਾਰਤਾ ਨਹੀਂ ਹੈ। ਹਰ ਕਮੇਟੀ ਨੇ ਆਪਣੀ ਮਰਜ਼ੀ ਅਨੁਸਾਰ ਨਿਯਮ ਘੜ ਲਏ । ਮਿਸਾਲ ਦੇ ਤੌਰ 'ਤੇ ਰਾਮਪੁਰਾ ਫੂਲ,ਭੁੱਚੋ ਅਤੇ ਬਠਿੰਡਾ ਦੀ ਕਮੇਟੀ ਨੇ 10 ਨੰਬਰ ਦੀ ਸਿਰਫ਼ ਇੰਟਰਵਿਊ ਦੇ ਆਧਾਰ 'ਤੇ ਚੋਣ ਕੀਤੀ ਜਦੋਂ ਕਿ ਰਾਮਾਂ ਕਮੇਟੀ ਨੇ 20 ਨੰਬਰ ਦੀ ਇੰਟਰਵਿਊ ਰੱਖੀ। ਜਲਾਲਾਬਾਦ ਤੇ ਫਾਜ਼ਿਲਕਾ ਕਮੇਟੀ ਨੇ ਇੰਟਰਵਿਊ ਦਾ ਕੋਈ ਨੰਬਰ ਨਹੀਂ ਰੱਖਿਆ। ਸਰਹਿੰਦ ਕਮੇਟੀ ਨੇ ਇੰਟਰਵਿਊ ਦੇ 25 ਨੰਬਰ ਰੱਖੇ ਸਨ। ਫਗਵਾੜਾ ਕਮੇਟੀ ਨੇ ਇੰਟਰਵਿਊ ਦੇ 50 ਨੰਬਰ ਰੱਖੇ ਸਨ ਜਦੋਂ ਕਿ ਸਾਹਨੇਵਾਲ ਕਮੇਟੀ ਨੇ 90 ਨੰਬਰ ਵਿਦਿਅਕ ਯੋਗਤਾ ਦੇ ਰੱਖੇ ਸਨ। ਮਲੌਦ ਕਮੇਟੀ ਨੇ ਤਜਰਬੇ ਦੇ ਵੀ 10 ਨੰਬਰ ਰੱਖੇ ਸਨ।
                                                    ਮੈਨੂੰ ਕੋਈ ਜਾਣਕਾਰੀ ਨਹੀਂ: ਲੱਖੋਵਾਲ
ਪੰਜਾਬ ਮੰਡੀ ਬੋਰਡ ਦੇ ਚੇਅਰਮੈਨ ਅਜਮੇਰ ਸਿੰਘ ਲੱਖੋਵਾਲ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੂੰ ਇਸ ਗੱਲ ਦੀ ਜਾਣਕਾਰੀ ਨਹੀਂ ਕਿ ਕਮੇਟੀਆਂ ਦੇ ਚੇਅਰਮੈਨਾਂ ਨੇ ਆਪਣੇ ਲੜਕੇ ਸੇਵਾਦਾਰ ਜਾਂ ਚੌਕੀਦਾਰ ਰੱਖੇ ਹਨ। ਉਨ੍ਹਾਂ ਆਖਿਆ ਕਿ ਕਮੇਟੀਆਂ ਕੋਲ ਆਪਣੇ ਤੌਰ 'ਤੇ ਇਹ ਅਸਾਮੀਆਂ ਭਰਨ ਦੀ ਤਾਕਤ ਹੁੰਦੀ ਹੈ ਅਤੇ ਖ਼ਾਲੀ ਥਾਂਵਾਂ 'ਤੇ ਹੀ ਇਹ ਅਸਾਮੀਆਂ ਭਰੀਆਂ ਗਈਆਂ ਹਨ। ਉਨ੍ਹਾਂ ਆਖਿਆ ਕਿ ਭਰਤੀ ਦਾ ਮਾਮਲਾ ਕਮੇਟੀਆਂ ਦੀ ਹਦੂਦ ਵਿੱਚ ਆਉਂਦਾ ਹੈ ਜਿਸ ਕਰਕੇ ਕੋਈ ਪ੍ਰਵਾਨਗੀ ਦੀ ਲੋੜ ਨਹੀਂ ਹੁੰਦੀ । ਪੰਜਾਬ ਮੰਡੀ ਬੋਰਡ ਦੇ ਸਕੱਤਰ ਮਹਿੰਦਰ ਸਿੰਘ ਕੈਂਥ ਦਾ ਕਹਿਣਾ ਸੀ ਕਿ ਪੰਜਾਬ ਸਰਕਾਰ ਦੇ ਨਿਯਮਾਂ ਅਨੁਸਾਰ ਇਹ ਭਰਤੀ ਹੁੰਦੀ ਹੈ ਅਤੇ ਕਮੇਟੀਆਂ ਆਜ਼ਾਦਾਨਾ ਤੌਰ 'ਤੇ ਭਰਤੀ ਦੀ ਪ੍ਰਕਿਰਿਆ ਅਤੇ ਅਧਾਰ ਦਾ ਫੈਸਲਾ ਕਰਦੀਆਂ ਹਨ। ਕਮੇਟੀ ਮਤਾ ਪਾਸ ਕਰਕੇ ਬੋਰਡ ਨੂੰ ਭੇਜਦੀ ਹੈ ਅਤੇ ਜੋ ਨਿਯੁਕਤੀ ਨਿਯਮਾਂ ਅਨੁਸਾਰ ਨਹੀਂ ਹੁੰਦੀ,ਉਸ ਨੂੰ ਰੱਦ ਕਰ ਦਿੱਤਾ ਜਾਂਦਾ ਹੈ।

Wednesday, December 12, 2012

                                                                    ਵਿਸ਼ਵ ਕਬੱਡੀ ਕੱਪ
                                            ਕਬੱਡੀ ਕਰੋੜਾਂ ਦੀ, ਜਾਂਬਾਜ਼ ਕੌਡੀਆਂ ਦਾ
                                                                     ਚਰਨਜੀਤ ਭੁੱਲਰ
ਬਠਿੰਡਾ : ਕਰੋੜਾਂ ਦੇ ਵਿਸ਼ਵ ਕਬੱਡੀ ਕੱਪ ਦਾ ਮੈਸਕਟ ਮੈਨ ਗਰੀਬ ਹੈ। ਤੀਜੇ ਵਿਸ਼ਵ ਕਬੱਡੀ ਕੱਪ ਦੇ ਮਸਕਟ ਨੂੰ ਤਾਂ ਹਰ ਕੋਈ ਜਾਣਦਾ ਹੈ ਪਰ ਕੋਈ ਨਹੀਂ ਇਸ ਮਸਕਟ ਪਿਛੇ ਛੁਪੇ ਚਿਹਰੇ ਨੂੰ ਜਾਣਦਾ। ਅਸਲੀ ਜ਼ਿੰਦਗੀ ਵਿੱਚ ਤਾਂ ਇਹ ਚਿਹਰਾ ਗਰੀਬੀ ਰੇਖਾ ਦੇ ਭਾਰ ਹੇਠ ਦੱਬਿਆ ਹੋਇਆ ਹੈ। ਇਹ ਚਿਹਰਾ ਉੱਚਾ ਉਡਣਾ ਚਾਹੁੰਦਾ ਹੈ ਪਰ ਗੁਰਬਤ ਉਸ ਦੇ ਪੈਰਾਂ ਵਿੱਚ ਜ਼ੰਜੀਰ ਬਣੀ ਹੋਈ ਹੈ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਵੱਲੋਂ ਤੀਜੇ ਵਿਸ਼ਵ ਕਬੱਡੀ ਕੱਪ ਦਾ ਇਹ ਮਸਕਟ ਚੰਡੀਗੜ੍ਹ ਵਿੱਚ ਰਿਲੀਜ਼ ਕੀਤਾ ਗਿਆ ਸੀ।
             ਬਠਿੰਡਾ ਦੇ ਦੇਸ ਰਾਜ ਸੀਨੀਅਰ ਸੈਕੰਡਰੀ ਸਕੂਲ ਦਾ 17 ਵਰ੍ਹਿਆਂ ਦਾ ਹਰਬੰਸ ਸਿੰਘ ਇਸ ਵੇਲੇ ਗਿਆਰ੍ਹਵੀਂ ਕਲਾਸ ਦਾ ਵਿਦਿਆਰਥੀ ਹੈ। ਇਹ ਵਾਲੀਬਾਲ ਦਾ ਚੰਗਾ ਖਿਡਾਰੀ ਹੈ। ਪੰਜਾਬ ਸਰਕਾਰ ਵੱਲੋਂ ਉਸ ਨੂੰ ਮਸਕਟ ਮੈਨ ਬਣਨ ਦੇ ਬਦਲੇ ਪੰਜ ਸੌ ਰੁਪਏ ਦਿਹਾੜੀ ਦਿੱਤੀ ਜਾਣੀ ਹੈ। ਉਹ ਖੁਸ਼ ਹੈ ਕਿ ਉਸ ਨੂੰ ਪੂਰੀ ਦੁਨੀਆ ਦੇਖ ਰਹੀ ਹੈ ਤੇ ਮਸਕਟ ਮੈਨ ਦਾ ਮੌਕਾ ਮਿਲਣ 'ਤੇ ਹੌਸਲੇ ਵਿੱਚ ਵੀ ਹੈ। ਦੁਖੀ ਤਾਂ ਸਿਰਫ਼ ਇਸ ਗੱਲੋਂ ਹੀ ਹੈ ਕਿ ਉਸ ਦੀ ਪੀੜ ਨੂੰ ਕੋਈ ਨਹੀਂ ਜਾਣਦਾ। ਨਵੇਂ ਕੱਪੜੇ ਪਾਉਣ ਨੂੰ ਕਿਸ ਦਾ ਦਿਲ ਨਹੀਂ ਕਰਦਾ। ਇਹ ਸਕੂਲੀ ਬੱਚਾ ਕਬਾੜੀਆਂ ਕੋਲੋਂ ਪੁਰਾਣੇ ਕੱਪੜੇ ਖਰੀਦ ਕੇ ਆਪਣੀਆਂ ਰੀਝਾਂ ਨੂੰ ਧਰਵਾਸ ਦਿੰਦਾ ਹੈ। ਉਸ ਦਾ ਬਾਪ ਦਰਸ਼ਨ ਸਿੰਘ ਵੀ ਆਪਣੇ ਜੀਵਨ ਵਿੱਚ ਨਵੇਂ ਕੱਪੜੇ ਪਾਉਣ ਨੂੰ ਤਰਸ ਗਿਆ ਹੈ। ਪਿਉ ਪੁੱਤ ਆਖਦੇ ਹਨ ਕਿ ਜਦੋਂ ਮਸਲਾ ਰੋਟੀ ਦਾ ਹੋਵੇ ਤਾਂ ਤਨ ਨੂੰ ਨਵੇਂ ਪੁਰਾਣੇ ਕੱਪੜੇ ਹੋਣ ਦਾ ਕੋਈ ਫਰਕ ਨਹੀਂ ਪੈਂਦਾ। ਬਾਪ ਦਰਸ਼ਨ ਸਿੰਘ ਛੇ ਵਰ੍ਹਿਆਂ ਤੋਂ ਟੀਚਰਜ਼ ਹੋਮ ਵਿੱਚ ਕੰਟੀਨ ਚਲਾ ਰਿਹਾ ਹੈ। ਉਸ ਤੋਂ ਪਹਿਲਾਂ ਉਹ ਕਬਾੜੀਆ ਬਣਿਆ ਤੇ ਚਾਹ ਦੀ ਰੇਹੜੀ 'ਤੇ 150 ਰੁਪਏ 'ਚ ਕੰਮ ਵੀ ਕੀਤਾ।
            ਮਸਕਟ ਮੈਨ ਹਰਬੰਸ ਸਿੰਘ ਨੂੰ ਤਾਂ ਟਰੈਕ ਸੂਟ ਵੀ ਪੁਰਾਣਾ ਖਰੀਦ ਕੇ ਪਾਉਣਾ ਪੈਂਦਾ ਹੈ। ਜਦੋਂ ਛੁੱਟੀ ਹੁੰਦੀ ਹੈ ਤਾਂ ਉਹ ਆਪਣੇ ਬਾਪ ਨਾਲ ਕੰਟੀਨ 'ਤੇ ਕੰਮ ਕਰਦਾ ਹੈ। ਦਾਨੀ ਸੱਜਣ ਉਸ ਲਈ ਕਿਤਾਬਾਂ ਦਾ ਪ੍ਰਬੰਧ ਕਰਦੇ ਹਨ। ਉਸ ਦੀ ਮਾਂ ਪਰਮਜੀਤ ਕੌਰ ਖੇਤਾਂ ਵਿੱਚ ਦਿਹਾੜੀ ਕਰਦੀ ਹੈ। ਭਰਾ ਪੜ੍ਹ ਜਾਵੇ, ਇਸ ਲਈ ਉਸ ਦੀ ਇੱਕ ਭੈਣ ਮਾਂ ਨਾਲ ਖੇਤਾਂ ਵਿੱਚ ਕੰਮ ਕਰਦੀ ਹੈ ਜਦੋਂਕਿ ਉਸ ਦੀਆਂ ਦੋ ਭੈਣਾਂ ਸਕੂਲ ਵਿੱਚੋਂ ਛੁੱਟੀ ਲੈ ਕੇ ਖੇਤਾਂ ਵਿੱਚ ਦਿਹਾੜੀ ਕਰਦੀਆਂ ਹਨ। ਪੰਜਾਬ ਸਰਕਾਰ ਦੇ ਕਾਗ਼ਜ਼ਾਂ ਵਿੱਚ ਵੀ ਉਹ ਗਰੀਬੀ ਰੇਖਾ ਤੋਂ ਹੇਠਾਂ ਵੱਸਣ ਵਾਲੇ ਪਰਿਵਾਰ ਦਾ ਮੈਂਬਰ ਹੈ। ਪਿਤਾ ਦਰਸ਼ਨ ਸਿੰਘ ਦੱਸਦਾ ਹੈ ਕਿ ਉਸ ਦਾ ਚੂਲਾ ਖਰਾਬ ਹੈ ਜਿਸ ਦਾ ਅਪਰੇਸ਼ਨ ਕਾਫ਼ੀ ਮਹਿੰਗਾ ਸੌਦਾ ਹੈ। ਉਸ ਨੇ ਦੱਸਿਆ ਕਿ ਵੱਡੀ ਧੀ ਵਿਹਾਉਣ ਦਾ ਫਿਕਰ ਹੈ ਜਿਸ ਕਰਕੇ ਚੂਲਾ ਕਦੇ ਯਾਦ ਨਹੀਂ ਆਇਆ।
          ਬਾਪ ਦਰਸ਼ਨ ਸਿੰਘ ਦਾ ਕਹਿਣਾ ਸੀ ਕਿ ਕੋਈ ਵੀ ਤਿਉਹਾਰ ਅੱਜ ਤੱਕ ਉਨ੍ਹਾਂ ਦੇ ਘਰ ਖੁਸ਼ੀ ਨਹੀਂ ਲਿਆ ਸਕਿਆ। ਉਸ ਨੇ ਦੱਸਿਆ ਕਿ ਉਸ ਦਾ ਮਸਕਟ ਮੈਨ ਬਣਿਆ ਲੜਕਾ ਹਰਬੰਸ ਸਿੰਘ ਸਵੇਰ ਪੰਜ ਵਜੇ ਉੱਠ ਕੇ ਸਟੇਡੀਅਮ ਪ੍ਰੈਕਟਿਸ ਕਰਦਾ ਹੈ। ਉਸ ਨੇ ਸਟੇਡੀਅਮ ਵਿੱਚ ਏਨਾ ਕੰਮ ਇੱਕ ਵਰ੍ਹੇ ਵਿੱਚ ਕੀਤਾ ਕਿ ਵਾਲੀਬਾਲ ਕੋਚ ਕਮਲਪ੍ਰੀਤ ਕੌਰ ਧਾਲੀਵਾਲ ਦੀ ਨਜ਼ਰ ਵਿੱਚ ਆ ਗਿਆ। ਕੋਚ ਧਾਲੀਵਾਲ ਦਾ ਕਹਿਣਾ ਸੀ ਕਿ ਵਿਸ਼ਵ ਕਬੱਡੀ ਕੱਪ ਲਈ ਮਸਕਟ ਮੈਨ ਦੀ ਲੋੜ ਸੀ ਜਿਸ ਕਰਕੇ ਉਸ ਨੇ ਇਸ ਲੋੜਵੰਦ ਲੜਕੇ ਦੀ ਸਿਫਾਰਸ਼ ਕਰ ਦਿੱਤੀ। ਉਸ ਨੇ ਦੱਸਿਆ ਕਿ ਹਰਬੰਸ ਬਹੁਤ ਮਿਹਨਤੀ ਲੜਕਾ ਹੈ। ਹਰਬੰਸ ਵਾਲੀਬਾਲ ਖੇਡਦਾ ਹੈ ਤੇ ਉਹ ਪੁਲੀਸ ਜਾਂ ਫੌਜ ਵਿੱਚ ਭਰਤੀ ਹੋਣ ਦਾ ਇੱਛੁਕ ਹੈ। ਵਿਸ਼ਵ ਕਬੱਡੀ ਕੱਪ ਦੇ ਜਿਥੇ ਵੀ ਮੈਚ ਹੁੰਦੇ ਹਨ, ਉਥੇ ਹੀ ਇਹ ਮਸਕਟ ਮੈਨ ਜਾਂਦਾ ਹੈ। ਸਰਕਾਰ ਵੱਲੋਂ ਉਸ ਨੂੰ ਲਿਜਾਣ ਵਾਸਤੇ ਇੱਕ ਗੱਡੀ ਤੇ ਹੈਲਪਰ ਦਿੱਤੇ ਹੋਏ ਹਨ। ਨਾਗਰਿਕ ਚੇਤਨਾ ਮੰਚ ਦੇ ਜਗਮੋਹਨ ਕੌਸ਼ਲ ਤੇ ਬੱਗਾ ਸਿੰਘ ਦਾ ਕਹਿਣਾ ਸੀ ਕਿ ਪੰਜਾਬ ਸਰਕਾਰ ਮਸਕਟ ਮੈਨ ਬਣੇ ਬੱਚੇ ਦੀ ਬਾਂਹ ਫੜੇ। ਉਨ੍ਹਾਂ ਆਖਿਆ ਕਿ ਸਰਕਾਰ ਨੇ ਕਬੱਡੀ ਲਈ ਕਰੋੜਾਂ ਦਾ ਬਜਟ ਰੱਖਿਆ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਸਰਕਾਰ ਇਸ ਲੜਕੇ ਨੂੰ ਆਪਣੇ ਖਰਚੇ 'ਤੇ ਪੜ੍ਹਾ ਕੇ ਉਸ ਲਈ ਨੌਕਰੀ ਦਾ ਪ੍ਰਬੰਧ ਕਰੇ।

Tuesday, December 11, 2012

                                  ਸੜਕਾਂ ਲਈ
         ਵਿਸ਼ਵ ਬੈਂਕ ਤੋਂ 600 ਕਰੋੜ ਦਾ ਕਰਜ਼ਾ
                                ਚਰਨਜੀਤ ਭੁੱਲਰ
ਬਠਿੰਡਾ :  ਵਿਸ਼ਵ ਬੈਂਕ ਨੇ ਮਾਲਵਾ ਪੱਟੀ ਵਿੱਚ ਸੜਕੀ ਸੁਧਾਰ ਖਾਤਰ 600 ਕਰੋੜ ਰੁਪਏ ਦੇ ਕਰਜ਼ੇ ਨੂੰ ਪ੍ਰਵਾਨਗੀ ਦੇ ਦਿੱਤੀ ਹੈ। ਇਸ ਦੇ ਤਹਿਤ ਸੜਕਾਂ ਦੇ ਕੰਮਾਂ ਦੀ ਅਲਾਟਮੈਂਟ ਕਰ ਦਿੱਤੀ ਗਈ ਹੈ। ਵਿਸ਼ਵ ਬੈਂਕ ਵੱਲੋਂ ਪਾਇਲਟ ਪ੍ਰਾਜੈਕਟ ਦੇ ਤੌਰ 'ਤੇ ਸੜਕੀ ਸੁਧਾਰ ਲਈ ਇਹ ਕਦਮ ਉਠਾਇਆ ਗਿਆ ਹੈ। ਸੜਕਾਂ ਦੀ ਸਾਂਭ-ਸੰਭਾਲ ਦੀ ਨਵੀਂ ਧਾਰਨਾ ਤਹਿਤ ਮਾਲਵਾ ਪੱਟੀ ਵਿੱਚ 204 ਕਿਲੋਮੀਟਰ ਸੜਕਾਂ ਦਾ ਕੰਮ ਵਿਸ਼ਵ ਬੈਂਕ ਤੋਂ ਲਏ ਕਰਜ਼ੇ ਨਾਲ ਹੋਏਗਾ। ਗੁਜਰਾਤ ਦੀ ਇੱਕ ਕੰਪਨੀ ਨੂੰ ਇਨ੍ਹਾਂ ਸੜਕਾਂ ਦਾ ਕੰਮ ਦਿੱਤਾ ਗਿਆ ਹੈ। ਇਹ ਕੰਪਨੀ ਹੀ 10 ਸਾਲ ਤੱਕ ਇਨ੍ਹਾਂ ਸੜਕਾਂ ਦੀ ਮੁਰੰਮਤ ਅਤੇ ਸਾਂਭ- ਸੰਭਾਲ ਦਾ ਕੰਮ ਕਰੇਗੀ। ਇੱਕ ਦਹਾਕੇ ਲਈ ਇਹ ਸੜਕਾਂ ਪ੍ਰਾਈਵੇਟ ਕੰਪਨੀ ਦੇ ਹਵਾਲੇ ਕਰ ਦਿੱਤੀਆਂ ਗਈਆਂ ਹਨ।
              ਵਿਸ਼ਵ ਬੈਂਕ, ਕੇਂਦਰ ਸਰਕਾਰ ਅਤੇ ਪੰਜਾਬ ਸਰਕਾਰ ਦਰਮਿਆਨ ਇੱਕ  ਸਮਝੌਤਾ ਹੋਇਆ ਹੈ ਜਿਸ ਤਹਿਤ ਸੜਕੀ ਸੁਧਾਰ ਲਈ ਲੰਮੇ ਸਮੇਂ ਦਾ ਕਰਜ਼ਾ ਚੁੱਕਿਆ ਗਿਆ ਹੈ। ਇਹ ਰਾਸ਼ੀ ਪੰਜਾਬ ਸਰਕਾਰ ਵੱਲੋਂ ਮੋੜੀ ਜਾਏਗੀ। ਇਸ ਪ੍ਰਾਜੈਕਟ ਨੂੰ 'ਆਉਟਪੁਟ ਐਂਡ ਪ੍ਰਫਾਰਮੈਂਸ ਬੇਸਡ ਰੋਡ ਕੰਸਟ੍ਰਕਸ਼ਨ ਪ੍ਰਾਜੈਕਟ' ਦਾ ਨਾਮ ਦਿੱਤਾ ਗਿਆ ਹੈ। ਇਹ ਪ੍ਰਾਜੈਕਟ ਕਾਫ਼ੀ ਅਰਸੇ ਤੋਂ ਵਿਚਾਰ ਅਧੀਨ ਸੀ ਜਿਸ ਨੂੰ ਹੁਣ ਅੰਤਿਮ ਪ੍ਰਵਾਨਗੀ ਮਿਲੀ ਹੈ। ਇਸ ਪ੍ਰਾਜੈਕਟ ਨੂੰ ਅਕਤੂਬਰ ਮਹੀਨੇ ਵਿੱਚ  ਵਿਸ਼ਵ ਬੈਂਕ ਦੇ ਮੁੱਖ ਦਫ਼ਤਰ ਵਾਸ਼ਿੰਗਟਨ ਤੋਂ ਪ੍ਰਵਾਨਗੀ ਮਿਲੀ ਹੈ। ਇਹ ਭਾਰਤ ਦਾ ਪਹਿਲਾ ਪਾਇਲਟ ਪ੍ਰਾਜੈਕਟ ਹੈ ਜਿਸ ਨੂੰ ਤਜਰਬੇ ਦੇ ਤੌਰ 'ਤੇ ਲਿਆ ਗਿਆ ਹੈ।
            ਜਾਣਕਾਰੀ ਅਨੁਸਾਰ ਵਿਸ਼ਵ ਬੈਂਕ ਦੇ ਕਰਜ਼ੇ ਨਾਲ ਸੰਗਰੂਰ, ਮਾਨਸਾ ਅਤੇ ਬਠਿੰਡਾ ਦੀਆਂ ਸੜਕਾਂ ਦਾ ਸੁਧਾਰ ਕੀਤਾ ਜਾਣਾ ਹੈ। ਭਵਾਨੀਗੜ੍ਹ ਤੋਂ ਬਠਿੰਡਾ ਵਾਇਆ ਮਾਨਸਾ ਮੁੱਖ ਸੜਕ ਨੂੰ ਮਜ਼ਬੂਤ ਅਤੇ ਚੌੜਾ ਕੀਤਾ ਜਾਣਾ ਹੈ। ਮਾਨਸਾ ਤੋਂ ਕੋਟਸ਼ਮੀਰ ਵਾਇਆ ਤਲਵੰਡੀ ਸਾਬੋ ਸੜਕ ਵੀ ਇਸ ਪ੍ਰਾਜੈਕਟ ਦਾ ਹਿੱਸਾ ਹੈ। ਧਨੌਲਾ ਤੋਂ ਭੀਖੀ ਸੜਕ ਅਤੇ ਸੰਗਰੂਰ ਤੋਂ ਸੁਨਾਮ ਤੱਕ ਦੀ ਸੜਕ ਵੀ ਇਸੇ ਪ੍ਰਾਜੈਕਟ ਤਹਿਤ ਬਣਾਈ ਜਾਣੀ ਹੈ। ਟਰੈਫ਼ਿਕ ਜ਼ਿਆਦਾ ਨਾ ਹੋਣ ਕਰਕੇ ਇਨ੍ਹਾਂ 'ਚੋਂ ਕਿਸੇ ਵੀ ਸੜਕ ਨੂੰ ਚਹੁੰ-ਮਾਰਗੀ ਬਣਾਏ ਜਾਣ ਦੀ ਕੋਈ ਯੋਜਨਾ ਨਹੀਂ ਹੈ।ਲੋਕ ਮੋਰਚਾ ਪੰਜਾਬ ਦੇ ਸਰਪ੍ਰਸਤ ਅਤੇ ਐਡਵੋਕੇਟ ਐਨ.ਕੇ.ਜੀਤ ਦਾ ਕਹਿਣਾ ਹੈ ਕਿ ਸਰਕਾਰ ਵੱਲੋਂ ਹੁਣ ਵਿਕਾਸ ਕਰਜ਼ਾ ਚੁੱਕ ਕੇ ਕੀਤਾ ਜਾ ਰਿਹਾ ਹੈ। ਵਿਸ਼ਵ ਬੈਂਕ ਦੀਆਂ ਹਦਾਇਤਾਂ ਅਨੁਸਾਰ ਲੋਕਾਂ 'ਤੇ ਨਵੇਂ ਭਾਰ ਪਾਏ ਜਾ ਰਹੇ ਹਨ। ਉਨ੍ਹਾਂ ਪੁੱਛਿਆ ਕਿ ਕੀ ਲੋਕਾਂ ਨੂੰ ਹੁਣ ਪੈਰ ਪੁੱਟਣ ਲਈ ਵੀ ਕੀਮਤ ਤਾਰਨੀ ਪਿਆ ਕਰੇਗੀ।
                                               ਕੰਮ ਜਲਦੀ ਸ਼ੁਰੂ ਹੋਏਗਾ: ਮੁੱਖ ਇੰਜਨੀਅਰ
ਮੁੱਖ ਇੰਜੀਨੀਅਰ (ਵਿਸ਼ਵ ਬੈਂਕ) ਸ੍ਰੀ ਯੋਗੇਸ਼ ਗੁਪਤਾ ਦਾ ਕਹਿਣਾ ਹੈ ਕਿ ਇਹ ਪਾਇਲਟ ਪ੍ਰਾਜੈਕਟ ਹੈ ਜਿਸ ਨੂੰ ਵਿਸ਼ਵ ਬੈਂਕ ਨੇ ਪ੍ਰਵਾਨਗੀ ਦੇ ਦਿੱਤੀ ਹੈ। ਸੜਕ ਸੁਰੱਖਿਆ ਦੇ ਨਜ਼ਰੀਏ ਤੋਂ ਇਹ ਸੜਕਾਂ ਬਹੁਤ ਬਿਹਤਰ ਹੋਣਗੀਆਂ। ਗੁਜਰਾਤ ਦੀ ਕੰਪਨੀ ਜਲਦੀ ਕੰਮ ਸ਼ੁਰੂ ਕਰ ਦੇਵੇਗੀ। ਉਨ੍ਹਾਂ ਦੱਸਿਆ ਕਿ 600 ਕਰੋੜ ਰੁਪਏ ਦਾ ਕਰਜ਼ਾ ਪ੍ਰਵਾਨ ਹੋਇਆ ਹੈ ਜੋ ਲੰਮੇ ਸਮੇਂ ਵਿੱਚ ਵਾਪਸ ਕਰਨਾ ਹੋਵੇਗਾ

Tuesday, December 4, 2012

                                ਉਧਾਰੇ ਰਾਸ਼ਨ 'ਤੇ
           ਕਦੋਂ ਤੱਕ ਚੁੰਗੀਆਂ ਭਰਨਗੇ ਹਿਰਨ !
                                  ਚਰਨਜੀਤ ਭੁੱਲਰ
ਬਠਿੰਡਾ : ਸਰਕਾਰੀ ਖਜ਼ਾਨੇ 'ਚੋਂ ਫੰਡ ਨਾ ਆਉਣ ਕਾਰਨ ਬਠਿੰਡਾ ਦੇ ਹਿਰਨ ਪਾਰਕ ਦੇ ਜਾਨਵਰ ਉਧਾਰ ਦਾ ਰਾਸ਼ਨ ਛਕ ਰਹੇ ਹਨ। ਜੰਗਲਾਤ ਅਧਿਕਾਰੀ ਮਿੰਨਤ ਤਰਲੇ ਨਾਲ ਉਧਾਰਾ ਰਾਸ਼ਨ ਚੁੱਕ ਰਹੇ ਹਨ। ਜੀਵ ਰੱਖਿਆ ਮਹਿਕਮੇ ਨੂੰ ਠੇਕੇਦਾਰਾਂ ਤੋਂ ਮਿਹਣੇ ਵੀ ਸੁਣਨੇ ਪੈ ਰਹੇ ਹਨ। ਰਾਸ਼ਨ ਸਪਲਾਈ ਕਰਨ ਵਾਲੇ ਆਖਣ ਲੱਗੇ ਹਨ ਕਿ ਖਜ਼ਾਨੇ ਵਿੱਚ ਅਕਸ਼ੈ ਕੁਮਾਰ ਨੂੰ ਦੇਣ ਲਈ ਪੈਸਾ ਹੈ ਪਰ ਉਨ੍ਹਾਂ ਲਈ ਨਹੀਂ ਹੈ। ਪਹਿਲੀ ਵਾਰ ਹੋਇਆ ਹੈ ਕਿ ਤਿੰਨ ਮਹੀਨੇ ਤੋਂ ਹਿਰਨ ਪਾਰਕ ਦੇ ਜਾਨਵਰਾਂ ਅਤੇ ਪੰਛੀਆਂ ਦੇ ਰਾਸ਼ਨ ਲਈ ਫੰਡ ਮੁੱਕੇ ਹੋਏ ਹਨ। ਪੰਜਾਬ ਸਰਕਾਰ ਨੇ ਫੰਡ ਨਾ ਭੇਜੇ ਤਾਂ ਜਾਨਵਰਾਂ ਦਾ ਰਾਸ਼ਨ ਵੀ ਬੰਦ ਹੋ ਸਕਦਾ ਹੈ। ਹਿਰਨ ਪਾਰਕ ਦੇ ਪ੍ਰਬੰਧਕ ਹੁਣ ਤੱਕ ਤਕਰੀਬਨ ਪੰਜ ਲੱਖ ਰੁਪਏ ਦਾ ਰਾਸ਼ਨ ਉਧਾਰ ਲੈ ਚੁੱਕੇ ਹਨ।
            ਪ੍ਰਾਪਤ ਜਾਣਕਾਰੀ ਅਨੁਸਾਰ ਬੀੜ ਤਲਾਬ ਦੇ ਹਿਰਨ ਪਾਰਕ ਨੂੰ ਸਤੰਬਰ 2012 ਤੋਂ ਬਾਅਦ ਫੰਡ ਨਹੀਂ ਮਿਲੇ ਹਨ। ਸਭ ਤੋਂ ਜ਼ਿਆਦਾ ਉਧਾਰ ਹਰਾ ਚਾਰਾ ਸਪਲਾਈ ਕਰਨ ਵਾਲੇ ਠੇਕੇਦਾਰ ਦਾ ਹੈ। ਹਿਰਨ ਪਾਰਕ ਵਿੱਚ ਰੋਜ਼ਾਨਾ ਸਾਢੇ 12 ਕੁਇੰਟਲ ਹਰਾ ਚਾਰਾ ਸਪਲਾਈ ਹੁੰਦਾ ਹੈ ਜੋ ਕਿ ਸਾਂਭਰ,ਹਿਰਨ ਅਤੇ ਚੀਤਲ ਦੀ ਖੁਰਾਕ ਹੈ। ਹਿਰਨ ਪਾਰਕ ਵਿੱਚ ਇਸ ਵੇਲੇ 45 ਕਾਲੇ ਹਿਰਨ,16 ਚੀਤਲ ਅਤੇ 10 ਸਾਂਬਰ ਹਨ। ਸੂਤਰਾਂ ਅਨੁਸਾਰ ਇੱਕ ਮਹੀਨੇ 'ਚ ਹਰੇ ਚਾਰੇ ਦਾ ਬਿੱਲ ਇੱਕ ਲੱਖ ਰੁਪਏ ਬਣ ਜਾਂਦਾ ਹੈ। ਹਰਾ ਚਾਰਾ ਸਪਲਾਈ ਕਰਨ ਵਾਲੇ ਠੇਕੇਦਾਰ ਦਾ ਤਕਰੀਬਨ 3 ਲੱਖ ਰੁਪਏ ਬਕਾਇਆ ਹੈ। ਇਸੇ ਤਰ੍ਹਾਂ ਫਲ ਅਤੇ ਸਬਜ਼ੀਆਂ ਤੋਂ ਇਲਾਵਾ ਡਰਾਈ ਰਾਸ਼ਨ ਸਪਲਾਈ ਕਰਨ ਵਾਲੇ ਦੁਕਾਨਦਾਰਾਂ ਦੇ ਤਕਰੀਬਨ ਡੇਢ ਤੋਂ ਦੋ ਲੱਖ ਰੁਪਏ ਦੇ ਬਕਾਏ ਖੜ੍ਹੇ ਹਨ। ਪੰਛੀਆਂ ਲਈ ਰੋਜ਼ਾਨਾ ਤਕਰੀਬਨ 750 ਰੁਪਏ ਦੇ ਫਲ ਅਤੇ ਸਬਜ਼ੀਆਂ ਵਗੈਰਾ ਆਉਂਦੀਆਂ ਹਨ। ਹਿਰਨ ਪਾਰਕ ਵਿੱਚ 9 ਬਾਂਦਰ ਹਨ ਜਿਨ੍ਹਾਂ ਨੂੰ ਸੇਬ,ਕੇਲੇ ਅਤੇ ਬਰੈਡ ਵਗੈਰਾ ਦਿੱਤੇ ਜਾਂਦੇ ਹਨ। ਤੋਤੇ ਲਈ ਮਿਰਚਾਂ, ਮੂੰਗਫਲੀ ਅਤੇ ਖੀਰਾ ਸਪਲਾਈ ਹੁੰਦਾ ਹੈ। ਇਸੇ ਤਰ੍ਹਾਂ ਪੰਛੀਆਂ ਵਾਸਤੇ ਡਰਾਈ ਰਾਸ਼ਨ ਆਉਂਦਾ ਹੈ ਜਿਸ ਵਿੱਚ ਬਾਜਰਾ,ਚੌਲਾਂ ਦੀ ਕਿਣਕੀ ਅਤੇ ਸਤਨਾਜਾ ਵਗੈਰਾ ਸ਼ਾਮਲ ਹੈ। ਹਿਰਨਾਂ ਨੂੰ ਤਾਂ ਖਲ ਵਗੈਰਾ ਵੀ ਪਾਈ ਜਾਂਦੀ ਹੈ।
            ਹਿਰਨ ਪਾਰਕ 'ਚ ਪ੍ਰ੍ਰਤੀ ਸਾਂਬਰ 25 ਕਿਲੋ ਅਤੇ ਪ੍ਰਤੀ ਹਿਰਨ 15 ਕਿਲੋ ਹਰਾ ਚਾਰਾ ਰੋਜ਼ਾਨਾ ਪਾਇਆ ਜਾਂਦਾ ਹੈ।  ਇੱਕ ਚੀਤਲ ਨੂੰ 250 ਗਰਾਮ ਫੀਡ ਅਤੇ ਸਾਂਬਰ ਨੂੰ 500 ਗਰਾਮ ਫੀਡ ਦਿੱਤੀ ਜਾਂਦੀ ਹੈ। ਹਿਰਨ ਪਾਰਕ ਦੇ ਇੰਚਾਰਜ ਅਤੇ ਰੇਂਜ ਅਫ਼ਸਰ ਪਵਨ ਸ੍ਰੀਧਰ ਨੇ ਕਿਹਾ ਕਿ ਉਨ੍ਹਾਂ ਨੇ ਪੰਜਾਬ ਸਰਕਾਰ ਤੋਂ ਮਾਰਚ 2013 ਤੱਕ ਦੇ ਬਜਟ ਦੀ ਮੰਗ ਕੀਤੀ ਹੈ ਜਿਸ ਦੇ ਜਲਦੀ ਆਉਣ ਦੀ ਉਮੀਦ ਹੈ। ਉਨ੍ਹਾਂ ਆਖਿਆ ਕਿ ਸਤੰਬਰ ਮਹੀਨੇ ਤੋਂ ਹਾਲੇ ਬਕਾਏ ਖੜ੍ਹੇ ਹਨ। ਉਨ੍ਹਾਂ ਦੱਸਿਆ ਕਿ ਹੁਣ ਹਿਰਨ ਪਾਰਕ 'ਚ ਕਾਫੀ ਸੈਲਾਨੀ ਆਉਂਦੇ ਹਨ। ਦੱਸਣਯੋਗ ਹੈ ਕਿ ਪੰਜਾਬ ਸਰਕਾਰ ਨੇ ਕਰੋੜਾਂ ਰੁਪਏ ਖਰਚ ਕੇ ਹਿਰਨ ਸਫਾਰੀ ਤਿਆਰ ਕੀਤੀ ਹੈ ਜੋ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦਾ ਡਰੀਮ ਪ੍ਰਾਜੈਕਟ ਹੈ। ਇਸ ਹਿਰਨ ਸਫਾਰੀ ਦਾ ਕੰਮ ਮੁਕੰਮਲ ਹੋ ਚੁੱਕਾ ਹੈ ਅਤੇ ਸਿਰਫ ਉਦਘਾਟਨ ਬਾਕੀ ਹੈ। ਕੁਝ ਸਮਾਂ ਪਹਿਲਾਂ ਬਠਿੰਡਾ ਨਹਿਰ ਵਿੱਚ ਪਾੜ ਪੈਣ ਕਰਕੇ ਹਿਰਨ ਸਫਾਰੀ ਦੀ ਚਾਰਦੀਵਾਰੀ ਡਿੱਗ ਪਈ ਸੀ ਜਿਸ ਕਰਕੇ ਕੰਮ ਪਛੜ ਗਿਆ ਸੀ। ਪੰਜਾਬ ਸਰਕਾਰ ਇਸ ਹਿਰਨ ਪਾਰਕ ਨੂੰ ਉਭਾਰਨਾ ਚਾਹੁੰਦੀ ਹੈ ਪਰ ਇਸ ਹਿਰਨ ਪਾਰਕ ਨੂੰ ਸਮੇਂ ਸਿਰ ਬਜਟ ਨਹੀਂ ਦੇ ਰਹੀ ਹੈ। ਸੂਤਰਾਂ ਮੁਤਾਬਕ ਕੁਝ ਸਾਲ ਪਹਿਲਾਂ ਵੀ ਸੇਇ ਤਰ੍ਹਾਂ ਰਾਸ਼ਨ ਮਨੀ ਦੀ ਮੁਸ਼ਕਲ ਬਣ ਗਈ ਸੀ ਪਰ ਉਸ ਮਗਰੋਂ ਅਜਿਹੀ ਦਿੱਕਤ ਨਹੀਂ ਆਈ ਸੀ।
                                                ਚੈੱਕ ਕਲੀਅਰ ਨਾ ਹੋਣ ਕਰਕੇ ਸਮੱਸਿਆ ਬਣੀ
ਜ਼ਿਲ੍ਹਾ ਜੰਗਲਾਤ ਅਫ਼ਸਰ,ਬਠਿੰਡਾ  ਕੇ.ਕੰਨਨ ਦਾ ਕਹਿਣਾ ਹੈ ਕਿ ਚੈੱਕ ਕਲੀਅਰ ਨਾ ਹੋਣ ਕਾਰਨ ਇਹ ਸਮੱਸਿਆ ਆਈ ਹੈ। ਉਨ੍ਹਾਂ ਦੱਸਿਆ ਕਿ ਹੁਣ ਚੈੱਕ ਕਲੀਅਰ ਹੋ ਗਿਆ ਹੈ ਅਤੇ ਅਗਲੇ ਹਫਤੇ ਅਦਾਇਗੀ ਹੋ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਰਾਸ਼ਨ ਤਾਂ ਮਿਲ ਰਿਹਾ ਹੈ ਪਰ ਫੰਡਾਂ ਦੀ ਦਿੱਕਤ ਸੀ। ਉਨ੍ਹਾਂ ਦੱਸਿਆ ਕਿ ਜੋ ਰਾਸ਼ਨ ਟੈਂਡਰ ਨਾਲ ਸਪਲਾਈ ਹੁੰਦਾ ਹੈ, ਉਸ ਦੀ ਅਦਾਇਗੀ ਤਾਂ ਕਿਸ਼ਤਾਂ ਵਿੱਚ ਹੀ ਕੀਤੀ ਜਾਂਦੀ ਹੈ।

Sunday, December 2, 2012

                            ਵਾਹ ਬਾਦਲ ਸਰਕਾਰੇ
               ਤੇਰੇ ਸ਼ੋਕ ਤੇ ਸ਼ੌਕ ਨਿਆਰੇ !
                              ਚਰਨਜੀਤ ਭੁੱਲਰ
ਬਠਿੰਡਾ :  ਜਦੋਂ ਅੱਜ ਪੂਰਾ ਦੇਸ਼ ਸਾਬਕਾ ਪ੍ਰਧਾਨ ਮੰਤਰੀ ਇੰਦਰ ਕੁਮਾਰ ਗੁਜਰਾਲ ਦੇ ਚਲੇ ਜਾਣ 'ਤੇ ਸੋਗ ਵਿੱਚ ਡੁੱਬਾ ਹੋਇਆ ਸੀ ਪਰ ਪੰਜਾਬ ਸਰਕਾਰ ਵੱਲੋਂ ਬਾਲੀਵੁੱਡ ਰੰਗ ਵਿੱਚ ਤੀਜੇ ਵਿਸ਼ਵ ਕਬੱਡੀ ਕੱਪ ਦੇ ਧੂਮ-ਧੜੱਕੇ ਨਾਲ ਉਦਘਾਟਨੀ ਜਸ਼ਨ ਮਨਾਏ ਜਾ ਰਹੇ ਸਨ। ਅੱਜ ਸਮਾਰੋਹਾਂ ਵਿੱਚ ਸ਼ੋਕ ਅਤੇ ਸ਼ੌਕ ਇੱਕੋ ਵੇਲੇ ਵੇਖਣ ਨੂੰ ਮਿਲਿਆ। ਦੋਚਿਤੀ ਵਿੱਚ ਘਿਰੀ ਪੰਜਾਬ ਸਰਕਾਰ ਇਸ ਮੌਕੇ 'ਤੇ ਨਾ ਸ਼ੋਕ ਹੀ ਮਨਾ ਸਕੀ ਅਤੇ ਨਾ ਹੀ ਆਗੂ ਖੁੱਲ੍ਹ ਕੇ ਸ਼ੌਕ ਪੂਰਾ ਕਰ ਸਕੇ। ਪੰਜਾਬ ਸਰਕਾਰ ਇਨ੍ਹਾਂ ਸਮਾਰੋਹਾਂ ਵਿੱਚ ਸਾਬਕਾ ਪ੍ਰਧਾਨ ਮੰਤਰੀ ਆਈ ਕੇ ਗੁਜਰਾਲ ਦੇ ਜਾਣ ਦਾ ਸੋਗ ਮਨਾਉਣਾ ਵੀ ਨਹੀਂ ਭੁੱਲੀ ਅਤੇ ਸਰਕਾਰ ਨੇ ਇਸ ਦੁੱਖ ਦੇ ਮੌਕੇ 'ਤੇ ਢੋਲ-ਢਮੱਕੇ ਨਾਲ ਜਸ਼ਨ ਮਨਾਉਣ ਤੋਂ ਵੀ ਸੰਕੋਚ ਨਾ ਕੀਤਾ। ਆਮ ਲੋਕਾਂ ਨੇ ਇਸ ਗੱਲ ਦਾ ਬੁਰਾ ਵੀ ਮਨਾਇਆ ਕਿਉਂਕਿ ਆਈ.ਕੇ. ਗੁਜਰਾਲ ਪਹਿਲੇ ਪੰਜਾਬੀ ਪ੍ਰਧਾਨ ਮੰਤਰੀ ਸਨ ਅਤੇ ਸ਼੍ਰੋਮਣੀ ਅਕਾਲੀ ਦਲ ਨਾਲ ਉਨ੍ਹਾਂ ਦੀ ਕਾਫੀ ਨੇੜਤਾ ਸੀ। ਕੇਂਦਰ ਸਰਕਾਰ ਵੱਲੋਂ ਸੱਤ ਦਿਨਾਂ ਦੇ ਰਾਸ਼ਟਰੀ ਸੋਗ ਦਾ ਐਲਾਨ ਕੀਤਾ ਹੈ ਅਤੇ ਸਾਰੇ ਸਮਾਗਮ ਰੱਦ ਕਰ ਦਿੱਤੇ ਗਏ ਹਨ।
            ਪੰਜਾਬ ਸਰਕਾਰ ਨੇ ਸੱਤ ਦਿਨਾਂ ਦੇ ਸਰਕਾਰੀ ਸੋਗ ਦਾ ਐਲਾਨ ਕੀਤਾ ਹੈ ਅਤੇ ਮੁੱਖ ਮੰਤਰੀ ਨੇ ਆਪਣੇ ਇਨ੍ਹਾਂ ਦਿਨਾਂ ਦੇ ਸਾਰੇ ਪ੍ਰੋਗਰਾਮ ਰੱਦ ਵੀ ਕਰ ਦਿੱੱਤੇ ਹਨ। ਫਿਰ ਵੀ ਪੰਜਾਬ ਸਰਕਾਰ ਨੇ ਅੱਜ ਬਠਿੰਡਾ ਦੇ ਬਹੁਮੰਤਵੀ ਖੇਡ ਸਟੇਡੀਅਮ ਵਿੱਚ ਦੇਰ ਸਾਮ ਤੱਕ ਬਾਲੀਵੁੱਡ ਅਦਾਕਾਰ ਅਕਸੈ ਕੁਮਾਰ ਅਤੇ ਮਿਸ ਪੂਜਾ ਦੀ ਅਦਾਕਾਰੀ ਤੋ ਇਲਾਵਾ ਨਾਚ ਗਾਣੇ ਨਾਲ ਤੀਸਰੇ ਵਿਸ਼ਵ ਕਬੱਡੀ ਕੱਪ ਦੀ ਸ਼ੁਰੂਆਤ ਕੀਤੀ। ਸੂਤਰ ਆਖਦੇ ਹਨ ਕਿ ਜਦੋਂ ਬਾਲ ਠਾਕਰੇ ਦੀ ਮੌਤ ਹੋਈ ਤਾਂ ਪ੍ਰਧਾਨ ਮੰਤਰੀ ਨੇ ਸਿਆਸੀ ਧਿਰਾਂ ਲਈ ਰੱਖਿਆ ਡਿਨਰ ਪ੍ਰੋਗਰਾਮ ਕੈਂਸਲ ਕਰ ਦਿੱਤਾ ਸੀ ਪ੍ਰੰਤੂ ਪੰਜਾਬ ਦੀ ਹਾਕਮ ਧਿਰ ਦੀ ਕਿਹੜੀ ਮਜਬੂਰੀ ਸੀ ਕਿ ਧੂਮ ਧੜੱਕੇ ਤੋ ਬਿਨ•ਾਂ ਕਬੱਡੀ ਕੱਪ ਦੀ ਸ਼ੁਰੂਆਤ ਨਹੀਂ ਹੋ ਸਕਦੀ ਸੀ। ਅੱਜ ਜਸ਼ਨਾਂ ਮੌਕੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਮੌਜੂਦ ਸਨ। ਸਰਕਾਰੀ ਰਸਮ ਰਿਵਾਜ ਹੀ ਨਹੀਂ ਬਲਕਿ ਸਦਾਚਾਰ ਤੇ ਜਜ਼ਬਾਤ ਵੀ ਮੰਗ ਕਰਦੇ ਸਨ ਕਿ ਕੌਮੀ ਸੋਗ ਵਿੱਚ ਪੰਜਾਬ ਸਰਕਾਰ ਸੰਜੀਦਗੀ ਨਾਲ ਸ਼ਾਮਲ ਹੁੰਦੀ। ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਖੁਦ ਇਸ ਗੱਲੋਂ ਸਾਬਕਾ ਪ੍ਰਧਾਨ ਮੰਤਰੀ ਆਈ ਕੇ ਗੁਜਰਾਤ ਦੀ ਪ੍ਰਸੰਸਾ ਕਰਦੇ ਨਹੀਂ ਥੱਕਦੇ ਕਿ ਉਨ•ਾਂ ਨੇ ਪੰਜਾਬ ਦਾ ਕਰਜ਼ ਮੁਆਫ਼ ਕੀਤਾ ਹੈ। ਅੱਜ ਸਮਾਰੋਹਾਂ ਵਿੱਚ ਹਾਕਮ ਧਿਰ ਨੇ ਵਿਵਾਦਾਂ ਤੋ ਬਚਣ ਖਾਤਰ ਕੁਝ ਸੋਗਮਈ ਰਸਮਾਂ ਵੀ ਕੀਤੀਆਂ ਪ੍ਰੰਤੂ ਜਸ਼ਨਾਂ ਨੂੰ ਫਿਰ ਵੀ ਫਿੱਕਾ ਨਾ ਪੈਣ ਦਿੱਤਾ।
            ਪੰਜਾਬ ਸਰਕਾਰ ਦੀ ਇਸ ਪਹੁੰਚ ਤੇ ਸਿਆਸੀ ਹਲਕੇ ਕਿੰਤੂ ਵੀ ਖੜ•ਾ ਕਰਦੇ ਹਨ। ਸਮਾਰੋਹਾਂ ਵਿੱਚ ਪੰਜਾਬ ਸਰਕਾਰ ਨੇ ਸਾਬਕਾ ਪ੍ਰਧਾਨ ਮੰਤਰੀ ਗੁਜਰਾਲ ਨੂੰ ਇੱਕ ਮਿੰਟ ਦਾ ਮੋਨ ਧਾਰਨ ਕੀਤਾ ਗਿਆ। ਸਮਾਰੋਹਾਂ ਦੀ ਸਮਾਪਤੀ ਤੇ ਕੋਈ ਆਤਿਸਬਾਜੀ ਵੀ ਨਾ ਕੀਤੀ। ਸਮਾਰੋਹਾਂ ਮੌਕੇ ਹੀ ਗੁਜਰਾਲ ਤੇ ਇੱਕ ਦਸਤਾਵੇਜ਼ੀ ਫਿਲਮ ਵੀ ਦਿਖਾਈ ਗਈ। ਇਸ ਤੋ ਇਲਾਵਾ ਸਟੇਡੀਅਮ ਵਿੱਚ ਲਗਾਏ ਝੰਡੇ ਵੀ ਉਤਾਰ ਦਿੱਤੇ ਗਏ।ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਆਪਣੇ ਸੰਬੋਧਨ ਵਿੱਚ ਤੀਸਰਾ ਵਿਸਵ ਕਬੱਡੀ ਕੱਪ ਸਾਬਕਾ ਪ੍ਰਧਾਨ ਮੰਤਰੀ ਗੁਜਰਾਲ ਨੂੰ ਸਮਰਪਿਤ ਕੀਤਾ ਅਤੇ ਇਹ ਵੀ ਸਫਾਈ ਦਿੱਤੀ ਕਿ ਇਹ ਕੌਮਾਂਤਰੀ ਸਮਾਗਮ ਹੋਣ ਕਰਕੇ ਬਦਲਿਆਂ ਨਹੀ ਜਾ ਸਕਿਆ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਆਪਣੇ ਸੰਬੋਧਨ ਵਿੱਚ ਸਾਬਕਾ ਪ੍ਰਧਾਨ ਮੰਤਰੀ ਦਾ ਜਿਕਰ ਕਰਨਾ ਭੁੱਲ ਗਏ। ਸਟੇਜ ਤੋ ਇਹ ਵੀ ਸਪੱਸਟ ਕੀਤਾ ਗਿਆ ਕਿ ਗੁਜਰਾਲ ਸਾਹਿਬ ਕਾਰਨ ਪ੍ਰੋਗਰਾਮ ਚਾਰ ਘੰਟੇ ਤੋ ਘਟਾ ਕੇ ਦੋ ਘੰਟੇ ਦਾ ਕੀਤਾ ਗਿਆ ਹੈ। ਅੱਜ ਸੁਰੂਆਤੀ ਜਸ਼ਨਾਂ ਮੌਕੇ ਪੂਰਾ ਸਟੇਡੀਅਮ ਰੰਗ ਬਰੰਗੀਆਂ ਲਾਈਟਾਂ ਨਾਲ ਚਮਕ ਰਿਹਾ ਸੀ।
            ਸਾਬਕਾ ਆਈ ਏ ਐਸ ਅਧਿਕਾਰੀ ਕੁਲਬੀਰ ਸਿੰਘ ਸਿੱਧੂ ਨੇ ਏਨੀ ਕੁ ਟਿੱਪਣੀ ਕੀਤੀ ਕਿ ਜਦੋਂ ਵਿਆਹ ਮੌਕੇ ਕਿਸੇ ਬਜ਼ੁਰਗ ਦੀ ਮੌਤ ਹੋ ਜਾਵੇ ਤਾਂ ਫਿਰ ਅਖਾੜੇ ਨਹੀਂ ਲੱਗਦੇ ਹਨ। ਸਟੇਜ ਤੋ ਮਿਸ ਪੂਜਾ ਅਤੇ ਸਤਿੰਦਰ ਸੱਤੀ ਨੇ ਡਾਂਸਰਾਂ ਲਾਲ ਨਾਚ ਗਾਣੇ ਗਾਏ ਅਤੇ ਉਸ ਤੋ ਪਹਿਲਾਂ ਭੰਗੜਾ ਟੀਮ ਨੇ ਜੌਹਰ ਦਿਖਾਏ। ਗਾਣਿਆਂ ਦਾ ਦੌਰ ਤਾਂ ਸਟੇਜ ਤੋ ਸੂਰਜ ਦੀ ਟਿੱਕੀ ਛਿਪਣ ਤੋ ਪਹਿਲਾਂ ਹੀ ਸੁਰੂ ਹੋ ਗਿਆ ਸੀ। ਜਦੋ ਬਾਲੀਵੁੱਡ ਸਟਾਰ ਤੇ ਮਾਹੌਲ ਨੂੰ ਸਿਖਰ ਤੇ ਪਹੁੰਚਾ ਦਿੱਤਾ ਤਾਂ ਦਰਸਕਾਂ ਨੇ ਵੀ ਲਲਕਾਰੇ ਮਾਰੇ। ਮੁੱਖ ਮੰਤਰੀ ਸ੍ਰੀ ਬਾਦਲ ਨੇ ਅੱਜ ਉਦਘਾਟਨੀ ਸਮਾਰੋਹਾਂ ਵਿੱਚ ਹਾਜ਼ਰੀ ਤਾਂ ਭਰੀ ਪ੍ਰੰਤੂ ਉਹ ਜਸ਼ਨਾਂ ਦੇ ਪ੍ਰੋਗਰਾਮ ਤੋਂ ਪਹਿਲਾਂ ਹੀ ਸਮਾਗਮਾਂ 'ਚੋਂ ਚਲੇ ਗਏ। ਅਹਿਮ ਸੂਤਰਾਂ ਅਨੁਸਾਰ ਮੁੱਖ ਮੰਤਰੀ ਨੇ ਅੱਜ ਦਿਨੇ ਪਾਰਟੀ ਦੇ ਸੀਨੀਅਰ ਆਗੂਆਂ ਅਤੇ ਪ੍ਰਬੰਧਕਾਂ ਨੂੰ ਸਮਾਰੋਹ ਰੱਦ ਕਰਨ ਵਾਸਤੇ ਆਖਿਆ ਸੀ ਪਰ ਜਦੋਂ ਕਿਸੇ ਨੇ ਕੋਈ ਹਾਮੀ ਨਾ ਭਰੀ ਤਾਂ ਮੁੱਖ ਮੰਤਰੀ ਨੇ ਸਮਾਰੋਹਾਂ ਵਿੱਚ ਸੰਖੇਪ ਜਿਹੀ ਸ਼ਮੂਲੀਅਤ ਕੀਤੀ।

Saturday, December 1, 2012

                                   ਅਫ਼ਸਰੀ ਨੂੰ ਸਲਾਮ
        ਅਕਸ਼ੈ  ਦੇ 12 ਮਿੰਟਾਂ ਦਾ ਮੁੱਲ ਸਵਾ ਕਰੋੜ
                                     ਚਰਨਜੀਤ ਭੁੱਲਰ
ਬਠਿੰਡਾ  : ਬਾਲੀਵੁੱਡ ਅਦਾਕਾਰ ਅਕਸ਼ੈ ਕੁਮਾਰ ਦਾ ਉਦਘਾਟਨੀ ਸਮਾਰੋਹਾਂ ਵਿੱਚ ਪ੍ਰੋਗਰਾਮ 12 ਮਿੰਟ ਦਾ ਹੋਵੇਗਾ ਜਿਸ ਦਾ ਸਵਾ ਕਰੋੜ ਰੁਪਏ ਦਿੱਤਾ ਜਾਵੇਗਾ। ਅਕਸ਼ੈ ਕੁਮਾਰ ਨੂੰ ਭਿਸੀਆਣਾ ਹਵਾਈ ਅੱਡੇ ਤੋਂ ਲਿਆਉਣ ਲਈ ਨੋਡਲ ਅਧਿਕਾਰੀ ਲਾਇਆ ਗਿਆ ਹੈ। 5 ਵਜੇ ਤੱਕ ਅਕਸ਼ੈ ਕੁਮਾਰ ਭਿਸੀਆਣਾ ਪੁੱਜੇਗਾ ਅਤੇ 9 ਵਜੇ ਮਗਰੋਂ ਉਹ ਵਾਪਸ ਰਵਾਨਾ ਹੋਵੇਗਾ। ਅਕਸ਼ੈ ਕੁਮਾਰ ਕਰੀਬ ਸਵਾ ਕੁ ਸੱਤ ਵਜੇ ਸਟੇਡੀਅਮ ਪੁੱਜੇਗਾ। ਤੀਸਰੇ ਵਿਸ਼ਵ ਕਬੱਡੀ ਕੱਪ ਦੇ ਅਗਾਜ਼ ਲਈ ਬਠਿੰਡਾ ਦਾ ਬਹੁਮੰਤਵੀ ਖੇਡ ਸਟੇਡੀਅਮ ਸਜ ਕੇ ਤਿਆਰ-ਬਰ- ਤਿਆਰ ਹੋ ਗਿਆ ਹੈ ਪਰ ਸਾਬਕਾ ਪ੍ਰਧਾਨ ਮੰਤਰੀ ਆਈ ਕੇ ਗੁਜਰਾਲ ਦੀ ਮੌਤ ਕਾਰਨ ਆਤਿਸ਼ਬਾਜ਼ੀ ਕਰਨ ਦਾ ਫੈਸਲਾ ਬਦਲ ਦਿੱਤਾ ਗਿਆ ਹੈ। ਸ੍ਰੀ ਗੁਜਰਾਲ ਨੂੰ ਦੋ ਮਿੰਟ ਦਾ ਮੋਨ ਧਾਰ ਕੇ ਸ਼ਰਧਾਂਜਲੀ ਵੀ ਭੇਟ ਕੀਤੀ ਜਾਵੇਗੀ ਜ਼ਿਲ੍ਹਾ ਪ੍ਰਸ਼ਾਸਨ ਬਠਿੰਡਾ ਨੇ ਤੀਜੇ ਵਿਸ਼ਵ ਕਬੱਡੀ ਕੱਪ ਦੇ ਉਦਘਾਟਨੀ ਸਮਾਰੋਹ ਦੀ ਚਮਕ ਦਮਕ ਲਈ ਅਫ਼ਸਰਾਂ ਨੂੰ ਪੱਬਾਂ ਭਾਰ ਕਰ ਦਿੱਤਾ ਹੈ। ਬਠਿੰਡਾ ਦੇ ਅਫ਼ਸਰ ਬਿਨਾਂ ਪੈਸੇ ਤੋਂ ਹੀ ਸਮਾਰੋਹਾਂ ਨੂੰ ਅੰਤਿਮ ਛੋਹਾਂ ਦੇ ਰਹੇ ਹਨ। ਜ਼ਿਲ੍ਹਾ ਟਰਾਂਸਪੋਰਟਰ ਅਫ਼ਸਰ ਬਠਿੰਡਾ ਨੇ ਅੱਜ ਬਿਨਾਂ ਕੁਝ ਦਿੱਤੇ ਲਏ 75 ਮਿੰਨੀ ਬੱਸਾਂ ਅਤੇ 50 ਵੱਡੀਆਂ ਬੱਸਾਂ ਲੈ ਲਈਆਂ ਹਨ। ਇਨ੍ਹਾਂ ਬੱਸਾਂ ਵਿੱਚ ਆਮ ਲੋਕਾਂ ਨੂੰ ਸਮਾਰੋਹਾਂ 'ਤੇ ਲਿਆਂਦਾ ਜਾਏਗਾ। ਡੀ.ਟੀ.ਓ. ਨੇ ਇਨ੍ਹਾਂ ਬੱਸ ਮਾਲਕਾਂ ਨਾਲ ਪੌਣੇ ਚਾਰ ਲੱਖ ਦਾ ਉਧਾਰ ਕੀਤਾ ਹੈ। ਬਠਿੰਡਾ ਅਤੇ ਮਾਨਸਾ ਦੇ ਅਸੈਂਬਲੀ ਹਲਕਿਆਂ ਵਿੱਚ 25 ਬੱਸਾਂ ਭੇਜੀਆਂ ਗਈਆਂ ਹਨ। ਇਨ੍ਹਾਂ ਬੱਸਾਂ ਵਿੱਚ ਡੀਜ਼ਲ ਹਲਕਾ ਇੰਚਾਰਜਾਂ ਵੱਲੋਂ ਪਵਾਇਆ ਜਾਵੇਗਾ ਜਦੋਂ ਕਿ ਦਿਹਾੜੀ ਦੇ 2500 ਰੁਪਏ ਮਿੰਨੀ ਬੱਸ ਅਤੇ 3750 ਰੁਪਏ ਪ੍ਰਤੀ ਵੱਡੀ ਬੱਸ ਦੇ ਕਬੱਡੀ ਕੱਪ ਦੇ ਖਰਚੇ 'ਚੋਂ ਦਿੱਤੇ ਜਾਣਗੇ।
             ਮਿੰਨੀ ਬੱਸ ਅਪਰੇਟਰ ਯੂਨੀਅਨ ਦੇ ਪ੍ਰਧਾਨ ਬਲਤੇਜ ਸਿੰਘ ਦਾ ਕਹਿਣਾ ਹੈ ਕਿ ਟਰਾਂਸਪੋਰਟ ਦਫ਼ਤਰ ਵੱਲੋਂ ਕਿਸੇ ਵੀ ਬੱਸ ਮਾਲਕ ਨੂੰ ਕੋਈ ਰਾਸ਼ੀ ਨਹੀਂ ਦਿੱਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਟਰਾਂਸਪੋਰਟ ਵਿਭਾਗ ਨੇ ਬੱਸ ਮਾਲਕਾਂ ਨੂੰ ਪੰਜ ਸਾਲ ਪਹਿਲਾਂ ਦੇ ਪੈਸੇ ਹਾਲੇ ਤੱਕ ਨਹੀਂ ਦਿੱਤੇ ਹਨ। ਜਾਣਕਾਰੀ ਅਨੁਸਾਰ ਮੁੱਖ ਸੰਸਦੀ ਸਕੱਤਰ ਸਰੂਪ ਚੰਦ ਸਿੰਗਲਾ ਵੱਲੋਂ ਬੱਸਾਂ ਨਹੀਂ ਲਈਆਂ ਜਾ ਰਹੀਆਂ। ਮੰਡੀ ਬੋਰਡ ਪੰਜਾਬ ਦੀ ਡਿਊਟੀ ਵੱਡਾ ਜੈਨਰੇਟਰ ਲਿਆਉਣ ਦੀ ਲਾਈ ਹੈ ਅਤੇ ਇਸ ਲਈ ਕੋਈ ਫੰਡ ਜਾਰੀ ਨਹੀਂ ਕੀਤਾ ਗਿਆ ਹੈ। ਮੰਡੀ ਬੋਰਡ ਵੱਲੋਂ ਤਕਰੀਬਨ ਸੱਤ ਲੱਖ ਦੇ ਕਿਰਾਏ 'ਤੇ ਦਿੱਲੀ ਤੋਂ ਅੱਜ ਵੱਡਾ ਜੈਨਰੇਟਰ ਲਿਆਂਦਾ ਗਿਆ ਹੈ ਜਿਸ ਨਾਲ ਫਲੱਡ ਲਾਈਟਾਂ ਚੱਲਣਗੀਆਂ। ਇਹ ਜੈਨਰੇਟਰ ਚਾਰ ਸ਼ਹਿਰਾਂ ਵਿੱਚ ਲਿਜਾਇਆ ਜਾਵੇਗਾ। ਮੰਡੀ ਬੋਰਡ ਨੇ ਆਪਣੇ ਫੰਡਾਂ 'ਚੋਂ ਹੀ ਜੈਨਰੇਟਰ ਦਾ ਕਿਰਾਇਆ ਤਾਰਿਆ ਹੈ। ਲੋਕ ਨਿਰਮਾਣ ਵਿਭਾਗ ਵੱਲੋਂ ਮੁੱਖ ਸਟੇਡੀਅਮ ਵਿੱਚ ਬੈਰੀਕੇਡਿੰਗ ਕੀਤੀ ਗਈ ਹੈ ਜਿਸ ਨੂੰ ਕੋਈ ਰਾਸ਼ੀ ਨਹੀਂ ਦਿੱਤੀ ਗਈ ਹੈ। ਸਾਰਾ ਕੰਮ ਉਧਾਰ ਵਿੱਚ ਹੀ ਕਰਾਇਆ ਜਾ ਰਿਹਾ ਹੈ। ਸਟੇਡੀਅਮ ਨੂੰ ਚਿੱਟਾ ਰੰਗ ਵੀ ਉਧਾਰ ਵਿੱਚ ਕਰਾਇਆ ਗਿਆ ਹੈ ਜਿਸ ਦੀ ਰਾਸ਼ੀ ਤਕਰੀਬਨ ਇੱਕ ਲੱਖ ਰੁਪਏ ਬਣਦੀ ਹੈ। ਇਸੇ ਤਰ੍ਹਾਂ ਬੈਰੀਕੇਡਿੰਗ ਵਿੱਚ ਜੋ ਡੱਬੀ ਵਾਲੀ ਜਾਲੀ ਅਤੇ ਮੁਰਗਾ ਜਾਲੀ ਲਵਾਈ ਗਈ ਹੈ, ਉਸ ਦਾ ਖਰਚਾ ਵੀ 2 ਲੱਖ ਦੇ ਕਰੀਬ ਬਣ ਗਿਆ ਹੈ। ਬਿਨਾਂ ਫੰਡਾਂ ਤੋਂ ਇਹ ਕੰਮ ਕਰਾਉਣੇ ਵਿਭਾਗੀ ਅਫਸਰਾਂ ਲਈ ਕਾਫ਼ੀ ਔਖੇ ਸਨ। ਜਨ ਸਿਹਤ ਵਿਭਾਗ ਦੀ ਵੀ ਡਿਊਟੀ ਲਾਈ ਗਈ ਹੈ ਪਰ ਕੋਈ ਪੈਸਾ ਨਹੀਂ ਦਿੱਤਾ ਗਿਆ। ਇਸੇ ਤਰ੍ਹਾਂ ਖੁਰਾਕ ਤੇ ਸਪਲਾਈਜ਼ ਵਿਭਾਗ, ਕਰ ਅਤੇ ਆਬਕਾਰੀ ਵਿਭਾਗ ਤੋਂ ਇਲਾਵਾ ਮਾਲ ਮਹਿਕਮੇ ਦੇ ਅਫ਼ਸਰਾਂ ਦੀ ਡਿਊਟੀ ਪ੍ਰਾਹੁਣਚਾਰੀ 'ਤੇ ਲਾਈ ਗਈ ਹੈ। ਪ੍ਰਾਹੁਣਚਾਰੀ ਲਈ ਕੇਟਰਿੰਗ ਦਾ ਪ੍ਰਬੰਧ ਚੰਡੀਗੜ੍ਹ ਤੋਂ ਕੀਤਾ ਗਿਆ ਹੈ।
           ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਹਾਕਮ ਧਿਰ ਦੇ ਮਹਿਮਾਨਾਂ ਨੂੰ ਵੀ.ਆਈ.ਪੀ. ਗੈਲਰੀ ਵਿੱਚ ਬਿਠਾਇਆ ਜਾ ਰਿਹਾ ਹੈ। ਮੁੱਖ ਸੰਸਦੀ ਸਕੱਤਰ ਸਰੂਪ ਚੰਦ ਸਿੰਗਲਾ ਦੇ ਤਕਰੀਬਨ 100 ਆਦਮੀ ਦੋ ਬੱਸਾਂ ਰਾਹੀਂ ਸਟੇਡੀਅਮ ਪੁੱਜਣਗੇ ਜਿਨ੍ਹਾਂ ਨੂੰ ਵੀ.ਆਈ.ਪੀ. ਗੈਲਰੀ ਵਿੱਚ ਵੱਖਰੇ ਹੀ ਬਿਠਾਇਆ ਜਾਵੇਗਾ।ਜਲਾਲਾਬਾਦ, ਕਾਲਝਰਾਨੀ ਅਤੇ ਪਿੰਡ ਬਾਦਲ ਤੋਂ ਆਉਣ ਵਾਲੇ ਲੋਕ ਵੀ ਇਸੇ ਗੈਲਰੀ ਵਿੱਚ ਬੈਠਣਗੇ। ਵੀ.ਆਈ.ਪੀਜ਼. ਨਾਲ ਆਉਣ ਵਾਲੇ ਡਰਾਈਵਰਾਂ ਅਤੇ ਗੰਨਮੈਨਾਂ ਦੀ ਐਂਟਰੀ ਮੁੱਖ ਸਟੇਡੀਅਮ ਵਿੱਚ ਬੈਨ ਕਰ ਦਿੱਤੀ ਗਈ ਹੈ। ਉਨ੍ਹਾਂ ਨੂੰ ਨੇੜਲੇ ਛਾਬੜਾ ਪੈਲੇਸ ਵਿੱਚ ਦਾਲ ਰੋਟੀ ਦਿੱਤੀ ਜਾਵੇਗੀ। ਵੀ.ਆਈ.ਪੀ. ਗੈਲਰੀ ਵਿੱਚ ਕੌਫੀ ਅਤੇ ਜੂਸ ਤੋਂ ਇਲਾਵਾ ਸਨੈਕਸ ਵਰਤਾਏ ਜਾਣੇ ਹਨ। ਐਸ.ਐਸ.ਪੀ. ਰਵਚਰਨ ਸਿੰਘ ਬਰਾੜ ਵੱਲੋਂ ਜਾਰੀ ਰੂਟ ਪਲਾਨ ਅਨੁਸਾਰ ਗਿੱਦੜਬਾਹਾ,ਗੋਨਿਆਣਾ ਸਾਈਡ ਤੋਂ ਆਉਣ ਵਾਲੇ ਆਮ ਲੋਕਾਂ ਨੂੰ ਰੋਜ਼ ਗਾਰਡਨ ਚੌਕ, ਗੋਨਿਆਣਾ ਰੋਡ ਤੋਂ ਦਫ਼ਤਰ ਨਗਰ ਸੁਧਾਰ ਟਰੱਸਟ ਤੱਕ ਉਤਾਰਿਆ ਜਾਵੇਗਾ ਜਿਥੋਂ ਸਟੇਡੀਅਮ ਤੱਕ ਉਨ੍ਹਾਂ ਨੂੰ ਪ੍ਰਸ਼ਾਸਨ ਵੱਲੋਂ ਲਾਈਆਂ ਬੱਸਾਂ 'ਚ ਲਿਆਂਦਾ ਜਾਵੇਗਾ। ਉਨ੍ਹਾਂ ਲਈ ਪਾਰਕਿੰਗ ਰੋਜ਼ ਗਾਰਡਨ ਅਤੇ ਐਸ.ਸੀ.ਐਫ. ਮਾਰਕੀਟ ਗੋਨਿਆਣਾ ਰੋਡ 'ਤੇ ਬਣਾਈ ਗਈ ਹੈ। ਬਰਨਾਲਾ ਸਾਈਡ ਤੋਂ ਆਉਣ ਵਾਲੇ ਆਮ ਲੋਕ ਬੀਬੀ ਵਾਲਾ ਚੌਕ ਅਤੇ ਨਾਰਥ ਅਸਟੇਟ ਉਤਰਨਗੇ ਅਤੇ ਇਥੇ ਹੀ ਕਾਰਾਂ ਜੀਪਾਂ ਦੀ ਪਾਰਕਿੰਗ ਡੀ.ਏ.ਵੀ. ਕਾਲਜ ਦੇ ਗਰਾਊਂਡ ਵਿੱਚ ਬਣਾਈ ਗਈ ਹੈ। ਮਾਨਸਾ-ਡੱਬਵਾਲੀ ਸਾਈਡ ਤੋਂ ਆਉਣ ਵਾਲੇ ਆਮ ਲੋਕਾਂ ਨੂੰ ਪੁਲੀਸ ਲਾਈਨ, ਬਾਲਮੀਕ ਚੌਕ, ਸੇਂਟ ਜੋਜ਼ਫ ਸਕੂਲ,ਭਾਗੂ ਰੋਡ,ਘੋੜੇ ਵਾਲਾ ਚੌਕ, ਜੁਝਾਰ ਸਿੰਘ ਨਗਰ ਵਾਲੀ ਸੜਕ 'ਤੇ ਉਤਾਰਿਆ ਜਾਵੇਗਾ। ਇਨ੍ਹਾਂ ਲਈ ਪਾਰਕਿੰਗ ਜੁਝਾਰ ਸਿੰਘ ਨਗਰ ਵਾਲੀ ਸੜਕ ਅਤੇ ਮਾਡਲ ਟਾਊਨ ਫੇਜ਼ ਤਿੰਨ ਵਿੱਚ ਬਣਾਈ ਗਈ    ਹੈ। ਵੀ.ਵੀ.ਆਈ.ਪੀ. ਲਈ ਪਾਰਕਿੰਗ  ਸਟੇਡੀਅਮ ਦੇ ਗੇਟ ਨੰਬਰ ਇੱਕ ਦੇ ਨੇੜੇ, ਸ੍ਰੀ ਗੁਰੂ ਹਰਕ੍ਰਿਸ਼ਨ ਪਬਲਿਕ ਸਕੂਲ ਅਤੇ ਟਰੱਕ ਯੂਨੀਅਨ ਵਿੱਚ ਬਣਾਈ ਗਈ ਹੈ। ਵੀ.ਆਈ. ਪੀਜ਼. ਲਈ ਪਾਰਕਿੰਗ ਮਹਾਂਵੀਰ ਹਸਪਤਾਲ ਵਿੱਚ ਬਣਾਈ ਗਈ ਹੈ।                    
                             ਸਰਕਾਰੀ ਬੱਲੇ-ਬੱਲੇ
                   ਠੇਕੇਦਾਰਾਂ ਦੇ ਖੜਕੇ ਗੱਲੇ
                                ਚਰਨਜੀਤ ਭੁੱਲਰ
ਬਠਿੰਡਾ :  ਨਵੇਂ ਬਣਾਏ ਸਟੇਡੀਅਮਾਂ ਲਈ ਪੰਜਾਬ ਸਰਕਾਰ ਦੇ ਖ਼ਜ਼ਾਨੇ ਵਿੱਚ ਪੈਸਾ ਨਹੀਂ ਹੈ ਜਿਸ ਕਾਰਨ ਸਟੇਡੀਅਮ ਉਸਾਰਨ ਵਾਲੇ ਠੇਕੇਦਾਰਾਂ ਦੇ ਕਰੋੜਾਂ ਰੁਪਏ ਸਰਕਾਰ ਵੱਲ ਫਸੇ ਪਏ ਹਨ। ਪੰਜਾਬ ਸਰਕਾਰ ਵੱਲੋਂ ਭਲਕੇ ਤੋਂ ਇਨ੍ਹਾਂ ਸਟੇਡੀਅਮਾਂ ਵਿੱਚ ਤੀਜਾ ਵਿਸ਼ਵ ਕਬੱਡੀ ਕੱਪ ਕਰਾਇਆ ਜਾ ਰਿਹਾ ਹੈ। ਇਨ੍ਹਾਂ ਸਟੇਡੀਅਮਾਂ ਨੇ ਪੰਜਾਬ ਮੰਡੀ ਬੋਰਡ ਦਾ ਖ਼ਜ਼ਾਨਾ ਵੀ ਖਾਲ੍ਹੀ ਕਰ ਦਿੱਤਾ ਹੈ। ਸਰਕਾਰੀ ਖ਼ਜ਼ਾਨੇ 'ਚੋਂ ਜੋ ਸਟੇਡੀਅਮ ਉਸਾਰੇ ਗਏ ਸਨ, ਉਨ੍ਹਾਂ ਦੀ ਹੀ ਸਮੱਸਿਆ ਹੈ। ਬਾਕੀ ਸਟੇਡੀਅਮ ਹੋਰ ਏਜੰਸੀਆਂ ਦੇ ਫੰਡਾਂ ਨਾਲ ਉਸਾਰੇ ਗਏ ਹਨ। ਪੰਜਾਬ ਸਰਕਾਰ ਨੇ ਅੱਧੀ ਦਰਜਨ ਸਟੇਡੀਅਮਾਂ ਲਈ 20 ਕਰੋੜ ਰੁਪਏ ਦੇਣੇ ਸਨ ਪਰ ਮੁਢਲੇ ਪੜਾਅ 'ਤੇ ਪੰਜ ਕਰੋੜ ਰੁਪਏ ਹੀ ਜਾਰੀ ਕੀਤੇ ਸਨ। ਜਾਣਕਾਰੀ ਮੁਤਾਬਕ ਮਗਰੋਂ ਪੰਜ ਕਰੋੜ ਰੁਪਏ ਹੋਰ ਜਾਰੀ ਹੋ ਗਏ ਸਨ।
           ਇਥੇ ਬਹੁਮੰਤਵੀ ਸਟੇਡੀਅਮ ਬਠਿੰਡਾ ਵਿਕਾਸ ਅਥਾਰਟੀ ਦੇ ਫੰਡਾਂ ਨਾਲ ਉਸਾਰਿਆ ਗਿਆ ਹੈ ਜਿਸ ਕਾਰਨ ਫੰਡਾਂ ਦੀ ਘਾਟ ਤੋਂ ਬਚ ਗਿਆ। ਬਠਿੰਡਾ ਦੇ ਹਾਕੀ ਸਟੇਡੀਅਮ ਦੇ ਇੱਕ ਕਰੋੜ ਦੇ ਬਕਾਏ ਹਾਲੇ ਤੱਕ ਨਹੀਂ ਦਿੱਤੇ ਜਾ ਸਕੇ। ਨਗਰ ਸੁਧਾਰ ਟਰੱਸਟ,ਬਠਿੰਡਾ ਨੇ ਹਾਕੀ ਸਟੇਡੀਅਮ ਲਈ ਸਾਢੇ ਪੰਜ ਕਰੋੜ ਰੁਪਏ ਦੇਣੇ ਸਨ ਪਰ ਟਰੱਸਟ ਸਿਰਫ਼ ਇੱਕ ਕਰੋੜ ਰੁਪਏ ਹੀ ਦੇ ਸਕਿਆ ਹੈ। ਇਸ ਸਟੇਡੀਅਮ 'ਤੇ ਚਾਰ ਕਰੋੜ ਰੁਪਏ ਖਰਚ ਹੋਏ ਹਨ। ਮੰਡੀ ਬੋਰਡ ਦੋ ਕਰੋੜ ਰੁਪਏ ਆਪਣੇ ਖ਼ਜ਼ਾਨੇ 'ਚੋਂ ਖਰਚ ਕਰ ਚੁੱਕਾ ਹੈ। ਸਬੰਧਿਤ ਐਸ.ਡੀ.ਓ. ਪਵਨ ਕੁਮਾਰ ਛਾਬੜਾ ਨੇ ਦੱਸਿਆ ਕਿ ਠੇਕੇਦਾਰਾਂ ਦੇ ਤਕਰੀਬਨ ਇੱਕ ਕਰੋੜ ਰੁਪਏ ਦੇ ਬਕਾਏ ਖੜ੍ਹੇ ਹਨ। ਉਨ੍ਹਾਂ ਦੱਸਿਆ ਕਿ ਦੋ ਕਰੋੜ ਰੁਪਏ ਮੰਡੀ ਬੋਰਡ ਨੇ ਆਪਣੇ ਖ਼ਜ਼ਾਨੇ 'ਚੋਂ ਵਰਤੇ ਹਨ ਜੋ ਸਰਕਾਰ ਨੇ ਹਾਲੇ ਤੱਕ ਨਹੀਂ ਦਿੱਤੇ ਹਨ।
           ਮਾਨਸਾ ਵਿੱਚ ਬਣਾਏ ਗਏ ਬਹੁਮੰਤਵੀ ਸਟੇਡੀਅਮ 'ਤੇ ਚਾਰ ਕਰੋੜ ਰੁਪਏ ਤੋਂ ਜ਼ਿਆਦਾ ਖਰਚ ਹੋਇਆ ਹੈ ਜਿਸ 'ਚੋਂ ਸਰਕਾਰ ਨੇ 3 ਕਰੋੜ,10 ਲੱਖ ਰੁਪਏ ਦਿੱਤੇ ਹਨ। ਮੰਡੀ ਬੋਰਡ ਨੇ ਅਦਾਇਗੀਆਂ ਕਰਨ ਵਾਸਤੇ 70 ਲੱਖ ਰੁਪਏ ਆਪਣੇ ਖਜ਼ਾਨੇ 'ਚੋਂ ਦਿੱਤੇ ਹਨ ਪਰ 20 ਲੱਖ ਦੇ ਬਕਾਏ ਠੇਕੇਦਾਰਾਂ ਦੇ ਸਰਕਾਰ ਵੱਲ ਹਾਲੇ ਵੀ ਖੜ੍ਹੇ ਹਨ। ਫਰੀਦਕੋਟ ਵਿੱਚ ਜੋ ਬਹੁਮੰਤਵੀ ਸਟੇਡੀਅਮ ਬਣਾਇਆ ਗਿਆ ਹੈ, ਉਸ ਦੀ ਲਾਗਤ 6 ਕਰੋੜ ਰੁਪਏ ਸੀ। ਮੰਡੀ ਬੋਰਡ ਵੱਲੋਂ ਇਸ ਸਟੇਡੀਅਮ ਵਿੱਚ ਢਾਈ ਕਰੋੜ ਰੁਪਏ ਦੇ ਕੰਮ ਕਰਾਏ ਗਏ ਹਨ ਜਿਸ 'ਚੋਂ ਸਰਕਾਰ ਨੇ ਸਿਰਫ਼ ਡੇਢ ਕਰੋੜ ਰੁਪਏ ਦਿੱਤੇ ਹਨ। ਸਬੰਧਿਤ ਐਸ.ਡੀ.ਓ. ਸ੍ਰੀ ਚੱਢਾ ਨੇ ਦੱਸਿਆ ਕਿ ਸਟੇਡੀਅਮ ਦੀ ਉਸਾਰੀ ਕਰਨ ਵਾਲੀਆਂ ਫਰਮਾਂ ਦੇ 50 ਲੱਖ ਦੇ ਬਕਾਏ ਹਾਲੇ ਖੜ੍ਹੇ ਹਨ ਜਿਸ ਬਾਰੇ ਸਰਕਾਰ ਨੂੰ ਲਿਖਿਆ ਗਿਆ ਹੈ।
           ਜ਼ਿਕਰਯੋਗ ਹੈ ਕਿ ਪੰਜਾਬ ਸਰਕਾਰ ਵੱਲੋਂ ਪੰਜਾਬ ਵਿੱਚ 16 ਨਵੇਂ ਸਟੇਡੀਅਮ ਬਣਾਏ ਗਏ ਹਨ ਜਿਨ੍ਹਾਂ 'ਚੋਂ 6 ਸਟੇਡੀਅਮਾਂ ਲਈ ਰਾਸ਼ੀ ਸਰਕਾਰੀ ਖਜ਼ਾਨੇ 'ਚੋਂ ਜਾਰੀ ਹੋਣੀ ਸੀ। ਵਿੱਤ ਵਿਭਾਗ ਨੇ ਇਹ ਫੰਡ ਹਾਲੇ ਤੱਕ ਜਾਰੀ ਨਹੀਂ ਕੀਤੇ ਹਨ ਜਦੋਂ ਕਿ ਇਨ੍ਹਾਂ ਸਟੇਡੀਅਮਾਂ 'ਚ ਦੂਜਾ ਵਿਸ਼ਵ ਕਬੱਡੀ ਕੱਪ ਵੀ ਹੋ ਚੁੱਕਾ ਹੈ। ਹੁਸ਼ਿਆਰਪੁਰ ਦੇ ਬਹੁਮੰਤਵੀ ਆਊਟਡੋਰ ਸਟੇਡੀਅਮ 'ਤੇ 3 ਕਰੋੜ, 26 ਲੱਖ ਰੁਪਏ ਖਰਚੇ ਗਏ ਹਨ। ਪੈਸੇ ਮੁੱਕਣ ਕਰਕੇ ਹੁਣ ਇਸ ਸਟੇਡੀਅਮ ਦਾ ਕੰਮ ਵਿਚਕਾਰ ਰੋਕ ਦਿੱਤਾ ਗਿਆ ਹੈ। ਇਸ ਸਟੇਡੀਅਮ ਲਈ ਸਰਕਾਰ ਨੇ ਸਿਰਫ਼ 2 ਕਰੋੜ,61 ਲੱਖ ਰੁਪਏ ਜਾਰੀ ਕੀਤੇ ਹਨ। ਮੰਡੀ ਬੋਰਡ ਦੇ ਐਕਸੀਅਨ ਸ੍ਰੀ ਅਗਨੀਹੋਤਰੀ ਨੇ ਦੱਸਿਆ ਕਿ 65 ਲੱਖ ਰੁਪਏ ਦੇ ਫੰਡ ਮੰਡੀ ਬੋਰਡ ਨੇ ਆਪਣੇ ਵਰਤੇ ਹਨ ਜਦੋਂ ਕਿ ਹੋਰ ਫੰਡ ਸਰਕਾਰ ਨੇ ਜਾਰੀ ਨਹੀਂ ਕੀਤੇ ਹਨ ਜਿਸ ਕਾਰਨ ਸਟੇਡੀਅਮ ਦੀਆਂ ਪੌੜੀਆਂ ਦਾ ਇੱਕ ਤਿਹਾਈ ਹਿੱਸਾ ਸਿਰੇ ਨਹੀਂ ਲੱਗ ਸਕਿਆ ਹੈ।
            ਜਾਣਕਾਰੀ ਅਨੁਸਾਰ ਇਸ ਸਟੇਡੀਅਮ ਦੀ ਉਸਾਰੀ ਲਈ ਮਗਰੋਂ 4 ਕਰੋੜ,30 ਲੱਖ ਦੀ ਯੋਜਨਾ ਤਿਆਰ ਕੀਤੀ ਸੀ ਜਿਸ ਨੂੰ ਸਰਕਾਰ ਨੇ ਪ੍ਰਵਾਨ ਹੀ ਨਹੀਂ ਕੀਤਾ। ਸੰਗਰੂਰ 'ਚ ਵਾਰ ਹੀਰੋਜ਼ ਸਟੇਡੀਅਮ ਬਣਾਇਆ ਗਿਆ ਹੈ। ਇਸ ਦੀ ਉਸਾਰੀ 'ਤੇ 2 ਕਰੋੜ,30 ਲੱਖ ਰੁਪਏ ਖਰਚੇ ਗਏ ਹਨ। ਸਰਕਾਰ ਨੇ ਇਸ ਸਟੇਡੀਅਮ ਲਈ 1 ਕਰੋੜ,69 ਲੱਖ ਰੁਪਏ ਦਿੱਤੇ ਹਨ। ਸੂਤਰਾਂ ਮੁਤਾਬਕ ਉਸਾਰੀ ਕਰਨ ਵਾਲੀਆਂ ਫਰਮਾਂ ਦੇ ਤਕਰੀਬਨ 50 ਲੱਖ ਰੁਪਏ ਹਾਲੇ ਵੀ ਸਰਕਾਰ ਵੱਲ ਖੜ੍ਹੇ ਹਨ। ਲੁਧਿਆਣਾ ਦੇ ਦੋ ਸਟੇਡੀਅਮਾਂ ਲਈ ਗਲਾਡਾ ਨੇ ਪੈਸਾ ਦਿੱਤਾ ਹੈ। ਜਲੰਧਰ ਦੇ ਸਟੇਡੀਅਮ ਲਈ ਜੇ.ਆਈ.ਟੀ. ਨੇ ਪੈਸਾ ਦਿੱਤਾ ਹੈ। ਮੁਹਾਲੀ ਸਟੇਡੀਅਮ ਦੀ ਉਸਾਰੀ ਲਈ ਗਮਾਡਾ ਨੇ ਪੈਸਾ ਦਿੱਤਾ ਹੈ। ਅੰਮ੍ਰਿਤਸਰ ਅਤੇ ਗੁਰਦਾਸਪੁਰ ਦੇ ਸਟੇਡੀਅਮਾਂ 'ਤੇ ਪੀ.ਆਈ.ਡੀ. ਬੀ. ਨੇ ਖਰਚ ਕੀਤਾ ਹੈ। ਇਸ ਬਾਰੇ ਸੰਪਰਕ ਕਰਨ 'ਤੇ ਖੇਡ ਵਿਭਾਗ ਪੰਜਾਬ ਦੇ ਡਾਇਰੈਕਟਰ ਸ਼ਿਵ ਦੁਲਾਰ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਵਿੱਤ ਵਿਭਾਗ ਤੋਂ ਬਕਾਇਆ ਰਾਸ਼ੀ ਮੰਗੀ ਹੈ ਜੋ ਜਲਦੀ ਮਿਲ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਸਾਰੇ ਸਟੇਡੀਅਮ ਮੁਕੰਮਲ ਹੋ ਚੁੱਕੇ ਹਨ।

Friday, November 30, 2012

                             ਬਠਿੰਡਾ ਪੁਲੀਸ
     ਪੱਲੇ ਨਹੀਂ ਧੇਲਾ, ਕਰਦੀ ਮੇਲਾ-ਮੇਲਾ
                            ਚਰਨਜੀਤ ਭੁੱਲਰ
ਬਠਿੰਡਾ : ਵਿਸ਼ਵ ਕਬੱਡੀ ਕੱਪ ਕਾਰਨ ਬਠਿੰਡਾ ਸ਼ਹਿਰ ਪੁਲੀਸ ਛਾਉਣੀ ਬਣ ਗਿਆ ਹੈ। ਚਾਰ ਚੁਫੇਰੇ ਪੁਲੀਸ ਹੀ ਪੁਲੀਸ ਨਜ਼ਰ ਆਉਂਦੀ ਹੈ। ਕਬੱਡੀ ਕੱਪ ਦੇ ਉਦਘਾਟਨੀ ਸਮਾਰੋਹ ਤੋਂ ਦੋ ਦਿਨ ਪਹਿਲਾਂ ਹੀ ਪੰਜਾਬ ਭਰ ਤੋਂ ਪੁਲੀਸ ਬੁਲਾ ਲਈ ਹੈ। ਤਕਰੀਬਨ ਤਿੰਨ ਹਜ਼ਾਰ ਪੁਲੀਸ ਮੁਲਾਜ਼ਮ ਬਠਿੰਡਾ ਪੁੱਜ ਗਏ ਹਨ ਜਦੋਂ ਕਿ ਕਾਫ਼ੀ ਪੁਲੀਸ ਪਹਿਲੀ ਦਸੰਬਰ ਨੂੰ ਪੁੱਜੇਗੀ। ਜ਼ਿਲ੍ਹਾ ਪੁਲੀਸ ਦਾ ਖ਼ਜ਼ਾਨਾ ਖਾਲੀ ਹੈ ਜਿਸ ਕਾਰਨ ਉਧਾਰ ਚੁੱਕ ਕੇ ਕਬੱਡੀ ਕੱਪ ਦੀ ਸੁਰੱਖਿਆ ਕੀਤੀ ਜਾ ਰਹੀ ਹੈ। ਹਫ਼ਤੇ ਭਰ ਤੋਂ ਸਿਰਸਾ ਕਾਂਡ ਕਰਕੇ ਪੁਲੀਸ ਪੱਬਾਂ ਭਾਰ ਹੈ। ਇਥੇ ਪੁਲੀਸ ਲਾਈਨ ਵਿਚਲਾ ਤੇਲ ਪੰਪ ਡਰਾਈ ਹੋ ਗਿਆ ਹੈ ਜਿਸ ਕਾਰਨ ਸਾਢੇ ਚਾਰ ਲੱਖ ਰੁਪਏ ਦਾ ਤੇਲ ਉਧਾਰ ਪਵਾਇਆ ਗਿਆ ਹੈ। ਤੇਲ ਪੰਪ ਡੀਲਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ ਸੁਭਾਸ਼ ਕੁਮਾਰ ਦਾ ਕਹਿਣਾ ਹੈ ਕਿ ਪੁਲੀਸ ਵੱਲ ਪਹਿਲਾਂ ਹੀ ਤਕਰੀਬਨ ਇੱਕ ਕਰੋੜ ਰੁਪਏ ਬਕਾਇਆ ਹਨ। ਉਨ੍ਹਾਂ ਦੱਸਿਆ ਕਿ ਹੁਣ ਕਬੱਡੀ ਕੱਪ ਕਰਕੇ ਪੁਲੀਸ ਨੇ ਚਾਰ ਲੱਖ ਰੁਪਏ ਦਾ ਹੋਰ ਤੇਲ ਉਧਾਰ ਮੰਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਹੁਣ ਬਾਹਰੋਂ ਆਈਆਂ ਗੱਡੀਆਂ ਲਈ ਵੀ ਉਧਾਰ ਵਿੱਚ ਤੇਲ ਲਿਆ ਜਾ ਰਿਹਾ ਹੈ। ਪ੍ਰਾਪਤ ਜਾਣਕਾਰੀ ਮੁਤਾਬਕ ਬਾਹਰੋਂ ਆਈ ਪੁਲੀਸ ਲਈ ਰੋਟੀ ਪਾਣੀ ਵਾਸਤੇ ਵੀ ਜ਼ਿਲ੍ਹਾ ਪੁਲੀਸ ਕੋਲ ਫੰਡ ਨਹੀਂ ਹੈ। ਪੁਲੀਸ ਲਾਈਨ ਵਿੱਚ ਇੱਕ ਮੈਸ ਚਲਾਈ ਗਈ ਹੈ। ਕੁਝ ਦਿਨਾਂ ਤੋਂ ਡੇਰਾ ਵਿਵਾਦ ਕਰਕੇ ਤਾਇਨਾਤ ਪੁਲੀਸ ਵੀ ਗੁਰੂ ਘਰਾਂ 'ਚੋਂ ਪ੍ਰਸ਼ਾਦੇ ਛੱਕ ਰਹੀ ਹੈ। ਬਾਕੀ ਪੁਲੀਸ ਨੂੰ ਵਗਾਰ ਵਿੱਚ ਹੀ ਰੋਟੀ ਪਾਣੀ ਛਕਾਇਆ ਜਾ ਰਿਹਾ ਹੈ। ਬਾਹਰੋਂ ਆਏ ਪੁਲੀਸ ਅਫ਼ਸਰਾਂ ਲਈ ਤਾਂ ਹੋਟਲਾਂ ਵਿੱਚ ਕਮਰੇ ਬੁੱਕ ਕਰਾਏ ਗਏ ਹਨ। ਮੁਲਾਜ਼ਮਾਂ ਲਈ ਸਰਾਵਾਂ ਦਾ ਪ੍ਰਬੰਧ ਕੀਤਾ ਗਿਆ ਹੈ।
            ਇਥੇ ਪੁਲੀਸ ਲਾਈਨ ਵਿੱਚ ਅੱਜ ਸਵੇਰੇ ਹੀ ਬਾਹਰੋਂ ਪੁਲੀਸ ਪੁੱਜਣੀ ਸ਼ੁਰੂ ਹੋ ਗਈ ਸੀ। ਮਹਿਲਾ ਪੁਲੀਸ ਤੋਂ ਇਲਾਵਾ ਸਾਦੇ ਕੱਪੜਿਆਂ ਵਿੱਚ ਵੀ ਪੁਲੀਸ ਤਾਇਨਾਤ ਕੀਤੀ ਜਾ ਰਹੀ ਹੈ। ਸੀ.ਆਰ.ਪੀ.ਐਫ. ਅਤੇ ਬੀ.ਐਸ.ਐਫ. ਦੀ ਇੱਕ ਇੱਕ ਕੰਪਨੀ ਵੀ ਬਠਿੰਡਾ ਤਾਇਨਾਤ ਕੀਤੀ ਗਈ ਹੈ। ਵਿਸ਼ਵ ਕਬੱਡੀ ਕੱਪ ਅਤੇ ਡੇਰਾ ਵਿਵਾਦ ਕਾਰਨ ਪੁਲੀਸ ਨੂੰ ਇੱਕੋਂ ਸਮੇਂ ਦੋਵੇਂ ਪਾਸੇ ਧਿਆਨ ਦੇਣਾ ਪੈ ਰਿਹਾ ਹੈ। ਦੂਜੇ ਵਿਸ਼ਵ ਕੱਪ ਸਮੇਂ ਸਿਰਫ਼ ਸਟੇਡੀਅਮ ਦੇ ਆਸ ਪਾਸ ਹੀ ਪੁਲੀਸ ਦਾ ਪਹਿਰਾ ਸੀ। ਜ਼ਿਲ੍ਹਾ ਪੁਲੀਸ ਖ਼ਤਰਾ ਮੁੱਲ ਨਹੀਂ ਲੈਣਾ ਚਾਹੁੰਦੀ ਕਿਉਂਕਿ ਬੇਰੁਜ਼ਗਾਰ ਅਤੇ ਮੁਲਾਜ਼ਮ ਧਿਰਾਂ ਵੀ ਅੰਦਰੋਂ ਅੰਦਰੀਂ ਕਾਫ਼ੀ ਸਰਗਰਮ ਹਨ। ਉਪਰੋਂ ਸਿਰਸਾ ਕਾਂਡ ਵੀ ਹਾਲੇ ਠੰਢਾ ਨਹੀਂ ਹੋਇਆ ਹੈ। ਆਮ ਲੋਕ ਹੈਰਾਨ ਹਨ ਕਿ ਐਨੀ ਪੁਲੀਸ ਕਿਉਂ ਤਾਇਨਾਤ ਕੀਤੀ ਜਾ ਰਹੀ ਹੈ। ਬਠਿੰਡਾ ਪੁਲੀਸ ਦੇ ਐਸ.ਪੀ. (ਐਚ) ਗੁਰਮੀਤ ਸਿੰਘ ਦਾ ਕਹਿਣਾ ਹੈ ਕਿ ਪੰਜਾਬ ਭਰ ਤੋਂ ਤਕਰੀਬਨ ਤਿੰਨ ਹਜ਼ਾਰ ਪੁਲੀਸ ਮੁਲਾਜ਼ਮ ਪੁੱਜ ਗਏ ਹਨ ਅਤੇ ਕੁਝ ਪੁਲੀਸ ਪਹਿਲੀ ਦਸੰਬਰ ਨੂੰ ਆ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਉਦਘਾਟਨੀ ਸਮਾਰੋਹਾਂ ਕਰਕੇ ਲੋੜ ਅਨੁਸਾਰ ਪੁਲੀਸ ਬੁਲਾਈ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਤੇਲ ਪੰਪਾਂ ਤੋਂ ਉਧਾਰਾਂ ਤੇਲ ਪਵਾਇਆ ਜਾ ਰਿਹਾ ਹੈ ਕਿਉਂਕਿ ਬਜਟ ਨਹੀਂ ਆਇਆ ਹੈ। ਉਨ੍ਹਾਂ ਦੱਸਿਆ ਕਿ ਮੁਲਾਜ਼ਮਾਂ ਦੇ ਰੋਟੀ ਪਾਣੀ ਲਈ ਥਾਣਿਆਂ ਦੀ ਡਿਊਟੀ ਲਾਈ ਗਈ ਹੈ। ਦੱਸਣਯੋਗ ਹੈ ਕਿ ਬਠਿੰਡਾ ਜ਼ੋਨ ਦੇ ਆਈ.ਜੀ. ਨਿਰਮਲ ਸਿੰਘ ਢਿੱਲੋਂ, ਡੀ.ਆਈ.ਜੀ. ਪ੍ਰਮੋਦ ਬਾਨ ਅਤੇ ਐਸ.ਐਸ.ਪੀ. ਰਵਚਰਨ ਸਿੰਘ ਬਰਾੜ ਸੁਰੱਖਿਆ ਪ੍ਰਬੰਧਾਂ ਵਿੱਚ ਜੁਟੇ ਹੋਏ ਹਨ।
                                                 ਹਾਕਮ ਧਿਰ ਦੇ ਪ੍ਰਾਹੁਣਿਆਂ ਲਈ ਵਿਸ਼ੇਸ਼ ਪ੍ਰਬੰਧ
ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਸਮੁੱਚੀ ਸਰਕਾਰੀ ਮਸ਼ੀਨਰੀ ਤੀਜੇ ਵਿਸ਼ਵ ਕਬੱਡੀ ਕੱਪ ਦੇ ਉਦਘਾਟਨੀ ਸਮਾਰੋਹ ਦੀ ਤਿਆਰੀ 'ਤੇ ਲਗਾ ਦਿੱਤੀ ਹੈ ਜਿਸ ਕਾਰਨ ਬਾਕੀ ਸਰਕਾਰੀ ਕਾਰਜਾਂ ਨੂੰ ਬਰੇਕ ਲੱਗ ਗਈ ਹੈ। ਉਦਘਾਟਨੀ ਸਮਾਰੋਹਾਂ ਦੀ ਤਿਆਰੀ ਲਈ ਇੱਕ ਦਰਜਨ ਕਮੇਟੀਆਂ ਬਣਾਈਆਂ ਹਨ ਜਿਨ੍ਹਾਂ ਵਿੱਚ 60 ਅਧਿਕਾਰੀ ਸ਼ਾਮਲ ਹਨ। ਇਨ੍ਹਾਂ ਦੀ ਮਦਦ ਲਈ ਤਕਰੀਬਨ 100 ਮੁਲਾਜ਼ਮ ਹੋਰ ਕੰਮ ਕਰ ਰਹੇ ਹਨ। ਅੱਜ ਕਿਸੇ ਵੀ ਸਰਕਾਰੀ ਦਫ਼ਤਰ ਵਿੱਚ ਕੋਈ ਕੰਮ ਨਹੀਂ ਹੋਇਆ। ਆਮ ਲੋਕਾਂ ਨੂੰ ਦਫ਼ਤਰਾਂ ਵਿੱਚ ਖਾਲੀ ਕੁਰਸੀਆਂ ਹੀ ਮਿਲੀਆਂ। ਵਧੀਕ ਡਿਪਟੀ ਕਮਿਸ਼ਨਰ (ਜ) ਨੇ ਤਾਂ ਆਪਣੇ ਦਫ਼ਤਰ ਦੇ ਬਾਹਰ ਨੋਟਿਸ ਹੀ ਲਗਾ ਦਿੱਤਾ ਹੈ ਕਿ ਅਸਲੇ ਸਬੰਧੀ ਕੰਮਕਾਰ ਵਾਲੇ 4 ਦਸੰਬਰ ਤੋਂ ਬਾਅਦ ਹੀ ਮਿਲਣ।
            ਉਦਘਾਟਨੀ ਸਮਾਰੋਹ ਵਿੱਚ ਹਾਕਮ ਧਿਰ ਦੇ ਪ੍ਰਾਹੁਣਿਆਂ ਲਈ ਵਿਸ਼ੇਸ਼ ਪ੍ਰਬੰਧ ਕੀਤੇ ਜਾ ਰਹੇ ਹਨ। ਵੀ.ਵੀ.ਆਈ.ਪੀ. ਗੈਲਰੀ ਵਿੱਚ ਇੱਕ ਹਜ਼ਾਰ ਕੁਰਸੀ ਦਾ ਪ੍ਰਬੰਧ ਹੈ ਅਤੇ ਵੀ.ਆਈ.ਪੀ. ਗੈਲਰੀ ਵਿੱਚ ਚਾਰ ਹਜ਼ਾਰ ਕੁਰਸੀਆਂ ਹਨ। ਤਕਰੀਬਨ ਪੰਜ ਹਜ਼ਾਰ ਤਾਂ ਵੀ.ਆਈ.ਪੀ. ਹੀ ਹੋਣਗੇ ਜਦੋਂ ਕਿ ਹਜ਼ਾਰ ਤੋਂ ਜ਼ਿਆਦਾ ਪੁਲੀਸ ਮੁਲਾਜ਼ਮ ਹੋਣਗੇ। ਵੀ.ਵੀ.ਆਈ.ਪੀ. ਅਤੇ ਵੀ.ਆਈ.ਪੀ. ਪਾਸ ਐਤਕੀਂ ਸਿਰਫ਼ ਦੋ ਤਿੰਨ ਸਿਆਸੀ ਆਗੂਆਂ ਵੱਲੋਂ ਹੀ ਵੰਡੇ ਜਾ ਰਹੇ ਹਨ। ਇਸ ਮਾਮਲੇ ਵਿੱਚ ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਹੱਥ ਖਾਲੀ ਹਨ। ਸੂਤਰਾਂ ਅਨੁਸਾਰ ਸਿਰਫ਼ ਹਾਕਮ ਧਿਰ ਨਾਲ ਸਬੰਧਿਤ ਨੇੜਲੇ ਲੋਕਾਂ ਨੂੰ ਹੀ ਪਾਸ ਵੰਡੇ ਜਾ ਰਹੇ ਹਨ। ਸੂਚਨਾ ਅਨੁਸਾਰ ਹਲਕਾ ਜਲਾਲਾਬਾਦ 'ਚੋਂ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੇ ਤਿੰਨ ਸੌ ਮਹਿਮਾਨ ਉਦਘਾਟਨੀ ਸਮਾਰੋਹ ਵਿੱਚ ਪੁੱਜ ਰਹੇ ਹਨ ਜਿਨ੍ਹਾਂ ਨੂੰ ਲਿਆਉਣ ਲਈ ਪ੍ਰਸ਼ਾਸਨ ਨੇ ਬੱਸਾਂ ਦਾ ਪ੍ਰਬੰਧ ਕੀਤਾ ਹੈ। ਵੀ.ਆਈ.ਪੀ. ਗੈਲਰੀ ਵਿੱਚ ਇਨ੍ਹਾਂ ਮਹਿਮਾਨਾਂ ਦੀ ਖ਼ਾਤਰਦਾਰੀ ਲਈ ਸਰਕਾਰੀ ਮੁਲਾਜ਼ਮਾਂ ਦੀ ਡਿਊਟੀ ਲੱਗੇਗੀ। ਇਸੇ ਤਰ੍ਹਾਂ ਪਿੰਡ ਬਾਦਲ ਅਤੇ ਕਾਲਝਰਾਨੀ ਤੋਂ ਪੰਜ ਸੌ ਮਹਿਮਾਨ ਪੁੱਜ ਰਹੇ ਹਨ ਜਿਨ੍ਹਾਂ ਲਈ ਬਕਾਇਦਾ ਬੱਸਾਂ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਜ਼ਿਲ੍ਹਾ ਪ੍ਰਸ਼ਾਸਨ ਦੀ ਕਾਰਵਾਈ 'ਚ ਬਕਾਇਦਾ ਇਹ ਹਦਾਇਤਾਂ ਦਰਜ ਹਨ।
           ਉਦਘਾਟਨੀ ਸਮਾਰੋਹਾਂ ਵਿੱਚ ਪੁੱਜਣ ਵਾਲੇ ਆਮ ਲੋਕਾਂ ਨੂੰ ਤਾਂ ਪਹਿਲਾਂ ਦੀ ਤਰ੍ਹਾਂ ਧਰਤੀ 'ਤੇ ਬੈਠ ਕੇ ਹੀ ਸਬਰ ਕਰਨਾ ਪਵੇਗਾ। ਵੀ.ਆਈ.ਪੀ. ਲੋਕਾਂ ਲਈ ਚਾਹ ਪਾਣੀ ਦਾ ਇੰਤਜ਼ਾਮ ਵੀ ਕੀਤਾ ਗਿਆ ਹੈ। ਸਟੇਡੀਅਮ ਵਿੱਚ ਪੰਜ ਹਜ਼ਾਰ ਕੁਰਸੀ ਲਗਾਈ ਜਾ ਰਹੀ ਹੈ ਅਤੇ ਮੁੱਖ ਸਟੇਜ 'ਤੇ ਦੋ ਦਰਜਨ ਸੋਫੇ ਲਾਏ ਜਾ ਰਹੇ ਹਨ। ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਜ਼ਿਲ੍ਹਾ ਫਰੀਦਕੋਟ, ਮਾਨਸਾ, ਸੰਗਰੂਰ ਅਤੇ ਬਰਨਾਲਾ ਤੋਂ 20 ਅੰਬੈਸਡਰ ਗੱਡੀਆਂ ਵੀ ਉਧਾਰੀਆਂ ਲੈ ਲਈਆਂ ਹਨ। ਫ਼ੌਜ ਤੋਂ ਆਰਮੀ ਬੈਂਡ ਲਿਆ ਜਾ ਰਿਹਾ ਹੈ। ਸ਼ਹਿਰ ਦੇ ਸੈਪਲ ਹੋਟਲ ਵਿੱਚ 32 ਕਮਰੇ, ਹੋਟਲ ਕੰਫਟ ਇੰਨ ਵਿੱਚ 16 ਅਤੇ ਕ੍ਰਿਸ਼ਨਾ ਕੰਟੀਨੈਂਟਲ ਵਿੱਚ 16 ਕਮਰੇ ਬੁੱਕ ਕਰਾਏ ਗਏ ਹਨ। ਸਰਕਾਰੀ ਗੈਸਟ ਹਾਊਸ ਤਾਂ ਸਾਰੇ ਹੀ ਬੁੱਕ ਕੀਤੇ ਹੋਏ ਹਨ। ਸਿੱਖਿਆ ਮੰਤਰੀ ਅਤੇ ਕਬੱਡੀ ਐਸੋਸੀਏਸ਼ਨ ਦੇ ਪ੍ਰਧਾਨ ਸਿਕੰਦਰ ਸਿੰਘ ਮਲੂਕਾ ਨੇ ਅੱਜ ਇਥੇ ਸਟੇਡੀਅਮ ਵਿੱਚ ਉਦਘਾਟਨੀ ਸਮਾਰੋਹ ਦੀਆਂ ਤਿਆਰੀਆਂ ਦਾ ਜਾਇਜ਼ਾ ਲਿਆ। ਇਸ ਮੌਕੇ ਮੁੱਖ ਸੰਸਦੀ ਸਕੱਤਰ ਸਰੂਪ ਚੰਦ ਸਿੰਗਲਾ, ਵਿਧਾਇਕ ਦਰਸ਼ਨ ਸਿੰਘ ਕੋਟਫੱਤਾ ਅਤੇ ਡਿਪਟੀ ਕਮਿਸ਼ਨਰ ਕਮਲ ਕਿਸ਼ੋਰ ਯਾਦਵ ਹਾਜ਼ਰ ਸਨ। ਜਾਣਕਾਰੀ ਅਨੁਸਾਰ ਉਦਘਾਟਨੀ ਸਮਾਰੋਹਾਂ ਵਿੱਚ ਅਕਸ਼ੈ ਕੁਮਾਰ ਕਰੀਬ 7 ਵਜੇ ਪ੍ਰੋਗਰਾਮ ਪੇਸ਼ ਕਰਨਗੇ। ਉਸ ਤੋਂ ਪਹਿਲਾਂ ਲੇਜ਼ਰ ਸ਼ੋਅ ਹੋਵੇਗਾ। ਇਨ੍ਹਾਂ ਸਮਾਰੋਹਾਂ ਵਿੱਚ 1200 ਦੇ ਕਰੀਬ ਸਕੂਲੀ ਬੱਚੇ ਅਤੇ ਐਨ.ਸੀ.ਸੀ. ਕੈਡਿਟ ਸ਼ਾਮਲ ਹੋਣਗੇ। ਅੱਜ ਦੇਰ ਸ਼ਾਮ ਤੱਕ ਸਟੇਡੀਅਮ ਵਿੱਚ ਉਦਘਾਟਨੀ ਸਮਾਰੋਹਾਂ ਲਈ ਸਟੇਜ ਸਜ ਗਈ ਸੀ ਅਤੇ ਭਲਕੇ ਰਿਹਰਸਲ ਹੋਵੇਗੀ।

Thursday, November 29, 2012

                                ਵਿਸ਼ਵ ਕਬੱਡੀ ਕੱਪ
           ਬਾਲੀਵੁੱਡ ਨੂੰ ਚਾਰ ਕਰੋੜ ਦਾ ਗੱਫਾ !
                                  ਚਰਨਜੀਤ ਭੁੱਲਰ
ਬਠਿੰਡਾ :  ਪੰਜਾਬ ਸਰਕਾਰ ਵੱਲੋਂ ਤੀਜੇ ਵਿਸ਼ਵ ਕਬੱਡੀ ਕੱਪ ਦੀ ਚਮਕ ਦਮਕ ਲਈ ਬਾਲੀਵੁੱਡ ਕਲਾਕਾਰਾਂ 'ਤੇ ਤਕਰੀਬਨ ਚਾਰ ਕਰੋੜ ਰੁਪਏ ਖਰਚੇ ਜਾ ਰਹੇ ਹਨ। ਰਾਜ ਸਰਕਾਰ ਵੱਲੋਂ ਐਤਕੀਂ ਉਦਘਾਟਨੀ ਅਤੇ ਸਮਾਪਤੀ ਸਮਾਰੋਹਾਂ 'ਤੇ ਸਵਾ ਛੇ ਕਰੋੜ ਰੁਪਏ ਖਰਚੇ ਜਾ ਰਹੇ ਹਨ। ਬਠਿੰਡਾ ਵਿੱਚ ਪਹਿਲੀ ਦਸੰਬਰ ਨੂੰ ਤੀਜੇ ਵਿਸ਼ਵ ਕਬੱਡੀ ਕੱਪ ਦਾ ਉਦਘਾਟਨ ਹੋਵੇਗਾ ਜਿਸ 'ਚ ਬਾਲੀਵੁੱਡ ਕਲਾਕਾਰ ਅਕਸ਼ੈ ਕੁਮਾਰ ਤੋਂ ਇਲਾਵਾ ਹੀਰੋਇਨ ਅਸਿਨ ਅਤੇ ਹਿਮੇਸ਼ ਰੇਸ਼ਮੀਆ ਮੁੱਖ ਆਕਰਸ਼ਣ ਹੋਣਗੇ। ਪੰਜਾਬੀ ਗਾਇਕਾ ਮਿਸ ਪੂਜਾ ਵੀ ਉਦਘਾਟਨੀ ਸਮਾਰੋਹਾਂ ਵਿੱਚ ਪੁੱਜ ਰਹੀ ਹੈ। ਸੂਤਰਾਂ ਅਨੁਸਾਰ ਪੰਜਾਬ ਸਰਕਾਰ ਵੱਲੋਂ ਤੀਜੇ ਕਬੱਡੀ ਕੱਪ ਦੇ ਉਦਘਾਟਨੀ ਅਤੇ ਸਮਾਪਤੀ ਸਮਾਰੋਹਾਂ ਦਾ ਜ਼ਿੰਮਾ ਵਿਜ ਕਰਾਫਟ ਕੰਪਨੀ ਨੂੰ ਦਿੱਤਾ ਗਿਆ ਹੈ ਜਿਸ ਨੂੰ 6 ਕਰੋੜ,15 ਲੱਖ ਰੁਪਏ ਵਿੱਚ ਇਹ ਕੰਮ ਦਿੱਤਾ ਗਿਆ ਹੈ। ਬਾਲੀਵੁੱਡ ਕਲਾਕਾਰਾਂ ਦਾ ਖਰਚ ਵੀ ਇਸ ਕੰਪਨੀ ਵੱਲੋਂ ਕੀਤਾ ਜਾਣਾ ਹੈ। ਪਹਿਲੇ ਵਿਸ਼ਵ ਕਬੱਡੀ ਕੱਪ ਦੇ ਉਦਘਾਟਨੀ ਅਤੇ ਸਮਾਪਤੀ ਸਮਾਰੋਹ 'ਤੇ ਸਿਰਫ਼ 75 ਲੱਖ ਰੁਪਏ ਖਰਚ ਹੋਏ ਸਨ।
          ਵਿਜ ਕਰਾਫਟ ਕੰਪਨੀ ਵੱਲੋਂ ਬਾਕੀ ਕਲਾਕਾਰਾਂ ਤੋਂ ਇਲਾਵਾ ਸਟੇਜ, ਲਾਈਟਿੰਗ, ਸਾਊਂਡ, ਆਤਿਸ਼ਬਾਜ਼ੀ ਦਾ ਖਰਚ ਇਸ ਬਜਟ ਵਿੱਚ ਝੱਲਿਆ ਜਾਣਾ ਹੈ। ਉਦਘਾਟਨੀ ਸਮਾਰੋਹ ਮੌਕੇ ਅਕਸ਼ੈ ਕੁਮਾਰ ਮੋਟਰਸਾਈਕਲ 'ਤੇ ਸਟੇਡੀਅਮ ਦਾ ਚੱਕਰ ਲਾਵੇਗਾ ਅਤੇ ਸਮਾਰੋਹਾਂ ਵਿੱਚ ਸਕੂਲੀ ਬੱਚੇ ਵੀ ਸ਼ਾਮਲ ਹੋਣਗੇ।ਖੇਡ ਵਿਭਾਗ ਪੰਜਾਬ ਦੇ ਡਾਇਰੈਕਟਰ ਸ਼ਿਵਦੁਲਾਰ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਵਿਜ ਕਰਾਫਟ ਕੰਪਨੀ ਨੂੰ ਉਦਘਾਟਨੀ ਅਤੇ ਸਮਾਪਤੀ ਸਮਾਰੋਹਾਂ ਦਾ ਕੰਮ ਸਵਾ ਛੇ ਕਰੋੜ ਵਿੱਚ ਦਿੱਤਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਬਾਲੀਵੁੱਡ ਕਲਾਕਾਰ ਵੀ ਇਸ ਕੰਪਨੀ ਵੱਲੋਂ ਹੀ ਬੁਲਾਏ ਜਾਣੇ ਹਨ। ਉਨ੍ਹਾਂ ਦੱਸਿਆ ਕਿ ਵਿਸ਼ਵ ਕਬੱਡੀ ਕੱਪ ਲਈ ਕਾਫ਼ੀ ਸਪਾਂਸਰ ਮਿਲ ਗਏ ਹਨ। ਜਾਣਕਾਰੀ ਅਨੁਸਾਰ ਐਤਕੀਂ ਵਿਸ਼ਵ ਕਬੱਡੀ ਕੱਪ ਦਾ ਬਜਟ 20 ਕਰੋੜ ਰੁਪਏ ਰੱਖਿਆ ਗਿਆ ਹੈ। ਦੂਜੇ ਵਿਸ਼ਵ ਕੱਪ ਦਾ ਬਜਟ 17 ਕਰੋੜ ਰੁਪਏ ਸੀ। ਪਹਿਲਾ ਵਿਸ਼ਵ ਕੱਪ ਸਿਰਫ਼ 5 ਕਰੋੜ,66 ਲੱਖ ਰੁਪਏ ਵਿੱਚ ਹੀ ਹੋ ਗਿਆ ਸੀ।
            ਪੰਜਾਬ ਸਰਕਾਰ ਨੇ ਪਹਿਲੇ ਵਿਸ਼ਵ ਕਬੱਡੀ ਕੱਪ 'ਤੇ ਸਰਕਾਰੀ ਖ਼ਜ਼ਾਨੇ 'ਚੋਂ 2 ਕਰੋੜ,33 ਲੱਖ ਰੁਪਏ ਖਰਚੇ ਸਨ ਜਦੋਂ ਕਿ 3 ਕਰੋੜ,32 ਲੱਖ ਰੁਪਏ ਸਪਾਂਸਰਾਂ ਨੇ ਖਰਚੇ ਸਨ। ਦੂਜੇ ਵਿਸ਼ਵ ਕਬੱਡੀ ਕੱਪ ਦੌਰਾਨ ਸਰਕਾਰੀ ਖ਼ਜ਼ਾਨੇ 'ਚੋਂ ਸਵਾ ਪੰਜ ਕਰੋੜ ਰੁਪਏ ਖਰਚੇ ਗਏ ਸਨ ਅਤੇ ਬਾਕੀ ਰਾਸ਼ੀ ਸਪਾਂਸਰਾਂ ਨੇ ਖਰਚੀ ਸੀ। ਐਤਕੀਂ ਸਰਕਾਰ ਵੱਲੋਂ ਪੰਜ ਕਰੋੜ ਰੁਪਏ ਦਾ ਬਜਟ ਜਾਰੀ ਕੀਤਾ ਗਿਆ ਹੈ, ਬਾਕੀ 15 ਕਰੋੜ ਰੁਪਏ ਸਪਾਂਸਰਾਂ ਤੋਂ ਇਕੱਠੇ ਕੀਤੇ ਜਾ ਰਹੇ ਹਨ। ਰੀਅਲ ਅਸਟੇਟ ਦੇ ਕਾਰੋਬਾਰੀ ਵੀ ਇਨ੍ਹਾਂ ਸਪਾਂਸਰਾਂ ਵਿੱਚ ਸ਼ਾਮਲ ਹਨ।ਪੰਜਾਬ ਸਰਕਾਰ ਵੱਲੋਂ ਖਿਡਾਰੀਆਂ ਨੂੰ ਦਿੱਤੇ ਜਾਣ ਵਾਲੇ ਇਨਾਮਾਂ ਦਾ ਕੁੱਲ ਬਜਟ ਸਾਢੇ ਛੇ ਕਰੋੜ ਰੁਪਏ ਰੱਖਿਆ ਗਿਆ ਹੈ। ਬਾਲੀਵੁੱਡ ਕਲਾਕਾਰਾਂ ਅਤੇ ਪਹਿਲੇ ਤਿੰਨ ਸਥਾਨਾਂ 'ਤੇ ਰਹਿਣ ਵਾਲੀਆਂ ਟੀਮਾਂ ਦਾ ਖਰਚ ਬਰਾਬਰ ਰਹੇਗਾ। ਵਿਜ ਕਰਾਫਟ ਕੰਪਨੀ ਵੱਲੋਂ ਬਠਿੰਡਾ ਵਿੱਚ ਉਦਘਾਟਨੀ ਸਮਾਰੋਹਾਂ ਦੀ ਸਟੇਜ ਨੂੰ ਅੰਤਿਮ ਛੋਹਾਂ ਦਿੱਤੀਆਂ ਜਾ ਰਹੀਆਂ ਹਨ। ਪੂਰਾ ਬਠਿੰਡਾ ਪ੍ਰਸ਼ਾਸਨ ਬਾਕੀ ਕੰਮ ਛੱਡ ਕੇ ਉਦਘਾਟਨੀ ਸਮਾਰੋਹਾਂ ਦੀਆਂ ਤਿਆਰੀਆਂ ਵਿੱਚ ਜੁਟਿਆ ਹੋਇਆ ਹੈ। ਉਦਘਾਟਨੀ ਸਮਾਰੋਹ ਕਰੀਬ ਪੰਜ ਵਜੇ ਸ਼ੁਰੂ ਹੋਵੇਗਾ।
                                                  ਡੇਢ ਕਰੋੜ 'ਚ ਪਏਗਾ ਅਕਸ਼ੈ ਕੁਮਾਰ
ਬਾਲੀਵੁੱਡ ਅਦਾਕਾਰ ਅਕਸ਼ੈ ਕੁਮਾਰ ਪੌਣਾ ਘੰਟਾ ਕਬੱਡੀ ਕੱਪ ਦੇ ਉਦਘਾਟਨੀ ਸਮਾਰੋਹ ਵਿੱਚ ਠਹਿਰੇਗਾ ਜਿਸ 'ਚੋਂ ਤਕਰੀਬਨ 20 ਮਿੰਟ ਦਾ ਪ੍ਰੋਗਰਾਮ ਅਕਸ਼ੈ ਕੁਮਾਰ ਦਾ ਹੋਵੇਗਾ। ਸੂਤਰਾਂ ਅਨੁਸਾਰ ਅਕਸ਼ੈ ਕੁਮਾਰ ਨੇ ਇਨ੍ਹਾਂ 25 ਮਿੰਟਾਂ ਦੇ ਡੇਢ ਕਰੋੜ ਰੁਪਏ ਲਏ ਹਨ। ਸ਼ਹਿਰ ਦੇ ਸੈਪਲ ਹੋਟਲ ਵਿੱਚ ਅਕਸ਼ੈ ਕੁਮਾਰ ਨੂੰ ਠਹਿਰਾਇਆ ਜਾਵੇਗਾ। ਵਿਜ ਕਰਾਫਟ ਕੰਪਨੀ ਨੇ ਇਸ ਹੋਟਲ 'ਚ 6 ਕਮਰੇ ਬੁੱਕ ਕਰਾਏ ਹਨ। ਜਾਣਕਾਰੀ ਅਨੁਸਾਰ ਅਕਸ਼ੈ ਕੁਮਾਰ ਹੈਲੀਕਾਪਟਰ ਰਾਹੀਂ ਮੁੰਬਈ ਤੋਂ ਭਿਸੀਆਣਾ ਹਵਾਈ ਅੱਡੇ 'ਤੇ ਪੁੱਜੇਗਾ।

Tuesday, November 27, 2012

                                        ਸਰਕਾਰੀ ਹੱਲਾ
                     ਖੇਤੀ ਖੋਜਾਂ ਵਾਲੀ ਜ਼ਮੀਨ ਖੋਹੀ
                                       ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਸਰਕਾਰ ਨੇ ਖੇਤੀ ਖੋਜਾਂ ਲਈ ਰੱਖੀ ਸੈਂਕੜੇ ਏਕੜ ਜ਼ਮੀਨ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ (ਪੀ.ਏ.ਯੂ.)ਤੋਂ ਖੋਹ ਲਈ ਹੈ। ਪੀ.ਏ.ਯੂ.ਦੀ ਬਠਿੰਡਾ ਵਿਚਲੀ ਖੇਤੀ ਖੋਜਾਂ ਲਈ ਰੱਖੀ ਇਸ 230 ਏਕੜ ਜ਼ਮੀਨ 'ਤੇ ਐਜੂਸਿਟੀ ਬਣਾਉਣ ਲਈ ਹਰੀ ਝੰਡੀ ਦੇ ਦਿੱਤੀ ਗਈ ਹੈ। ਦੇਰ ਸਵੇਰ ਐਜੂਸਿਟੀ ਦੇ ਨਾਂ 'ਤੇ ਇਹ ਜ਼ਮੀਨ ਪ੍ਰਾਈਵੇਟ ਕੰਪਨੀਆਂ ਹਵਾਲੇ ਕਰ ਦਿੱਤੀ ਜਾਵੇਗੀ ਜੋ ਐਜੂਸਿਟੀ ਵਿੱਚ ਪ੍ਰਾਈਵੇਟ ਵਿੱਦਿਅਕ ਅਦਾਰੇ ਚਲਾਉਣਗੀਆਂ। ਪੰਜਾਬ ਸਰਕਾਰ ਵੱਲੋਂ ਪੀ.ਏ.ਯੂ. ਨੂੰ ਪਹਿਲਾ ਝਟਕਾ ਉਦੋਂ ਦਿੱਤਾ ਗਿਆ ਸੀ ਜਦੋਂ 'ਵਰਸਿਟੀ ਦੀ ਬਠਿੰਡਾ ਵਿਚਲੀ ਖੇਤੀ ਖੋਜਾਂ ਵਾਲੀ ਜ਼ਮੀਨ 'ਚੋਂ 25 ਏਕੜ 9 ਕਨਾਲ 9 ਮਰਲੇ ਜ਼ਮੀਨ ਕੌਮਾਂਤਰੀ ਕ੍ਰਿਕਟ ਸਟੇਡੀਅਮ ਬਣਾਉਣ ਲਈ ਖੇਡ ਵਿਭਾਗ ਪੰਜਾਬ ਹਵਾਲੇ ਕਰ ਦਿੱਤੀ ਸੀ। ਹੁਣ ਇਸ ਜ਼ਮੀਨ 'ਤੇ ਸਰਕਾਰ ਦਾ ਦੂਜਾ ਹੱਲਾ ਹੈ। ਖੇਤਰੀ ਖੋਜ ਕੇਂਦਰ ਬਠਿੰਡਾ ਦੀ ਬਾਕੀ ਬਚਦੀ ਸਾਰੀ ਜ਼ਮੀਨ (230 ਏਕੜ) 'ਤੇ ਐਜੂਸਿਟੀ ਬਣਾਏ ਜਾਣ ਲਈ ਸਿਧਾਂਤਿਕ ਤੌਰ 'ਤੇ ਸਹਿਮਤੀ ਹੋ ਗਈ ਹੈ।
           ਪੰਜਾਬ ਦੇ ਮੁੱਖ ਸਕੱਤਰ ਦੀ ਪ੍ਰਧਾਨਗੀ ਹੇਠ 16 ਨਵੰਬਰ ਨੂੰ ਚੰਡੀਗੜ੍ਹ ਵਿੱਚ ਮੀਟਿੰਗ ਹੋਈ ਸੀ ਜਿਸ ਵਿੱਚ ਪੀ.ਏ.ਯੂ.ਦੇ ਪ੍ਰਤੀਨਿਧ ਵੀ ਸ਼ਾਮਲ ਹੋਏ ਸਨ। ਯੂਨੀਵਰਸਿਟੀ ਦੇ ਪ੍ਰਤੀਨਿਧ ਨੇ ਮੀਟਿੰਗ ਵਿੱਚ ਇਸ ਗੱਲ ਦੀ ਸਹਿਮਤੀ ਦੇ ਦਿੱਤੀ ਹੈ ਕਿ ਪੰਜਾਬ ਸਰਕਾਰ ਬਠਿੰਡਾ ਵਿਚਲੀ ਇਸ ਜ਼ਮੀਨ ਦੇ ਬਦਲੇ ਵਿੱਚ ਕਿਤੇ ਹੋਰ ਖੇਤੀ ਖੋਜਾਂ ਲਈ ਜ਼ਮੀਨ ਦੇ ਦੇਵੇ। ਇਸ ਤਹਿਤ ਡਿਪਟੀ ਕਮਿਸ਼ਨਰ ਬਠਿੰਡਾ ਨੇ ਉੱਚ ਪੱਧਰੀ ਕਮੇਟੀ ਦਾ ਗਠਨ ਕੀਤਾ ਹੈ ਜਿਸ ਵਿੱਚ ਵਧੀਕ ਡਿਪਟੀ ਕਮਿਸ਼ਨਰ ਜਨਰਲ, ਜ਼ਿਲ੍ਹੇ ਵਿਚਲੇ ਤਿੰਨ ਐਸ.ਡੀ. ਐਮਜ਼ ਤੋਂ ਇਲਾਵਾ ਪੀ.ਏ.ਯੂ. ਦੇ ਨੁਮਾਇੰਦੇ ਸ਼ਾਮਲ ਕੀਤੇ ਗਏ ਹਨ। ਇਸ ਕਮੇਟੀ ਵੱਲੋਂ ਪੀ.ਏ.ਯੂ.ਲਈ ਖੇਤੀ ਖੋਜਾਂ ਵਾਸਤੇ ਜ਼ਿਲ੍ਹੇ ਵਿੱਚ ਕਿਤੇ ਹੋਰ ਜ਼ਮੀਨ ਤਲਾਸ਼ ਕੀਤੀ ਜਾਵੇਗੀ। ਸਰਕਾਰ ਮੁਤਾਬਕ ਖੇਤੀ ਖੋਜਾਂ ਵਾਸਤੇ ਜ਼ਮੀਨ ਐਕੁਆਇਰ ਕਰਨੀ ਸੌਖੀ ਹੈ ਪਰ ਐਜੂਸਿਟੀ ਵਾਸਤੇ ਜ਼ਮੀਨ ਹਾਸਲ ਕਰਨਾ ਔਖਾ ਕੰਮ ਹੈ। ਡਿਪਟੀ ਕਮਿਸ਼ਨਰ ਨੇ ਖੇਤਰੀ ਖੋਜ ਕੇਂਦਰ ਬਠਿੰਡਾ ਦੇ ਡਾਇਰੈਕਟਰ ਨੂੰ ਪੱਤਰ ਲਿਖ ਕੇ ਜਾਣੂ ਕਰਾ ਦਿੱਤਾ ਹੈ ਕਿ ਕੇਂਦਰ ਦੀ 230 ਏਕੜ ਜ਼ਮੀਨ 'ਤੇ ਐਜੂਸਿਟੀ ਬਣਾਏ ਜਾਣ ਲਈ ਸਿਧਾਂਤਿਕ ਤੌਰ 'ਤੇ ਸਹਿਮਤੀ ਹੋ ਗਈ ਹੈ ਅਤੇ ਯੂਨੀਵਰਸਿਟੀ ਲਈ ਕਿਤੇ ਹੋਰ ਜਗ੍ਹਾ ਦੇ ਦਿੱਤੀ ਜਾਵੇਗੀ।
           ਦੱਸਣਯੋਗ ਹੈ ਕਿ ਕਰੀਬ ਢਾਈ ਦਹਾਕੇ ਪਹਿਲਾਂ ਪੀ.ਏ.ਯੂ.ਵੱਲੋਂ ਪਿੰਡ ਜੋਧਪੁਰ ਰੋਮਾਣਾ ਦੀ 256 ਏਕੜ ਜ਼ਮੀਨ ਖੇਤੀ ਖੋਜਾਂ ਅਤੇ ਬੀਜ ਪੈਦਾਵਾਰ ਵਾਸਤੇ ਐਕੁਆਇਰ ਕੀਤੀ ਗਈ ਸੀ। ਸਸਤੇ ਭਾਅ 'ਚ ਜ਼ਮੀਨ ਐਕੁਆਇਰ ਹੋਣ ਮਗਰੋਂ ਪਿੰਡ ਜੋਧਪੁਰ ਰੋਮਾਣਾ ਦੇ ਦਰਜਨਾਂ ਕਿਸਾਨਾਂ ਵੱਲੋਂ ਮੁਆਵਜ਼ੇ ਵਿੱਚ ਵਾਧੇ ਦੀ ਮੰਗ ਨੂੰ ਲੈ ਕੇ ਕੀਤੇ ਗਏ ਕੇਸ ਅਦਾਲਤਾਂ ਵਿੱਚ ਹਾਲੇ ਵੀ ਚੱਲ ਰਹੇ ਹਨ। ਉਦੋਂ ਸਰਕਾਰ ਨੇ ਕਿਸਾਨਾਂ ਨੂੰ ਨਹਿਰੀ ਜ਼ਮੀਨ ਦਾ ਮੁਆਵਜ਼ਾ 17 ਹਜ਼ਾਰ ਰੁਪਏ ਅਤੇ ਬਰਾਨੀ ਜ਼ਮੀਨ ਦਾ ਮੁਆਵਜ਼ਾ 11 ਹਜ਼ਾਰ ਰੁਪਏ ਦਿੱਤਾ ਸੀ। ਪੰਜਾਬ ਸਰਕਾਰ ਨੇ ਕੌਮਾਂਤਰੀ ਕ੍ਰਿਕਟ ਸਟੇਡੀਅਮ ਬਣਾਉਣ ਲਈ ਪੀ.ਏ.ਯੂ.ਤੋਂ ਮੁਫਤੋ ਮੁਫ਼ਤੀ 3.85 ਕਰੋੜ ਰੁਪਏ ਦੀ ਜ਼ਮੀਨ ਲੈ ਲਈ ਸੀ। ਇਹ ਜ਼ਮੀਨ ਬਠਿੰਡਾ ਸ਼ਹਿਰ ਦੇ ਐਨ ਨਾਲ ਹੈ। ਸੂਤਰਾਂ ਮੁਤਾਬਕ ਖੇਤੀ ਖੋਜ ਕੇਂਦਰ ਵਾਲੀ ਜ਼ਮੀਨ ਦੇ ਆਸ ਪਾਸ ਹਾਕਮ ਧਿਰ ਦੇ ਸਿਆਸੀ ਆਗੂਆਂ ਨੇ ਜ਼ਮੀਨਾਂ ਖਰੀਦੀਆਂ ਹੋਈਆਂ ਹਨ। ਜਦੋਂ ਕ੍ਰਿਕਟ ਸਟੇਡੀਅਮ ਦਾ ਕੰਮ ਠੰਢੇ ਬਸਤੇ ਵਿੱਚ ਪੈ ਗਿਆ ਹੈ ਤਾਂ ਹੁਣ ਖੇਤੀ ਖੋਜਾਂ ਵਾਲੀ ਜ਼ਮੀਨ ਐਜੂਸਿਟੀ ਲਈ ਲੈਣ ਵਾਸਤੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।
            ਪੰਜਾਬ ਸਰਕਾਰ ਵਲੋਂ ਵਿਦੇਸ਼ੀ ਤਰਜ਼ 'ਤੇ ਬਠਿੰਡੇ ਵਿੱਚ ਐਜੂਸਿਟੀ ਬਣਾਈ ਜਾ ਰਹੀ ਹੈ ਜਿਸ ਵਿੱਚ ਸਕੂਲ ਤੋਂ ਲੈ ਕੇ ਯੂਨੀਵਰਸਿਟੀ ਪੱਧਰ ਦੇ ਅਦਾਰੇ ਹੋਣਗੇ। ਹਰ ਤਰ੍ਹਾਂ ਦੇ ਕੋਰਸਾਂ ਲਈ ਇੱਕੋ ਕੈਂਪਸ ਹੋਵੇਗਾ। ਸਰਕਾਰ ਵਲੋਂ ਐਜੂਸਿਟੀ ਵਿੱਚ ਪ੍ਰਾਈਵੇਟ ਕੰਪਨੀਆਂ ਨੂੰ ਜ਼ਮੀਨ ਦਿੱਤੀ ਜਾਣੀ ਹੈ। ਇੱਧਰ ਖੇਤੀ ਯੂਨੀਵਰਸਿਟੀ ਵਲੋਂ ਇਸ ਜ਼ਮੀਨ ਵਿੱਚ ਨਰਮੇ ਕਪਾਹ ਤੋਂ ਇਲਾਵਾ ਹਰ ਫ਼ਸਲ ਅਤੇ ਖਾਸ ਕਰਕੇ ਤੇਲ ਬੀਜਾਂ ਵਾਲੀਆਂ ਫ਼ਸਲਾਂ ਬਾਰੇ ਖੋਜ ਕੀਤੀ ਜਾਂਦੀ ਹੈ। ਬਾਗਬਾਨੀ ਦਾ ਵੱਡਾ ਖੋਜ ਪ੍ਰਾਜੈਕਟ ਇਸ ਜ਼ਮੀਨ 'ਤੇ ਚੱਲ ਰਿਹਾ ਹੈ। ਹਾਲ ਹੀ ਵਿੱਚ ਨਰਮੇ ਕਪਾਹ ਦੀ ਖੋਜ ਦਾ ਪੂਰਾ ਪ੍ਰਾਜੈਕਟ ਲੁਧਿਆਣਾ ਤੋਂ ਇਸ ਖੇਤਰੀ ਖੋਜ ਕੇਂਦਰ ਵਿੱਚ ਤਬਦੀਲ ਕੀਤਾ ਗਿਆ ਹੈ। ਖੋਜ ਕੇਂਦਰ ਲਈ ਹੁਣ ਇਸਰਾਈਲ ਦੀ ਸਾਂਝ ਨਾਲ 16 ਕਰੋੜ ਦਾ ਪ੍ਰਾਜੈਕਟ ਮਨਜ਼ੂਰ ਹੋਇਆ ਹੈ ਅਤੇ ਇਸ ਜ਼ਮੀਨ 'ਤੇ ਖਾਰੇ ਪਾਣੀ ਦੀ ਵਰਤੋਂ ਬਾਰੇ ਪ੍ਰਾਜੈਕਟ ਲਈ ਤਿੰਨ ਕਰੋੜ ਰੁਪਏ ਵੀ ਮਿਲ ਗਏ ਹਨ।  ਕਰੀਬ ਡੇਢ ਦਰਜਨ ਖੇਤੀ ਮਾਹਿਰ ਇਸ ਖੇਤਰੀ ਖੋਜ ਕੇਂਦਰ ਵਿੱਚ ਤਾਇਨਾਤ ਹਨ। ਹੁਣ ਸਰਕਾਰ ਵਲੋਂ ਇਸ ਜ਼ਮੀਨ ਨੂੰ ਐਜੂਸਿਟੀ ਵਾਸਤੇ ਲੈਣ ਲਈ ਹਰੀ ਝੰਡੀ ਦੇਣ ਮਗਰੋਂ ਇਨ੍ਹਾਂ ਖੋਜ ਕਾਰਜਾਂ ਨੂੰ ਵੱਡਾ ਧੱਕਾ ਲੱਗੇਗਾ।  ਡਿਪਟੀ ਕਮਿਸ਼ਨਰ ਬਠਿੰਡਾ ਦਾ ਕਹਿਣਾ ਹੈ ਕਿ ਖੇਤੀ ਖੋਜਾਂ ਸਰਕਾਰ ਦੀ ਤਰਜੀਹ ਹਨ ਅਤੇ ਖੋਜ ਕਾਰਜ ਪ੍ਰਭਾਵਿਤ ਨਹੀਂ ਹੋਣ ਦਿੱਤੇ ਜਾਣਗੇ। ਉੱਚ ਪੱਧਰੀ ਮੀਟਿੰਗ ਵਿੱਚ ਪੀ.ਏ.ਯੂ.ਦੇ ਪ੍ਰਤੀਨਿਧ ਵਲੋਂ ਬਦਲਵੀਂ ਥਾਂ 'ਤੇ ਜ਼ਮੀਨ ਦੇਣ ਦੀ ਗੱਲ ਉਠਾਈ ਗਈ ਸੀ। ਉਨ੍ਹਾਂ ਇਹ ਵੀ ਆਖਿਆ ਕਿ ਐਜੂਸਿਟੀ ਵਿੱਚ ਸਰਕਾਰੀ ਅਦਾਰੇ ਹੋਣਗੇ ਜਾਂ ਪ੍ਰਾਈਵੇਟ,ਇਸ ਬਾਰੇ ਹਾਲੇ ਕੋਈ ਫੈਸਲਾ ਨਹੀਂ ਹੋਇਆ ਹੈ।
                                        ਸਰਕਾਰ ਨੂੰ ਮਨਾਉਣ ਦੇ ਯਤਨ ਕਰਾਂਗੇ:ਵਾਈਸ ਚਾਂਸਲਰ
ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਡਾ.ਬਲਦੇਵ ਸਿੰਘ ਢਿੱਲੋਂ ਦਾ ਕਹਿਣਾ ਸੀ ਕਿ ਬਠਿੰਡਾ ਦੇ ਖੇਤੀ ਖੋਜ ਕੇਂਦਰ ਵਿੱਚ ਕਈ ਤਰ੍ਹਾਂ ਦੇ ਖੋਜ ਕਾਰਜ ਚੱਲ ਰਹੇ ਹਨ ਅਤੇ ਹੁਣ ਤਾਜ਼ਾ ਇਸਰਾਈਲ ਦੀ ਸਾਂਝ ਵਾਲਾ ਪ੍ਰਾਜੈਕਟ ਵੀ ਮਿਲਿਆ ਹੈ। ਐਜੂਸਿਟੀ ਵਾਸਤੇ ਜ਼ਮੀਨ ਲੈਣ ਲਈ ਮੀਟਿੰਗ ਤਾਂ ਹੋਈ ਹੈ ਪਰ ਹਾਲੇ ਤੱਕ ਮੀਟਿੰਗ ਦੀ ਕਾਰਵਾਈ ਉਨ੍ਹਾਂ ਤੱਕ ਪੁੱਜੀ ਨਹੀਂ ਹੈ। ਉਹ ਸਰਕਾਰ ਨੂੰ ਮਨਾਉਣ ਦਾ ਯਤਨ ਕਰਨਗੇ ਕਿ ਇਸ ਜ਼ਮੀਨ ਨੂੰ ਐਜੂਸਿਟੀ ਵਾਸਤੇ ਨਾ ਲਿਆ ਜਾਵੇ।

Saturday, November 24, 2012

                             ਮੇਅਰ ਕਾਨਫਰੰਸ
             ਪ੍ਰਾਹੁਣੇ ਪੌਣੇ ਨੌ ਲੱਖ ਵਿੱਚ ਪਏ
                             ਚਰਨਜੀਤ ਭੁੱਲਰ
ਬਠਿੰਡਾ : ਨਗਰ ਨਿਗਮ ਬਠਿੰਡਾ ਨੂੰ ਦੇਸ਼ ਦੇ ਵੱਡੇ ਸ਼ਹਿਰਾਂ ਦੇ ਮੇਅਰਾਂ ਦੀ ਪ੍ਰਾਹੁਣਚਾਰੀ ਕਰੀਬ ਪੌਣੇ ਨੌਂ ਲੱਖ ਵਿੱਚ ਪਈ। ਆਲ ਇੰਡੀਆ ਕੌਂਸਲ ਆਫ਼ ਮੇਅਰਜ਼ ਦੀ ਕਾਰਜਕਾਰਨੀ ਕਮੇਟੀ ਦੀ ਬਠਿੰਡਾ ਵਿੱਚ ਹੋਈ ਦੋ ਦਿਨਾਂ ਕਾਨਫਰੰਸ ਸਿਰਫ਼ ਇਕ ਦਿਨ ਵਿੱਚ ਖ਼ਤਮ ਹੋ ਗਈ ਸੀ। ਦੂਜਾ ਦਿਨ ਮੇਅਰਾਂ ਦੇ ਸੈਰ ਸਪਾਟੇ ਵਾਲਾ ਰਿਹਾ ਸੀ। ਨਗਰ ਨਿਗਮ ਦੇ ਖਰਚੇ 'ਤੇ ਦੇਸ਼ ਦੇ 17 ਸ਼ਹਿਰਾਂ ਦੇ ਮੇਅਰ ਵਾਹਗਾ ਬਾਰਡਰ ਵੀ ਘੁੰਮੇ। ਨਗਰ ਨਿਗਮ ਕੋਲ ਇਸ ਮੀਟਿੰਗ ਦਾ ਕੋਈ ਏਜੰਡਾ ਅਤੇ ਕਾਰਵਾਈ ਦਾ ਵੇਰਵਾ ਵੀ ਨਹੀਂ ਹੈ। ਨਗਰ ਨਿਗਮ ਬਠਿੰਡਾ ਵੱਲੋਂ ਸੂਚਨਾ ਦੇ ਅਧਿਕਾਰ ਕਾਨੂੰਨ ਤਹਿਤ ਜੋ ਵੇਰਵੇ ਦਿੱਤੇ ਗਏ ਹਨ, ਉਨ੍ਹਾਂ ਮੁਤਾਬਕ ਨਿਗਮ ਨੂੰ ਮੇਅਰਾਂ ਕਾਨਫਰੰਸ ਕਰਾਉਣ ਦਾ ਖਰਚ 8,66,746 ਰੁਪਏ ਪਿਆ ਹੈ। ਕਰੀਬ ਪੌਣੇ ਚਾਰ ਲੱਖ ਦੇ ਬਿੱਲ ਹਾਲੇ ਵੱਖ ਵੱਖ ਹੋਟਲਾਂ ਅਤੇ ਕਾਰੋਬਾਰੀਆਂ ਦੇ ਬਕਾਇਆ ਹਨ। ਨਿਗਮ ਨੇ ਹੁਣ ਤੱਕ 4,92,492 ਰੁਪਏ ਇਸ ਮੀਟਿੰਗ 'ਤੇ ਖਰਚੇ ਹਨ, ਜਦੋਂ ਕਿ 3,74,254 ਰੁਪਏ ਦੇ ਬਕਾਏ ਖੜ੍ਹੇ ਹਨ। ਨਿਗਮ ਦੀ ਵਿੱਤ ਅਤੇ ਠੇਕਾ ਕਮੇਟੀ ਵੱਲੋਂ ਮੇਅਰਾਂ ਦੀ ਮੀਟਿੰਗ ਲਈ ਪੰਜ ਲੱਖ ਰੁਪਏ ਦੀ ਪ੍ਰਵਾਨਗੀ ਦਿੱਤੀ ਗਈ ਸੀ ਅਤੇ ਮਗਰੋਂ ਸਰਕਾਰ ਨੇ ਮਿਊਂਸਿਪਲ ਕਾਰਪੋਰੇਸ਼ਨ ਐਕਟ 1976 ਦੀ ਧਾਰਾ 82 ਦੀ ਉਪ ਧਾਰਾ 3 ਤਹਿਤ ਮਨਜ਼ੂਰੀ ਦੇ ਦਿੱਤੀ ਸੀ। ਹੁਣ ਕਾਰਪੋਰੇਸ਼ਨ ਵੱਲੋਂ ਪੰਜ ਲੱਖ ਰੁਪਏ ਦੀ ਹੋਰ ਪ੍ਰਵਾਨਗੀ ਲਈ ਗਈ ਹੈ ਤਾਂ ਜੋ ਬਕਾਏ ਤਾਰੇ ਜਾ ਸਕਣ।
             ਰਾਇਲ ਕੇਟਰਜ਼ ਬਠਿੰਡਾ ਵੱਲੋਂ ਪੇਸ਼ ਕੀਤੇ ਬਿੱਲਾਂ ਅਨੁਸਾਰ ਮੇਅਰਾਂ ਦੀ ਕਾਨਫਰੰਸ ਵਿੱਚ ਸ਼ਹਿਰ ਦੇ ਐਨਟੀਕ ਪੈਲੇਸ ਵਿੱਚ 400 ਵਿਅਕਤੀਆਂ ਨੂੰ ਜੋ ਦੁਪਹਿਰ ਦਾ ਖਾਣਾ ਦਿੱਤਾ ਗਿਆ, ਉਸ 'ਤੇ ਦੋ ਲੱਖ ਰੁਪਏ ਖਰਚ ਆਏ। 15 ਸਤੰਬਰ ਨੂੰ ਜੋ ਰਾਤ ਦਾ ਖਾਣਾ ਦਿੱਤਾ ਗਿਆ, ਉਹ ਡੇਢ ਲੱਖ ਰੁਪਏ ਵਿੱਚ ਪਿਆ। ਇਹ ਖਾਣਾ 150 ਲੋਕਾਂ ਨੂੰ ਦਿੱਤਾ ਗਿਆ। ਵੈਟ ਅਤੇ ਸਰਵਿਸ ਟੈਕਸ ਸਮੇਤ ਇਹ ਖਾਣੇ 4,26,006 ਰੁਪਏ ਵਿੱਚ ਪਏ ਹਨ।ਇਸ ਤੋਂ ਇਲਾਵਾ ਰਾਮ ਦਾਸ ਮਿੱਠੂ ਰਾਮ ਹਲਵਾਈ ਐਂਡ ਟੈਂਟ ਹਾਊਸ ਵੱਲੋਂ ਵੀ 87,150 ਰੁਪਏ ਦਾ ਬਿੱਲ ਖਾਣਿਆਂ ਦਾ ਬਣਾਇਆ ਗਿਆ ਸੀ। ਐਨਟੀਕ ਪੈਲੇਸ ਵਿੱਚ ਇਸ ਫਰਮ ਵੱਲੋਂ 150 ਰੁਪਏ ਪ੍ਰਤੀ ਵਿਅਕਤੀ ਦੇ ਹਿਸਾਬ ਨਾਲ 301 ਲੋਕਾਂ ਦੇ ਖਾਣੇ ਦਾ ਬਿੱਲ 45,150 ਰੁਪਏ ਬਣਾਇਆ ਗਿਆ ਹੈ।ਇਸ ਫਰਮ ਵੱਲੋਂ 280 ਲੋਕਾਂ ਨੂੰ ਰਾਤ ਦਾ ਖਾਣਾ ਦਿੱਤਾ ਗਿਆ, ਜਿਸ ਦੀ ਕੀਮਤ 150 ਰੁਪਏ ਪ੍ਰਤੀ ਵਿਅਕਤੀ ਦੇ ਹਿਸਾਬ ਨਾਲ 42 ਹਜ਼ਾਰ ਰੁਪਏ ਵਸੂਲੀ ਗਈ। ਆਜ਼ਾਦ ਲਾਈਟ ਐਂਡ ਸਾਊਂਡ ਨੂੰ 25 ਹਜ਼ਾਰ ਰੁਪਏ ਦੀ ਅਦਾਇਗੀ ਕੀਤੀ ਗਈ ਹੈ। ਨਿਗਮ ਇਸ ਕਾਨਫਰੰਸ ਦਾ ਉਹ ਰਿਕਾਰਡ ਨਹੀਂ ਦੇ ਸਕੀ, ਜਿਸ ਤਹਿਤ ਮੇਅਰਾਂ ਦੀ ਬਠਿੰਡਾ ਆਮਦ ਨਾਲ ਨਿਗਮ ਜਾਂ ਬਠਿੰਡਾ ਸ਼ਹਿਰ ਨੂੰ ਕੋਈ ਫਾਇਦਾ ਪੁੱਜਿਆ ਹੋਵੇ। ਇੱਥੋਂ ਤੱਕ ਕਿ ਮੇਅਰਾਂ ਦੀ ਕਾਨਫਰੰਸ ਵਿੱਚ ਵਿਚਾਰੇ ਗਏ ਮਸਲਿਆਂ ਦੀ ਕੋਈ ਕਾਪੀ ਵੀ ਨਗਰ ਨਿਗਮ ਕੋਲ ਨਹੀਂ ਹੈ।
            ਮੇਅਰਾਂ ਦੀ ਕਾਨਫਰੰਸ ਵਿੱਚ ਨਿਗਮ ਨੇ 52 ਹਜ਼ਾਰ ਦਾ ਖਰਚਾ ਇਕੱਲਾ ਸਵਾਗਤੀ ਬੋਰਡਾਂ 'ਤੇ ਕੀਤਾ ਹੈ, ਜਦੋਂ ਕਿ 11,540 ਰੁਪਏ ਗੁਲਦਸਤਿਆਂ 'ਤੇ ਖਰਚੇ ਹਨ। ਕਾਨਫਰੰਸ ਦੌਰਾਨ ਕੰਫਟ ਇਨ ਹੋਟਲ ਵਿੱਚ ਮਹਿਮਾਨਾਂ ਨੂੰ ਠਹਿਰਾਇਆ ਗਿਆ ਸੀ, ਜਿਸ ਦਾ ਬਿੱਲ 2,44,748 ਰੁਪਏ ਦਾ ਬਣਿਆ ਹੈ। ਕੰਫਟ ਇੰਨ ਹੋਟਲ ਵੱਲੋਂ ਹਰ ਮੇਅਰ ਦੇ ਨਾਮ 'ਤੇ ਵੱਖਰਾ ਬਿੱਲ ਬਣਾਇਆ ਗਿਆ ਹੈ। ਸਭ ਤੋਂ ਜ਼ਿਆਦਾ ਬਿੱਲ 17,384 ਰੁਪਏ ਦਾ ਸ੍ਰੀ ਕ੍ਰਿਸ਼ਨਾ ਮੋਰਾਰੀ ਦਾ ਬਣਿਆ ਹੈ, ਜਦੋਂ ਕਿ ਸ੍ਰੀ ਆਸ਼ੂਤੋਸ ਦਾ ਬਿੱਲ 12,627 ਰੁਪਏ ਦਾ ਬਣਿਆ ਹੈ। ਬਠਿੰਡਾ ਟੀਮ ਦੇ ਨਾਮ 'ਤੇ ਬਣੇ ਬਿੱਲ ਦੀ ਰਾਸ਼ੀ 10,495 ਰੁਪਏ ਹੈ। ਨਿਗਮ ਦੇ ਕਮਿਸ਼ਨਰ ਉਮਾ ਸ਼ੰਕਰ ਦੇ ਨਾਮ 'ਤੇ ਜੋ 3199 ਅਤੇ 3200 ਨੰਬਰ ਬਿੱਲ ਬਣਿਆ ਹੈ, ਉਹ 17,719 ਰੁਪਏ ਦਾ ਹੈ। ਇਕ ਸੂਬੇ ਵਿੱਚੋਂ ਆਏ ਗ੍ਰਹਿ ਮੰਤਰੀ ਦੇ ਸਟਾਫ ਦਾ ਬਿੱਲ ਵੀ 8235 ਰੁਪਏ ਬਣਿਆ ਹੈ। ਕੰਫਟ ਇੰਨ ਹੋਟਲ ਵੱਲੋਂ ਇਨ੍ਹਾਂ ਸਾਰੇ ਬਿੱਲਾਂ ਦਾ ਇਕ ਬਿੱਲ ਮੇਅਰ ਨਗਰ ਨਿਗਮ ਬਠਿੰਡਾ ਦੇ ਨਾਮ 'ਤੇ ਬਣਾਇਆ ਗਿਆ ਹੈ। ਨਿਗਮ ਵੱਲੋਂ ਮੇਅਰਾਂ ਦੇ ਸੈਰ ਸਪਾਟੇ ਲਈ 13 ਟੈਕਸੀਆਂ ਵੀ ਕਿਰਾਏ 'ਤੇ ਲਈਆਂ ਗਈਆਂ, ਜਿਨ੍ਹਾਂ ਦਾ ਬਿੱਲ 50,044 ਰੁਪਏ ਬਣਿਆ।
                                                                 ਏਜੰਡਾ ਹੋਇਆ ਗੁੰਮ
ਮੇਅਰ ਬਲਜੀਤ ਸਿੰਘ ਬੀੜ ਬਹਿਮਣ ਦਾ ਕਹਿਣਾ ਸੀ ਕਿ ਕਾਨਫਰੰਸ ਦਾ ਏਜੰਡਾ ਤੇ ਕਾਰਵਾਈ ਦੇ ਵੇਰਵੇ ਤਾਂ ਸਨ ਪਰ ਇਹ ਹੁਣ ਗੁੰਮ ਹੋ ਗਏ ਹਨ। ਉਨ੍ਹਾਂ ਦੱਸਿਆ ਕਿ ਬਾਕੀ ਸਾਰਾ ਰਿਕਾਰਡ ਦਿੱਲੀ ਦਫ਼ਤਰ ਵਿੱਚ ਮੌਜੂਦ ਹੈ। ਕਾਨਫਰੰਸ 'ਤੇ ਖਰਚਾ ਪਹਿਲਾਂ ਪੰਜ ਲੱਖ ਹੋਣ ਦੀ ਸੰਭਾਵਨਾ ਸੀ ਪਰ ਮਗਰੋਂ ਖਰਚਾ ਵੱਧ ਗਿਆ ਸੀ। ਉਨ੍ਹਾਂ ਆਖਿਆ ਕਿ ਬਕਾਏ ਕਲੀਅਰ ਕਰਨ ਵਾਸਤੇ ਪੰਜ ਲੱਖ ਰੁਪਏ ਦੀ ਹਾਊਸ ਤੋਂ ਮਨਜ਼ੂਰੀ ਲਈ ਗਈ ਹੈ।

Friday, November 23, 2012

                               ਕੌਣ ਫੜੂ ਬਾਂਹ
        ਲੋਕਪਾਲ : ਖਰਚਾ ਵੱਧ, ਕੰਮ ਘੱਟ
                              ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਦਾ ਲੋਕਪਾਲ ਹੁਣ ਤੱਕ 'ਖਰਚੇ ਦਾ ਘਰ' ਹੀ ਬਣਿਆ ਰਿਹਾ ਹੈ। ਲੰਘੇ ਛੇ ਵਰ੍ਹਿਆਂ ਦੌਰਾਨ ਲੋਕਪਾਲ ਕੋਲ ਸਿਰਫ 28 ਸ਼ਿਕਾਇਤਾਂ ਪੁੱਜੀਆਂ ਜਦੋਂਕਿ ਲੋਕਪਾਲ ਦਾ ਖਰਚਾ 3.32 ਕਰੋੜ ਰੁਪਏ ਰਿਹਾ। ਸਰਕਾਰੀ ਖਜ਼ਾਨੇ 'ਚੋਂ ਇੱਕ ਸ਼ਿਕਾਇਤ ਪਿੱਛੇ ਔਸਤਨ 1.64 ਲੱਖ ਰੁਪਏ ਖਰਚਾ ਹੋਇਆ। ਕੀ ਲੋਕਪਾਲ ਇਸ ਰੁਝਾਨ ਨੂੰ ਮੋੜਾ ਦੇ ਕੇ ਲੋਕਾਂ ਦਾ ਇਸ ਸੰਸਥਾ ਵਿਚ ਭਰੋਸਾ ਬਹਾਲ ਕਰ ਸਕੇਗਾ, ਇਹ ਚੁਣੌਤੀ ਜਸਟਿਸ ਜੈ ਸਿੰਘ ਸੇਖੋਂ ਦੇ ਸਾਹਮਣੇ ਹੈ। ਪੰਜਾਬ ਦੇ ਮੰਤਰੀ ਜਨਮੇਜਾ ਸਿੰਘ ਸੇਖੋਂ ਦੇ ਭਰਾ ਹੋਣ ਦੇ ਨਾਤੇ ਪਹਿਲਾਂ ਹੀ ਉਨ੍ਹਾਂ ਦੀ ਨਿਯੁਕਤੀ ਵੱਲ ਉਂਗਲਾਂ ਉੱਠੀਆਂ ਹਨ।
            ਜਿੱਥੋਂ ਤੱਕ ਪਿਛਲੇ ਇਤਿਹਾਸ ਦਾ ਸਵਾਲ ਹੈ, ਲੋਕਪਾਲ ਆਪਣਾ ਜਲਵਾ ਦਿਖਾਉਣ ਵਿਚ ਫੇਲ੍ਹ ਰਿਹਾ ਹੈ। ਲੰਘੇ ਡੇਢ ਦਹਾਕੇ ਦੌਰਾਨ ਲੋਕਪਾਲ ਨੇ  115 ਸਿਆਸੀ ਹਸਤੀਆਂ ਤੇ ਅਫਸਰਾਂ ਖ਼ਿਲਾਫ਼ 'ਐਕਸ਼ਨ' ਸਿਫਾਰਸ਼ ਕੀਤੀ ਸੀ ਪ੍ਰੰਤੂ ਕਿਸੇ ਦਾ ਵਾਲ ਵਿੰਗਾ ਤਕ ਨਹੀਂ ਹੋ ਸਕਿਆ। ਕਾਰਗੁਜ਼ਾਰੀ ਦੇਖੀਏ ਤਾਂ ਲੋਕਪਾਲ ਲੰਘੇ ਛੇ ਵਰ੍ਹਿਆਂ ਦੌਰਾਨ 202 ਸ਼ਿਕਾਇਤਾਂ ਦਾ ਨਿਪਟਾਰਾ ਕਰ ਚੁੱਕਾ ਹੈ ਜਦੋਂ ਕਿ 112 ਸ਼ਿਕਾਇਤਾਂ ਹਾਲੇ ਵੀ ਵਿਚਾਰ ਅਧੀਨ ਹਨ। ਲੋਕਪਾਲ ਪੰਜਾਬ ਵੱਲੋਂ ਸੂਚਨਾ ਅਧਿਕਾਰ ਕਾਨੂੰਨ ਤਹਿਤ ਜੋ ਸੂਚਨਾ ਪੱਤਰ ਨੰਬਰ 140/ ਆਰ.ਐਲ.ਪੀ  ਤਹਿਤ ਦਿੱਤੀ ਗਈ ਹੈ, ਉਸ ਮੁਤਾਬਕ ਲੋਕਪਾਲ 'ਖਾਲੀ ਹੱਥ' ਹੀ ਕੁਰੱਪਸ਼ਨ ਖ਼ਿਲਾਫ਼ ਜੰਗ ਲੜ ਰਿਹਾ ਹੈ। ਸਾਲ 2011 ਦੌਰਾਨ ਲੋਕਪਾਲ ਕੋਲ ਸਿਰਫ਼ ਦੋ ਸ਼ਿਕਾਇਤਾਂ ਪੁੱਜੀਆਂ ਜਦੋਂਕਿ ਸਾਲ 2010 'ਚ ਅੱਧੀ ਦਰਜਨ ਸ਼ਿਕਾਇਤਾਂ ਪੁੱਜੀਆਂ ਸਨ। ਇਸੇ ਤਰ੍ਹਾਂ ਸਾਲ 2009 'ਚ 5 ਸ਼ਿਕਾਇਤਾਂ ਪੁੱਜੀਆਂ ਸਨ ਜਦੋਂ ਕਿ ਸਾਲ 2008 ਵਿੱਚ ਸਿਰਫ ਇੱਕ ਸ਼ਿਕਾਇਤ ਹੀ ਮਿਲੀ ਸੀ।
            ਲੋਕਪਾਲ ਦਾ ਦਫਤਰ ਕਿਰਾਏ ਦੀ ਇਮਾਰਤ 'ਚ ਹੈ ਜਿਸ ਦਾ ਪ੍ਰਤੀ ਮਹੀਨਾ 94 ਹਜ਼ਾਰ ਕਿਰਾਇਆ ਦਿੱਤਾ ਗਿਆ। ਸਾਲਾਨਾ ਕਿਰਾਇਆ 11.28 ਲੱਖ ਰੁਪਏ ਬਣ ਜਾਂਦਾ ਹੈ। ਲੰਘੇ ਛੇ ਵਰ੍ਹਿਆਂ ਦੌਰਾਨ 67.68 ਲੱਖ ਰੁਪਏ ਇਕੱਲੇ ਕਿਰਾਏ ਦੇ ਤਾਰੇ ਜਾ ਚੁੱਕੇ ਹਨ। ਲੋਕਪਾਲ ਨੂੰ ਜੋ ਇਨ੍ਹਾਂ ਵਰ੍ਹਿਆਂ 'ਚ ਤਨਖਾਹ ਤੇ ਭੱਤੇ ਦਿੱਤੇ ਗਏ ਹਨ, ਉਹ ਵੀ 60.63 ਲੱਖ ਰੁਪਏ ਬਣਦੇ ਹਨ। ਸਾਲਾਨਾ ਤਨਖਾਹ ਤੇ ਭੱਤੇ 16 ਲੱਖ ਨੂੰ ਪਾਰ ਕਰ ਜਾਂਦੇ ਹਨ। ਇਸ ਛੇ ਸਾਲਾਂ ਦੇ ਸਮੇਂ ਦੌਰਾਨ ਲੋਕਪਾਲ ਦਾ 32.95 ਲੱਖ ਰੁਪਏ ਪੈਟਰੋਲ ਖਰਚ ਆਇਆ ਜਦੋਂਕਿ 9.22 ਲੱਖ ਰੁਪਏ ਗੱਡੀਆਂ ਦੀ ਮੁਰੰਮਤ 'ਤੇ ਖਰਚੇ ਗਏ ਹਨ।  ਉਪਰੋਕਤ ਖਰਚਿਆਂ ਤੋਂ ਇਲਾਵਾ ਲੋਕਪਾਲ ਦੇ ਦਫ਼ਤਰ ਵੱਲੋਂ 1.61 ਕਰੋੜ ਦਾ ਬਜਟ ਖਰਚ ਕੀਤਾ ਗਿਆ ਹੈ। ਇਕ ਪਾਸੇ ਖਰਚੇ ਤਾਂ ਵਧ ਰਹੇ ਹਨ, ਦੂਜੇ ਪਾਸੇ ਲੋਕਾਂ ਦੀਆਂ ਸ਼ਿਕਾਇਤਾਂ ਦੀ ਗਿਣਤੀ ਘਟ ਰਹੀ ਹੈ। ਲੋਕਪਾਲ ਕੋਲ 37 ਪ੍ਰਵਾਨਿਤ ਅਸਾਮੀਆਂ ਹਨ ਜਿਨ੍ਹਾਂ 'ਚੋਂ ਬਹੁਗਿਣਤੀ ਖਾਲੀ ਹਨ।
           ਪੰਜਾਬ ਸਰਕਾਰ, ਲੋਕਪਾਲ ਨੂੰ ਖਰਚਾ ਦੇ ਕੇ ਪੱਲਾ ਝਾੜ ਲੈਂਦੀ ਹੈ, ਕਦੇ ਵੀ ਕੋਈ ਤਾਕਤ ਨਹੀਂ ਦਿੱਤੀ ਗਈ। ਤਾਕਤ- ਰਹਿਤ ਹੋਣ ਕਰਕੇ ਹੀ ਲੋਕਪਾਲ ਦੀ ਸੰਸਥਾ ਵਿਚ ਭਰੋਸੇ ਦੀ ਘਾਟ ਵਧੀ ਹੈ। ਉਂਜ ਵੀ, ਸ਼ਿਕਾਇਤਾਂ ਨਿਪਟਾਉਣ ਵਿਚ ਸਮਾਂ ਬਹੁਤ ਲਿਆ ਜਾਂਦਾ ਹੈ।  ਪ੍ਰਾਪਤ ਸੂਚਨਾ ਅਨੁਸਾਰ ਗੁਰਦੇਵ ਸਿੰਘ ਨਾਮ ਦੇ ਵਿਅਕਤੀ ਵੱਲੋਂ ਤਤਕਾਲੀ ਟਰਾਂਸਪੋਰਟ ਮੰਤਰੀ ਮਾਸਟਰ ਮੋਹਨ ਲਾਲ ਖ਼ਿਲਾਫ਼ 30 ਅਗਸਤ 2007 ਨੂੰ ਸ਼ਿਕਾਇਤ ਲੋਕਪਾਲ ਕੋਲ ਕੀਤੀ ਗਈ ਸੀ ਜਿਸ ਦਾ ਚਾਰ ਵਰ੍ਹਿਆਂ ਮਗਰੋਂ ਵੀ ਨਿਪਟਾਰਾ ਨਹੀਂ ਸੀ ਹੋਇਆ। ਕਾਂਗਰਸ ਦੇ ਰਾਜਭਾਗ ਵੇਲੇ ਹਰਚਰਨ ਸਿੰਘ ਨਾਮੀ ਵਿਅਕਤੀ ਵੱਲੋਂ ਤਤਕਾਲੀ ਸਹਿਕਾਰਤਾ ਮੰਤਰੀ ਜਸਜੀਤ ਸਿੰਘ ਰੰਧਾਵਾ ਖ਼ਿਲਾਫ਼ ਸ਼ਿਕਾਇਤ ਕੀਤੀ ਗਈ ਸੀ ਜਿਸ ਦਾ ਫੈਸਲਾ ਹਾਲੇ ਤੱਕ ਨਹੀਂ ਹੋ ਸਕਿਆ। ਇਵੇਂ ਹੀ ਕੈਬਨਿਟ ਮੰਤਰੀ ਤੀਕਸ਼ਣ ਸੂਦ ਖ਼ਿਲਾਫ਼ 25 ਮਾਰਚ 2010 ਅਤੇ 29 ਜੁਲਾਈ 2011 ਨੂੰ ਦੋ ਸ਼ਿਕਾਇਤਾਂ ਹੋਈਆਂ, ਉਨ੍ਹਾਂ 'ਤੇ ਕਾਰਵਾਈ ਵੀ ਸ਼ੁਰੂ ਨਹੀਂ ਹੋਈ ਹੈ। ਹਰਪਾਲ ਸਿੰਘ ਵੱਲੋਂ ਵਿਧਾਇਕ ਮਹਿੰਦਰ ਕੁਮਾਰ ਰਿਣਵਾ ਖ਼ਿਲਾਫ਼ 25 ਅਗਸਤ 2006 ਨੂੰ ਸ਼ਿਕਾਇਤ ਕੀਤੀ ਗਈ ਸੀ ਜਿਸ ਦਾ ਨਿਪਟਾਰਾ ਲੋਕਪਾਲ ਅੱਜ ਤੱਕ ਨਹੀਂ ਕਰ ਸਕਿਆ ਹੈ।
                                               ਨੇਤਾਵਾਂ ਨੂੰ ਸਿੱਧਾ ਹੱਥ ਨਹੀਂ ਪਾ ਸਕਦਾ ਲੋਕਪਾਲ
 ਸਰਕਾਰੀ ਸੂਚਨਾ ਵਿੱਚ ਲੋਕਪਾਲ ਪੰਜਾਬ ਨੇ ਸਪੱਸ਼ਟ ਕੀਤਾ ਹੈ ਕਿ  ਪੰਜਾਬ ਲੋਕਪਾਲ ਐਕਟ 1996 ਦੀ ਧਾਰਾ 2(ਕੇ) ਤਹਿਤ ਆਈ.ਏ.ਐਸ, ਆਈ.ਪੀ.ਐਸ ਅਤੇ ਪੀ.ਸੀ.ਐਸ. ਅਧਿਕਾਰੀ 'ਪਬਲਿਕ ਮੈਨ' (ਜਨਤਕ ਵਿਅਕਤੀ) ਦੀ ਪਰਿਭਾਸ਼ਾ 'ਚ ਨਹੀਂ ਆਉਂਦੇ। ਇਸ ਤਰ੍ਹਾਂ ਇਹ ਨੌਕਰਸ਼ਾਹੀ ਤਾਂ ਸਿੱਧੇ ਤੌਰ 'ਤੇ ਹੀ ਲੋਕਪਾਲ ਦੇ ਘੇਰੇ 'ਚੋਂ ਨਿਕਲ ਗਈ ਹੈ। ਜੋ ਸਿਆਸੀ ਨੇਤਾ ਘੇਰੇ 'ਚ ਆਉਂਦੇ ਹਨ, ਉਨ੍ਹਾਂ ਨੂੰ ਸਿੱਧਾ ਹੱਥ ਪਾਉਣ ਦੀ ਤਾਕਤ ਵੀ ਲੋਕਪਾਲ ਪੰਜਾਬ ਕੋਲ ਨਹੀਂ ਹੈ। ਲੋਕਪਾਲ ਨੂੰ ਕੇਵਲ ਸਿਫਾਰਸ਼ ਕਰਨ ਦਾ ਅਧਿਕਾਰ ਹੈ, ਕਾਰਵਾਈ ਕਰਨ ਦਾ ਨਹੀਂ।

Tuesday, November 20, 2012

                                ਕਾਹਦੀ ਨੌਕਰੀ
                 ਰੱਬਾ ਰੱਬਾ ਵਿਆਹ ਕਰਵਾ !
                                ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਪੁਲੀਸ ਦੀ ਨੌਕਰੀ ਰੰਗਰੂਟਾਂ ਦੇ ਵਿਆਹ ਦੇ ਰਾਹ ਵਿੱਚ ਰੋੜਾ ਬਣ ਗਈ ਹੈ। ਇਨ੍ਹਾਂ ਦੀ ਰੁਜ਼ਗਾਰ ਦੀ ਸਮੱਸਿਆ ਹੱਲ ਹੋਈ ਤਾਂ ਹੁਣ ਵਿਆਹ ਦਾ ਸੰਕਟ ਬਣ ਗਿਆ ਹੈ। ਹਾਲਾਂ ਕਿ ਸਰਕਾਰੀ ਨੌਕਰੀ ਵਾਲੇ ਮੁੰਡੇ ਤੇ ਕੁੜੀਆਂ ਦੇ ਰਿਸ਼ਤੇ ਲਈ ਕਤਾਰਾਂ ਲੱਗ ਜਾਂਦੀਆਂ ਹਨ ਪਰ ਪੰਜਾਬ ਪੁਲੀਸ ਵਿੱਚ ਨਵੇਂ ਭਰਤੀ ਹੋਏ ਮੁੰਡੇ ਕੁੜੀਆਂ ਲਈ ਇਹ ਨਵਾਂ ਸੰਕਟ ਖੜ੍ਹਾ ਹੋ ਗਿਆ ਹੈ ਕਿ ਲੋਕ ਉਨ੍ਹਾਂ ਨਾਲ ਰਿਸ਼ਤਾ ਜੋੜਨ ਲਈ ਤਿਆਰ ਨਹੀਂ। ਨਵੇਂ ਭਰਤੀ ਹੋਏ ਰੰਗਰੂਟ ਖੁਦ ਵੀ ਪੁਲੀਸ ਵਿੱਚ ਭਰਤੀ ਹੋਈ ਲੜਕੀ ਨਾਲ ਰਿਸ਼ਤਾ ਕਰਾਉਣ ਨੂੰ ਤਿਆਰ ਨਹੀਂ ਹਨ। ਪੁਲੀਸ ਦੀ ਡਿਊਟੀ ਦਾ ਕੋਈ ਸਮਾਂ ਨਾ ਹੋਣ ਕਰਕੇ ਇਨ੍ਹਾਂ ਦੇ ਰਿਸ਼ਤੇ ਹੋਣ 'ਚ ਵੱਡਾ ਅੜਿੱਕਾ ਬਣ ਰਿਹਾ ਹੈ।
            ਪੰਜਾਬ ਪੁਲੀਸ ਵਿੱਚ ਮਹਿਲਾ ਪੁਲੀਸ ਦੀ ਭਰਤੀ 2009 ਤੋਂ ਹੁਣ ਤੱਕ ਹੋ ਰਹੀ ਹੈ। ਚਾਰ ਵਰ੍ਹਿਆਂ ਦੌਰਾਨ ਬਠਿੰਡਾ ਪੁਲੀਸ ਵਿੱਚ ਕਰੀਬ 300 ਲੜਕੀਆਂ ਭਰਤੀ ਹੋਈਆਂ ਹਨ। ਵਿਮੈਨ ਥਾਣਾ ਬਠਿੰਡਾ ਵਿੱਚ ਤਾਇਨਾਤ ਸਬ ਇੰਸਪੈਕਟਰ ਬੇਅੰਤ ਕੌਰ ਨੇ ਦੱਸਿਆ ਕਿ ਇਨ੍ਹਾਂ 'ਚੋਂ ਸਿਰਫ਼ ਦੋ ਚਾਰ ਲੜਕੀਆਂ ਦੇ ਹੀ ਰਿਸ਼ਤੇ ਹੋਏ ਹਨ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਅਸਲ ਵਿਚ ਸਮਾਜ ਪੁਰਾਣੀ ਸੋਚ ਨਾਲ ਹੀ ਬੱਝਾ ਹੋਇਆ ਹੈ ਜਦੋਂਕਿ ਜ਼ਮਾਨਾ ਬਦਲ ਚੁੱਕਾ ਹੈ ਜਿਸ ਦੇ ਹਾਣ ਦਾ ਸਮਾਜ ਨੂੰ ਬਣਨਾ ਹੀ ਪੈਣਾ ਹੈ। ਉਨ੍ਹਾਂ ਦੱਸਿਆ ਕਿ ਅਸਲ ਵਿੱਚ ਪੁਲੀਸ ਵਿਚ ਭਰਤੀ ਲੜਕੀਆਂ ਦਾ ਰਿਸ਼ਤਾ ਲੈਣ ਤੋਂ ਇਸ ਕਰਕੇ ਲੋਕ ਝਿਜਕਦੇ ਹਨ ਕਿਉਂਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਪੁਲੀਸ ਦੀ ਡਿਊਟੀ ਗ੍ਰਹਿਸਤੀ ਜੀਵਨ ਵਿੱਚ ਵਿਘਨ ਪਾਉਂਦੀ ਹੈ। ਉਨ੍ਹਾਂ ਆਖਿਆ ਕਿ ਜੇ ਪੁਲੀਸ ਵਾਲਾ ਲੜਕਾ ਲੜਕੀ ਆਪਸ ਵਿੱਚ ਜੀਵਨ ਸਾਥੀ ਬਣਦੇ ਹਨ ਤਾਂ ਗ੍ਰਹਿਸਤੀ ਜੀਵਨ ਹੋਰ ਵੀ ਵਧੀਆ ਹੋ ਸਕਦਾ ਹੈ ਕਿਉਂਕਿ ਦੋਵੇਂ ਧਿਰਾਂ ਡਿਊਟੀ ਦੇ ਸੁਭਾਅ ਤੇ ਕੰਮ ਤੋਂ ਜਾਣੂ ਹੁੰਦੀਆਂ ਹਨ।
             ਪਤਾ ਲੱਗਾ ਹੈ ਕਿ ਬਠਿੰਡਾ ਪੁਲੀਸ ਵਿੱਚ ਭਰਤੀ ਇੱਕ ਲੜਕੀ ਨੇ ਪ੍ਰੇਮ ਵਿਆਹ ਜ਼ਰੂਰ ਕਰਾਇਆ ਹੈ। ਜ਼ਿਲ੍ਹਾ ਪੁਲੀਸ ਦੀ ਇੱਕ ਹੋਰ ਮਹਿਲਾ ਲੜਕੀ ਨੇ ਆਪਣੇ ਪਿੰਡ ਦੀ ਹੀ ਇੱਕ ਲੜਕੀ ਨਾਲ ਵਿਆਹ ਕੀਤਾ ਹੈ ਜੋ ਕਾਫ਼ੀ ਚਰਚਾ ਵਿੱਚ ਰਿਹਾ ਹੈ। ਇਹ ਦੋਵੇਂ ਲੜਕੀਆਂ ਦੀ ਜੋੜੀ ਹੁਣ ਪੁਲੀਸ ਲਾਈਨ ਵਿੱਚ ਰਹਿ ਰਹੀ ਹੈ। ਇਨ੍ਹਾਂ ਲੜਕੀਆਂ ਨੇ ਆਪਸ ਵਿੱਚ ਵਿਆਹ ਕਰਾਉਣ ਦੇ ਮਾਮਲੇ 'ਤੇ ਹਾਈ ਕੋਰਟ ਤੱਕ ਵੀ ਪਹੁੰਚ ਕੀਤੀ ਸੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਜੋ ਪੁਲੀਸ ਵਿੱਚ ਲੜਕੇ ਭਰਤੀ ਹੋਏ ਹਨ,ਉਨ੍ਹਾਂ ਨੂੰ ਨੌਕਰੀ ਵਾਲੀਆਂ ਲੜਕੀਆਂ ਦੇ ਰਿਸ਼ਤੇ ਨਹੀਂ ਆ ਰਹੇ ਤੇ ਪੁਲੀਸ ਵਾਲੀਆਂ ਲੜਕੀਆਂ ਦੇ ਹੀ ਰਿਸ਼ਤੇ ਆ ਰਹੇ ਹਨ। ਨਵੇਂ ਰੰਗਰੂਟ ਲੜਕਿਆਂ ਨੇ ਦੱਸਿਆ ਕਿ ਉਹ ਪੁਲੀਸ ਵਾਲੀ ਲੜਕੀ ਨਾਲ ਵਿਆਹ ਨਹੀਂ ਕਰਾਉਣਗੇ। ਰੰਗਰੂਟਾਂ ਨੇ ਆਪਣੀ ਪਹਿਲੀ ਪਸੰਦ ਅਧਿਆਪਕਾ ਦੱਸੀ।
           ਮੈਰਿਜ ਬਿਊਰੋ ਐਸੋਸੀਏਸ਼ਨ ਦੇ ਪ੍ਰਧਾਨ ਮਨਜੀਤਇੰਦਰ ਸਿੰਘ ਦਾ ਕਹਿਣਾ ਸੀ ਕਿ ਉਸ ਕੋਲ ਪੁਲੀਸ ਵਾਲੇ ਤਿੰਨ ਲੜਕਿਆਂ ਤੇ ਚਾਰ ਲੜਕੀਆਂ ਦੇ ਰਿਸ਼ਤੇ ਨੋਟ ਹਨ ਪਰ ਸਮੱਸਿਆ ਇਹ ਹੈ ਕਿ ਜਦੋਂ ਰਿਸ਼ਤੇ ਦੇ ਚਾਹਵਾਨਾਂ ਨੂੰ ਪੁਲੀਸ ਵਿੱਚ ਲੜਕਾ ਜਾਂ ਲੜਕੀ ਹੋਣ ਦੀ ਦੱਸ ਪਾਈ ਜਾਂਦੀ ਹਾਂ ਤਾਂ ਉਹ ਤ੍ਰਿਭਕ ਜਾਂਦੇ ਹਨ। ਉਨ੍ਹਾਂ ਦੱਸਿਆ ਕਿ ਜੋ ਪੁਲੀਸ ਵਾਲੇ ਰੰਗਰੂਟ ਲੜਕੇ ਹਨ,ਉਹ ਵੀ ਪੁਲੀਸ ਵਾਲੀ ਲੜਕੀ ਦੀ ਥਾਂ ਅਧਿਆਪਕ ਲੜਕੀ ਦੀ ਭਾਲ ਵਿੱਚ ਹਨ। ਉਨ੍ਹਾਂ ਦੱਸਿਆ ਕਿ ਪੁਲੀਸ ਵਾਲੀਆਂ ਲੜਕੀਆਂ ਦੇ ਮਾਮਲੇ ਵਿੱਚ ਨੌਜਵਾਨਾਂ ਦੇ ਮਾਪੇ ਇਹ ਆਖਦੇ ਹਨ ਕਿ ਪੁਲੀਸ ਦੀ ਡਿਊਟੀ ਦਾ ਕੋਈ ਸਮਾਂ ਨਹੀਂ ਹੁੰਦਾ। ਇਹ ਵੀ ਆਖਦੇ ਹਨ ਕਿ ਇਸ ਡਿਊਟੀ ਕਰਕੇ ਬੱਚਿਆਂ ਦੀ ਸੰਭਾਲ ਕੌਣ ਕਰੂ।
           ਬਠਿੰਡਾ ਦੇ ਅਰੋੜਾ ਮੈਰਿਜ ਬਿਊਰੋ ਦੇ ਪਰਮਜੀਤ ਸਿੰਘ ਅਰੋੜਾ ਦਾ ਕਹਿਣਾ ਸੀ ਕਿ ਉਸ ਕੋਲ ਕਰੀਬ 10 ਪੁਲੀਸ ਰੰਗਰੂਟਾਂ ਦੇ ਰਿਸ਼ਤੇ ਹਨ ਪਰ ਲੜਕੀ ਵਾਲੇ ਪੁਲੀਸ ਦੇ ਨਾਂ ਤੋਂ ਝਿਜਕ ਜਾਂਦੇ ਹਨ। ਉਨ੍ਹਾਂ ਦੱਸਿਆ ਕਿ ਲੜਕੀਆਂ ਦੇ ਮਾਪੇ ਪੁਲੀਸ ਦੀ ਨੌਕਰੀ ਨੂੰ ਚੰਗਾ ਨਹੀਂ ਮੰਨਦੇ। ਉਨ੍ਹਾਂ ਦੱਸਿਆ ਕਿ ਹਾਲਾਂ ਕਿ ਇਹ ਲੜਕੇ ਚੰਗੇ ਪੜ੍ਹੇ ਲਿਖੇ ਹਨ ਅਤੇ ਚੰਗੇ ਘਰਾਂ ਦੇ ਹਨ ਪਰ ਪੁਲੀਸ ਦੀ ਨੌਕਰੀ ਉਨ੍ਹਾਂ ਦੇ ਰਾਹ ਵਿਚ ਅੜਿੱਕਾ ਬਣੀ ਹੋਈ ਹੈ।
              ਦੱਸਣਯੋਗ ਹੈ ਕਿ ਪੁਲੀਸ ਵਿੱਚ ਨਵੇਂ ਰੰਗਰੂਟਾਂ ਨੂੰ ਹੁਣ ਨਵੇਂ ਸਕੇਲਾਂ ਮੁਤਾਬਿਕ ਕਰੀਬ 25 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਮਿਲਦਾ ਹੈ। ਇਹ ਸਾਰੇ ਮੁੰਡੇ ਕੁੜੀਆਂ ਪਿਛਲੇ ਚਾਰ ਕੁ ਸਾਲਾਂ ਵਿੱਚ ਸਿਪਾਹੀ ਵਜੋਂ ਭਰਤੀ ਹੋਏ ਹਨ। ਇਨ੍ਹਾਂ ਦੀ ਨਵੀਂ ਸੋਚ ਹੈ ਤੇ ਡਿਊਟੀ ਪ੍ਰਤੀ ਤਨਦੇਹੀ ਤੇ ਇਮਾਨਦਾਰੀ ਵੀ ਕਾਫ਼ੀ ਹੈ। ਫਿਰ ਵੀ ਇਨ੍ਹਾਂ ਲਈ ਵਿਆਹ ਦਾ ਸੰਕਟ ਬਣ ਗਿਆ ਹੈ। ਪੰਜਾਬ ਪੁਲੀਸ ਵਿੱਚ ਇਸ ਤੋਂ ਪਹਿਲਾਂ ਖਾਸ ਕਰਕੇ ਮਹਿਲਾ ਪੁਲੀਸ ਦੇ ਮਾਮਲੇ ਵਿੱਚ ਭਰਤੀ ਬੰਦ ਰਹੀ ਹੈ। ਪਹਿਲਾਂ ਪੁਲੀਸ ਵਿੱਚ ਸਿਰਫ਼ ਮਹਿਲਾਵਾਂ ਸਪੋਰਟਸ ਕੋਟੇ ਵਿੱਚੋਂ ਹੀ ਭਰਤੀ ਹੋਈਆਂ ਹਨ ਜਾਂ ਫਿਰ ਵਿਧਵਾ ਮਹਿਲਾਵਾਂ ਤਰਸ ਦੇ ਆਧਾਰ 'ਤੇ ਭਰਤੀ ਹੋਈਆਂ ਹਨ।

Monday, November 19, 2012

                                          ਨੰਨ੍ਹੀ ਛਾਂ
              ਸੰਗਤ ਪੌਦਿਆਂ ਦੇ ਪ੍ਰਸ਼ਾਦ ਨੂੰ ਤਰਸੀ
                                     ਚਰਨਜੀਤ ਭੁੱਲਰ
ਬਠਿੰਡਾ : ਵਣ ਵਿਭਾਗ ਵੱਲੋਂ ਮੁਫ਼ਤ ਵਿੱਚ ਪੌਦਿਆਂ ਦਾ 'ਪ੍ਰਸ਼ਾਦ' ਦੇਣਾ ਬੰਦ ਕਰ ਦਿੱਤਾ ਗਿਆ ਹੈ ਜਿਸ ਦੇ ਸਿੱਟੇ ਵਜੋਂ ਨੰਨ੍ਹੀ ਛਾਂ ਮੁਹਿੰਮ ਠੰਢੇ ਬਸਤੇ ਵਿੱਚ ਪੈ ਗਈ ਹੈ। ਵਣ ਵਿਭਾਗ ਨੇ ਇਸ ਮੁਹਿੰਮ ਵਿੱਚੋਂ ਪੈਰ ਪਿਛਾਂਹ ਖਿੱਚ ਲਏ ਹਨ। ਤਕਰੀਬਨ ਇੱਕ ਸਾਲ ਤੋਂ ਨੰਨ੍ਹੀ ਛਾਂ ਪ੍ਰੋਗਰਾਮ ਦੀ ਕੋਈ ਮੀਟਿੰਗ ਨਹੀਂ ਹੋਈ ਜਦੋਂਕਿ ਪਹਿਲਾਂ ਪ੍ਰਾਜੈਕਟ ਦੀ ਪ੍ਰਗਤੀ ਦਾ ਜਾਇਜ਼ਾ ਲੈਣ ਲਈ ਥੋੜੇ ਸਮੇਂ ਮਗਰੋਂ ਹੀ ਮੀਟਿੰਗ ਹੁੰਦੀ ਰਹੀ ਹੈ। ਵਣ ਵਿਭਾਗ ਵੱਲੋਂ ਪੌਦਿਆਂ ਦਾ 'ਪ੍ਰਸ਼ਾਦ' ਤਿਆਰ ਕਰਨ ਵਾਸਤੇ ਨਰਸਰੀਆਂ ਦੀ ਸਥਾਪਨਾ ਕੀਤੀ ਗਈ ਸੀ ਜਦੋਂਕਿ ਖਰਚਾ ਸ਼੍ਰੋਮਣੀ ਕਮੇਟੀ ਵੱਲੋਂ ਦਿੱਤਾ ਜਾਂਦਾ ਸੀ। ਜਦੋਂ ਸ਼੍ਰੋਮਣੀ ਕਮੇਟੀ ਨੇ ਵਣ ਵਿਭਾਗ ਨੂੰ ਵੇਲੇ ਸਿਰ ਫੰਡ ਦੇਣ ਤੋਂ ਆਨਾਕਾਨੀ ਕੀਤੀ ਤਾਂ ਵਣ ਵਿਭਾਗ ਨੇ ਮੁਫ਼ਤ ਵਿੱਚ ਪੌਦਿਆਂ ਦਾ ਪ੍ਰਸ਼ਾਦ ਦੇਣ ਤੋਂ ਪਾਸਾ ਵੱਟ ਲਿਆ ਹੈ।
          ਸੰਸਦ ਮੈਂਬਰ ਹਰਸਿਮਰਤ ਕੌਰ ਬਾਦਲ ਵੱਲੋਂ ਨੰਨ੍ਹੀ ਛਾਂ ਮੁਹਿੰਮ ਦੀ ਸ਼ੁਰੂਆਤ ਬੜੇ ਜ਼ੋਰਸ਼ੋਰ ਨਾਲ ਕੀਤੀ ਗਈ ਸੀ। ਸਾਲ 2009 ਵਿੱਚ ਗੁਰੂ ਘਰਾਂ ਵਿੱਚੋਂ ਪੌਦਿਆਂ ਦਾ ਪ੍ਰਸ਼ਾਦ ਦੇਣਾ ਸ਼ੁਰੂ ਕੀਤਾ ਗਿਆ ਸੀ। ਤਖ਼ਤ ਸਹਿਬਾਨ ਤੋਂ ਸੰਗਤਾਂ ਨੂੰ ਲਗਾਤਾਰ ਪੌਦਿਆਂ ਦਾ ਪ੍ਰਸ਼ਾਦ ਮਿਲਦਾ ਰਿਹਾ ਹੈ। ਵਣ ਵਿਭਾਗ ਨੇ ਹੁਣ ਨੰਨ੍ਹੀ ਛਾਂ ਦੀਆਂ ਨਰਸਰੀਆਂ ਵਿੱਚ ਪੌਦੇ ਤਿਆਰ ਕਰਨੇ ਬੰਦ ਕਰ ਦਿੱਤੇ ਹਨ। ਸ਼੍ਰੋਮਣੀ ਕਮੇਟੀ ਵੱਲੋਂ ਹੁਣ ਜੰਗਲਾਤ ਵਿਭਾਗ ਤੋਂ ਚੈੱਕ ਦੇ ਕੇ ਪੌਦੇ ਖਰੀਦੇ ਜਾਂਦੇ ਹਨ। ਸੂਚਨਾ ਅਧਿਕਾਰ ਤਹਿਤ ਵਣ ਵਿਭਾਗ ਪੰਜਾਬ ਵੱਲੋਂ ਪੱਤਰ ਨੰਬਰ 10428 ਤਹਿਤ 30 ਅਕਤੂਬਰ, 2012 ਨੂੰ ਦਿੱਤੀ ਸੂਚਨਾ ਅਨੁਸਾਰ ਨੰਨ੍ਹੀ ਛਾਂ ਪ੍ਰਾਜੈਕਟ ਦੀ ਪ੍ਰਗਤੀ ਜਾਇਜ਼ ਲੈਣ ਮੀਟਿੰਗਾਂ ਦਾ ਸਿਲਸਿਲਾ ਬੰਦ ਹੋ ਗਿਆ ਹੈ। ਵਣ ਵਿਭਾਗ ਤੇ ਸ਼੍ਰੋਮਣੀ ਕਮੇਟੀ ਵਿਚਾਲੇ ਆਖਰੀ ਮੀਟਿੰਗ 14 ਅਕਤੂਬਰ, 2011 ਨੂੰ ਹੋਈ ਸੀ। ਉਸ ਤੋਂ ਪਹਿਲਾਂ 18 ਮਈ, 2011 ਨੂੰ ਨੰਨ੍ਹੀ ਛਾਂ ਪ੍ਰੋਗਰਾਮ ਬਾਰੇ ਮੀਟਿੰਗ ਹੋਈ ਸੀ। ਇਸੇ ਤਰ੍ਹਾਂ ਸਭ ਤੋਂ ਪਹਿਲਾਂ 23 ਸਤੰਬਰ, 2009 ਨੂੰ ਮੀਟਿੰਗ ਹੋਈ ਸੀ। ਉਸ ਮਗਰੋਂ 9 ਅਪਰੈਲ, 2010 ਨੂੰ ਤੇ ਫਿਰ 20 ਜੁਲਾਈ, 2010 ਨੂੰ ਮੀਟਿੰਗਾਂ ਹੋਈਆਂ ਸਨ।
           ਇਨ੍ਹਾਂ ਮੀਟਿੰਗਾਂ ਵਿੱਚ ਸ਼੍ਰੋਮਣੀ ਕਮੇਟੀ ਵੱਲੋਂ ਫੰਡ ਜਾਰੀ ਨਾ ਕਰਨ ਦਾ ਮੁੱਦਾ ਹੀ ਛਾਇਆ ਰਿਹਾ। ਨੰਨ੍ਹੀ ਛਾਂ ਪ੍ਰਾਜੈਕਟ ਤਹਿਤ ਬੂਟੇ ਤਿਆਰ ਕਰਨ ਤੇ ਸਪਲਾਈ ਕਰਨ ਬਾਰੇ 14 ਸਤੰਬਰ, 2009 ਨੂੰ ਇਕਰਾਰਨਾਮਾ ਹੋਇਆ ਸੀ ਜਿਸ ਤਹਿਤ ਆਨੰਦਪੁਰ ਸਾਹਿਬ, ਦਮਦਮਾ ਸਾਹਿਬ, ਫਤਹਿਗੜ੍ਹ ਸਾਹਿਬ ਤੇ ਅੰਮ੍ਰਿਤਸਰ ਵਿਖੇ ਨਰਸਰੀਆਂ ਸਥਾਪਤ ਕੀਤੀਆਂ ਗਈਆਂ ਸਨ ਜਿਨ੍ਹਾਂ ਦੀ ਸਮਰੱਥਾ ਪ੍ਰਤੀ ਸਾਲ ਪੰਜ ਲੱਖ ਬੂਟੇ ਤਿਆਰ ਕਰਨ ਸੀ। ਪੌਦੇ ਦੀ ਕੀਮਤ ਪੰਜ ਰੁਪਏ ਤੈਅ ਕੀਤੀ ਗਈ ਸੀ। ਹੁਣ ਇਨ੍ਹਾਂ ਨਰਸਰੀਆਂ ਦਾ ਕੰਮ ਠੰਢੇ ਬਸਤੇ ਵਿੱਚ ਪੈ ਗਿਆ ਹੈ। ਵਣ ਵਿਭਾਗ ਵੱਲੋਂ ਇਸ ਕੰਮ ਲਈ ਮੁਢਲੇ ਪੜਾਅ 'ਤੇ ਹੀ 20 ਲੱਖ ਰੁਪਏ ਸ਼੍ਰੋਮਣੀ ਕਮੇਟੀ ਤੋਂ ਅਡਵਾਂਸ ਮੰਗੇ ਸਨ ਪਰ ਸ਼੍ਰੋਮਣੀ ਕਮੇਟੀ ਨੇ ਸਿਰਫ਼ ਚਾਰ ਲੱਖ ਰੁਪਏ ਦੇਣ ਦਾ ਫੈਸਲਾ ਕੀਤਾ।
           ਫਤਹਿਗੜ੍ਹ ਸਾਹਿਬ ਵਿਖੇ ਸਾਲ 2009-10 ਦੌਰਾਨ ਵਣ ਵਿਭਾਗ ਵੱਲੋਂ 70 ਹਜ਼ਾਰ ਬੂਟੇ ਸਪਲਾਈ ਕੀਤੇ ਗਏ ਜਿਸ ਦੀ ਕੀਮਤ ਸਾਢੇ ਤਿੰਨ ਲੱਖ ਰੁਪਏ ਸ਼੍ਰੋਮਣੀ ਕਮੇਟੀ ਨੇ ਦੇ ਦਿੱਤੀ ਸੀ। ਜਦੋਂ ਫਤਹਿਗੜ੍ਹ ਸਾਹਿਬ ਨਰਸਰੀ ਲਈ ਇੱਕ ਲੱਖ ਪੌਦਾ ਤਿਆਰ ਕਰਨ ਵਾਸਤੇ ਪੰਜ ਲੱਖ ਦੇ ਫੰਡ ਮੰਗੇ ਗਏ ਤਾਂ ਸ਼੍ਰੋਮਣੀ ਕਮੇਟੀ ਨੇ ਸਮੇਂ ਸਿਰ ਫੰਡ ਨਹੀਂ ਦਿੱਤੇ। ਇਸੇ ਚਾਲੂ ਸਾਲ ਦੌਰਾਨ ਆਨੰਦਪੁਰ ਸਾਹਿਬ ਨਰਸਰੀ ਲਈ 10 ਲੱਖ ਰੁਪਏ ਦੀ ਮੰਗ ਰੱਖੀ ਗਈ ਪਰ ਸ਼੍ਰੋਮਣੀ ਕਮੇਟੀ ਨੇ ਸਿਰਫ਼ ਇੱਕ ਲੱਖ ਰੁਪਏ ਜਾਰੀ ਕੀਤੇ ਸਨ। ਅੰਮ੍ਰਿ੍ਰਤਸਰ ਵੱਲੋਂ ਤਿੰਨ ਲੱਖ ਦੀ ਮੰਗ ਕੀਤੀ ਗਈ ਸੀ। ਜ਼ਿਲ੍ਹਾ ਜੰਗਲਾਤ ਅਫਸਰ ਲੁਧਿਆਣਾ ਨੇ ਗੁਰਦੁਆਰਾ ਆਲਮਗੀਰ ਸਾਹਿਬ ਦੇ ਮੈਨੇਜਰ ਤੋਂ ਪੰਜ ਲੱਖ ਬੂਟੇ ਤਿਆਰ ਕਰਨ ਵਾਸਤੇ 25 ਲੱਖ ਦੇ ਫੰਡ ਮੰਗੇ ਸਨ। ਬਠਿੰਡਾ ਦੇ ਜ਼ਿਲ੍ਹਾ ਜੰਗਲਾਤ ਅਫਸਰ ਨੇ ਨੌਂ ਲੱਖ ਰੁਪਏ ਮੰਗੇ ਸਨ। ਮਗਰੋਂ ਸ਼੍ਰੋਮਣੀ ਕਮੇਟੀ ਨੇ ਅੱਧ ਪਚੱਧੇ ਫੰਡ ਜਾਰੀ ਕਰ ਦਿੱਤੇ।
          ਵਣ ਵਿਭਾਗ ਤੇ ਸ਼੍ਰੋਮਣੀ ਕਮੇਟੀ ਵੱਲੋਂ ਜੋ 20 ਜੁਲਾਈ, 2010 ਨੂੰ ਸਾਂਝੀ ਮੀਟਿੰਗ ਕੀਤੀ ਗਈ, ਉਸ ਵਿੱਚ ਫੈਸਲਾ ਕੀਤਾ ਗਿਆ ਕਿ ਸ਼੍ਰੋਮਣੀ ਕਮੇਟੀ 15 ਦਿਨ ਪਹਿਲਾਂ ਅਡਵਾਂਸ ਰਾਸ਼ੀ ਵਣ ਵਿਭਾਗ ਨੂੰ ਦੇਵੇਗੀ। ਜਦੋਂ 18 ਮਈ, 2011 ਨੂੰ ਮੁੜ ਮੀਟਿੰਗ ਹੋਈ ਤਾਂ ਜ਼ਿਲ੍ਹਾ ਜੰਗਲਾਤ ਅਫਸਰਾਂ ਨੇ ਜ਼ੋਰਦਾਰ ਤਰੀਕੇ ਨਾਲ ਮੁੱਦਾ ਉਠਾਇਆ ਕਿ ਸ਼੍ਰੋਮਣੀ ਕਮੇਟੀ ਵੱਲੋਂ ਫੰਡ ਨਹੀਂ ਦਿੱਤੇ ਜਾ ਰਹੇ ਹਨ। ਅੰਮ੍ਰਿਤਸਰ ਨਰਸਰੀ ਵਿੱਚੋਂ ਵਣ ਵਿਭਾਗ ਨੇ ਸਾਲ 2010-11 ਦੌਰਾਨ ਇੱਕ ਲੱਖ ਪੌਦੇ ਨੰਨ੍ਹੀ ਛਾਂ ਪ੍ਰਾਜੈਕਟ ਤਹਿਤ ਸਪਲਾਈ ਕੀਤੇ ਜਦੋਂਕਿ ਅਗਲੇ ਵਰ੍ਹੇ ਹੀ ਇਹ ਸਪਲਾਈ ਘਟ ਕੇ 74266 ਪੌਦਿਆਂ ਦੀ ਰਹਿ ਗਈ। ਲੁਧਿਆਣਾ ਦੇ ਗੁਰਦੁਆਰਾ ਆਲਮਗੀਰ ਦੇ ਮੈਨੇਜਰ ਵੱਲੋਂ ਰਾਸ਼ੀ ਜਾਰੀ ਹੀ ਨਹੀਂ ਕੀਤੀ ਗਈ।
            ਤਖ਼ਤ ਦਮਦਮਾ ਸਾਹਿਬ ਵਿਖੇ ਬਣਾਈ ਨਰਸਰੀ ਵਿੱਚ ਅਗਸਤ 2010 ਤੋਂ ਮਗਰੋਂ ਕੋਈ ਕੰਮ ਨਹੀਂ ਹੋਇਆ ਹੈ ਕਿਉਂਕਿ ਸ਼੍ਰੋਮਣੀ ਕਮੇਟੀ ਨੇ ਫੰਡ ਜਾਰੀ ਨਹੀਂ ਕੀਤੇ ਹਨ। ਨੰਨ੍ਹੀ ਛਾਂ ਪ੍ਰੋਗਰਾਮ ਦੀ ਆਖਰੀ ਮੀਟਿੰਗ ਵਿੱਚ ਵੀ ਫੰਡਾਂ ਦਾ ਰੌਲਾ ਹੀ ਪੈਂਦਾ ਰਿਹਾ। ਸ਼੍ਰੋਮਣੀ ਕਮੇਟੀ ਵੱਲੋਂ ਫੰਡ ਨਾ ਦਿੱਤੇ ਜਾਣ ਕਰਕੇ ਆਖਰ ਵਣ ਵਿਭਾਗ ਨੇ ਨਰਸਰੀਆਂ ਨੂੰ ਤਾਲੇ ਲਾਉਣੇ ਸ਼ੁਰੂ ਕਰ ਦਿੱਤੇ। ਤਖਤ ਦਮਦਮਾ ਸਾਹਿਬ ਦੇ ਪ੍ਰਬੰਧਕਾਂ ਵੱਲੋਂ ਹੁਣ ਜੰਗਲਾਤ ਵਿਭਾਗ ਤੋਂ ਖੁਦ ਪੌਦੇ ਖਰੀਦ ਕੀਤੇ ਜਾਂਦੇ ਹਨ। ਜੰਗਲਾਤ ਵਿਭਾਗ ਨੇ ਤਖਤ 'ਤੇ ਲਾਏ ਵਿਸ਼ੇਸ਼ ਕਾਊਂਟਰ ਤੋਂ ਮੁਲਾਜ਼ਮ ਹਟਾ ਲਏ ਹਨ। ਪਿਛਲੇ ਚਾਰ ਮਹੀਨੇ ਵਿੱਚ ਤਕਰੀਬਨ ਪੰਜ ਹਜ਼ਾਰ ਪੌਦਾ ਇਸ ਕਾਊਂਟਰ ਤੋਂ ਵੰਡਿਆ ਗਿਆ ਹੈ। ਵਣ ਵਿਭਾਗ ਨੇ ਸ਼੍ਰੋਮਣੀ ਕਮੇਟੀ ਨੂੰ ਹੁਣ ਬੂਟੇ ਵਿਸ਼ੇਸ਼ ਨਰਸਰੀਆਂ ਵਿੱਚ ਤਿਆਰ ਕਰਕੇ ਵੇਚਣੇ ਬੰਦ ਕਰ ਦਿੱਤੇ ਹਨ।
                                                        ਸਰਕਾਰੀ ਫੰਡ ਦੇਣ ਦੀ ਮਨਾਹੀ
ਜਦੋਂ ਸ਼੍ਰੋਮਣੀ ਕਮੇਟੀ ਨੇ ਪੌਦੇ ਤਿਆਰ ਕਰਨ ਵਾਸਤੇ ਵਣ ਵਿਭਾਗ ਨੂੰ ਸਰਕਾਰੀ ਫੰਡ ਵਰਤਣ ਲਈ ਆਖਿਆ ਤਾਂ ਪ੍ਰਧਾਨ ਮੁੱਖ ਵਣ ਪਾਲ ਪੰਜਾਬ ਨੇ ਸਪੱਸ਼ਟ ਕੀਤਾ ਕਿ ਨੰਨ੍ਹੀ ਛਾਂ ਪ੍ਰਾਜੈਕਟ ਲਈ ਸਰਕਾਰੀ ਬਜਟ ਵਿੱਚੋਂ ਕੋਈ ਰਾਸ਼ੀ ਖਰਚ ਨਹੀਂ ਕੀਤੀ ਜਾ ਸਕਦੀ। ਇਕਰਾਰਨਾਮੇ ਅਨੁਸਾਰ ਇਸ ਪ੍ਰੋਗਰਾਮ ਤਹਿਤ ਫੰਡ ਆਪਣੇ ਵਸੀਲਿਆਂ ਤੋਂ ਹੀ ਵਰਤੇ ਜਾਣੇ ਹਨ ਜਿਸ ਦਾ ਮਤਲਬ ਹੈ ਕਿ ਸ਼੍ਰੋਮਣੀ ਕਮੇਟੀ ਹੀ ਇਨ੍ਹਾਂ ਫੰਡਾਂ ਦਾ ਪ੍ਰਬੰਧ ਕਰੇਗੀ ਜਦੋਂਕਿ ਇਸ ਵਣ ਵਿਭਾਗ ਵੱਲੋਂ ਇਸ ਦਾ ਅਲੱਗ ਲੇਖਾ ਰੱਖਿਆ ਜਾਵੇਗਾ।

Thursday, November 15, 2012


                              ਇੱਕ ਸ਼ਿਵ ਇਹ ਵੀ
         ਕੋਈ ਝੋਰਾ ਨਹੀਂ ਪੀੜਾਂ ਦੀ ਪੰਡ ਦਾ
                               ਚਰਨਜੀਤ ਭੁੱਲਰ
ਬਠਿੰਡਾ :  ਪੰਦਰਾਂ ਵਰ੍ਹਿਆਂ ਦਾ ਬੱਚਾ ਸ਼ਿਵ ਹੱਥਾਂ ਸਹਾਰੇ ਚੱਲਦਾ ਹੈ ਪਰ ਉਹ ਪਾਇਲਟ ਬਣਨਾ ਚਾਹੁੰਦਾ ਹੈ। ਉਹ ਚਾਰੇ ਪਾਸਿਓਂ ਮਾਰਾਂ ਹੀ ਮਾਰਾਂ ਝੱਲ ਰਿਹਾ ਹੈ ਪਰ ਜਜ਼ਬੇ ਵਿੱਚ ਕੋਈ ਕਮੀ ਨਹੀਂ। ਉਸ 'ਚ ਆਤਮ-ਵਿਸ਼ਵਾਸ ਏਨਾ ਪੱਕਾ ਕਿ ਉਹ ਤੀਰ ਨਿਸ਼ਾਨੇ 'ਤੇ ਲਾਉਣਾ ਚਾਹੁੰਦਾ ਹੈ। ਉਹ ਤਿੰਨ ਮਹੀਨੇ ਦਾ ਸੀ ਜਦੋਂ ਡਾਕਟਰੀ ਗਲਤੀ ਨਾਲ ਦੋਹਾਂ ਲੱਤਾਂ ਦੀ ਸ਼ਕਤੀ ਗੁਆ ਬੈਠਾ। ਉਹ ਜਦੋਂ ਪਾਇਲਟ ਬਣਨ ਦਾ ਸੁਪਨਾ ਦੱਸਦਾ ਹੈ ਤਾਂ ਲੋਕ ਹੱਸਦੇ ਹਨ। ਕਈਆਂ ਨੇ ਤਾਂ ਇਹ ਕਹਿ ਕੇ ਦਿਲ ਹੀ ਤੋੜ ਦਿੱਤਾ ਕਿ ਅੰਗਹੀਣ ਕਦੇ ਪਾਇਲਟ ਨਹੀਂ ਬਣ ਸਕਦੇ। ਉਹ ਹੁਣ ਹੱਸਣ ਵਾਲਿਆਂ ਦੇ ਹੌਸਲੇ ਤੋੜਨਾ ਚਾਹੁੰਦਾ ਹੈ। ਉਹ ਟੀ ਵੀ ਵੇਖਦਾ ਹੈ ਤੇ ਡਿਸਕਵਰੀ ਚੈਨਲ ਉਸ ਨੂੰੰ ਹਿੰਮਤ ਦਿੰਦਾ ਹੈ।
           ਬਠਿੰਡਾ ਸ਼ਹਿਰ ਦੇ ਮਧੋਕਪੁਰਾ ਇਲਾਕੇ ਵਿੱਚ ਬੱਚਾ ਸ਼ਿਵ ਸ਼ੰਕਰ ਆਪਣੀ ਮਾਂ ਨਾਲ ਰਹਿ ਰਿਹਾ ਹੈ। ਉਸ ਦਾ ਬਾਪ ਹਰੀਕ੍ਰਿਸ਼ਨ ਇਸ ਦੁਨੀਆਂ ਵਿੱਚ ਨਹੀਂ ਰਿਹਾ। ਉਸ ਦੇ ਦਿਲ ਵਿੱਚ ਛੇਕ ਸੀ ਅਤੇ ਉਹ ਰੇਹੜੀ ਲਾਉਂਦਾ ਸੀ। ਉਸ ਦਾ ਵੱਡਾ ਭਰਾ ਜਦੋਂ 22 ਵਰ੍ਹਿਆਂ ਦਾ ਸੀ,ਉਹ ਦਿਲ ਦਾ ਦੌਰਾ ਪੈਣ ਕਰਕੇ ਰੱਬ ਨੂੰ ਪਿਆਰਾ ਹੋ ਗਿਆ। ਹੁਣ ਗੁਜ਼ਾਰੇ ਦਾ ਕੋਈ ਸਾਧਨ ਨਹੀਂ। ਫਿਰ ਵੀ ਇਸ ਬੱਚੇ ਦੇ ਚਿਹਰੇ 'ਤੇ ਭਰੋਸਾ ਦਿੱਖ ਰਿਹਾ ਹੈ। ਇਹ ਬੱਚਾ ਸਥਾਨਕ ਐਸ ਐਸ ਡੀ ਸਕੂਲ ਵਿੱਚ ਪੜ੍ਹ ਰਿਹਾ ਹੈ। ਉਹ ਦੱਸਦਾ ਹੈ ਕਿ ਸਥਾਨਕ ਕਿਲਾ ਮੁਬਾਰਕ ਗੁਰੂ ਘਰ ਦੇ ਸੇਵਾਦਾਰ ਉਸ ਦੀ ਮਾਲੀ ਮਦਦ ਕਰ ਦਿੰਦੇ ਹਨ। ਉਨ੍ਹਾਂ ਦਾ ਮਦਦਗਾਰ ਇੱਕ ਵਕੀਲ ਵੀ ਹੈ। ਦੀਵਾਲ਼ੀ ਦੇ ਤਿਉਹਾਰ ਮੌਕੇ ਉਸ ਨੇ ਖੁਦ ਮੋਮਬੱਤੀਆਂ ਵੇਚੀਆਂ ਅਤੇ ਬੱਚਤ ਆਪਣੀ ਮਾਂ ਦੇ ਹਵਾਲੇ ਕਰ ਦਿੱਤੀ। ਹਸਮੁਖ ਚਿਹਰੇ ਵਾਲਾ ਸ਼ਿਵ ਦੱਸਦਾ ਹੈ ਕਿ ਡਿਸਕਵਰੀ ਚੈਨਲ 'ਤੇ ਉਸ ਨੇ ਨਵੀਂ ਤਕਨੀਕ ਵੇਖ ਲਈ ਹੈ ਕਿ ਅੰਗਹੀਣਤਾ ਪਾਇਲਟ ਬਣਨ ਦੇ ਰਾਹ ਵਿੱਚ ਅੜਿੱਕਾ ਨਹੀਂ ਬਣਦੀ। ਉਹ ਹੌਸਲੇ ਨਾਲ ਆਖਦਾ ਹੈ ਕਿ ਜਦੋਂ ਤੱਕ ਉਹ ਪੜ੍ਹ-ਲਿਖ ਕੇ ਵੱਡਾ ਹੋ ਜਾਵੇਗਾ, ਉਦੋਂ ਤੱਕ ਤਾਂ ਇਹ ਤਕਨੀਕ ਸਾਡੇ ਮੁਲਕ ਵਿੱਚ ਵੀ ਆ ਜਾਵੇਗੀ। ਘਰ ਦੀ ਤੰਗੀ ਤੁਰਸ਼ੀ ਕਿਤੇ ਅੰਬਰੀ ਉਡਾਰੀ ਲਾਉਣ ਦੇ ਸੁਪਨੇ ਨੂੰ ਮਧੋਲ ਹੀ ਨਾ ਦੇਵੇ ਤਾਂ ਉਹ ਆਖਦਾ ਹੈ, 'ਦੇਖਦੇ ਹਾਂ ਕੌਣ ਰੋਕਦਾ ਮੈਨੂੰ। ਕੀ ਹੋਇਆ ਲੱਤਾਂ ਤੋਂ ਮੁਥਾਜ ਹਾਂ,ਦੋ ਹੱਥ ਤੇ ਹੌਸਲਾ ਤਾਂ ਹੈ ਮੇਰੇ ਕੋਲ।' ਇਹ ਬੱਚਾ ਬੈਠ ਕੇ ਗਤਕਾ ਵੀ ਖੇਡਦਾ ਹੈ।
          ਅੱਠਵੀਂ ਕਲਾਸ ਵਿੱਚ ਪੜ੍ਹਦਾ ਸ਼ਿਵ ਦੱਸਦਾ ਹੈ ਕਿ ਉਸ ਨੂੰ ਜ਼ਿੰਦਗੀ 'ਤੇ ਕੋਈ ਸ਼ਿਕਵਾ ਨਹੀਂ। ਕਦੇ ਮਨ ਵਿੱਚ ਉਦਾਸੀ ਆ ਵੀ ਜਾਵੇ,ਕਿਸੇ ਨਾ ਕਿਸੇ ਦੋਸਤ ਕੋਲ ਚਲਾ ਜਾਂਦਾ ਹਾਂ। ਇਸੇ ਤਰ੍ਹਾਂ ਰੈੱਡ ਕਰਾਸ ਬਠਿੰਡਾ ਵੱਲੋਂ ਚਲਾਏ ਜਾ ਰਹੇ ਗੂੰਗੇ ਬੋਲੇ ਬੱਚਿਆਂ ਦੇ ਸਕੂਲ ਵਿੱਚ ਪੜ੍ਹਦੇ ਦੋ ਭੈਣ-ਭਰਾ ਭਾਵੇਂ ਖੁਦ ਬੋਲ ਸੁਣ ਨਹੀਂ ਸਕਦੇ ਪਰ ਉਨ੍ਹਾਂ ਦੇ ਸੁਪਨੇ ਬੋਲਦੇ ਹਨ। ਛੇਵੀਂ ਕਲਾਸ ਵਿੱਚ ਪੜ੍ਹਦੀ ਮਹਿਕ ਅਤੇ ਉਸ ਦਾ ਚੌਥੀ ਕਲਾਸ ਵਿੱਚ ਪੜ੍ਹਦਾ ਭਰਾ ਸ਼ੁਭਮ ਨਾ ਬੋਲ ਸਕਦਾ ਹੈ ਅਤੇ ਨਾ ਸੁਣ ਸਕਦਾ ਹੈ। ਇਨ੍ਹਾਂ ਦੀ ਮਾਂ ਅਤੇ ਬਾਪ ਵੀ ਬੋਲਣ ਅਤੇ ਸੁਣਨ ਤੋਂ ਅਸਮਰੱਥ ਹਨ। ਇੱਥੋਂ ਤੱਕ ਕਿ ਉਨ੍ਹਾਂ ਦੇ ਮਾਮਾ-ਮਾਮੀ ਵੀ ਨਾ ਬੋਲ ਸਕਦੇ ਹਨ ਅਤੇ ਨਾ ਸੁਣ ਸਕਦੇ ਹਨ।
          ਸਕੂਲ ਦੀ ਪ੍ਰਿੰਸੀਪਲ ਮਨਿੰਦਰ ਕੌਰ ਭੱਲਾ ਦੱਸਦੀ ਹੈ ਕਿ ਇਨ੍ਹਾਂ ਬੱਚਿਆਂ ਦੇ ਇਰਾਦੇ ਬੋਲਦੇ ਹਨ। ਪ੍ਰਿੰਸੀਪਲ ਦੱਸਦੀ ਹੈ ਕਿ ਦੋਵੇਂ ਭੈਣ-ਭਰਾ ਇਕੱਲੀ ਪੜ੍ਹਾਈ ਵਿੱਚ ਨਹੀਂ ਬਲਕਿ ਬਾਕੀ ਸਰਗਰਮੀਆਂ ਵਿੱਚ ਕਿਸੇ ਨਾਲੋਂ ਘੱਟ ਨਹੀਂ ਹਨ। ਇਨ੍ਹਾਂ ਬੱਚਿਆਂ ਦਾ ਬਾਪ ਸਿਲਾਈ-ਕਢਾਈ ਦਾ ਕੰਮ ਕੋਟਕਪੂਰਾ ਕਰਦਾ ਹੈ। ਇਵੇਂ ਹੀ ਪਿੰਡ ਰੱਲਾ ਦੀਆਂ ਦੋ ਭੈਣਾਂ ਵੀ ਬੋਲਣ ਸੁਣਨ ਦੀ ਸਮਰੱਥਾ ਨਾ ਹੋਣ ਕਰਕੇ ਕਦੇ ਆਪਣੇ ਜਜ਼ਬਾਤ ਵੀ ਸਾਂਝੇ ਨਹੀਂ ਕਰ ਸਕੀਆਂ। ਬਲਜੀਤ ਕੌਰ ਨੌਵੀਂ ਕਲਾਸ ਵਿੱਚ ਪੜ੍ਹਦੀ ਹੈ ਜਦੋਂ ਕਿ ਉਸ ਦੀ ਵੱਡੀ ਭੈਣ ਹੁਣ ਵਿਆਹੀ ਜਾ ਚੁੱਕੀ ਹੈ। ਬਾਪ ਦਾ ਸਿਰ 'ਤੇ ਸਾਇਆ ਨਹੀਂ ਰਿਹਾ। ਬਲਜੀਤ ਕੌਰ ਡਿਜ਼ਾਈਨਰ ਬਣਨਾ ਚਾਹੁੰਦੀ ਹੈ। ਉਹ ਸਕੂਲ ਦੀ ਹੁਸ਼ਿਆਰ ਬੱਚੀ ਹੈ। ਸਟਾਫ ਦੱਸਦਾ ਹੈ ਕਿ ਉਸ ਦਾ ਜਜ਼ਬਾ ਕਦੇ ਡੋਲਿਆ ਨਹੀਂ ਹੈ।
          ਪਿੰਡ ਘੰਡਾਬੰਨਾ ਦੇ ਸਰਕਾਰੀ ਐਲੀਮੈਂਟਰੀ ਸਕੂਲ ਵਿੱਚ ਤੀਸਰੀ ਕਲਾਸ ਵਿੱਚ ਪੜ੍ਹਦੇ ਬੱਚੇ ਸਨਮੀਤ ਦੇ ਹੌਸਲੇ ਨੂੰ ਵੀਲ੍ਹ ਚੇਅਰ ਨਹੀਂ ਤੋੜ ਸਕੀ। ਮਾਪੇ ਦੱਸਦੇ ਹਨ ਕਿ ਡਾਕਟਰੀ ਗਲਤੀ ਨੇ ਉਸ ਨੂੰ ਤੁਰਨ-ਫਿਰਨ ਤੋਂ ਮੁਥਾਜ ਕਰ ਦਿੱਤਾ ਹੈ। ਸਨਮੀਤ ਨੇ ਇੰਜਨੀਅਰ ਬਣਨ ਦਾ ਸੁਪਨਾ ਦੇਖਿਆ ਹੈ। ਮੱਧ ਵਰਗੀ ਪਰਿਵਾਰ ਦੇ ਸਨਮੀਤ ਨੂੰ ਹੁਣ ਮਾਪੇ ਵੀਲ੍ਹ ਚੇਅਰ 'ਤੇ ਸਕੂਲ ਛੱਡ ਕੇ ਜਾਂਦੇ ਹਨ। ਉਹ ਮਾਪਿਆਂ ਦਾ ਇਕਲੌਤਾ ਬੱਚਾ ਹੈ। ਸਕੂਲ ਅਧਿਆਪਕ ਜਗਸੀਰ ਸਹੋਤਾ ਨੇ ਦੱਸਿਆ ਕਿ ਸਨਮੀਤ ਦਾ ਹਿਸਾਬ ਵਿੱਚ ਕੋਈ ਸਾਨੀ ਨਹੀਂ। ਉਸ ਦੇ ਇਰਾਦੇ ਵੀ ਬੁਲੰਦ ਹੀ ਹਨ। ਮਾਪਿਆਂ ਦਾ ਕੰਮ ਵਿੱਚ ਹੱਥ ਹੀ ਨਹੀਂ ਵਡਾਉਂਦਾ ਬਲਕਿ ਉਹ ਪਹਾੜ ਨਾਲ ਮੱਥਾ ਲਾਉਣ ਦਾ ਵੀ ਸਿਰੜ ਰੱਖਦਾ ਹੈ। ਸੱਚਮੁੱਚ ਕੁਦਰਤੀ ਤੇ ਸਮਾਜੀ ਤਕਲੀਫ਼ਾਂ ਇਨ੍ਹਾਂ ਬੱਚਿਆਂ ਦੇ ਹੌਸਲਿਆਂ ਦਾ ਵਾਲ ਵਿੰਗਾ ਨਹੀਂ ਕਰ ਸਕੀਆਂ ਹਨ। ਹਾਲਾਂਕਿ ਇਨ੍ਹਾਂ ਬੱਚਿਆਂ ਦੀ ਉਮਰ ਛੋਟੀ ਹੈ ਅਤੇ ਅਲਾਮਤਾਂ ਵੱਡੀਆਂ ਹਨ ਪਰ ਫਿਰ ਵੀ ਉਨ੍ਹਾਂ ਕੋਲ ਜ਼ਿੰਦਾ ਦਿਲੀ ਹੈ ਜਿਸ ਦੇ ਸਹਾਰੇ ਉਹ ਆਕਾਸ਼ ਵਿੱਚ ਉੱਡਣ ਦੇ ਸੁਪਨੇ ਵੇਖ ਰਹੇ ਹਨ। ਅੱਜ ਬਾਲ ਦਿਵਸ ਮੌਕੇ ਏਦਾਂ ਦਾ ਜਜ਼ਬਾ ਰੱਖਣ ਵਾਲੇ ਬੱਚਿਆਂ ਨੂੰ ਕੌਣ ਨਹੀਂ ਸਲਾਮ ਕਰਨਾ ਚਾਹੇਗਾ।